ମାଥିଉ 8
8
ଯୀଶୁ କୁଷ୍ଟ ରଗ୍କାଟାକାନିଙ୍ଗ୍ ହାର୍କିତାନ୍
(ମାର୍କ. ୧:୪୦-୪୫; ଲୁକ. ୫:୧୨-୧୬)
1ଯୀଶୁ ମାଡ଼ିତାଙ୍ଗ୍ ଯୁଜି ୱାନିହିଙ୍ଗ୍, ବେସିହେନି ମାନାୟ୍ ତାପାଚେ ପାଚେ ହାଚାର୍। 2ଆରେ ହୁଡ଼ାଟ୍ କୁଷ୍ଟରଗ୍ କାଟାକାନ୍ ରକାନ୍ ଯୀଶୁ ଲାଗାୟ୍ ୱାଜି ଜୱାର୍କିଜି ୱେଚ୍ଚାନ୍, “ଏ ଆଜ୍ଞା ଯଦି ଏନେଙ୍ଗ୍ ମାନ୍କିତିସ୍। ନାଙ୍ଗେଙ୍ଗ୍ ହାର୍ କିଦ୍ନାଇ।”
3ହେବେତାଙ୍ଗ୍ ଯୀଶୁ କେଇ ଲାମାୟ୍ କିଜି ତାଙ୍ଗେଙ୍ଗ୍ ଆସ୍ପାତାନ୍ ଆରେ ୱେଚ୍ଚାନ୍, “ଆନେଙ୍ଗ୍ ମାନ୍ କିଦ୍ନାଙ୍ଗା ହାର୍ ଆ।” ହେଦାପ୍ରେ ହେ କୁଷ୍ଟରଗ୍ କାଟାକାନ୍ ହାର୍ ଆତାନ୍। 4ଯୀଶୁ ହେୱାନିଙ୍ଗ୍ ଆଦେସ୍ ହିଜି ୱେଚ୍ଚାନ୍, “ଇନେରିଙ୍ଗ୍ ପା ୱେଚ୍ମା ମାତର୍ ହାଲା, ଈଶ୍ୱର ହେବାକିନି ପୁଜାରିତାକେ ହାର୍ ଆତାଙ୍ଗ୍ ଇଞ୍ଜି ୱେଚା, ଆରେ ମୋଶା ଲେକିକିତି ନିୟମ୍ତାଙ୍ଗ୍ ଈଶ୍ୱରତିଙ୍ଗ୍ ପୁଜାକିତିସ୍ ଏନେଙ୍ଗ୍ ବିଦିଅନୁସାତାଙ୍ଗ୍ ହାର୍ ଆନାୟ୍, ଆରେ ୱିଜାକାର୍ ହାର୍ ଆତାନ୍ ଇଞ୍ଜି ପୁଞ୍ଜ୍ନାର୍।”
ଯୀଶୁ ରମିୟ ସେନାପତିଙ୍ଗ୍ ହାର୍କିତାନ୍
(ଲୁକ. ୭:୧-୧୦)
5ଯୀଶୁ କପୁର୍ନାହୁମ୍ ସହର୍ତାକେ ହାଚି ପାଚେ, ରକାନ୍ ରୋମ୍ ଦେସ୍ତି ଶହେଜାଣ୍ ସେନାର୍ତାଙ୍ଗ୍ ମୁଡ଼୍ଦାକାନ୍ ତା ଲାଗେ ୱାଜି ଗୁୱାରି କିଜି ୱେଚ୍ଚାନ୍। 6“ଏ ମାପୃ, ନା ହଲିଆ ହିର୍କଲ୍ ରଗ୍ତାଙ୍ଗ୍ ବେସି କଷ୍ଟ ପାୟାଆଜି ଲେମ୍ଦେଙ୍ଗ୍ ଆଡୁନା, ଆରେ ହେୱାନ୍ ଇଞ୍ଜ ଟାଟିତ ନେ ମାକ୍ତାନ୍ନା।”
7ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ୱାଜି ହେୱାନିଙ୍ଗ୍ ହାର୍ କିନାଙ୍ଗ୍।”
