ମାଥିଉ 19
19
ଯୀଶୁ ହେଲୱାଇ ନାଟ୍ନି ବିଷୟରେ ହିକ୍ଷା ହିତାନ୍
(ମାର୍କ. ୧୦:୧-୧୨)
1ଯୀଶୁ ଇ ୱିଜୁବେଣ୍ ୱେଚ୍ଚି ୱିସ୍ତି ପାଚେ ଗାଲିଲୀ ଜିଲ୍ଲାତାଙ୍ଗ୍ ହାଲ୍ଜି ଯର୍ଦ୍ଦନ ନାଗୁଡ଼୍ ଆରେ ର ପାଡ଼୍କା ଯିହୁଦା ଜିଲ୍ଲାନି ହାନ୍ଦିତାକେ ଏକାତାନ୍। 2ଆରେ ବେସିହେନି ମାନାୟ୍ ତାପାଚେ ପାଚେ ହାଚାର୍। ଆରେ ହେୱାନ୍ ହେବେ ହେୱାରିଙ୍ଗ୍ ହାର୍କିତାନ୍।
3ତାପାଚେ ପାରୁସିଦଳ୍ନି ମାନାୟାର୍ ଯୀଶୁଙ୍ଗ୍ ଗୁପାଇ କିଦେଙ୍ଗ୍ ୱେନ୍ବାତାର୍, “ଇନା ବିଷୟରେ ପା ଆଣ୍ଡ୍ରେନ୍ କଗ୍ଲେଙ୍ଗ୍ ହେଲ ନାଟ୍ନାକା ନିୟମ୍ ମାନାତ୍ କି?” 4ହେୱାନ୍ ୱେଚ୍ଚାନ୍, “ଏପେଙ୍ଗ୍ ଇନାକା ସାସ୍ତର୍ତାକେ ପଡ଼ି କିୱାତାଦେର୍ନା ଈଶ୍ୱର ହେୱାରିଙ୍ଗ୍ ଆଗେ ଆଣ୍ଡ୍ରେନ୍ ଆରେ କଗ୍ଲେ କିଜି ରସ୍ତାନ୍।
5ହେଦାଙ୍ଗ୍ କାଜିଙ୍ଗ୍ ଆଣ୍ଡ୍ରେନ୍ ଆବା ଆରେ ଆୟାଙ୍ଗ୍ ପିସ୍ତି ଜାର୍ କଗ୍ଲେ ହୁଦାଙ୍ଗ୍ ମେହାଆଜି ମାନ୍ଗାନାର୍। ଆରେ ହେୱାନ୍ ରିୟାର୍ ରକାନ୍ ଲେକେ ଆଜି ମାନ୍ଗାନାର୍। 6ଲାଗିଙ୍ଗ୍ ହେୱାର୍ ଆରେ ରିୟାର୍ ଆଜି ମାନୁର୍ ମାତର୍ ର ଗାଗାଡ଼୍ ଆଜି ମାନାର୍। ଲାଗିଙ୍ଗ୍ ଈଶ୍ୱର ଇମ୍ଣି ରିୟାରିଙ୍ଗ୍ ରବେ ମେହାଇ କିତାତ୍ନା, ଇନେର୍ ପା ହେୱାରିଙ୍ଗ୍ ବାଙ୍ଗାୟ୍ କିମାଟ୍।”
7ଆରେରଗ ପାରୁସିଦଳ୍ ଯୀଶୁଙ୍ଗ୍ ୱେନ୍ବାତାର୍, ଲାଗିଙ୍ଗ୍ ମୋଶା ତା ଲେକିକିତି ସାସ୍ତର୍ତାକେ ଇନା କିଦେଙ୍ଗ୍ କଗ୍ଲେଙ୍ଗ୍ ହେଲୱାଇ ନାଡ଼୍ତେଙ୍ଗ୍ ୱେଚ୍ଚାନ୍ନା? 8ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଈଶ୍ୱରତିଙ୍ଗ୍ ୱିଜୁଦିନ୍ ମାନିକିୱାଦାଙ୍ଗ୍ ମାଚିଲେ ମୋଶା ମିଙ୍ଗେଙ୍ଗ୍ ଇ ଆଦେସ୍ ହିତ୍ତାନ୍ନା। ମାତର୍ ଆଗେ କଗ୍ଲେଙ୍ଗ୍ ହେଲୱାଇ ନାଟ୍ନାକା ଈଶ୍ୱର ୱେଚ୍ୱାଦାଙ୍ଗ୍ ମାଚାନ୍।” 9ମାତର୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, “ଇନେର୍ ପା ନିଜର୍ କଗ୍ଲେଙ୍ଗ୍ ଦସ୍ ଆୱାଦାଙ୍ଗ୍ ଦାରି କିତାୟ୍ ଇଞ୍ଜି ହେଦେଲିଙ୍ଗ୍ ପିହ୍ନାନ୍, ହେୱାନ୍ ଦାରୁଲା କିନାନ୍।”
