मत्ती 12
12
पवीतर दिवस को प्रभु
(मरकुस 2:23-28; लूका 6:1-5)
1वोना बेरा बिसराम दिवस मा यीसु, चेला गिनको संग खेत लक होयके, जावत होतिन। अना चेला गीनला भूख लगी। अना वय गहुँ को बाल तोड़के खावन लगीन। 2फरिसी अना मोसे को नियम को गुरूगिन ना यो चोवके, वोको लक कहिन “चोव! तोरो चेलागिन वा करासेत जोन बिसराम दिवस मा मोसे को नियम अनुसार करनो साजरो नाहत।”
3एको पर यीसु उनला पुसीस, काय तुम्हिना नही बाचीसेव? का राजा दाऊद अना वोको संगीगिन, भूखा होतिन। तो काजक करीन? 4उ कसो परमेस्वर को घर मा गईन, अना चढवा को भाकर ला जेइन जबकि मोसे को नियम लक वोला याजक सोड़ कोनिला, जेवन को हक नाहत। 5काय तुमी पवीतर गिरंथ मा नही बाची सेव? का पवीतर दिवस, मा याजक मंदिर मा मोसे को नियम अना विधि-विधान ला तोड़न पर, भी पापी नही ठहरासे। 6पर मी तुमी लक कव्हसू, यहान पर जोनसे, उ मंदिर लक मोठयो से। 7#मत्ती 9:13अदी तुमी ला एको मजे मालुम होत्यो “मी पुजा चघानो लक खुसी नही होवासू, पर दया लक खुसी होवासू। त तुमी बेकसूर ला पापी नही ठयरायोसेत। 8मानूस को टूरा तो पवीतर दिवस को भी पिरभु से।”
सुक्को हात वालो मानूस ला चंगा करनो
(मरकुस 3:1-6; लूका 6:6-11)
9यीसु वहाँन लक चलके ना उनको, पिराथना घर मा आयो। 10उता एक मानूस होतो जेनको हात सूक गयो होत्यो उनना यीसु पर दोस लगावन लाई पुसिन, काय मोसे को नियम लक पवीतर दिवस मा बिमार ला साजरो करनो खरोसे? उनना यीसु ला यो काजी पुसियो होतिन, का वय वोला दोसी साबीत करे।
11वोना उनला सांगिस तुमरो मा असो कोन सेत? जोनको, एकच मेढा होय, अना वा बिसराम को दिवस मा खोदरा, मा पड़ जाय, मंग तुम्ही वोला धरके बहार नही कहाड़ेत?#लूका 14:5 12अता तुमच मोला सांगो, मानूस मेढा लक कितरो किमती से? एकोलाय पवीतर दिवस, मा मोसे को नियम लक भला करनो साजरो से। 13तबा यीसु ना उ मानूस ला कव्हयो,
“आपरो हात बढा वोना आपरो हात बढाईस अना वा हात भी दुसरो, हात जसो भई गयो।” 14एको पर फरिसी गुरूगिन पिराथना घर लक बाहेर हिटीन, वय यीसु ला मारन को बिचार करन लगीन।
परमेस्वर को निवाड़ो हुयो दास
15तबा यीसु न उनको मनकि बात जानके, वहान लक चली गयो अना लगत लोकगीन वोको मघा भई गईन अना वोना सबला साजरो कर देईस। 16अना उनला असो हुकूम देइस, का मी तूमला साजरो करीसेव यो बात कोनिला नोको साँगजोस। 17असो भविस्यवक्ता यसायाह को कव्हनो, पूरो भयो।
18“आयको! एला मिना बेची सेव यो मोरो चहेतो दास आय,
मी एकोलक गजब खुस सेव,
मी वोको पर आपरो आतमा डाखू अना,
उ गैर यहुदी मा सहि न्याय को बारे मा सागेत।
19यो न तो बैस करयेत अना हाकलेत,
अना कोनी चौबट्टा कन एको आवज आयकु आयत।
