ดอ โฆว 38
38
ลอง อายูดา ฆาย นาง ทามา
1ดอ อัน ตี อายูดา ตึอน กาย็อห ดี อูกัด อูวา อัน. อัน บอ ฮาว กอย รึม โดบ ดูอี อาโมยว อาดูลัม อู วี อี จืร อาฮีราน. 2ดอ กอย อัน ดี ตี, อัน กาตูณ ฆอน อีบึณ ดูอี อาโมยว กานัณ อู วี. อีบึณ ตี, อัน จืร นาง จูอา. อัน แฮะ ฮอต คัด, อีบึณ ตี บอ แด บาดีก ซันเท. 3อัน บอ มึห ฆอน อีมาย อู วี, อี จืร อาเอรา. 4วาย อัน ตี อัน วี แด บาดีก ซันเท ปอ อู เฌณ. อัน วี มึห ฆอน อีมาย, อี จืร อาออนัน. 5แฮะ ฮอต อัน ปี วี มึห ฆอน อีมาย ปอ อู วี. อัน วี แตห อัน จืร อาเซลา. ดอ อัน ตี เฆ ยี กอย มืง เชฌีบ.
6อายูดา ตึอน วี เหรต อีบึณ อาดา ฆอน ฆีณ อัน, อี จืร อาเอรา. อีบึณ ตี, อัน จืร นาง ทามา. 7อาเอรา อี มูห ฆอน ฆีณ อายูดา ตึอน, อัน โบง ปี ตู อึง เฌาพรา. แฮะ ฮอต เฌาพรา แตห อาซาก อัน ชึม.
8วาย อัน ตี อายูดา วี ต็อห ดี อาออนัน, “แตห แม ลาย ยา ซีปรัห อีกัด แม, แตห อัน แบน อีบึณ แม, แตห แม ปึอน ฆอน อาดา อีกัด แม.”#38:8 ฮีด เฆ, อึณ มูห ปาย ตี 9อาออนัน ยี นับ, เซ อัน ดี ลาย นาง ทามา ตึอน, เซ อัน มึห ฆอน, ฆอน อัน ตี ตู วี แบน ฆอน อัน. อัน ยี ตู ซี แตห ยา ซีปรัห อีกัด อัน มึห ฆอน. โคว, ดอ ลาย อัน อีบึณ ตี, ดอน เฌณ อัน วี แวน อึม ตานา อัน แดง กาดาย. 10ปี โบง อัน ฌึร ตี, เฌาพรา มืร ตู อึง. อัน เฌา แตห บอ อาซาก อัน ชึม.
11แฮะ ฮอต ปัน ตี อายูดา วี ต็อห ดี เอา อัน, “แตห แม แบน ปี ยา ซีปรัห, กอย แคง กาง ฆูณ แม, แตห แม หน็อะ ปัน ดี วี แกร ดี ตาง ฆอน โอว อี จืร อาเซลา, แตห อัน กอ ปึอน ดี วี ลาย แม.” อัน ต็อห ปาย ตี โคว, อัน ทาง บอ ฆอน อัน ตี, ดี วี ยัม ปี อีกัด อัน. ปัน ตี นาง ทามา ตึอน วี ฮาว กอย แคง กาง ฆูณ อัน.
12วาย อัน ตี แฮะ ราม เหลณ, อีบึณ อายูดา ตึอน, อี มูห ฆอน อาจูอา ตึอน, อัน บอ ยัม. วาย อาคราว โลว กลึร แฮะ โนะ, อายูดา วี ฮาว โดง กอย อาทีมานา, โบง บลอย กับ ฮึก มาบู. ฆึก อัน อี จืร อาฮีราน, อี มูห ดูอี อาโมยว อาดูลัม, อัน ฮาว รึม โดบ อัน.
13ดอ อัน ตี อึณ มึห ดูอี กาลาง ดี นาง ทามา ตึอน, “บึร แม แฮะ ฮาว โดง กอย อาทีมานา ตึอน, โดง โบง เฆ บลอย กับ ฮึก มาบู.” 14อัน บอ ยึร ลอง อัน ตี, อัน วี บูต แวน ครึง ยา ซีปรัห ปี ชึบ อัน. อัน วี ดึห กาแมะ กาโหมะ นา อัน, แกวะ แตห อี นับ อัน มูห อาเซ. แฮะ ฮอต, อัน บอ ฮาว กอย ดี โคบ อึณเตณ ฮาว ลึบ เรา เอนาอีม. โดง ตี กอย โดบ อึณเตณ อี ฮาว โดง จืร ทีมานา. อัน โบง ปาย ตี โคว, อัน แฮะ ยึร, อาเซลา ตึอน ปี บอ แฮะ ตาง, ฆูณ อัน ยี ตู ดัว อัน ลาย คัด ดี อัน.
15อายูดา ตึอน วี ตัห ฌัม โดง กอย นาง ทามา, อัน บอ ยึร นาง ตี, อัน ทาง อีบึณ ตี มูห ยา มาลัม. โคว, นาง ทามา แฮะ กาโหมะ นา อัน, แกวะ แตห อี ยึร. 16อายูดา วี ยอด อัน, อัน ต็อห, “แตห โอว อีด รึม โดบ แม แคง หมึร นี.” มาแล อัน ตู นับ อีบึณ ตี มูห เอา อัน. อีบึณ ตึอน วี ต็อห, “มาเซ ปี ดี ดัว แม ดี โอว, เซ แม ลาย โอว?”
