Génesis 9
9
Diosan Noébëtan achúshi ñu ꞌakin mënio ñuikë bana
1Nukën ꞌIbu Diosan ka upíokin sinánxunkin Noé ꞌimainun ain bëchikëkama, ësokin kakëxa: Kamina bëchipati mebi tsitsirui ꞌuákamë ꞌëoti ꞌain. 2Kamabi ñuina ënë menu ꞌikë ax ka mitsumi rakuë́ti abáti ꞌikën. Kamabi ñuina suñunu nuánkë, men nikë ꞌimainun parúmpapa bakanu ꞌikë, akamax mitsubëira ꞌimabi mi ꞌura bukuti ꞌikën. 3ꞌËn kana mi kain kamina kamabi ñuina ꞌimainun ñu ꞌapátankëxun bimia pianan kamina añu kaina pisatanin aribi piti ꞌain. ꞌËn kana akama mi ꞌinanin. 4ꞌAínbi kamina achúshi ñu ashi pitima ꞌain ax ka ñuina nami aín imikëñun pitima ꞌikën: ax ka nami imiñu a ꞌikën, aín ꞌimi kupín ka kamabi uni ꞌimainun ñuinakama tsotia. 5ꞌËn kana uni achúshi achúshi ꞌimainun ñuinaribi mitsu achúshi achúshinën imi kupí uisakin kara mitsu ꞌaxa a ñukáti ꞌain. ꞌAnan kana achúshi achúshi uni uisa kara bëtsi oxa aribi usokinbi ꞌati ꞌain.
6Uin kara bëtsi uni ꞌaia, aka bëtsi unínribi ꞌati ꞌikën. Unix ka Nukën ꞌIbu Diosan a iskësabi okin unio ꞌikën usa ꞌain.
7ꞌAínbi kamina mitsun, ¡ꞌitsaira bëchipakin
atubëtan me tsitsirui ꞌuakamë ꞌëoti ꞌain!
8Diosan ka ësokinribi Noé ꞌimainun aín bëchikëkamaribi kakëxa: 9“Ka kuat, ꞌën kana achúshi ñu mibëtan ꞌanan min rëbúnkikama, 10ꞌimainun kamabi ñuina axa mibë nunti chaiira anuax chikíkë akamabëtan ꞌain: ꞌakin: kana ñuina pëchiñu, a ꞌarakati ñuina ꞌimainun ꞌarakatima ñuina ꞌianan ñuina menu ꞌikë akamabëtan ꞌain. 11ꞌËn mibëtan ꞌakë ñu akana bëtsiokin nantëkëntima ꞌain: amiribishi kana unikama ꞌimainun ñuinakama këñunun bakan tita chaiira ꞌëmitëkënuxuma ꞌain, bakan tita chaiira ka ꞌitëkënuxuma ꞌaia menu ꞌikë ñuinakama këñutëkëni.”
12Ënëx ka a ꞌunántiokin achúshi ñu mitsubëtan ꞌakin manutima okin, kamabi ñuina kamabëtanribi ꞌakë ꞌikën: 13ꞌën kana nón bai naí kuin kamanu anuaxa mëratiokin nan, ax ka achúshi ñu ꞌën mibëtan ꞌakësa ꞌiti ꞌikën. 14Usa ꞌain ka uínsaran karana ꞌën kuin manámi mëranun ꞌimin, ꞌimikëbë ka anu nón bai mërati ꞌikën. 15Usa ꞌain kana mitsubëtan achúshi ñu ꞌakë a ꞌën sinánti ꞌain, ꞌimainun kamabi ñuinabëtan ꞌakë a, usa ꞌain ka amiribishi bakan tita chaiira kamabi ñu menua këñui ꞌëtëkëntima ꞌikën. 16Uínsaran kara nón bai kuínnu mëratia anu kana ꞌën a iskin, achúshi ñu nëtë́tima okin ꞌakë ax ka unikama ꞌimainun ñuina kamabi menu ꞌikëbëtan ꞌá ꞌikë kixun sinánti ꞌain. 17Ënëx ka ꞌën ꞌunánti okin achúshi ñu anubia ꞌitiokin kamabi uni ꞌimainun ñuina menu ꞌikë akamabëtan ꞌakë ꞌikën Ësakin ka Nukën ꞌIbu Diosan Noé kakëxa.
Noé ꞌimainun aín bëchikëkama ꞌia
18Ënëx ka Noénën bëchikëkama nunti chaiira anuaxa chikíkë akamax ka Sem, Cam, Jafet ꞌiakëxa, Cam ax ka Canaán kakë aín papa ꞌiakëxa. 19Ënëkamax ka Noénën bëchikë rabë́ ꞌimainun achúshi ꞌiakëxa, usa ꞌain ka aín rëbúnkikama kamabi menu kuani amiribishi ꞌuákamë ꞌëoi mekama oi kuankëxa.
20Usa ꞌain ka Noénën menu ñu ꞌapákin pëukin naë ꞌatankëxun uvas ꞌatabakin ꞌapákëxa. 21Achúshi nëtë ꞌikëbë ka Noé uvas baka kachokin ꞌakë a xëatankëx paëankëxa, usai ꞌiax ka sinanima aín chupa pëtankëx xubusa okían ꞌakë chupa këxtú a nëbëtsi ꞌukëmëu ꞌuxax rakakëxa. 22Usai ꞌikë ka Cam Canaánën papa an isti ꞌikëmabi chupañuma rakákë isakëxa, usai ꞌikë isbiani kuanxun ka ëmanua aín xukë́n rabë́ ñuixuni chikíakëxa. 23Usakin ñuixunkëxun ka Sem ꞌimainun Jafetnën chupa chaxkë́, bixun ain tëxanu ꞌarubiani anun aín papa isima amo bësukiani kaxushi kuanxun rakuakëxa. Rakubëtsini kaxutan ain papa chupañuma rakákë isti rabanan uakëxa, usokin rakubëtsini ka isima amoshi bësuax utankëx chikíakëxa. 24Usakian aín bëchikënën ꞌakëx ka Noé ain paë́nkë inúkëbë bësuakëxa, bësukin ka aín bëchikë ꞌanákanëan ꞌakë a ꞌunánkëxa, 25ꞌunáni ka kiakëxa:
¡Mix kamina ꞌatimokë ꞌiti ꞌain Canaán!
¡Min xukë́n rabëtan rëbúnkinën ka tëmëramikin min rëbúnki ñu mëëmiti ꞌikën!
26Usokin ꞌaxa basikëbëtan ka ësokinribi kakëxa:
Chúamarua ka Nukën ꞌIbu Semnën Dios ꞌiti ꞌikën,
Canaánën bëchikëkama ax ka tëmërakin an uni ñu mëëxunkëishi ꞌiti ꞌikën.
27ꞌËn kana Nukën ꞌIbu Diosan Jafet chaiira meñu ꞌianan aín bëchikëkama ꞌuákamë ꞌëoti kuëënin;
ꞌimainun kana Semnën, rëbúnkikamabë Jafet aín rëbúnkinëx ꞌiti kuëënin ꞌaínbi ka,
Canaánën bëchikëkamax tëmërakin uni ñu mëëxuni bukuti ꞌikën.
28Usaia bakan titachaiira ꞌikuatsian ꞌain ka Noé trescientos cincuenta baritia imi tsópaiankëxa;
29usokin kamabi ñu ꞌatankëx ka Noé novecientos cincuenta baritia tsótëkëntankëx ñuakëxa.
© 1978, 1995, 2008, 2022 Wycliffe Bible Translators, Inc. All rights reserved.