Mateus 12
12
Yeesus un te samstach
Markus 2.23-28; Lukas 6.1-5
1Phaar taache tëm noo, uf en samstach, waar Yeesus em waytse plantaax torich am keen. Sayn tisiple hate hunger un, tesweche, hon se aankefang ti eere se ërnte un ti waytse kërner se ese. 2Wii phaar fariseyer tas kesiin hon, hon se fer Yeesus kesaat:
— Kuk mool! Tayn tisiple sin was am mache woo unser Kesets ferpiite tuut se mache uf samstachs!
3Tan hot Yeesus keantwort:
— Het teyer net keleest was Dawii kemach hot, wii eyer un sayn khameraate hunger hate? 4Dawii is in Hërkot sayn haus rin kang, un tee un sayn khameraate hon tas proot kes woo keopfert kep waar fer Hërkot, wën tas ach keeche ti Kesets waar. Wayl ploos ti priister hate ti recht fer tas proot se ese. 5Ore het teyer net keleest in Mooses sayn Kesets tas, uf samstachs, ti priister ti Kesets preche, im Thëmpel, un hon khee xult? 6Ich fersichere aych tas was too hier is mee important is wii te Thëmpel. 7Wën teyer wist was ti Hayliche Xrifte saan wole wën se fersichere: “Ich wil tas ti mënxe kuut sin un khee opfer fon tiire mich aan piite”, teet teyer net tii woo khee xult hon konteneere. 8Wayl te Soon fom Man hot autoriteet iwer te samstach.
Yeesus un te man mit en laam hant
Markus 3.1-6; Lukas 6.1-6
9Yeesus is too fort kang un is in en sinakook kang. 10Too waar en man woo een fon te hënt laam hat. Tan hon phaar layt woo wolte Yeesus aan kewe tas eyer ti kesets fom samstach net noo këngt tëm kefroot:
— Is es keeche unser Kesets uf em samstach kuriire?
11Yeesus hot keantwort:
12— Wën yemant fon aych en xoof hot un, uf samstach, tee in en loch falt, meecht eyer net ales mache fer te xoof too raus hoole? Also, en mënx is fiil mee weyert wii en xoof. Soo, unser Kesets lost uns ti anere helfe uf samstachs.
13Un saat fer te man:
— Xtrek tayn hant!
Tee hot se kextrekt, un tii is keheelt un is ekaal wii ti aner kep.
14Tan sin ti fariseyer woo too waare fort kang un hon aankefang pleen se mache fer Yeesus um se pringe.
Te tiiner woo Hërkot aus kesuucht hot
15Wii Yeesus tas se wise kriit hot, is eyer fon too fort kang un fiil layt sin mit em kang. Eyer hot al tii woo krank waare kuriert 16un hot kexikt tas se niks fertseele solte fer nimant iwich iim. 17Tas is paseyert tas sich in hale solt was te Profët Isaiias kesaat hat:
18“Hërkot saat: Hier is mayne tiiner woo ich aus kesuucht hon,
tee woo ich liipe un fiil frayt kept fer mayn hërts.
Ich tuun mayne Kayst an iim,
un tee saat aan mayne julkamënt fer ale foleke.
19Eyer tuut net tiskutiire, tuut net xraaye, halt net mool reete uf te xtroose.
20Fertreet net te ast woo ferproch is,
tuut net mool tas licht aus mache woo xon xwach is.
Eyer macht tas soo pis te khamf fon te justis kewine tuut.
21Un ale foleke setse sayn hofnung uf iim.”
Yeesus sayn macht fer temoone aus xtoose
Markus 3.20-30; Lukas 11.14-23
22Tan hon se Yeesus pis an en man kenom woo plint un xtum waar wayl eyer tomineyert waar fon en temoon. Yeesus hot em kuriert, un tee hot aankefang se siin un xpreche. 23Tas folek hot sich ferwunert un hot kefroot:
— Meecht tee man Soon fon Dawii sin?
24Phaar fariseyer hon tas keheyert un hon keantwort:
— Is Pelsepuu, te xef fon te temoone, weyer tëm man ti macht kept fer temoone fort yaae.
25Awer, Yeesus hot tëne sayn ketanke kekhënt un saat:
— Ti natsioon woo sich in krupe teelt un unich sich khëmfe kept kans sicher fernicht. Un ti xtat ore familye woo sich in krupe teelt un unich sich khëmfe kewe aach fernicht. 26Soo, wën in Satanaas sayne raych eene krupe keeche te anere am khëmfe is, tas petayt tas tee raych xon keteelt is un klaych ferxwine tuut. 27Teyer saat tas ich temoone fort yaae wayl Pelsepuu mich macht kept fer tas se mache. Awer, wën tas soo is, weyer kept fer ayre aanhënger ti mchat fer temoone aus se xtoose? Soo, ayre aychne aanhënger pewayse tas teyer kans ferkheyert sayt. 28In te woerheet, is torich Hërkot sayn macht woo ich temoone fort yaae, un tas pewayst tas em Hërkot sayne Raych xon pis an aych khom is.