8ମାତର୍ ଶତ୍ସେନାପତି ୱେଚ୍ଚାନ୍, “ମାପୃ ଏନେଙ୍ଗ୍ ମାଞ୍ଜ ୱାନାଇ, ଇନେସ୍କି ହେଦାଙ୍ଗ୍ କାଜିଙ୍ଗ୍ ଆନେଙ୍ଗ୍ ସାମାନ୍ ଆକାୟ୍। ଏନେଙ୍ଗ୍ ଇବେତାଙ୍ଗ୍ ରପାଦ୍ ଆଦେସ୍ ହିଦା, ଇନେସ୍କି ନା ହଲିଆ ହାର୍ ଆନାନ୍। 9ଆନେଙ୍ଗ୍ ପା ରକାନ୍ ଗାଜାକାନ୍ ତାକେ କାମାୟ୍ କିନାଙ୍ଗା। ନା ତାରେନ୍ କେତେକ୍ ସେନାର୍ ମାନାର୍, ଆନେଙ୍ଗ୍ ଯଦି ର ସେନାଙ୍ଗ୍ ୱେଚ୍ନାଙ୍ଗ୍, ହାଲା ଇଚିସ୍ ହେୱାନ୍ ହାନାନ୍। ଆନେଙ୍ଗ୍ ଯଦି ଆରେ ରକାନିଙ୍ଗ୍ ୱେଚ୍ନାଙ୍ଗ୍ ୱା ଇଚିସ୍ ହେୱାନ୍ ୱାନାନ୍। ଆନେଙ୍ଗ୍ ଯଦି ନା ହଲିଆଙ୍ଗ୍ ଇଦାଙ୍ଗ୍ କିୟା ଇଚିସ୍ ହେୱାନ୍ ହେଦାଙ୍ଗ୍ କିନାନ୍।
10ଯୀଶୁ ଇଦାଙ୍ଗ୍ ୱେନ୍ଞ୍ଜି ଚାନିଆ ଆତାନ୍। ତାପାଚେ ୱାଜିମାଚି ମାନାୟାରିଙ୍ଗ୍ ୱେଚ୍ଚାନ୍, ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଯେ ଇଲେକେ ପାର୍ତି କିନାକାରିଙ୍ଗ୍ ଇସ୍ରାଏଲତ ମାନି ମାନାୟାର୍ତାକେ ଇନେର୍ତାକେ ପା ହୁଡ଼୍ୱାତାଙ୍ଗ୍ନା।” 11ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, “କେତେକ୍ ମାନାୟ୍ ପୁର୍ବ, ପଶ୍ଚିମତାଙ୍ଗ୍, ୱାଜି ଅବ୍ରାହାମ୍, ଇସାକ ଆରେ ଯାକୁବ ଲାହାଙ୍ଗ୍ ଈଶ୍ୱର ସାସନ୍ କିନି ରାଜିତାକେ କାଦି ଚିଞ୍ଜେଙ୍ଗ୍ କୁଚ୍ନାର୍। 12ମାତର୍ ଯିହୁଦିର୍ ମାନାୟାରିଙ୍ଗ୍ ବାର୍ତ ମାଜ୍ଗାତାକେ ତୁସିହିନାର୍। ହେବେ ହେୱାର୍ ଦୁକ୍ କଷ୍ଟତାଙ୍ଗ୍ ଟାଡାଙ୍ଗ୍ କାପ୍ଚି କିଲ୍ବିଲ୍ ଆନାର୍।”
13ଆରେ ଯୀଶୁ ଶହେଜାଣ୍ନି ସତ୍ସେନାପତିଙ୍ଗ୍ ୱେଚ୍ଚାନ୍, “ଇଞ୍ଜ ହାଲା, ଏନେଙ୍ଗ୍ ଇନେସ୍ ପାର୍ତି କିତାୟ୍ନା, ନିଙ୍ଗେଙ୍ଗ୍ ହେଲେକେ ଆଏତ୍। ହେ ଚେଲାହି ହେ ରଗ୍ତାଙ୍ଗ୍ ହାର୍ ଆତାନ୍।
ଯୀଶୁ ବେସିହେନି ମାନାୟ୍ତିଙ୍ଗ୍ ହାର୍କିତାନ୍
(ମାର୍କ. ୧:୨୯-୩୪; ଲୁକ. ୪:୩୮-୪୧)
14ପାଚେ ଯୀଶୁ ପିତର ଇଞ୍ଜ ହାଲ୍ଜି ଶିମୋନ (ପିତର) ପଦାହି ନଚ୍ନାକା ହୁନ୍ଞ୍ଜି ମାଚାକା ହୁଡ଼୍ତାନ୍। 15ହେବେତାଙ୍ଗ୍ ହେୱାନ୍ ପିତର ପଦାହିଙ୍ଗ୍ ଆସ୍ପାତାନ୍, ଆରେ ହେଦେଲିଙ୍ଗ୍ ନମେର୍ ପିସ୍ତାତ୍, ହେଦେଲ୍ ତିଦ୍ବିସ୍ ତା ହେବା କିଦେଙ୍ଗ୍ ଲାଗାତାତ୍।
