లూకా 23
23
పిలాతున హఃమె యేసు
(మత్త 27:2,11-14; మార్కు 15:1-5)
1యత్రమా సభామ ఛాతే హాఃరు ఉట్టీన్‍ ఇనా పిలాతు కన లీన్‍ గయా. 2ఆ అప్నా అద్మీయేనా తప్పు వాట్‍ ధరాంగ్రస్‍, అజు రోమా రాజోనూ పన్నుబి భాందోనకోకరీ మేస్‍ క్రీస్తు రాజో కరి బోలుకరతో హమే హఃమ్జ్యా, కరి ఇనఫర్‍ ఇన్‍జామ్‍ నాఖానిక్ల్యా.
3పిలాతు తూ “యూదుల్‍నూ రాజోనా?” కరి ఇనా పుఛ్చావమా యేసు హో “తూ బోలతిమ్మస్‍” కరి ఇనేతి బోల్యొ.
4యేసు ఇమ్‍ బోలమా పిలాతు ప్రధాన యాజకుల్‍తీ, అద్మీయేతి మన ఆ అద్మి కనా షీక్చనాటెకే ఖాయిబి తప్పు దేఖౌంగ్రకోయిని కరి బోల్యొ.
5తేదెబి యూవ్నే ఆ గలీలయతూ ధరీన్ ఆజ్గా తోడీ ఇనా బోధనల్‍తి యూదయమా ఖారమా బోధిస్తోహుయిన్‍, జనాల్‍నా వూషీ కరౌతో ర్హయో అజు ఘణు ఛిక్రాణ్‍ మ్హేంతా హూయిన్‍ బోల్తార్హయ్యా.
హేరోద్‍నా హఃమే యేసు
6పిలాతు ఆ వాతే ఖంజీన్‍ ఆ అద్మి గలీలయమనూ అద్మినా? కరి పుచ్చాన్‍, 7యో హేరోద్‍ ఏలుకరతే దేహ్‍ఃనో కరి హూస్యేతో హేరోద్‍ కనా బులైలిజవో కరి బోల్యొ, తేదె హేరోద్‍ యో ధన్‍మా యెరూషలేమ్‍మస్‍ థో. 8హేరోద్‍ యేసునా దేఖీన్‍ జర ఖూషీ హూయిన్‍, ఇనా గురీంచీన్‍ గ్హణు వాతే ఖంజో ఇనటేకె యో ఏఖాదు సూచననూ కామ్‍ కర్యుతో దేఖ్నూ కరి ఆఖ్‍ః కర్యొ, ఘాణ ధన్‍తూ ఇనా దేఖ్నూ కరి రైగో.
9హేరోద్‍ యేసునా దేఖీన్‍ కేత్రుకి ప్రష్నల్‍ పుచ్చాయోతోబి యో ఏక్‍ వాత్నాబీ జవాబ్‍ దిదోకోయిని. 10ప్రధాన యాజకుల్‍, షాస్ర్తుల్‍ హీబ్రీన్‍ ఇనా ఫర్‍ కేత్రేకీ నిందల్‍ నాఖ్‍తా ర్హయ్యా. 11హేరోద్‍ ఇనా సైనికుల్‍తీ మళిన్‍, ఇనా ఇజ్జాత్‍ గేలి కాఢీన్‍, లుంగఢా పేరైన్‍ అజు పిలాతు కనా బోలిమొక్‍ల్యా. 12అనా అగడీ హేరొద్‍బి పిలాతు ఏక్‍నా ఏక్‍ వైరేవ్‍నితర థా. యో ధన్‍మా బే జణా దోస్తీ హూయిగయా. బరబ్బా చుట్టను యేసున మరణ్‍ షిక్చా
యేసునా మరణ్‍ షిక్చా నక్కాయు
(మత్త 27:15-26; మార్కు 15:6-15; యోహా 18:39,40)
13తేదె పిలాతు ప్రధానుల్‍నా, అధికరుల్‍నా అద్మీయేనా ఖారవ్నా బులైమంగైన్‍.