10ଚେଲାହିର୍ ଯୀଶୁଙ୍ଗ୍ ୱେଚ୍ଚାର୍, “ଯଦି ର ଆଣ୍ଡ୍ରେନ୍ ତା କଗ୍ଲେଙ୍ଗ୍ ହେଲୱାଇ ନାଡ଼୍ତେଙ୍ଗ୍ ନେ ମାନ୍କିତିସ୍, ଲାଗିଙ୍ଗ୍ ହେୱାନ୍ ବିବା ଆୱିତିସ୍ ହାର୍।” 11ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ୱିଜାକାର୍ ବିବା ଆୱାଦାଙ୍ଗ୍ ମାଞ୍ଜେଙ୍ଗ୍ ଆଡୁର୍। ମାତର୍ ମାପୃ ଇନେରିଙ୍ଗ୍ ଶାକ୍ତି ହିତ୍ତାନ୍ନା ହେୱାର୍ ନେ ବିବା ଆୱାଦାଙ୍ଗ୍ ମାଞ୍ଜେଙ୍ଗ୍ ଆଡ୍ନାର୍। 12ମାତର୍ ଇନେର୍ ତା ଆୟା ଗରବ୍ତାଙ୍ଗ୍ ବେଜୁ ଜନମ୍ ଆନାର୍। ଆରେ ଇନେର୍-ଇନେର୍ ମାନାୟ୍ତାଙ୍ଗ୍ ବେଜୁ କିୟାଆତାର୍ନା। ଆରେ ଇନେର୍-ଇନେର୍ ଈଶ୍ୱର ସାସନ୍ କିନି ରାଜି କାଜିଙ୍ଗ୍ ଜାର୍ତିଙ୍ଗ୍ ବେଜୁ ଆଜି ମାନ୍ଗାନାର୍। ଇମ୍ଣାକା ଇ ହିକ୍ଷାତିଙ୍ଗ୍ ୱେନ୍ଞ୍ଜି ବୁଜାଆନାଦେର୍ ହେ ହିସାବ୍ରେ ହେୱାନ୍ କାମାୟ୍ କିୟେନ୍।”
ଯୀଶୁ ହିମ୍ଣାକାଙ୍ଗ୍ ଆଶ୍ରିବାଦ୍ କିତାନ୍
(ମାର୍କ. ୧୦:୧୩-୧୬; ଲୁକ. ୧୮:୧୫-୧୭)
13ହେପାଦ୍ନା ଯୀଶୁ ହେଲେକେ ହିରୁ ହିମ୍ଣାଙ୍ଗ୍ ଜପି କେଇ ଇଡ଼୍ଜି ପାର୍ତାନା କିଜି ଆଶ୍ରିବାଦ୍ କିନାନ୍। ଇଦାଙ୍ଗ୍ କାଜିଙ୍ଗ୍ ହେବେ ହେୱାରିଙ୍ଗ୍ ତା ଲାଗାୟ୍ ତାସିୱାତାର୍। ମାତର୍ ତା ଚେଲାହିର୍ ତାସିୱାନି ମାନାୟାରିଙ୍ଗ୍ କେତ୍ତାର୍। 14ମାତର୍ ଯୀଶୁ ୱେଚ୍ଚାନ୍, “ହିରୁ-ହିରୁ ଗାଡ଼୍ଚେ ହିମ୍ଣାକାଙ୍ଗ୍ ନା ଲାଗେ ତାହିୱାଦେଙ୍ଗ୍ ପିସ୍ତି ହିୟାଟ୍, ହେୱାରିଙ୍ଗ୍ ନା ଲାଗେ ୱାଦେଙ୍ଗ୍ ମୁନା କିମାଟ୍। ଇନେସ୍କି ଈଶ୍ୱର ସାସନ୍ କିନି ରାଜି ଇ ଗାଡ଼୍ଚେ ହିମ୍ଣାଙ୍ଗ୍ ତି ଲେକେ।” 15ଆରେ ଯୀଶୁ ହେ ଗାଡ଼୍ଚେକ୍ ହିମ୍ଣା ଜପି କେଇ ଇଡ଼୍ଜି ଆଶ୍ରିବାଦ୍ କିତାନ୍ ଆରେ ହେ ବାହାତାଙ୍ଗ୍ ହାଚାନ୍।
ରକାନ୍ ସାଉକାର୍ ବେଣ୍ଡିଆ
(ମାର୍କ. ୧୦:୧୭-୩୧; ଲୁକ. ୧୮:୧୮-୩୦)
