BOTHUBO 45
45
Joseph no pa Kibolomi ghenguno Tsüpuwu
1Tileno Joseph ye pa gholo puthugho akeqo zülo pa likhi pa ghasü mlave. Pa no qauve, “Timi kümtsü I launo ipe khave lo.” Ikehu Joseph no pa thiküzümi vilo pa ampi ye khuu keno lhephe kelo milakhimu pa gholo ngo mono ae. 2Pa no ighaqa, ikehu Egyptmi no ti chiluve, eno Pharaoh kibolomi ghi chiluve. 3Joseph no pa thiküzümi vilo pi, “Ni ye Joseph ke! I pu ye xüaphi keshea?” Ikemu pa thiküzümi ye pa khochile mlave, kughengu panongu ye pa zülo thüghüive ke.
4Ikehu Joseph no pa mu noqo vilo pi, “Kimiyeno kupunu ighilo.” Panongu no kupunu ighi. Eno pa no pi, “Ni ye Joseph, nongu thiküzüu, khuu nongu no Egypt lo jepuwuve keno pa ke. 5Itehi nongu no hilau I jepuwuve ke ghenguno nongu ampi jupe kütakihi momu amloide kevilo, kughengu aküxü pükhatsü peniye nongu züuno Alhou no I puwuve ke. 6Kughengu aghakhu lo püqümiye ye ampe kini likhi aphi, eno itaghi ampe pungu dolo alu chilu momu ghile hulu monani. 7Ikemu Alhou no nongu ghenguno ayeghi lo ghükulumi qhitsü niye, eno küxümi kutomo qhitsü niye nongu züuno I puwuve ke. 8Ikehu nongu no I puwuve ke kumoe, ikemu Alhou noke. Pa no I pelo Pharaoh pa pu toive pe, eno pa kibo kümtsü lo ampeu shino Egypt yeghi kümtsü shou ayepelu peke. 9Mtazü I pu lau iqho no pa vilo pi lo, ‘O nu Joseph no hitoi piani, Alhou no Egyptmi kümtsü shou I pelo ampeu shive apeke. I lau iqighi lo; munu kevilo. 10Nongu ye Goshen yeghi lo küghünani, eno nongu ye I phivilo ngoni, nongu eno no tianuli ngo no tilimi, nongu mbeloji, atsü-aqu eno nongu no pighi akeqo kümtsü saghilo. 11I no nongu sala tsü nani, kughengu ampe pungu püqümiye ighini aphi, tishianguno nongu eno no kibolomi, nongu no pighi akeqo ye athokha amüha shivemo nani.’ 12Eno itehi nongu nhethi eno Benjamin nhethi no ithuluvae, ti ye I kichi no nongu pütsa anie. 13Egypt lo I gigihupu, eno nongu no ithulu akeu kümtsü I pu vilo pi masae. Mtazü I pu hilau saiqighi lo.” 14Tishino pa no Benjamin vape luve no qa, eno Benjamin no pa vape no qae. 15Eno pa no pa thiküzümi kümtsü müma no qa. Tithiu no pa thiküzümi no pa pütsae.
16Kughou Pharaoh kibolomi no, “Joseph thiküzümi ighi ani,” ipi asütsa chilu keno, tino Pharaoh eno pa qemiqo lopiqive. 17Eno Pharaoh no Joseph vilo pi, “O thiküzümi vilo pilo, ‘Hi shilo: Now tüghashiqo akho xapipe no Canaan yeghi lo idewolo, 18eno nongu papu ngo nongu kibolomi saluve no I lau ighilo, I no Egypt yeghi akiviu nongu tsüni, eno nongu ye ayeghi ghüma kivi lono pekighi chulu nani.’ 19Eno no, Joseph, no ishi pi penike azah tsü ani, ‘Hi shilo: nongu tianuli ngo anipuqo eno nongu papu saighi kepushi Egypt yeghi lono anhemgha kupu mishikulu pewulo, eno ighilo. 20Now tinhemgha ghenguno alomsü kevilo, kughengu Egypt yeghi lo akiviu ye nonguw ke.’”
21Israel tianuliqo no tishi: eno Pharaoh zakütsü kiqi lono Joseph no anhemgha kupu mishikuluqo panongu tsü, eno pano ghüzüla ghenguno achuqupu tsüe. 22Panongu lakhikhi kümtsü lau pa no aphimini küzüli kepu tsü, ikemu Benjamin lau ye pa no ghükayi aqhe küthü eno aphimini küzüli kepu pungu tsü. 23Pa pu lau pa no hipaqo tsüpuwu: Egypt lo thime kiviqo pesü khurha chighi xapipe, aghüzüla lo pa pu ghenguno athi, asho eno achuqupu pesü khurhaqu chighi xapipe. 24Tishino pa no pa thiküzümi puwuve, eno panongu no wuche kelo, pa no panoqo vilo pi, “Alaghi lo kütsala kevilo.”
25Ikehu panongu no Egypt lono iqhove no Canaan yeghi lo panongu papu lau ighi. 26Eno panongu no pa vilo pi, “Joseph ye xüaphie, eno pa no Egypt yeghi kümtsü shou yepeu shi ani.” Ikelo pa mlo ye thüghüive, kughengu pa ye panoqo tsa pülümoe. 27Ikemu panongu no Joseph tsa, khikhi pa no panoqo vilo pi keno, ti kümtsü pa vilo pi kelo, eno pa no Joseph no pa tsüpuwu keu tinhemgha kupu mishikuluqo ithulu kelo, pa nguagha ye xüthileive. 28Eno Israel no pi, “Tino kughomae; I nu Joseph ye xüaphie. I no wuni eno I no thimphi züuno pa sasü kushoni.”
The Bible Society of India
© 2023, Used by permission. All rights reserved. More
