Bwób Zitül 11
11
Babilon Tawa
1Ngaen, blaman ini tüpdü pamkolpamab darrpan wirri bóktan yarilürr; blamana dadan bóktan opore ikik kwarilürr. 2Pamkolpama enezan ngyabenkü ogoblórr olgabi, abüsa nólgabi banikda, da i Babilonia#11:2 Babilonia kantrri, oya darrü ngi módóga Ibrru bóktane: Syaenarr. kantrridü buruburu taptap tüp esenóp. Metat we bainóp. 3Da i tibióbka bóktan kwarilürr wagó, “Yao, mi errkya taptap marit poko tómbapóndakla, da mi zürüküm kubó tai bamngurre urdü!” Da ingülküpan pabodó ibü marit poko asi kwarilürr gri aelóm, akó motan#11:3 mota marit poko arüm klama. Mórrke-mórrke módóga: mortar. pabodó ama tarr, marit poko karrkukus arümüm. 4Da i bóktónóp wagó, “Mi errkya wirri basirr aeldakla tawapükü, kókó tawa soloa tai pülpül emrróne. Ene ngarkwatódó, mi sab mibiób ngi wirri nirre, ó ene igósüm mi sab koke barngeno bwób-bwób ini tüpdü.”
5⌊Lod⌋ ene wirri basirr ngakanóm we tübinürr akó tawa, pamkolpama ne kla nelnóp. 6Da Lod moboküpi we bóktanórr wagó, “I errkya darrpan pamkolpamako akó ibü darrpan bóktana. Ini wa zitüla, i sab ne kla tómbapónórre. Darrü kla sab ibüka müp koke yarile, i ne kla gyagüpi aman korale. 7Yao, mi módó ogoba ola ibü bóktan yarrisarri angónóm, igósüm i sab tibiób koke barrkrrule darrem-darrem.” 8Da módóga, Lod ibü we arngenórr bwób-bwób ini dudu tüpdü, akó i we piküp bainóp ene tawapükü wirri basirr aelóm. 9We ngarkwatódó, ene wirri basirr ngi ngyesilóp Babel,#11:9 Babel ngi darrü Ibrru bóktan opor minggüpanana. Oya küp módóga: yarrisarri angón. zitülkus Lod blaman pamkolpamab bóktan yarrisarri yangónórr. Da olgabi God ibü bwób-bwób we arngenórr ini dudu tüpdü.
Noan Ngaen Olom Syem, Oya Olmalbobatal
(1 Krronikol 1:24-27)
10Ini Syemón olmalbobatalab ngiko.
Nis pail naiz kakóm, Syem 100 pail nóma yarilürr, wa Arrpaksadón abóm bainürr. 11Arrpaksad nóma tómtómólórr, Syem akó 500 pailüm ngyabelórr akó ngibürr simanal akó ópal olmal we nósenóp.
12Arrpaksad 35 pail nóma yarilürr, wa Syilan abóm bainürr. 13Syilan amtómól kakóm, Arrpaksad akó 403 pailüm ngyabenórr akó wa ngibürr simanal a ópal olmal we nósenóp.
14Syila 30 pail nóma yarilürr, wa Eberrón abóm bainürr. 15Eberrón amtómól kakóm, Syila akó 403 pailüm ngyabenórr akó wa ngibürr simanal a ópal olmal we nósenóp.
16Eberr 34 pail nóma yarilürr, wa Pelegón abóm bainürr. 17Pelegón amtómól kakóm, Eberr akó 430 pailüm ngyabenórr akó wa ngibürr simanal a ópal olmal we nósenóp.
18Peleg 30 pail nóma yarilürr, wa Rreun abóm bainürr. 19Rreun amtómól kakóm, Peleg akó 209 pailüm ngyabenórr akó wa ngibürr simanal a ópal olmal we nósenóp.
20Rreu 32 pail nóma yarilürr, wa Serrugün abóm bainürr. 21Serrugün amtómól kakóm, Rreu akó 207 pailüm ngyabenórr akó wa ngibürr simanal a ópal olmal we nósenóp.
22Serrug 30 pail nóma yarilürr, wa Na-orrón abóm bainürr. 23Na-orrón amtómól kakóm, Serrug akó 200 pailüm ngyabenórr akó wa ngibürr simanal a ópal olmal we nósenóp.
24Na-orr 29 pail nóma yarilürr, wa Terran abóm bainürr. 25Terran amtómól kakóm, Na-orr akó 119 pailüm ngyabenórr akó wa ngibürr simanal a ópal olmal we nósenóp.
26Terra 70 pail nóma yarilürr, wa ibü abóm ugón bainürr, Eibrram, Na-orr, akó Arran.
Terran Olmalbobatal
27Ini Terran olmalbobatalab ngiko.
Terra ibü abóm bainürr, Eibrram, Na-orr, akó Arran. Arran Lotón abóm bainürr. 28Oya ab Terra arról nóma yarilürr, Arran ugón nurrótókórr tóba amtómól bwóbdü, ngi Urr, Babilonia pamkolpamab#11:28 Babilonia pamkolpamab darrü ngi módóga: Kaldia pamkolpam. kantrridü. 29Eibrram a Na-orr kol bumiógrri. Eibrramón kol ngi Serrae warilürr, Na-orr wa Milkan zumiógürr, Arranón óp olom. Oya darrü óp olom asi warilürr, ngi Iska. 30Serrae olmal balngón-koke kol warilürr.
31Terra tóba olom Eibrramón ipadórr, akó tóba bobat Lot, Arranón siman olom nótó yarilürr, akó tóba kolalkot Serrae, Eibrramón kol. I Urr basirr we amgütóp, Babilonia kantrri kugupidü, da i wa Keinan tüpdü ogoblórrma, a i Arran wirri basirrdü nóma babzilürr, da i ma metat ngyabenóm we bainóp. 32Terra 205 pailüm ngyabenórr, da we nurrótókórr Arran wirri basirrdü.
© 2019, Wycliffe Bible Translators, Inc. All rights reserved.