16ଆରେ ହୁଡ଼ାଟ୍, ରକାନ୍ ଯୀଶୁ ଲାଗେ ୱାଜି ୱେନ୍ବାତାନ୍, “ଏ ଗୁରୁ, ୱିଜ୍ୱି ଜିବୁନ୍ ପାଇକିଦେଙ୍ଗ୍ ଆନେଙ୍ଗ୍ ଇନାକା କିଦେଙ୍ଗ୍ ଆନାତ୍?” 17ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ହାର୍ଦି କାମାୟ୍ ବିଷୟରେ ଇନା କିଦେଙ୍ଗ୍ ନାଙ୍ଗେଙ୍ଗ୍ ୱେନ୍ବା ଆଦ୍ନାଦେରା? ମାତର୍ ହାର୍ଦାକାନ୍ ରକାନ୍। ଏପେଙ୍ଗ୍ ଯଦି ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଇଚା କିନାଦେରା, ଲାଗିଙ୍ଗ୍ ମାପୃ ଆଦେସ୍ତିଙ୍ଗ୍ ୱିଜୁ ମାନି କିୟାଟ୍।”
18ହେୱାନ୍ ଯୀଶୁଙ୍ଗ୍ ୱେନ୍ବାତାର୍, “ଇନେସ୍-ଇନେସ୍ ବାର୍ତି ଆଦେସ୍?” ଯୀଶୁ ୱେଚ୍ଚାନ୍, “ଇୱିଜୁ ମାନାୟ୍ ଅହ୍ମାଟ୍, ଦାରି କିମାଟ୍, ଚର୍ କିମାଟ୍, ମିଚ୍ ସାକି ହିମାଟ୍, 19ଆୟାଆବାରିଙ୍ଗ୍ ସନ୍ମାନ୍ କିୟାଟ୍। ଆରେ ମି ପାଡ଼୍ହା ଇଞ୍ଜାକାରିଙ୍ଗ୍ ଲାଡ୍ କିୟାଟ୍।”
20ହେ ଦାଙ୍ଗ୍ଣେନ୍ ଯୀଶୁଙ୍ଗ୍ ୱେଚ୍ଚାନ୍, “ଇୱିଜୁ ଆଦେସ୍ତିଙ୍ଗ୍ ତ ଆନେଙ୍ଗ୍ ମାନି କିତାଙ୍ଗ୍ନା, ନାତାଙ୍ଗ୍ ଆରେ ଇନାକା ବାକି ମାନାତ୍?” 21ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଯଦି ଏନେଙ୍ଗ୍ ପୁରା ଟିକ୍ ଆଦେଙ୍ଗ୍ ଇଚା କିନାୟା, ଏନେଙ୍ଗ୍ ହାଲ୍ଜି ନିତାଙ୍ଗ୍ ୱିଜେ ଦନ୍ ସମ୍ପତି ପସି ନାସ୍କି ନିକାରିଙ୍ଗ୍ ଡାବୁଙ୍ଗ୍ ହିୟା। ଆରେ ନା ପାଚେ ୱା, ଆରେ ଏନେଙ୍ଗ୍ କିତିସ୍ ସରଗ୍ତାକେ ଦନ୍ ପାୟାଆନାୟ୍।” 22ମାତର୍ ଇ ବେଣ୍ ୱେନ୍ଞ୍ଜି ଦାଙ୍ଗ୍ଣେନ୍ ଦୁଃକ୍ ଆଜି ହସିହାଚାନ୍। ଇନେସ୍କି ତାବେ ବେସି ଦନ୍ ସମ୍ପତି ମାଚାତ୍।
23ହେବେତାଙ୍ଗ୍ ଯୀଶୁ ତା ଚେଲାହିରିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ସାଉକାର୍ ମାନାୟ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ବେସି କଷ୍ଟ।” 24ଆରେରଗ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, “ର ଉଟ୍ ପଶୁ ହୁଜାକାଣା ତ ହଣାକା କଷ୍ଟ। ମାତର୍ ର ହାଉକାର୍ ମାନାୟ୍ ଈଶ୍ୱର ସାସନ୍ କିନି ରାଜିତାକେ ହାନାକା ହେବେତାଙ୍ଗ୍ ଆରେ ଇଦାଙ୍ଗ୍ ବେସି କଷ୍ଟ।”
25ଚେଲାହିର୍ ଇବେଣ୍ ୱେନ୍ଞ୍ଜି କାବାଆଜି ୱେଚ୍ଚାର୍, “ଇନେର୍ ରକ୍ଷା ପାୟାଆନାର୍?”