16ଯିହୁଦିର୍ ଜମ୍ନିଦିନ୍ ୱିସ୍ତି ମିକାହାରେସ୍ କେତେକ୍ ବୁତ୍ଆତ୍ମା ଡୁୟାଆତାକାରିଙ୍ଗ୍ ଯୀଶୁ ଲାଗାୟ୍ ତାତାର୍, ହେବେ ଯୀଶୁ ବେଣ୍ ୱେଚିଦାପ୍ରେ ବୁତ୍କୁ ପିସ୍ତି ହାଚିକ୍। ଆରେ ୱିଜୁ ରଗିୟାରିଙ୍ଗ୍ ହାର୍କିତାନ୍। 17ହେଲେକେ ଭବିଷ୍ଯତବକ୍ତା ଯିଶାୟ ତା ବେଣ୍ ୱେଚ୍ଚାକା ପୁରାଆନାତ୍, ହେଦାଙ୍ଗ୍ କାଜିଙ୍ଗ୍ ଯୀଶୁ ଇ କାମାୟ୍ ୱିଜୁକିଜି ମାଚାନ୍, ହେୱାନ୍ ନିଜେ ମା ଦୁକ୍କଷ୍ଟତିଙ୍ଗ୍ ୱିଜୁ ଆସ୍ତାନ୍ ଆରେ ମାଙ୍ଗେଙ୍ଗ୍ ହାର୍ କିତ୍ତାନ୍।”
ଯୀଶୁ ଚେଲା ଆଦେଙ୍ଗ୍ ଯଗ୍ଯ
(ଲୁକ. ୯:୫୭-୬୨)
18ଯୀଶୁ ତା ଚାରିବେଣ୍ତାଙ୍ଗ୍ ମାନାୟ୍ ୱାନାକା ହୁଡ଼୍ଜି ତା ଚେଲାହିରିଙ୍ଗ୍ ୱେଚ୍ଚାନ୍, ୱାଡ ଆସେଙ୍ଗ୍ ଗାଲିଲୀ ଜିଲ୍ଲାନି ହାମ୍ଦୁର୍ ଆରେ ର ପାଡ଼୍କା ହାନାସ୍।
19ଇନେସ୍ ହେୱାର୍ ହାଞ୍ଜେଙ୍ଗ୍ ରଞ୍ଚାର୍, ର ପଣ୍ଡିତ୍ ତା ଲାଗାୟ୍ ୱାଜି ୱେଚ୍ଚାନ୍, ଏ ଗୁରୁ, ଏନେଙ୍ଗ୍ ଇମ୍ଣି ବାହାତାକେ ହାନାୟ୍, ଆନେଙ୍ଗ୍ ନି ଚେଲା ଆଦେଙ୍ଗ୍ ନି ପାଚେ ୱାନାଙ୍ଗ୍।
20ହେବେତାଙ୍ଗ୍ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “କଲିଆ ମାଞ୍ଜେଙ୍ଗ୍ ପାରା ମାନାତ୍। ବାଦାଡ଼୍ତ ବୁଲା ଆନି ପଟିକାଙ୍ଗ୍ ଗୁଡା ମାନାତ୍। ମାତର୍ ଆନେଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତଙ୍ଗ୍ ଆନେଙ୍ଗ୍ (ଯୀଶୁ) ମାଞ୍ଜେଙ୍ଗ୍ ବାହା ହିଲେତ୍।”
21ଆରେ ଚେଲାହିର୍ ବିତ୍ରେତାଙ୍ଗ୍ ଆରେ ରକାନ୍ ଯୀଶୁଙ୍ଗ୍ ୱେଚ୍ଚାନ୍, “ଏ ମାପୃ ନାଙ୍ଗେଙ୍ଗ୍ ଆଗେ ନା ଆବାଙ୍ଗ୍ ଦୁଗେର୍ତ ମୁଚ୍ଚେଙ୍ଗ୍ ଆଦେସ୍ ହିଦା। ଆନେଙ୍ଗ୍ ନି ପାଚେ ଚେଲା ଆଦେଙ୍ଗ୍ ୱାନାଙ୍ଗ୍।”