29— Nimant khan in en xtarke man sayn haus rin keen un sayn aychentum xteele, oone iim te eyerxt aan pine. Ploos soo khan tee tas tings mit hoole woo te xtarke man in sayn haus hat.
30— Weyer net mit mich is is keeche mich; un weyer mich net heleft samle is am ferxtraue. 31Tesweche, fersichere ich aych tas ti mënxe fertsayert kewe weche yeete sinte ore fluuche woo se aus xpreche keeche Hërkot. Awer, weyer keeche te Hayliche Kayst fluuche aus saat wërt net fertsayert. 32Wën yemant etwas saat keeche te Soon fom Man, kept fertsayert; awer, weyer keeche te Hayliche Kayst xpreche tuut kept net fertsayert, net mool yets un net im futur.
Te paam un sayn fruchte
Lukas 6.43-45
33— Teyer khënt ploos kuute fruchte hon wen teyer en kuute paam hot. Awer, wën teyer en pam hot woo niks taucht, wërt teyer fruchte hon woo niks tauche. Wayl is torich ti kwaliteet fon te fruchte tas mer wise wen en paam kuut is ore niks taucht. 34Kiftiche xlange nixt! Wii soo khënt teyer kuut tings saan wën teyer xlecht sayt? Wayl tas maul xprecht fon was ayer hërts fol is. 35Te kuute mënx hoolt tas kuutes aus sayne xop fon kuut tings, un te xlechte mënx hool tas xlechtes aus sayne xop fon xlecht tings.
36— Ich fersichere aych tas, am Kerichts Taach, yeete mënx ap rechnung mache mus fon yeete unnitslich wort woo eyer aus kexproch hot. 37Wayl tayn aychne wërter wëre tiine fer se julkeere op tuu unxultich pixt ore xultich.
En wuner am ferlange
Markus 8.11-12; Lukas 11.29-32
38Tan hon phaar Kesets Mayster um phaar fariseyer fer Yeesus kesaat:
— Mayster, meyer wole aych siin en wuner mache.
39Yeesus hot keantwort:
— Ti layt fon hayt tsu taach sin toch mool xlecht un oone klaawe! Teyer sayt mich am ferlange tas ich en wuner mache sol, awer te wuner fom Profët Yoonas is te eensichste sinaal woo aych kep wërt. 40Wayl, soo wii Yoonas tray taache un tray nachte in en kroose fix keplip is, aach soo playpt te Soon fom Man tray taache un tray nachte in te tiif eyert. 41Am Kerichts Taach tuut tas folek fon Niniwe uf xtaye un tuut aych aan kewe, wayl tii hon sich keroyert fon sayn sinte wii se Yoonas sayn preetichung aan keheyert hon. Un ich fersichere aych tas was hier is importanter is wii Yoonas. 42Am Kerichts Taach tuut ti Kheenichiin fon Saba uf xtaye um aych aan kewe, wayl sii is fon kans wayt khom fer ti wisente unterichte fon Salomoo aan heere. Un ich fersichere aych tas was too hier is importanter is wii Salomoon.
Te xlechte kayst khomt tsurik
Lukas 11.24-26
43Yeesus saat wayter:
— Wën en xlechte kayst fon yemant raus keet, keet eyer torich plets oone waser, en plats am suuche fer se ruue, awer fint tas net. 44Tan saat eyer: “Ich keen tsurik noo mayn haus, woo ich raus kang sin.” Tan khomt eyer tsurik un fint tas haus leyer, sauwer un uf keraumt. 45Tan keet eyer aus, tuut anere siwe kayste ruufe woo noch xlechter sin, un tii al playwe too am woone. Soo, kept tëm person sayn situatsioon noch xlimer wii tefoer. Un tas tuut aach paseere mit tëne xlechte layt fon hayt tsu taach.
Yeesus sayn mama un sayn kexwister
Markus 3.31-35; Lukas 8.19-21
46Wii Yeesus noch am xpreche waar fer tas folek, sin tëm sayn mama un sayn kexwister aan khom. Sin traus keplip un hon ferlangt fer mit tëm se xpreche. 47Tan saat yemant fer Yeesus:
— Kuk mool! Tayn mama un tayn kexwister sin tort traus un wole mit aych xpreche.
48Yeesus hot kekfroot:
— Weyer is mayn mama? Un weyer sin mayn kexwister?
49Tan hot eyer sayn tisiple ketsaycht un saat:
— Kukt! Too sin mayn mama un mayn kexwister. 50Wayl, weyer mayne Fater woo im hinmel is sayne wile tuut, is mayne pruuter, mayn xwester un mayn mama.
2022 Sociedade Bíblica do Brasil