26ଯୀଶୁ ଚେଲାହିରିଙ୍ଗ୍ ର ହାଣ୍କୁ ହୁଡ଼୍ଜି ୱେଚ୍ଚାନ୍, “ଇ କାମାୟ୍ ମାନାୟାର୍ କିଦେଙ୍ଗ୍ ଆଡୁର୍। ମାତର୍ ଈଶ୍ୱର କିଦେଙ୍ଗ୍ ଆଡ୍ନାନ୍, ଈଶ୍ୱର ୱିଜୁ ବିଷୟ କିଦେଙ୍ଗ୍ ଆଡ୍ନାନ୍।”
27ହେବେ ପିତର ଯୀଶୁଙ୍ଗ୍ ୱେଚ୍ଚାନ୍, “ହୁଡ଼ା, ଆପେଙ୍ଗ୍ ୱିଜୁ ପିସ୍ତି ନି ପାଚେ-ପାଚେ ୱାତାପ୍ ଆରେ ନି ଚେଲା ଆତାପ୍ନା। ଆପେଙ୍ଗ୍ ପା ଇନାକା ପାୟାଆନାପ୍?”
28ଯୀଶୁ ୱେଚ୍ଚାନ୍, “ମିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା। ପୁନି ଯୁଗ୍ଦ ଏଚେକାଡ଼୍ଦ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ତା ଜୟ୍-ଜୟ୍ ପାୟାଆନି ସିଂହାସନ୍ତାକେ କୁଚ୍ନାନ୍, ହେପାଦ୍ନା ନା ବାରଜାଣ୍ ଚେଲାର୍ ପା ବାରଗଟା ସିଂହାସନ୍ତାକେ କୁଚ୍ଚି ଇସ୍ରାଏଲନି ବାରଗଟା କୁଟୁମ୍ନି ମାନାୟାରିଙ୍ଗ୍ ସାସନ୍ କିନାର୍।
29ଆରେ ଇନେର୍ ପା ନା ତର୍ଦାଙ୍ଗ୍ ତା ଇଲ୍ଗାଣ୍, ଟଣ୍ଡେନ୍, ତଣ୍ଦେହିଙ୍ଗ୍, ଆୟାଆବାରିଙ୍ଗ୍, ହିମ୍ଣାୱାକ୍ଡ଼ା, ଆରେ ଜମିବାଡ଼ିତିଙ୍ଗ୍ ପିସ୍ତି ନା ପାଚେ ୱାଜି ନା ହାର୍ଦିକାବୁର୍ ୱେଚ୍ଚି ବୁଲାଆନାନ୍। ହେୱାନ୍ ୱିଜୁ ଗୁଣ୍ ପାୟଆନାନ୍। ଆରେ ୱିଜ୍ୱି ଜିବୁନ୍ ପାୟା ଆନାନ୍। 30ମାତର୍ ଇମ୍ଣାକାର୍ ନଙ୍ଗୟ୍ ଗାଜା ଆତାର୍ନା ହେୱାର୍ ହିରୁ ଆନାର୍। ଆରେ ଇମ୍ଣାକାର୍ ନଙ୍ଗୟ୍ ହିରୁ ମାନାର୍ ହେୱାର୍ ପାଚେ ଗାଜା ଆନାର୍।”
Pengo Parja Bible by The Love Fellowship is licensed under Creative Commons Attribution-ShareAlike 4.0 License.