22ମାତର୍ ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ନା ଚେଲା ଆଦେଙ୍ଗ୍ ନା ପାଚେ ୱା। ଇମ୍ଣାକାର୍ ଆତ୍ମାତାଙ୍ଗ୍ ହାଃତାକାର୍ ଇ ହାଃତି ମାନାୟାରିଙ୍ଗ୍ ଦୁଗେର୍ତ ଅଜି ମୁଚ୍ନାର୍।”
ଯୀଶୁ ବାର୍ହା ଦୁକାତିଙ୍ଗ୍ ତିର୍କିତାନ୍
(ମାର୍କ. ୪:୩୫-୪୧; ଲୁକ. ୮:୨୨-୨୫)
23ଯୀଶୁ ଡଙ୍ଗାତାକେ ହାଲ୍ଜି ଦୁମ୍ତାନ୍ ଆରେ ତା ଚେଲାହିର୍ ପା ହାଲ୍ଜି ଦୁମ୍ତାର୍। 24ହେପାଦ୍ନା ହାମ୍ଦୁର୍ତାକେ ହାନିହିଙ୍ଗ୍, ତିପ୍କୁ ଜବର୍ଡ଼ୁଇ ଆତାତ୍, ଆରେ ଡଙ୍ଗାତିଙ୍ଗ୍ ଲଉଡ଼ି ଏଜୁଙ୍ଗ୍ ଡଙ୍ଗାବିତ୍ରେ ହଟିଲେ ଡଙ୍ଗା ମୁନ୍ଜେଙ୍ଗ୍ ହାଙ୍ଗ୍ତାତ୍, ହେପାଦ୍ନା ଯୀଶୁ ଡଙ୍ଗାତ ହୁନ୍ଞ୍ଜି ମାଚାନ୍। 25ଆରେ, ଚେଲାହିର୍ ଲାଗାୟ୍ ହାଲ୍ଜି ଯୀଶୁଙ୍ଗ୍ ନିକ୍ଚି ୱେଚ୍ଚାର୍, “ଏ ଗୁରୁ, ଡଙ୍ଗା ମୁଞ୍ଜ୍ନାତ୍ଦେ ମାଙ୍ଗେଙ୍ଗ୍ ଉଦାର୍ କିଦା।”
26ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ହେ ଅଲପ୍ ପାର୍ତି କିନାକାଦେର୍ ଏପେଙ୍ଗ୍ ଇନା କିଦେଙ୍ଗ୍ ଏଚେକ୍ ପାଣ୍ଡ୍ରା ଆନାଦେରା? ହେପାଦ୍ନା ଯୀଶୁ ନିଙ୍ଗ୍ଞ୍ଜି ଡ଼ୁଇ ଆରେ ଲଉଡ଼ିତିଙ୍ଗ୍ ଆଦେସ୍ ହିତାନ୍, ଆରେ ୱିଜୁ ତିର୍ ଆତାତ୍। 27ହେବେତାଙ୍ଗ୍ ଚେଲାହିର୍ ଚାନିଆ ଆଜି ୱେଚ୍ଚାର୍, ଇୱାନ୍ ଇନେସ୍ ଲେଗ୍ଦି ମାନାୟ୍?” ଡ଼ୁଇ ଆରେ ଲଉଡ଼ି ପା କାତା ମାନିକିନିକା।
ଯୀଶୁ ବୁତ୍ ଡୁୟାଆତାକାରିଙ୍ଗ୍ ରିଆରିଙ୍ଗ୍ ହାର୍କିତାନ୍
(ମାର୍କ. ୫:୧-୨୦; ଲୁକ. ୮:୨୬-୩୯)
28ଯୀଶୁ ଆରେ ତା ଚେଲାହିର୍ ଗାଲିଲୀନି ହାମ୍ଦୁର୍ ହେ ପାଡ଼୍କା ଗଦରିୟର୍ ମାନି ନାସ୍ତ ହାଚାର୍। ଯୀଶୁ ଡଙ୍ଗାତାଙ୍ଗ୍ ଜୁତିଦାପ୍ରେ ରିଆର୍ ବୁତ୍ଆତ୍ମା ଡୁୟାଆତାକାର୍ ଦୁଗେର୍ ବାଟାତାଙ୍ଗ୍ ହସି ଯୀଶୁଙ୍ଗ୍ ଗିଟାଆତାର୍। ହେୱାର୍ ବୟଙ୍କାର୍ ବାୟାଲେକେ ଆଜି ମାନାୟାରିଙ୍ଗ୍ ପାଣ୍ଡ୍ରୁକିଜି ମାଚାର୍, ହେଦାଙ୍ଗ୍ କାଜିଙ୍ଗ୍ ହେୱାର୍ ମାନି ହାଜ୍ଦିଙ୍ଗ୍ ଇନେର୍ ପା ହାଞ୍ଜେଙ୍ଗ୍ ଆଡ୍ୱାଦାଙ୍ଗ୍ ମାଚାର୍। 