20यो ना तो कुचलो हुओ घागरा गवथ ला तोड़ेत अना,
न इझतो दियो ला इझाएति बुझाहेती,
जब तकन न्याय ना भई जाये।”
21“वोको नाव मा सप्पा गैरयहुदी को लोक गीन भरोसा राखेत।”
यीसु अना बालजबुल
(मरकुस 3:20-30; लूका 11:14-23)
22तबा लोकगीन एक अँधरा, गुंगो, भुत-पलित झोमयो, मानूस ला, वोको जवर आनीन, यीसु ना वोला साजरो कर देइस। अना उ गुंगो बोलन अना चोवन लग्यो। 23एको मा सब लोकगिन ला लगत अचरज भयो अना वय कव्हन लगीन “का यो मानूस दाऊद को टूरा से”
24जबा फरीसि गिन यो आयकिन तबा कव्हन लगीन#मत्ती 9:34; 10:25 “यो ता बुरो आतमा को मुखिया, बालजबूल की मदद लक भूत-पलित ला हेड़से।”
25यीसु ला उनको विचार मालुम भय गयो। उ उनला बोलयो “हरेक वा राज जोनमा फूट होवासेत वा नास भयी जासे वसोच हरेक नगर अना घराना जोनमा फुट पड़ जासे वा नास भयी जासे।” 26तरी यदि सैतान च अपरो आपला बाहेर हेडे़त। तबा उ आपरो च विरोधी भय जासे, मंग ओको राज कसो बनो रहेत? 27भलो अदी मि बालजबूल बुरो आतमा की मदद, लक भूत-पलित ला हेड़ासू, ता तुमरो खानदान कोन की मदद लक हेड़ासे? एकोलाय वयच तुमरो फैसला करयेत। 28मी परमेस्वर को आतमा की मदद लक, भूत-पलीत बुरो आतमा ला हेड़ासू, ता बेसक परमेस्वर को राज तुमरो जवर आई गईसे।
29मंग असो कोनतो मानूस से जोन कोनी मोठयो पहलवान को घरमा धसके, ना वोला बिना हराये, अना बिना बान्धे वोको घर को माल लूट सकसे।
30जो मोरो संग नहात उ मोरो बिरोध मा सेत अना जोन बगरो मेंढा गीनला जमा करनो मा मोरी मदद नहीं करासेत वा उनला छितरान वारा से।#मरकुस 9:40; लूका 9:50 31यो साठी मि तुम लक कव्हसु “की मानूस को सप्पा पाप बिरोध अना निन्दा, छिमा कियो जाहेत, पर परमेस्वर को आतमा पवीतर आतमा की निन्दा छिमा नही कियो जाहेत।” 32“जोन कोनी मानूस को टूरा को विरोध मा बात कहे#लूका 12:10 ओको अपराध छिमा कियो जाहे, पर जोन कोनी पवीतर आतमा को बिरोध मा काही कहे ओको गुनाह न ता येना जुग मा, ना आवनवारा जुग मा छिमा कियो जाहे।”
झाड़ अना ओको फर
(लूका 6:43-45)
33“तुम्ही लोक ला मालुम सेत का साजरो फर आनन लाय साजरो झाड़ लगानो पाहिजे अना बुरो झाड़ लक बुरो च फर मिलासेत। काय की झाड़ आपरो फर लक चीन्हो जासे।”#मत्ती 7:16-20 34“अरे सरप का टुराहुन! तुमी खोटो होयके कसो साजरो गोस्टी कव्ह सकासेव?” मानूस को सबद जोन वोको मन मा भरयो से, वाच टोन्डमा भड़-भड़ आवासे।#मत्ती 3:7; 23:33; लूका 3:7 35एक साजरो मानूस, जोन साजरोपन वोको मनमा जमासेत वोच मा लक साजरा गोस्टी हेड़ासेत। जबकि एक बुरो मानूस, जोन बुराई वोको मनमा सेत वो च मा लक बुरो गोस्टी हेड़ासेत।
