VPOM 2
2
1Housoeh maukhung nyeisjvng yahge nyamoq dah somtung somxo lhyi dye gvnkhanh goeus. 2Nyhet vnyeih lyis Mangso ka nyah muh lyis dye kuot. Housoeh las nyhet vnyeih lyis nyang nyah muh dvnganh masyah no.#Heb 4.4, 10 #Dyu 20.11 3Mangso ka hau nyhet vnyeih lyis shvmanh las gyingshang nhang. Khasoeh ge lyis Mangso ka, nyang gvnkhanh muh dvnganh dye las hauh nyeih lyis no. 4Heika maukhung nyeisjvng khasoeh gvnkhanh dah sungson nghuot.
Eden Khyam
Yhensain lhyi Dangkhonh Vjyuk mas, yoeuh aq Mangso maukhung yahge nyeisjvng lyis gvnkhanh uhlyis, 5nyeisjvng thoq mas saiq, mhanh ma yuk thuq los shih las, xoh ja tsungh ja eq ma yuk shih. Khasoeh ge lyis Yhensain Mangso ka nyeisjvng thoq mas mau ma wus nhang shih; nyeisjvng mas muh zwi das dius eq ma nyeis shih. 6Nghuot laus eq nyeisjvng masyah thuq dah jeis yah nyeisjvng gonh lyis jyweq nhang.
7 Yhensain Mangso ka nyeisjvng#2.7 nyeisjvng…vbusbih: Hebre dangkhonh vbusbih yahge nyeisjvng gas thwe doeus goh. mas dah tsoh mons yah dius vbusbih vzwvng kuot las nyah nho mha kang soq muot kat dyei lyis hauh dius gas kang bos soeu bweh los.#1Kr 15.45
8Gvshih Yhensain Mangso ka, buisthuq shot pheh Eden mas khyam dvkoeuq ba tsungh toh. Houmha nyang kuot toh dah dius lyis nyhei toh. 9Yhensain Mangso ka saiqzains vja ja lyis tsoh masyah yuk los nhang. Hauh saiqzains goeu gas nyoqjeih xiklyis yoeuh omes phoh zis yahge zo gis phoh zis tsain nghuot. Khyam gungs mas kang dwis nhang saiqzains yahge gis gang seq nhang dah saiqzains tsain yuk joq.#2.9, 17 gis gang seq nhang; nghuot ya dvnganh lyis seq nhang. #Nyoq 2.7, 22.2, 14
10Hauh khyam lhyi jyweq nhang das xiklyis Eden masyah jeismuh dvlvng yaus thuq los. Hou mhayah jeis nyei lvng yaus gang thuq loh. 11Cangxeih vlvng dah nyings gas Pishon nghuot. Hauh jeis lvng gas xing bos dah Hawila mau chank yah yaus lhaink loh. 12Hauh mau mas dah xing ka gis. Saiqxangh yahge phauhdap Onik luk eq joq. 13Aiq vlvng dah nyings gas Gihon nghuot: Houka Khush#2.13 Khush ge zis Mesopotamia nghuot ya, Ethiopia nghuot. mau chank yah yaus lhaink loh. 14Somh vlvng dah nyings gas Tigri nghuot; houka Asiria mau dah buisthuq pheh yaus loh. Nyei vlvng gas Uphrat nghuot.
15 Yhensain Mangso ka hauh vbusbih lyis shwih yoeus las Eden khyam mha muh zwi das xiklyis eq dyangh das xiklyis eq nyhei toh. 16Yhensain Mangso hauh dius lyis tying toh zis gas, Nvng hauh khyam mha bos shihzains dvnganh mas zis yoh zo. 17Nghuot laus eq gis gang seq das dah vzains mas zis nvng ma gis zo: Khasoeh ge lyis nvng hauh zis zo nyeih lyis nvng jyoengh shei das, ge.
18 Yhensain Mangso ka, Vbusbih gas nyang dvyuk kyingh nyeis das zis gas ma gis, ngos nyah xiklyis nyang yah phi dah pangh soeu lhyi kuot das, ge. 19Gvshih Yhensain Mangso ka, mhanhdyvp mas dah yewus yahge dang dah nghoq dvnganh lyis tsoh yah kuot las nyamoq lyis yoeuh las nyings nyhink dyei das xiklyis hauh vbusbih jyank mas shwih los. Dwis ya dwis zis dvnganh gas hauh dius nyhink dyei zis yah dvyhangteh nyings tsain yoh. 20Housoeh dius gas gaunyhauq dvnganh, dang dah nghoq yahge mhanhdyvp yewus dvnganh lyis nyings nyhink dyei. Nghuot laus eq Adam nyhenshang nyang yah phi dah pangh soeu ma bos shih.
21Housoeh las Yhensain Mangso ka vbusbih lyis yhet muh muih nhang lha, nyang yhet joq. Hauh uhlyis nyah nvm yau dvkhvt she lho lha, hauh joqyos mas shoh yah tyink dyei. 22Yhensain Mangso ka hauh vbusbih masyah yoeus dah nvm yah vmesbih dvyuk kuot las, nyang lyis hau vbusbih jyank mas shwih los dyei. 23Hauh vbusbih taiq zis gas,
Gvshih heika ngah shohyau mas dah shohyau, ngah shoh mas dah shoh nghuot.
Housoeh las nyang lyis vmesbih oen das: khasoeh ge lyis, nyang gas vbusbih masyah yoeus thuq zis nghuot.#2.23 vmesbih…vbusbih: Hebre maussauh mas “vmesbih” yahge “vbusbih” dangkhonh thwe doeusgoh teh nghuot.
24Hauh gvng mas vbusbih gas nyah ungwes uwus lyis toh khoq las nyah yhensain nyhiq yah xonh zis yah nyah zomh gas dvsuih dvshoh bweh los.#Mat 19.5; Mak 10.7-8; 1Kr 6.16; Eph 5.31
25Hauh dius yahge nyah yhensain nyhiq gas shohchen nghuot laus eq nyah aiq yuk ma xoq.
Ngochang Common Language Bible © Bible Society of Myanmar, 2010.