14పిలాతు అద్మీయేనా ఫాచు పరీన్‍ బోలా, కరుకరస్‍ కరి తూమే ఆ అద్మీనఫర్‍ మార ఖామే లాయ పణికీ మన ఆ అద్మినా ఏన్‍ కరీన్‍ దేఖామా ఏక్‍ గల్తీబి కోదేఖైయుని.
15హేరొద్‍నాబి ఖాయిబి కోదేఖైని, ఇనటేకె అనా అజు ఫాచు మార కనా బోలిమెక్‍ల్యు. ఆ మర ఏత్రే ఖైబి గల్తీ కర్యొకోయిని. 16ఇనటెకె మే అనా ఖాళి కోల్డతీ షిక్చ నాఖిన్‍ మ్హేందిస్‍ కరి బోలమా, 17పండగను వక్హత్‍ సమయంమా పిలాతు అద్మినటెకె ఏక్‍ చ ఖైదీన బెందావను ఆనవాతి థూ.
18యూవ్నే హాఃరు యేసునా మర్రాకీన్‍, ఖైది బరబ్బనా ఛోడీ మ్హేందో కరి ఖారు ఏక్కస్‍ ఖైకార్‍తీ ఛిక్రనిక్లియు.
19యో హఃయార్మా కర్యోతే గలాఠాన ఖాజే, నర్‍హత్యనా ఖాజే ఇనా ఠాణమా ఘలాయ్‍గయోతే యోబరబ్బా.
20పిలాతు అద్మియేతీ బోల్యొ, యేసునస్‍ మ్హేందేనూ కరి పాఛు బోల్యుతోబి.
21యూవ్నే హాఃరు అనా “సిలువస్‍ నాఖో సిలువ నాఖో” కరి ఛిక్రాణ్‍ మ్హేంధా.
22తీన్‍మనూ వోహోఃత్‍బి ఇమ్మస్‍ ఆ ష్యాను గల్తీ కర్యొ? మరణ్‍ అనాకనా ఖైబి గల్తీ కో దేఖౌంగ్రని ఇనటేకె అనా సిక్చించిన్‍ మ్హేందుంగ్రుస్‍ కరి యూవ్నేతి బోల్యొ.
23పన్కి, కేత్రు బోల్యుతోబి యూవ్నే నాఖంజ్నుతిమ్‍ అనా సిలువ నాఖో కరి అడాతీబీ బుజు జాఖాత్‍ కైఖార్‍ మ్హేంధామా ఇవ్నేస్‍ జిత్యూ. 24తేదె పిలాతు యూవ్నే బోల్యాతిమ్మస్‍ హూవధే కరి తీర్పు దీధో. 25బరబ్బ కర్యొతే గలాఠానా, మర్రాకినాకను నేరంనాఖాజే ఘలైరోతే ఇనా యో బోలాతిమ్‍ ఛుట్టీ కరీన్‍, యేసునా కీమ్‍బి కర్‍లేవోకరీ యూవ్నాటెకె ధరైనగ్‍దిదో.
యేసున సిలువన నాఖను
(మత్త 27:33-38; మార్కు 15:22-28; మత్త 19:17-19)
26యూవ్నె క్హార యేసునా లీన్‍ జౌంగ్రతో గమ్మాతూ ఆయోతే కురేనీయుడ్ను హుయోతె సీమోన్‍ కరి ఏక్నానా ధర్లీన్‍ యేసునాకేడె సిలువ ఢోవ్వానాటేకె ఇనా బులైలీన్‍ జైన్‍ ఇనా హాతే ఢోవ్వాయూ.
