Jovan 9
9
O Isus sasljari e manuše kova bijandilo kororo
1Sar nakhela ine adathar, o Isus dikhlja e manuše kova inele kororo taro bijandipe.
2A lesere učenici pučle le: “Učitelju, sose akava manuš bijandilo kororo? Adalese so ov ćerđa greh ili lesoro dad hem i daj?”
3A o Isus phenđa: “Nane kororo adalese so grešinđa ov ili lesoro dad ili i daj. Ov bijando kororo te šaj upro leste mothoj pe o delja e Devlesere zoralipnastar. 4Sari dive, valjani te ćera o delja Okolesere kova bičhalđa man. Avela i rat, kad niko našti te ćerel buti. 5Sar injum ko sveto, me injum svetlost e svetose.”
6Kad adava phenđa, čhungarđa ki phuv hem oto čhungar ćerđa čik, i adala čikaja makhlja e kororesere jaćha.
7Tegani o Isus phenđa lese: “Dža thov to muj ko bazeni Siloam.” (Siloam značini “Bičhaldo”.)
I o manuš dželo, thovđa plo muj hem irinđa pe čhere dikhindoj.
8A lesere komšije hem okola kola angleder džande le sar prosjako, pučle pe: “Nane li akava okova kova bešela ine hem prosini?”
9Nesave phende: “Ovi adava”, a avera phende: “Nane, nego samo ličini upro leste.”
A ov phenđa: “Me injum.”
10Tegani on pučle le: “Sar phravdile te jaćha?”
11A ov phenđa: “O manuš kova vičini pe Isus, ćerđa čik hem olaja makhlja mle jaćha, hem phenđa maje: ‘Dža ko Siloam hem thov to muj.’ I me dželjum, thovđum mlo muj hem leljum te dikhav.”
12On pučle le: “Kaj akana adava manuš?”
A ov phenđa lenđe: “Na džanav.”
O fariseja ispitujinena e sasljarde
13Tegani e manuše kova angleder inele kororo ande koro fariseja. 14A adava dive kad o Isus ćerđa i čik hem phravđa e kororesere jaćha inele savato. 15Adalese hem o fariseja pučle le sar phravdile lesere jaćha.
A ov phenđa lenđe: “Makhlja mle jaćha e čikaja, me thovđum mlo muj hem akana dikhava.”
16Tegani nesave fariseja phende: “Adava manuš nane e Devlestar, adalese so ćerela buti ko savato.”
A avera phende: “Sar šaj o grešniko te ćerel esavke čudesna znakija?”
Hem ađahar maškaro fariseja uli podela.
17I palem phende e kororese: “Adava manuš phravđa te jaćha. So tu mislineja olestar?”
A ov phenđa: “Ovi proroko.”
18Ali e jevrejengere vođe na verujinde da o manuš inele kororo hem da phravdile lesere jaćha sa đikote na vičinde lesere dade hem e daja.
19I pučle len: “Akava li tumaro čhavo kolese phenena da bijandilo kororo? Sar onda akana dikhela?”
20A lesoro dad hem i daj phende: “Džanaja dai akava amaro čhavo hem da bijandilo kororo. 21Ali, sar onda akana dikhela hem ko phravđa lesere jaćha, na džanaja. Ole pučen. Ovi beršalo hem šaj te vaćeri korkoro pese.”
22Lesoro dad hem i daj phende adava, adalese so darandile e jevrejengere vođendar, adalese so e jevrejengere vođe već odlučinde ine tari sinagoga te ikalen đijekhe kova priznajini e Isuse sar Hriste. 23Adalese lesoro dad hem i daj phende: “Ovi beršalo. Ole pučen!”
24Tegani pana jekhvar vičinde e manuše kova inele kororo, i phende lese: “Obećin anglo Devel da ka vaćere o čačipe! Amen džanaja dai adava manuš grešniko.”
25A ov phenđa lenđe: “Me na džanav da li ov grešniko. Džanav samo da injumle kororo, a akana dikhava.”
26A on palem pučle le: “So ćerđa će? Sar phravđa te jaćha?”
27A ov phenđa lenđe: “Adava već phenđum tumenđe, ali na šunđen man. Sose palem mangena adava te šunen? Na li hem tumen mangena te oven lesere učenici?”
28Tegani on lelje te vređinen le hem phende lese: “Tu injan lesoro učeniko, a amen injam e Mojsijasere učenici. 29Amen džanaja da o Devel vaćerđa e Mojsijase, a akalese na džanaja ni kotari.”
30A o sasljardo manuš phenđa lenđe: “Čačei čudno akava! Tumen na džanen kotari, a ov phravđa mle jaćha. 31Džanaja da o Devel na šunela e grešnonen, ali šunela okolen kolai pobožna hem kola ćerena lesiri volja. 32Niko nikad na šunđa da neko phravđa o jaćha e manušesere kova bijandilo kororo. 33Te na ovel ine e Devlestar, naka šaj ine ništa te ćerel.”
34A on phende lese: “Tu kova bijandiljan sa ano grehija arakhljan amen te sikaven!” Hem frdinde le tari sinagoga.
O duhovno kororipe
35O Isus šunđa so e sasljarde manuše frdinde tari sinagoga, i arakhlja le hem pučlja le: “Verujineja li ano Čhavo e manušesoro?”
36A ov phenđa lese: “Phen maje koi ov, Gospode, te šaj verujinav ano leste.”
37O Isus phenđa lese: “Već dikhljan le. Adavai okova kova vaćeri tuja.”
38Tegani ov phenđa: “Verujinava, Gospode.” I pelo ko kočija anglo Isus.
39O Isus phenđa lese: “Me aljum ko akava sveto te šaj e svetose ovel sudime, te šaj dikhen okola kola na dikhena hem te ačhoven korore okola kola mislinena da dikhena.”
40Nesave fariseja kola inele oleja šunde adava, i pučle le: “Te na injam hem amen korore?”
41A o Isus phenđa lenđe: “Te priznajinen ine da injen korore, naka oven ine kriva zako greh. Ali, adalese so phenena da dikhena, tumari krivica ačhola upra tumende.”
