मति 9
9
धार-हइने चल्ना रोग लागल मन्से डउल भेल
(मरकुस २:१-१२; लुका ५:१७-२६)
1वकरपाछा येसुजि डोङवामा चढलसि हसे तलवाक वाहिकरवा यापन रहलि गउँवामा गेलसि। 2तखनहिँ किहो मन्सेसभ धार-हइने चल्ना रोग लागल एक जन मन्सेके बिछोनवाहिसाङे बोकके हुनेक लघिना यनलइ। येसुजि हुनुकर विस्वास देखके वकरेके कहलसि, “अरे बेटवा, सहास करहि, तोर पाप छमा भेलइ।” 3बाकि येसुजिक बतवा सुनके कतेक जन व्यवस्थाक-गुरुसभ मनमने यसके कहे लगलइ, “इअ त परमेस्वरक निना करइ बडिय।” 4बाकि येसुजि हुनुकर मनवाक विचार जानके कहलसि, “तोहरा यापन मनवामा केहके यसनुक हइने डउल विचार करइबडह? 5इअ मन्सावाके ‘तोर पाप छमा भेलइ’ कहेके उसार बडइ कि ‘उठ हसे बुलहि’ कहेके उसार बडइ? 6जसने तोहरा इअ धरतियामा मुइ मन्सेक पुतरक पाप छमा करेके अधिकार बडइ कहके थाह हखइ,” तब येसुजि उअ मन्सावाके कहलसि, “उठहि, हसे यापन बिछोनवा बोकके घर जाहि।” 7तखनहिँ उअ मन्सावा उठलिय हसे यापन घरवरि गेलिय। 8जब भिडवाक मन्सावाह इअ देखलइ, हुनुका डेरेलइ हसे जुन परमेस्वर मन्सावानिके यसनुक सक्ति देले बडसि, हुनेक बखान करलइ।
येसुजि मतिके बलोलसि
(मरकुस २:१३-१७; लुका ५:२७-३२)
9जब येसुजि वहवाँसे जाए लगलसि, तब मति नाउँक एक जन कर उठोलहर मन्सेके कर उठोना यडवामा बइठल देखलसि। येसुजि वकरेके कहलसि, “मोर पाछा लाग,” तब मति उठके हुनेक पाछा लगलिय।
10किहो समय पाछा जब येसुजि मतिक घरवामा जेउना करे बेठलसि, तब कर उठोलहराह हसे पपियाह फेनि याके येसुजि तके चेलवानिसाङे खाए बेठलइ।#लुका १५:१-२ 11इअ देखके फरिसियाह येसुजिक चेलवानिके पुछलइ, “तोहार गुरु केहके कर उठोलहराह हसे पपियानिसाङे खेसिय?” 12इअ सुनके येसुजि हुनुकाके कहलसि, “डउल मन्सेके बइध हइने चाहिँ लगसइ, बाकि मनियाइल मन्सेके चाहिँ लगसइ। 13तोहरा धरमसास्तरवामा लिखइलि इअ बतवा बुझे परतइ: ‘मुइ भोग हइने, दाया चाहसहिँ।’#मति १२:७; होसे ६:६ केहकेकि मुइ धरमियानिके हइने, बाकि पपियानिके बलावे याइल हखहि।”
उपासक बारेमा येसुजिके प्रस्न
(मरकुस २:१८-२२; लुका ५:३३-३९)
14एक दिन बप्तिस्मा देलाहर युहन्नाक चेलवाह येसुजि लघिना याके पुछलइ, “हमरा हसे फरिसियाह घर-घराहे उपास रहसहुँ, बाकि यपनहुँक चेलवाह केहके उपास हइने रहसइ?” 15तब येसुजि हुनुकाके कहलसि, “जखनिलइ दुलहवा बरियतवानिसाङे रहबिय, कथि हुनुका सोक करतइ त? बाकि यसनुक दिन यवइ बडइ, जब दुलहवा हुनुकरसे लिगेबिय तब हुनुका उपास रहतइ।
16 “कुनहुँ फेनि पुरान लुगामा लउठा पेउना हइने लगोसइ, केहकेकि लउठि पेउनावा लुगवाके फारदेबिय हसे लुगवामा झन जबड भोङ बनादेबिय।
17 “वसने करके कुनहुँ फेनि पुरान छालक-मसकमा लउठा अंङगुरक मोद हइने धरसइ, यगर धरले जउँ पुरनि छलवाक-मसकावामा फटतइ हसे जम्मे मोदवा हरकतइ। बरु लउठा अंङगुरक मोद लउठि छलवाक-मसकावामा धरे परतइ हसे दुन्हुँ सुरछित रहतइ।”
याइरसक बेटि हसे एक जन जनियानि डउल भेल
(मरकुस ५:२१-४३; लुका ८:४०-५६)