27మోటు అద్మీయేనూ ఫాంభళే ఇన్మా త్హోడుబాయిక దేఖీన్‍ ఛాతీకుట్‍లేతూ దుఃఖ పడ్తహూయిన్‍, కేత్రుకీ జణీ బాయికాబి యేసునాకేడె జాతుర్హయూ. 28తేదె యేసు యూవ్నామణి ఫరీదేఖిన్‍, ఓయెరూషలేమ్‍ని ఛోరీయే మరటేకె, నకో రోవొ; తూమార టేకె తూమార లఢ్‍కాన టేకె రోవొ. 29వాంజీణీయేబి, జణీ కోయిన్తె పేట్‍, దూత్‍ పీఢాయి కోయిన్తె తూమ్నా కేత్రుకీ అచ్చు హూయు కరి బోలానూ ధన్‍ ఆంగ్రస్‍. 30తేదె యూవ్నే పహాడ్తి హమార ఫర్‍ పడ్‍కరీ బోల్‍స్యే. బుజు ఫాహాడ్‍నా హమారఫర్‍ పఢీన్‍ ఢాపీనాక్‍ కరి బోల్‍స్యే. 31యూవ్నే ఖఛ్చు జాఢనస్‍ ఆమ్‍ కర్యుతో, కుఖ్కు జాఢనా అజు ష్యాత్‍ కరస్‍కీ? కరి బోల్యొ.
32యేసునా కేడె అజు బేజణాన నేరస్తులున సిలువ మారనటేకె లీన్‍ గయ్యా. 33యూవ్నే యేసునా కపాలం కరి బోలాతే (కలవర) జోగొమా ఆయ తేదె ఏజ్గా యేసునా ఖావత్‍ మణి ఏక్‍ జణనా, ఢవాత్‍ మణి ఏక్‍ జణనా కరి సిలువ మార్యు. 34యేసు ఆమ్‍ బోల్యొ, “భా ఆవ్నే ష్యాత్‍ కరుకరస్‍కీ అవ్నాస్‍ మాలంకోయిని అవ్నా క్చమించ్‍” కరి బోల్యొ. యూవ్నే చీట్లునాఖిన్‍ యేసును లుంగ్డాన ఫాడీన్‍ భాగ్‍ పళ్లిధా. 35అద్మీయే హాఃరు హిబ్రిన్‍ దేక్తూర్హయూ, తేదె అదికారుల్ ఆ “ఫార్లేవ్‍నా హూయితో భచయో! ఇనా హాఃఛీస్‍బి దేవ్‍ బోలిమోక్‍ల్యొతే దేవినిచే ఎన్ని రాక్యోతె క్రీస్తు హూస్యేతో ఇనూ యోస్‍ భచీజాసే” కరి బోల్లీదు.
36సైనికుల్‍బి కందే ఆయిన్‍ సైనికుడ్‍బి ఘేఖికాఢీన్‍ ఇనా ఖడు రహ్‍ఃనా దీదూ. 37మరియు తూ “యూదుల్‍నో రాజో హూస్యేతొ” తారు తూస్‍ నా భఛీజాకరీ గేళిసైనికుడ్‍బి కాఢ్యా.
38“ఆస్‍ యూదుల్‍నో రాజో” కరి నీక్కీన్‍ సిలువనా ఉఫర్‍ అట్‍క్వాయు.
39ఇనాకేడె సిలువ ఛఢీర్యూతే నేరస్తుడ్‍మా యూవ్నామా ఏక్‍ జణొ ఇనా గాళే దేతోహూయిన్‍ తూ క్రీస్తు కహేనా? తారు తూస్‍ భఛీన్‍ హమ్‍నాబి భచవ్‍ని కరి బోల్య.
40తేదె బేమ్మనో ఇనా గుర్‍ఖైన్‍ తూ దేవ్నా ఢరకోయిన్నా! తూబి యోస్‍ షిక్చమా ఛాకున్నా! 41అప్నా షిక్చించనూ న్యాయమస్‍. ష్యానకతో అప్నే కర్యతే పాపల్నా టేకె షిక్చ పడుకరస్‍ పణికీ యేసునే క్హయూ తప్పు కర్యొకోయిని కరి బోలీన్‍, 42యో యేసుతీ, ప్రభు! తారు రాజ్యంమా ఆవనూ వోహోఃత్‍ మనాబి ఖాయాల్‍ కర్లీజోకరీ బోలామా.
