Jovan 7
7
E Isusese na verujinena ni lesere phralja
1Palo adava o Isus džala ine maškari regija Galileja. Na manglja te džal ki regija Judeja, adalese so e jevrejengere vođe adari mangle te mudaren le.
2A avela ine paše e jevrejengoro Prazniko Senica, 3i e Isusesere phralja phende lese: “Ikljov akatar hem dža ki Judeja, te šaj dikhen te učenici o čudesija save ćereja. 4Adalese so, nijekh kova mangela te ovel pendžarutno, na garaj pe. Kad već ćereja esavke čudesija, mothov tut e svetose.”
5Adalese so čak ni lesere phralja na verujinde ano leste.
6A o Isus phenđa lenđe: “Mlo vreme pana na alo, a tumen šaj te džan kad god mangena. 7O sveto našti te mrzini tumen, ali man mrzini, adalese so svedočinava protiv oleste, dai lesere delja bišukar. 8Džan tumen zako prazniko, a me pana na džava adari, adalese so mlo vreme pana na alo.”
9Adava phenđa lenđe hem ačhilo ani Galileja.
O Isus sikaj ano Hram
10A kad lesere phralja džele te slavinen o prazniko, dželo hem ov, ali na javno, nego garavindoj.
11A e jevrejengere vođe zako prazniko rodinde le hem pučle: “Kaj okova?”
12Maškaro narodo but vaćerđa pe olestar. Nesave vaćerena ine: “Ovi šukar manuš”, dok avera nesave vaćerena: “Nane, prevarini e narodo.” 13Ali nijekh na vaćerđa olestar javno, adalese so darandile e jevrejengere vođendar.
14A ko ekvaš o prazniko, o Isus dželo ko Hram hem lelja te sikaj e narodo.
15Kad šunde le, e jevrejengere vođe začudinde pe, i pučle pe: “Sar akava edobor šukar džanel o Sveta lila, a nikad na inele sikavdo?”
16A o Isus phenđa lenđe: “Mlo sikaviba na avela mandar, nego Okolestar kova bičhalđa man. 17Ko mangela te ćerel e Devlesiri volja, ka džanel avela li akava sikaviba Olestar ili me vaćerava korkoro mandar. 18Ko vaćeri korkoro pestar, pese rodela slava. A ko rodela slava okolese kova bičhalđa le, vaćeri o čačipe hem koro leste nane hovajba. 19Na li o Mojsije dinđa tumen o Zakoni? A palem nijekh tumendar na ćerela palo Zakoni! Sose mangena te mudaren man?”
20O manuša phende: “Ana tute isi demoni! Ko mangela te mudari tut?”
21A o Isus phenđa lenđe: “Ćerđum jekh čudo hem sare divinena tumen. 22O Mojsije dinđa tumen o obreziba hem adalese tumen e čhavore obrezinena čak hem ko savato. Iako adava na avela e Mojsijastar, nego pana e pradadendar. 23I, te o manuš šaj te ovel obrezime ko savato, sar te na ovel phago e Mojsijasoro zakoni, sose edobor holjanena upra mande so ko savato sasljarđum sa o telo e manušesoro? 24Ma sudinen palo spoljašnjost, nego sudinen pravedno.”
Ano Jerusalim na verujinena dai o Isus o Hrist
25Tegani nesave manuša taro Jerusalim vaćerde: “Nane li akava okova kole dikhena te mudaren? 26A ače, ov javno vaćeri hem niko lafi na phenela lese. Te na halile amare šerutne dai ov čače o Hrist? 27Ali amen džanaja kotari ov, a kad o Hrist ka avel, niko naka džanel kotari.”
28I sar o Isus sikaj ine ano Hram, vičinđa: “Oja, pendžarena man! Hem džanen kotar injum! Na aljum korkoro mandar. Ali, čačikanoi Okova kova bičhalđa man, kole tumen na pendžarena. 29A me pendžarava le, adalese so me injum olestar hem Ov bičhalđa man.”
30Tegani on mangle te dolen le, ali niko na čhivđa plo vas upro leste, adalese so lesoro vreme pana na alo.
31A but džene taro narodo poverujinde ano leste, i phende: “O Hrist li, kad ka avel, ka ćerel više čudesna znakija nego so ćerđa len akava?”
O Isus vaćeri so ka irini pe ko Devel
32O fariseja šunde so o manuša adava garavindoj vaćerena e Isusestar, i on hem o šerutne sveštenici bičhalde nesave stražaren te dolen le.
33Tegani o Isus phenđa: “Pana hari ka ovav tumencar, a onda ka irinav man Okoleste kova bičhalđa man. 34Ka roden man, ali naka arakhen man, hem tumen našti te aven adari kaj me ka ovav.”
35Tegani e jevrejengere vođe vaćerde maškara pumende: “Kaj adava ov mislini te džal, a te našti amen te arakha le? Na li mislini te džal koro Jevreja kolai rasejime maškaro Grci hem te sikaj e Grkonen? 36So manglja te vaćeri adaleja kad phenđa: ‘Ka roden man, ali naka arakhen man’, hem: ‘Tumen našti te aven adari kaj me ka ovav’?”
O Devel ka del e Svetone Duho okolenđe kola verujinena ano Isus
37Kad inele o zadnjo hem o najbitno dive e praznikosoro, o Isus uštino ko pre hem vičindoj phenđa: “Tei neko žedno, nek avel mande hem nek pijel! 38Ko verujini ana mande, sar so vaćeri o Sveto lil, olestar ka thavden o lenja e dživde panjesoro.”
39A o Isus adava vaćerđa e Svetone Duhostar, kole valjande te priminen okola kola verujinena ano leste. Adalese so, tegani o Sveto Duho pana na inele dindo, adalese so o Isus pana na irinđa pe pese ani slava.
Nesave verujinena dai o Isus o Hrist, a nesave na
40Kad šunde akala lafija, but džene taro narodo phende: “Akavai čače o Proroko kole adžićeraja.”
41A avera phende: “Akavai o Hrist.”
A, palem, nesave avera phende: “Nane. O Hrist li ka avel tari Galileja? 42Na pisini li ano Sveto lil da o Hrist ka avel taro e Davidesoro potomstvo hem taro Vitlejem, taro gav kotari o David?”
43I ađahar zbog o Isus uli podela ano narodo. 44A nesave čak mangle te dolen le, ali niko na čhivđa plo vas upro leste.
E jevrejengere vođe na verujinena dai o Isus proroko
45I o stražarija irinde pe koro šerutne sveštenici hem koro fariseja, a on pučle len: “Sose na anđen e Isuse?”
46A o stražarija phende: “Niko nikad ađahar na vaćerđa sar adava manuš.”
47A o fariseja phende lenđe: “Hem tumen li prevarinđa? 48Na li neko e šerutnendar ili e farisejendar poverujinđa ano leste? Na. 49Nego, akavai narodo prokleto, adalese so na pendžari o Zakoni!”
50Tegani o Nikodim, okova kova angleder inele koro Isus, kovai jekh olendar, pučlja len: 51“Amaro li Zakoni mukela amenđe te osudina e manuše angleder nego so šunaja le hem dikhaja so ćerđa?”
52A on phende lese: “Te na injan hem tu tari Galileja? Rode ano Sveto lil hem ka dikhe da nijekh proroko na avela tari Galileja!”
53[I tegani sare dželefse čhere.
