मति 1
1
येसुजिक वंसावलि
(लुका ३:२३-३८)
1इअ अब्राहम हसे दाउदक सन्तान येसु ख्रिस्टक वंसक मन्सेसभक नाउँसभ हखइ: 2अब्राहमक बेटा इसहाक रहलिय। इसहाकक बेटा याकुब रहलिय। याकुबक बेटासभ यहुदा हसे वकर ददेर-भाइसभ फेनि रहलइ। 3फारेस हसे जाहेर यहुदाक बेटा रहलइ हसे हुनुकर दाओक नाउँ तमार रहलइ, फारेसक बेटा हेस्रोन, हेस्रोनक बेटा आराम, 4आरामक बेटा अम्मिनादाब, अम्मिनादाबक बेटा नहसोन, नहसोनक बेटा सल्मोन, 5सल्मोनक बेटा बोअज रहलिय हसे वकर दाओ राहाब रहलिय, बोअजक बेटा ओबेद रहलिय हसे ओबेदक दाओ रुथ रहलिय। ओबेदक बेटा यिसइ, 6यिसइक बेटा राजा दाउद रहलिय, दाउदक बेटा सोलोमन रहलिय हसे वकर दाओ बेतसेबा उरियाहक जनि रहलिय।
7सोलोमनक बेटा रहबाम, रहबामक बेटा अबिया, अबियाक बेटा यासा, 8यासाक बेटा यहोसापात, यहोसापातक बेटा यहोराम, यहोरामक बेटा उज्जियाह, 9उज्जियाहक बेटा योताम, योतामक बेटा आहाज, आहाजक बेटा हिजकिया, 10हिजकियाक बेटा मनस्से, मनस्सेक बेटा आमोन, आमोनक बेटा योसियाह, 11योसियाहक बेटा यकोनियास हसे वकर भाइसभ रहलइ तके हुनुका बेबिलोन देसवामा यहुदियानिके बन्दि बनाके लिगलि समयसे यागा जरमल रहलइ।#२ राजा २४:१४-१५; २ इतिहास ३६:१०; यरमिया २७:२०
12हुनुकाके बेबिलोन देसवामा बन्दि बनाके लिगइले पर: यकोनियासक बेटा सालतिएल, सालतिएलक बेटा यरुबाबेल, 13यरुबाबेलक बेटा अबिउद, अबिउदक बेटा एल्याकिम, एल्याकिमक बेटा आजोर, 14आजोरक बेटा सादोक, सादोकक बेटा आखिम, आखिमक बेटा एलिउद, 15एलिउदक बेटा एलाजार, एलाजारक बेटा मतान, मतानक बेटा याकुब रहलिय। 16याकुबक बेटा योसेफ रहलिय, जुने मरियमक मरद रहलिय। इहे मरियमसे येसुजिक जनम भेलइ, जकरेके ख्रिस्ट कहसइ।
17यसने अब्राहमसे दाउदलइ चउध पुस्ता भेलइ, दाउदक समयसे इस्राएलियानिके बेबिलोन देसवामा कइदि बनाके लिगइलि समयलइ चउध पुस्ता हसे बेबिलोन देसवामा कइदि बनाके लिगइलि समयसे ख्रिस्ट जरमलि समयलइ चउध पुस्ता भेलइ।
येसु ख्रिस्टक जनम
(लुका २:१-७)
18येसु ख्रिस्टक जनम यसके भेलइ: हुनेक दाओ मरियमक योसेफसाङे बियाहक बात पाका भेल रहलइ, बाकि हुनुकर बियाह हखलिसे यागा मरियम पवितर-आत्मासे भारदेहि भेल रहलिय।#लुका १:२७ 19बाकि वकर हखेवाला मरदावा योसेफ एगुडा धारमिक मन्से रहलिय हसे उहेसे मन्सावानिक यागा मरियमक बिजेत झिन हखइ कहके उअ वकरेके चुप-चापे छाडेके विचार करलिय। 20जब उअ यसनुक विचार करइ रहलिय, तब परमप्रभुक एगुडा स्वरगदुत सपनामा वकर लघिना देखा परके यसके कहलिय, “अरे दाउदक सन्तान योसेफ, तुइ मरियमके यापन जनि बनावेके झिन डेराहि, केहकेकि जुने वकर गरभमा बडसि, हुने पवितर-आत्माक सक्तिसे बडसि। 21उअ एगुडा बेटा जरमोबिय हसे तुइ हुनेक नाउँ येसु धरसि, केहकेकि हुने यापन मन्सावानिके#लुका १:३१ हुनुकर पापसे बचोबसि।”
22परमप्रभु अगमवक्तासे फदकलि वचन पुरा हखेके तहिँया इअ जम्मे भेल हखइ: 23“हेरहि, एगुडा कुवारि-कन्या भारदेहि हखबिय हसे उअ एगुडा बेटा जरमोबिय। मन्सावाह हुनेके इम्मानुएल कहतइ।”#यसइया ७:१४ यकर यरथ, “परमेस्वर हमारसाङे बडसि” हखइ। 24जब योसेफ निनवासे जगलिय, उअ प्रभुक स्वरगदुतवाक कहलि बमोजिम करलिय हसे मरियमके बियाह करके यनलिय। 25बाकि मरियम बेटा हइने जरमोइलइ योसेफ वकरसाङे हइने सुतलिय हसे मरियम बेटा जरमोले पर योसेफ हुनेक नाउँ येसु धरलिय।#लुका २:२१
© 2023, Wycliffe Bible Translators, Inc. and Nepal Bible Society