43యేసు ఇనేతి బోల్యొ, “ఆజ్‍ తూబి మార కేడె పరదేసిమా ర్హైస్ హాఃఛీతి బోలుకరుస్‍” కరి బోల్యొ.
యేసుని మరణం
44తేదె భరోబ్బర్‍ ధోపర్‍ హుయు, తేదె భార భజేథూ ధరీన్ తీన్‍ గంటాతోఢీ యో దేహ్‍ః అక్కు అంధారు హూయిగు.
45సూర్యుడ్‍బి దేఖైయో కోయిని; మందిరంనూ భీతే బే భాగ్‍ హూయి ఛీరైగయూ. 46తేదె యేసు ఏక్‍ మోటు ఆవాజ్‍తి “భా మారు ఆత్మనా తార హాత్మా మ్హేంధుకరుస్‍” కరి బోలీన్‍ జాన్‍ మ్హేందో.
47షతాధిపతి జర్‍గ్యూతే క్హారు దేఖీన్‍, దేవ్నా స్తుతించిన్ ఆ అద్మి క్హాఛ్చీస్‍బి నీతితీ ఛాకరీ బోల్యొ.
48యేసునాకేడె ఆయుతే క్హారుజణు ఇనా దేఖీన్‍ ఛాతీకూట్టీన్‍ రోవ్తూహూయిన్‍ ఛలీగూ.
49యేసునా మాలంహూయు అద్మీయే, గలీలయమతూ ఆయుతే థోడీ బాయికాబి యో ఖారు దేక్తూహుయిన్‍దూర్‍ హిబ్ర్యుథూ.
యేసుని సమాధి
(మత్త 27:57-61; మార్కు 15:42,47)
50అరిమతయియ కరి యూద ఖాయార్‍మనూ ఏక్‍ సభ్యుడ్‍ యోసేపు కరి ఏక్‍ జణో థో. 51యో నీతినో అషల్ అద్మి, యో దేవ్నూ రాజ్యంనా టేకె ఎదుర్‍ దేక్తోర్హయో. యేసునా మరణ్‍నూ షిక్చ నాఖానూ వాత్మా ఓప్యోకోయినితే అద్మి. 52యోసేపు, పిలాతుకనా జైన్‍ యేసునూ ముర్దానా హమ్‍నా ధా కరి మాంగీలీదొ. 53యో ముర్దాన హేట్‍ వుత్రాయిన్‍, నారను లుంగఢామా లఫ్‍టిన్‍ ఇనాబాద్‍మా పళ్ళీజైన్‍ హాంకేతోడీబి కీనా గ్హల్యుస్‍ కోయిన్తే ఖాళి సమాదినూ ఖాఢమా గ్హాలీన్‍ యో సమాధినూ గవ్హీనా ఏక్‍ మోటో గండ్‍ భండోనా ధర్‍వాజునితర మూఛ్యు. 54యో ధన్‍ ఆరామ్నూ ధన్‍ అవానాటేకె సిద్దంథూ.
55తేదె గలిలయథూ యేసునకేడె ఆయుతే బాయికా యోసేపునాకేడె జైన్‍ యేసునూ సమాధిన దేఖ్యు. 56ఇనబాద్‍మా పాచుఫరీన్‍ జైన్‍ అత్తర్బి వాక్హ్ నూ రాచా లీధూ. పణికీ యూవ్నే మోషే ధర్మషాస్త్రం ఛాతెతీమ్‍ ఆరామ్నూ ధన్నే కాయిబి కామ్‍ నాకర్నూకరీ యూవ్నే షోపొథా.
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024
