Génesis 10
10
Noénën rëbúnkikama ꞌiá
(1 Cr 1.5-23)
1Ënë kamax ka Noénën bëchikë Sem, Cam ꞌimainun Jafet, akaman rëbúnki ꞌikën, atux ka bakan tita chaiira ꞌikuatsian ꞌain, atunbi bëchipati tsóa a kama ꞌiakëxa.
2Jafetnën bakë bëchikëkama ka ꞌiakëxa Gómer, Magog, Madai, Javán, Tubal, Mésec ꞌimainun Tirás. 3Gómernën bakë bëchikëkama ka ꞌiakëxa Asquenaz, Rifat ꞌimainun Togarmá. 4Javánnën bëchikëkama ka ꞌiakëxa Elisá, Tarsis, Quitim ꞌimainun Rodanim. 5Ënë unikamax ka Jafetnën rëbúnki ꞌiakëxa, ax ka achúshi Javán kakë ꞌiakëxa, aín rëbúnkinëx ka parúmpapa kuëbí tsóti ꞌuakamë ꞌëokëxa, usai ꞌika aín bananbi bananbi banai aín aintsibë timë́ax aín menu menubi tsóakëxa.
6Camnën bëchikëkama aín anë ka ꞌiakëxa Cus, Misraim, Fut ꞌimainun Canaán. 7Cusnën bëchikëkaman anë ka ꞌiakëxa Sebá, Havilá, Sabtá, Raamá ꞌimainun Sabtecá ꞌimainun ka Raamá aín bëchikënën anë Sebá ꞌimainun Dedán kakë ꞌiakëxa. 8Cus ax ka bëtsi bëchikëñu Nimrod kakin anëkëñu ꞌiakëxa, ax painra ka uni kushiira a menu ꞌiakëxa. 9Nimrod ax ka usai ꞌitia Nukën ꞌIbu kuëënkëbë an ñuokë unira ꞌiakëxa. Anuax ka achúshi bana ësai kia: Nimrod axa Nukën ꞌIbu kuëënkëbë ñuira okë ꞌia usaribi ka ꞌiti ꞌikën. 10Usa ꞌain ka Nimrod ax ꞌapu ꞌain ëma chabu Babel, Érec, Acad ꞌimainun Calné, ënë ëmakamax ka Sinar menu ꞌiakëxa. 11Sinar menuax ka Asur kakë uni ax mërakëxa, mëraxun ka Nínive, Reohobot-ir, Quélah, 12ꞌimainun ëma chaiira Resen kakë, axa Nínive amo ꞌimainun Quélah axribi amo ꞌikë a ꞌakëxa. 13Usa ꞌain ka Misraimnën rëbúnkikama ax ludeokama, anameokama, lehabitakama, naftuhítakama, 14patruseokama casluhítakama ꞌimainun, caftoritaskama ax ka anuaxa filisteo unikama chikía ꞌikën. 15Canaán ax ka rabë́ bëchikëñu ꞌiakëxa aín rëkuën ax ka ꞌiakëxa Sidón, kakë aín ꞌanáka ax ka ꞌiakëxa Het. 16Usa ꞌain ka Canaánën rëbúnkikama ax ka jebuseos, amorreos, gergeseos, 17heveos, araceos, sineos, 18arvadeo, semareo ꞌimainun hamateo ꞌiakëxa. Usai ꞌikë ꞌitsa baritia ꞌinúkëbë ka cananeonën rëbúnkikama ax mekama mekama nu kuankëxa. 19Usa ꞌain ka cananeo unikama me ax Guerar kakë me ami kikiani Sidón kakë ëma, anuax kuanx Gaza kakë ëma chukúma anu sënën ꞌiakëxa, ꞌimainun ka Sodoma, Gomorra, Admá ꞌimainun Seboím, kakë anuxunbi Lesa kakë ëma anu bërunkin bikë ꞌiakëxa. 20Ënë unikamax ka Camnën rëbúnki ꞌiakëxa, achúshi achúshi ëmax ka aín aintsibë aín menubi tsóti ꞌain bananbi banakëxa.
21Sem, ax ka Jafetnën xukë́n aín apan ꞌiakëxa, anribi ka bëchipakëxa. Kamabi Ébernën bëchikëkamax ka Semnën rëbúnki ꞌiakëxa. 22Semnën bëchikëkamax ka ꞌiakëxa Elam, Asur, Arfaxad, Lud ꞌimainun Aram. 23Aramnën bëchikëkamax ka ꞌiakëxa, Us, Hul, Guéter ꞌimainun Mas. 24Arfaxad ax ka Sélahnën papa ꞌiakëxa, ꞌimainun ka Sélah ax Ébernën papa ꞌiakëxa. 25Usa ꞌain ka Ébernën rabë́ okin bakë bëchiakëxa: achúshinëx ka Péleg kakë ꞌiakëxa, axa anu ꞌain ka unikama kamabi menu kuani abísakëxa; ꞌimainun ka Pélegnën xukë́n ax Joctán kakë ꞌiakëxa. (Péleg ax ka bëtsi bëtsi menu kuani amanu amanu kuankëxa.) 26Joctán ax ka ënë unikaman papa ꞌiakëxa Almodad, Sélef, Hasar-mávet, Jérah, 27Hadoram, Uzal, Diclá, 28Obal, Abimael, Sebá, 29Ofir Havilá ꞌimainun Jobab. Kamabi ënëkamax ka Joctánnën bëchikëkama ꞌiakëxa. 30Usa ꞌain ka anua atux tsókë anuaxbi kuankë me ax Mesá aukikiani kuankë ꞌimainun Sefar ax auküaxa bari urukë au ꞌikë ꞌiakëxa, 31Ënë kamax ka Semnën rëbúnki ꞌiakëxa, achúshi achúshi ëma ꞌimainun ka aín aintsibëbi aín menubi tsóti ain bananbi banakëxa.
32Ënëkamax ka Noénën bëchikënën aintsikama ꞌiakëxa, usa ꞌain ka aín rëbúnkinëx anubia aín rara tsóa menubi ꞌiakëxa. Baka chaiira ꞌikuatsian ꞌain ka abisi amanu amanu kuani atun ëmabi ꞌai anu tsókankëxa.
© 1978, 1995, 2008, 2022 Wycliffe Bible Translators, Inc. All rights reserved.