36मि तुमी लक कव्हसू, का जोन-जोन खोटो अना फालतू सबद मानूस कव्हसेत, न्याय को दिवस वय हर एक ओनो गोस्टी को लेखा देहेत। 37काहे की तु आपरी गोस्टी को कारन निरदोस, “अना आपरी गोस्टी च को कारन दोसी ठहरायो, जाजोस।”
सरग को निसान की मांग
(मरकुस 8:11,12; लूका 11:29-32)
38 #
मत्ती 16:1; मरकुस 8:11; लूका 11:16 एको पर काही मोसे को नियम को गुरू अना, फरिसी गुरू ना ओला कहिन “ओ गुरू हमि तोला अचरज निसान परगट करतो चोवनो चाव्हसेजन।”
39 #
मत्ती 16:4; मरकुस 8:12 एको जवाब मा यीसु ना कहीस “एना जुग को बुरो अना दुस्ट लोकगीन च अचरज निसान चोवनो चाव्हासेत पर योना भविस्यवक्ता को अचरज निसान ला सोड़ून अखिन कोनी अचरज निसान उनला नही भेटेत।” 40जसो योना भविस्यवक्ता तीन रात-दिवस लक मगर को पोटमा रहयो, वसोच मानूस को टूरा ला तीन रात-दिवस धरती को भीतर रव्हनोसेत। 41न्याय को दिवस निनवे नगरी को निवासी अज् को यो पीढी को लोकगिन संग उभो होयेत अना उनला दोसी ठैयरायत। काहेका नीनेवा नगरी को वासी गिनना योना को परचार लक मन बदलयो होतीन। अना यहाँन ता कोनी योना लक मोठयो मौजूद से। 42“न्याय को दिवस दक्सिन की रानी यो पीढी को लोकगिन को संग उभो होयती अना उनला गुनाहगार ठैरायती। काहेकि वा सुलेमान को गियान आयकन को साठी धरती को छोर लक आई होती अना चोवो यहान उ से जोन सुलेमान लक मोठयो सेत।”
अधूरो सूधार लक आफद
(लूका 11:24-26)
43“जबा कोनी भूत-पलित कोनी मानूस ला सोड़ा सेत तबा उ अराम की खोज मा सूनसान जघा को लाय हिन्डा सेत। जबा वोला वसो जघा नही भेटासेत।” 44तबा वा कव्हसेत जोन घरला मी सोड़यो होती, मी वहान लवट जाहिन तबा वा उतानी लवटा सेत अना अबा वोला सफा चक्काक सजो सजायो मिलासेत। 45मंग वा लवटा सेत, अखिन अपरो संग सात भूत-पलित आनासेत। जोन वोको लक जादा बुरी होवा सेती। मंग वय सबअ आयके जुमला भयी के रव्हसेती अना वोना मानूस को दसा पयले लक लगत बूरो भयी जावा सेत।
यीसु की माय अना भाऊ
(मरकुस 3:31-35; लूका 8:19-21)
46यीसु अबा भीड़ लक गोस्टी सांगत होतो तबा ओकी माय अना भाऊ, बाहेर उभया होतीन, अना ओको लक गोस्टी करन लाय बाट चोवत होतिन। 47कोनी ना यीसु लक कहीस “तोरी माय अना तोरो भाऊ बाहेर उभा सेत अना तोरो लक गोस्टी करनो चव्हसेत।”
48जवाब मा यीसु ना सांगन वालो ला कव्हयो “कउन से मोरी माय? कउन सेत मोरो भाऊ-बन्ध” 49मंग वोना हात लक आपरो चेला गीन कन ईसारा करके सांगन लगयो “चोवो यो मोरि माय अना भाऊ से। 50काहेका जोन मोरो सरग को परमेस्वर को कव्हनो मा चलासे अना वोको मन को मुताबिक काम करासे, वोच मोरो भाऊ बहिन अना मायसे।”
The New Testament in Powari Language © The Word for the World International and Powari Madhya Pradesh, 2023.