18जब येसुजि हुनुकाके इअ बतवा कहते रहलसि, तब सभाघरवाक एक जन यहुदि सासक वहवाँ यलिय हसे येसुजिक यागा ठेहुँनाके यसके कहलिय, “मोर बेटिया भरखाहे मरल बडिय, बाकि यपनहुँ याके वकर वपरा हथवा धरदेहुँ हसे उअ जियबिय।” 19तब येसुजि उठके वकरसाङे गेलसि हसे हुनेक चेलवाह फेनि हुनेसाङे गेलइ।
20तखनहिँ एक जन बारह बरससे रकत बहना रोग लागल जनियानि येसुजिक पाछावरिसे याके हुनेक लुगवाक कोनहरवा छुअलिय। 21केहकेकि उअ मने-मने यसके सोचलिय, “यगर मुइ हुनेक लुगवा मतरे छुबहि जउँ, मुइ डउल हखबेकरबहिँ।” 22येसुजि छराहिदर फिरके हेरइकि जब उअ जनियावाके देखलसि, हुने कहलसि, “अरि बेटिया, सहास करहि, तोर विस्वास तोरके डउल बनोले बडिय।” तखनहिँ उअ डउल भेलिय।
23जब येसुजि उअ यहुदि सासकक घरवामा पुगलसि, हुने बासि बजोइ हसे कनन-रोहन करइकि देखलसि। 24तखनहिँ येसुजि हुनुकाके कहलसि, “तोहरा जम्मे जन बाहारा जइबे करह, इअ छउडिया मरल हइने बडिय, बाकि सुतल बडिय।” इअ बतवा सुनके हुनुका येसुजिक ठाठा करलइ। 25बाकि हुनुकाके बाहरा निकडोलेपर, हुने भितरा पेसलसि हसे उअ छउडियाक हथवा पकडके उठोलसि। तखनहिँ उअ छउडिया उठलिय। 26इअ बतवा जम्मे छेतरमा फइललइ।
दु जन यान्हर मन्से डउल भेल
27येसुजि उअ ठउरिया छाडके जाइखुनि, दु जन यान्हर मन्से यसके कहके चिलइते हुनेक पाछा लगलइ, “हे दाउदक पुतर, हमराके दाया करहुँ।” 28जब येसुजि घरवा भितरा पेसलसि, उअ दु जन यन्हरि मन्सावा हुनेक लघिना यलइ। तब येसुजि हुनुकाके पुछलसि, “कथि मुइ तोहराके डउल बनावे सकबहि कहके तोहरा विस्वास करसह?” हुनुका कहलइ, “हँ प्रभुजि, हमरा विस्वास करसहुँ।” 29तब येसुजि हुनुकर यखिया छुके यसके कहलसि, “तोहार विस्वास यनुसार तोहार तहिँया हखइ।” 30तखनहिँ हुनुकर यखिया खोलेलइ। तब येसुजि हुनुकाके काडा आग्या देते कहलसि, “हेरह, इअ बतवा ककरहुँके फेनि झिन कहिह।” 31बाकि हुनुका वहवाँसे जाके हुनेक बारेमा जम्मे छेतरमा सुनादेलइ।
32जब येसुजि हसे हुनेक चेलवाह वहवाँसे जाइ रहलइ, तब मन्सावाह एक जन भुत लागल गेडाह मन्सेके हुनेक लघिना यनलइ। 33येसुजि भुतवा निकडोलेपर उअ गेडहा मन्सावा फदके लगलिय। इअ देखके भिडवाक मन्सावाह छक परते यसके कहे लगलइ, “यसनुक त हमरा इस्राएल देसवामा कबहुँ फेनि हइने देखले रहलहुँ।” 34बाकि फरिसियाह कहलइ, “इअ त भुतवाक रजवानिक सक्तिसे भुतवानिके निकडोसिय।”#मति १०:२५; १२:२४; मरकुस ३:२२; लुका ११:१५
खेतहारिन इचिके बडइ
(मरकुस ६:३४; लुका १०:२)
35तखनहिँ येसुजि जम्मे सहरवाह हसे गउँवाहमा जाके हुनुकर सभाघरवामा सिछा देते परमेस्वरक राजक बारेमा खुसिक समाद परचार करलसि। हुने जम्मे खलिक रोग हसे मनियइलि मन्सावानिके डउल बनोलसि।#मति ४:२३; मरकुस १:३९; लुका ४:४४ 36जब हुने भिडवाक मन्सावानिके देखलसि हुनेक दाया लगलइ, केहकेकि हुनुका भेडहार हइने भेल भेडासभ नहिँया हदियाइल हसे दुःखि रहलइ।#गन्ति २७:१७; १ राजा २२:१७; २ इतिहास १८:१६; इजकिएल ३४:५; मरकुस ६:३४ 37वकरपाछा येसुजि यापन चेलवानिके कहलसि, “बालि त बहुत बडइ, बाकि खेतहारिन इचिके बडइ। 38उहेसे यापन बालि बटियावेके तहिँया खेतहारिनके खेतवामा पठादेसि कहके बालिक प्रभुसाङे परथाना करिह।”#लुका १०:२
© 2023, Wycliffe Bible Translators, Inc. and Nepal Bible Society
