Chenesis 14
14
1Atuk o̱ yakohmi tok, Shina i̱ mi̱ko Amlafel, Ellasa i̱ mi̱ko Aliok, Elam i̱ mi̱ko Chetolaoma, micha oklushi puta i̱ mi̱ko Tital aiena kʋt aiasha nitak ma;
2Ilʋppa puta kʋt Sotom i̱ mi̱ko Bela, micha Komollah i̱ mi̱ko Besha, Atmah i̱ mi̱ko Shinab, micha Seboim i̱ mi̱ko Shemebe, micha Bela yʋmmʋt Soa ya̱ i̱ mi̱ko aiena ka̱ in tanampi tok.
3Ilʋppa moma kak osh okfa Sittim, yʋmmʋt hʋpi okhʋta ha̱ ai itahobʋt aiasha tok.
4Afʋmmi auah tuklo ho̱ Chetolaoma ya̱ i̱ nutaka tok; atuk osh afʋmmi ont isht auah tuchina ho̱ i̱ filʋmmit i̱ sanali tok.
5Atuk o̱ afʋmmi ont isht auah ushta ma, Chetolaoma yʋt, micha mi̱ko ʋhleha yʋmma apeha kash aiena kʋt ʋla cha, Lefaim okla Ashtelolh Kanaim aiasha, micha Susim okla Ham aiasha, micha Emim okla Shafeh Kiliahlaim aiasha tuk aiena ka̱ issot kanchi mʋt,
6Micha Holim okla i̱ nʋnih Sei aiasha tuk aiena ka̱ ai issot kanchit El‐palan yʋmmʋt yakni chukushmi bili̱ka talaia ka̱ ont ʋhlichi tok.
7Mihmʋt falamʋt En‐mishpat, yʋmmʋt Katesh a̱ ai ʋla cha, Amalek okla i̱ yakni moma ka̱, micha Amolait ʋhleha yʋmmʋt Haseson‐tama a̱sha tuk a̱ issot kanchi tok.
8Mihma Sotom i̱ mi̱ko, micha Komollah i̱ mi̱ko, micha Atmah i̱ mi̱ko, micha Seboim i̱ mi̱ko, micha Bela yʋmmʋt Soa ya̱ i̱ mi̱ko aiena kʋt kohchʋt ilhkoli mʋt Sittim okfa ha̱ ont ai itafamʋt,
9Elam i̱ mi̱ko Chetolaoma, micha oklushi puta i̱ mi̱ko Tital, micha Shina i̱ mi̱ko Amlafel, micha Ellasa i̱ mi̱ko Aliok aiena kash itiba chi̱ kʋt il atahli tok: mi̱ko ushta hosh tahlapi ho̱ itafama tok.
10Mihma Sittim okfa hʋt bitumen aiasha yakni mitahli yosh alotowa tok: atuk o̱ Sotom i̱ mi̱ko, micha Komollah i̱ mi̱ko ʋt tihlaya tuk osh yʋmmak o̱ ai akakoha tok: mihma hlako̱ffi tuk ʋt yihlepʋt nʋnih chaha ya̱ ona tok.
11Mihma Sotom, micha Komollah i̱ na chukushpa, micha im ilhpak moma ka̱ ishi cha ilhkoli tok.
12Micha Eblam itibapishi ushi Sotom ʋtta hatuk Lot, micha im ʋlhpoyak aiena ka̱ ishi cha ilhkoli tok.
13Atuk o̱ hlako̱ffi tuk achʋfa kʋt Heblu hatak Eblam a̱ ont im anoli tok: Eshkol itibapishi, micha Ane itibapishi, Amolait hatak Mamli i̱ baiyi hieli ka̱ bili̱ka ya̱ ʋtta yatuk oka: micha yʋmmʋt Eblam a̱ anumpa itibai achʋfʋt itapela hatok.
14Mihma Eblam ʋt itibapishi ha̱ yukachit ishi tuk o̱ haklo mʋt, ilap in chuka akinli ho̱ ai ʋttʋt, nan im ʋlbʋchit hofantit aiasha ya̱ tahlepa tuchina cha auah untuchina ho̱ nahalupa im atahlit pehlichi cha, hliolit Tan a̱ ona tok.
15Mihma ilap, micha in tishu ʋhleha aiena kʋt itakʋshkoa cha, ninak o̱ issot kanchi mʋt, hliolit isht a̱yʋt Tamaskʋs im ʋlhfʋbekimma talaia Hobah ya̱ ona tok.
16Micha ʋlhpoyak moma ka̱ falʋmmichit isht ʋla mʋt, anonti itibapishi Lot ash kia, micha im ʋlhpoyak aiena, mikmʋt ohoyo puta, micha okla hash aiena ka̱ falʋmmichit isht ʋla tok.
17Mihma (Eblam ʋt Chetolaoma micha apehʋt a̱ya tok, mi̱ko ʋhleha ha̱ ʋbi cha, falamʋt a̱ya ha ma) Sotom i̱ mi̱ko ʋt Shafeh yʋmmʋt mi̱ko im okfa ha̱ aiafama chi̱ hosh kohchʋt ia tok.
18Mihma Salem i̱ mi̱ko Melkisetek ʋt pʋska, micha oka pa̱ki aieninchit i̱ kohchechi tok; micha yʋmmʋt ʋba chaha moma i̱ shahli Chitokaka ya̱ naholitompa isht im ʋtta yatok.
19Micha anumpa yukpali Eblam a̱ onochit, Ʋba chaha moma i̱ shahli, ʋba, micha yakni aiena ikbi Chitokaka ya̱ Eblam ʋt i̱ holitopashke.
20Mikma ʋba chaha moma i̱ shahli Chitokaka, yʋmmak osh chin tʋnʋp ʋhleha ha̱ chibbak fohki tuk ʋt holitopashke, achi tok. Mihma moma ka̱ ishit pokoli aiyukali ho̱ ai ishit Melkisetek ash ima tok.
21Mihma Sotom i̱ mi̱ko ʋt Eblam a̱, Hatak ʋhleha hano ʋno ak o̱ is sama cha, nachukushpa ya̱ chishno akinli hosh ish ishashke, im achi tok.
22Mihma Eblam ʋt Sotom i̱ mi̱ko ya̱, Chihowah ʋba chaha moma i̱ shahli Chitokaka, ʋba, micha yakni aiena ka̱ ikbi ya̱ sʋbbak a̱ ʋba pit i̱ wieli li kʋt,
23Ponola honnula achʋfa kia, shulush isht talakchi peh nana kia ishi la he keyu, micha nana hosh chimmi atuk a̱ ishi la he keyu, miha li tuk oke; yʋmmak keyukma Eblam a̱ ʋno ak osh nan in laua ikbi lishke, ish acha hinla hoke.
24Peh hatak himithoa hʋt ʋpa tuk ak illa, micha hatak si apehʋt a̱ya tuk ai isha he ʋlhpesa kak illa Ane, Eshkol, micha Mamli aiena kak osh ai isha he ʋlhpesa kʋt ishashke, achi tok.
Published by the American Bible Society 1848-1886, reprinted 1913