29ଆରେ ଯୀଶୁଙ୍ଗ୍ ହୁଡ଼୍ତି ଦାପ୍ରେ, ହେ ବୁତ୍ ଡୁୟାଆତାକାର୍ ଚେରାଆଜି ୱେଚ୍ଚାର୍, “ଏ ଈଶ୍ୱର ମେହି ଯୀଶୁ, ମା ଲାଗାୟ୍ ନିଦାଙ୍ଗ୍ ଇନା କାମାୟ୍ ମାନାତ୍? ଈଶ୍ୱର ଦଣ୍ଡ୍ ହିଦ୍ୱି ଆଗେ ଏନେଙ୍ଗ୍ ମାଙ୍ଗେଙ୍ଗ୍ ଦୁକ୍କଷ୍ଟ ହିଦ୍ଦେଙ୍ଗ୍ ୱାତାୟ୍ନା?” 30ହେପାଦ୍ନା ହେୱାର୍ତାଙ୍ଗ୍ ଅଲପ୍ ଦେହା ର ପାଞ୍ଜି ମାନ୍ଦା ହାରା ଆଜି ମାଚିକ୍। 31ବୁତ୍ଆତ୍ମାକ୍ ଯୀଶୁଙ୍ଗ୍ ଗୁୱାରି କିଜି ୱେଚ୍ଚିକ୍, “ମାଙ୍ଗେଙ୍ଗ୍ ଯଦି ଇ ମାନାୟାର୍ତାଙ୍ଗ୍ ହପ୍ତେଦେଙ୍ଗ୍ ମାନ୍ କିନାଇ ଇ ପାଞ୍ଜିଙ୍ଗ୍ ବିତ୍ରେ ହଣ୍ଡେଙ୍ଗ୍ ମାଙ୍ଗେଙ୍ଗ୍ ଆଦେସ୍ ହିଦା।”
32ଯୀଶୁ ହେୱାରିଙ୍ଗ୍ ଆଦେସ୍ ହିତାନ୍, “ହାଲାଟ୍!” ଲାଗିଙ୍ଗ୍ ହେ ବୁତ୍ଆତ୍ମାଙ୍ଗ୍ ହେ ମାନାୟ୍ତାଙ୍ଗ୍ ୱିଜୁ ହସି ପାଞ୍ଜିଙ୍ଗ୍ ବିତ୍ରେ ହଟିକ୍। ହେଦାଙ୍ଗ୍ କାଜିଙ୍ଗ୍ ଦୁଇହାଜାର୍ ପାଞ୍ଜିଙ୍ଗ୍ ବେଗି-ବେଗି ହନ୍ଚି ହାଲ୍ଜି ଡେଙ୍ଗା କାଣ୍ଡିତାଙ୍ଗ୍ ହାମ୍ଦୁର୍ ବିତ୍ରେ ଆର୍ଜି ହାତିକ୍। ଦୁଇହାଜାର୍ ପାଞ୍ଜିଙ୍ଗ୍ ମାଚିକ୍। 33ପାଞ୍ଜିଙ୍ଗ୍ ହାରାୟ୍ କିନି ମାନାୟାର୍ ହନ୍ଚି ହାଲ୍ଜି ସହର୍ ଆରେ କଚଣ୍ନି ନାସ୍କୁକାଙ୍ଗ୍ ମାନାୟାର୍ତାଙ୍ଗ୍ ବୁତ୍କୁ ହସି ହାଚାକା ଆରେ ପାଞ୍ଜିଙ୍ଗ୍ ଇନେସ୍ଆଜି ହାଃତିକ୍ ହେ ବିଷୟରେ ୱେଚ୍ଚାର୍। 34ହେବେତାଙ୍ଗ୍ ସହର୍ନି ୱିଜାକାର୍ ମାନାୟ୍ ଯୀଶୁଙ୍ଗ୍ ହୁଡ଼୍ଦେଙ୍ଗ୍ ୱାତାର୍। ଇନେରିଙ୍ଗ୍ ଆଗେ ବୁତ୍ଆତ୍ମାକ୍ ଡୁଜି ମାଚିକ୍, ହେୱାରିଙ୍ଗ୍ ହେନ୍ଦ୍ରା ଉସ୍ପି ହାଦ୍ଦାରୁମ୍ ଆଜି କୁଚ୍ଚାକା ହୁଡ଼୍ତାର୍। ଆରେ, ଯୀଶୁଙ୍ଗ୍ ହୁଡ଼୍ଜି ହେୱାର୍ ତା ହାନ୍ଦିତାଙ୍ଗ୍ ଇବାହା ପିସ୍ତି ହାଞ୍ଜେଙ୍ଗ୍ ଗୁୱାରି କିତାର୍।
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