17อัน ต็อห, “โอว ดี ตึย ฆอน มาบู อู โดว ดัว ดี แม.”
อีบึณ ตี ยี ต็อห, “แม โลว กัม อูน โกรว แม ดี โอว อาต ตึย แม ฆอน มาบู ตี.”
18อัน วี ดีหมอด, “โกรว มาเซ ปี ดี โลว แม, แตห โอว กัม อูน ดี แม?”
อีบึณ ตึอน วี ต็อห, “แม โลว ดัว ซีกานู อี มึห ฌึม แม บอ วัน อัน ดี โอว. บอ อึณกรวน แม, แม โลว ดัว ดี โอว.” แฮะ ฮอต ต็อห ปาย ตี อายูดา มืร ดัว แคะ ปี หมาณ อีบึณ ตึอน. อายูดา บอ ลึบ อีด โดบ อัน. แฮะ ฮอต อัน บอ แด บาดีก ซันเท ดี อายูดา. 19วาย อัน ตี นาง ทามา ตึอน วี เลห โดง กอย อัน ตี, วี บูต เลห กาแมะ อัน, วี ชึบ ครึง ยา ซีปรัห อัน.
20ปัน ตี อายูดา ตึอน บอ ดึห ฆอน มาบู อู โดว, ดัว ดี ฆึก อัน, อี มูห อาโมยว อาดูลัม ตึอน. อัน ต็อห ดี แตห ฆึก อัน วี เหรต อีบึณ ตึอน, แตห อัน วี ดัว มาบู ดี อีบึณ ตึอน, แตห อีบึณ วี ดัว วีว โกรว ปี ดึอม กัม อูน อายูดา ดี อัน. ฆึก อัน ยี ตู กาตูณ อีบึณ ตึอน. 21แฮะ ฮอต อัน วี ดีหมอด เฆ อีมาย อี กอย โดง ตึอน. อัน ต็อห, “เหมา อีบึณ, อี มูห ยา มาลัม ตึอน, อี กอย ดี โคบ อึณเตณ ฮาว มืง เอนาอีม?”
เฆ วี ต็อห, “อาว ดึอม มึห ยา มาลัม กอย ดี ตี.”
22ปัน ตี อัน วี เวณ โดง กอย อายูดา ต็อห, “โอว ตู ยึร ยา มาลัม ตึอน. แดง ตี, เฆ ดูอี อี กอย โดง ตึอน, เฆ แฮะ แค ดี โอว, อึณ ตู ดึอม มึห ยา มาลัม.”
23ปัน ตี อายูดา วี ต็อห, “แตห ยา มาลัม ตี ดึห ดี อัน โกรว โอว ตึอน, แกวะ แตห อี เฮา กาณัห อาย. โอว แฮะ เทว ดี ตึย ฆอน มาบู ดี อัน, แม ยี ตู ยึร อัน.”
24วาย อัน ตี บอ โนะ โอย มาเฆียน, เฆ ดูอี ต็อห ดี อายูดา, “เอา แม ตึอน แฮะ แบน ยา มาลัม. ดอ ตี นี, อัน แฮะ แด บาดีก ซันเท.”
อายูดา วี ต็อห, “แตห อัน ตัห ดี นี, แตห เย ง็อห ยัม อัน, บอ โดะ กาซึม อัน แคง เงา.”
25ดอ ตัห เฆ แดะ นาง ทามา ตึอน, อัน วี ตึย ดูอี อู วี, แตห อัน ฮาว กาลาง ดี บึร อัน, แตห อัน ต็อห, “โอว มึห ดี โฆ็ง ซีกานู บอ วัน บอ อึณกรวน. โกรว เฆ ตี มูห ลักซานา อีมาย อี มูห ฆูณ ฆอน โอว. แตห แม ยอด อึณ มูห โกรว อาเซ.”
26อายูดา ตึอน ยี ยอด, อึณ มูห โกรว อัน. อัน วี ต็อห, “เอา โอว แฮะ หมึอม หลึอม โอว. โอว ตู โบง ปี ดึอม กาลาง โอว. โอว ตู ดัว อัน ลาย ฆอน โอว อี จืร อาเซลา, แตห อาเซลา วี แบน อีมาย อัน.” ปัน ตี อายูดา ตู วี ลูต อัน.
27ปัน ตี นาง ทามา วี มึห ฆอน ราบ แคง วัต อัน. 28ดอ ฆึอด ฆอน ตี, แด อู วี แฮะ เลห ดี อาต. ยา อี ลึมลา อัน ยี ปัก เซณ อี เรณ ดี แด อัน, แตห เฆ นับ วี ตี แฮะ ฆึอด ดี อาต. 29แฮะ ฮอต อัน วี บลึบ ลึบ แด แคง วัต มา อัน, แตห วา อัน วี ฆึอด ดี อาต. มา อัน ต็อห, “เหมา แม ปาย ดี ฆึอด เลห ดี อาต?” โคว อัน, อัน แตห ฆอน ตี จืร อาเพเรด.#38:29 ‘เพเรด’ แคง โฆรห แฮแบร, ลอง ดาง อัน มูห ‘เลห ดี อาต’ 30วาย อัน ตี อีกัด อัน อี มึห เซณ เรณ ปัก ดี แด, อัน บอ ฆึอด. เฆ วี แตห อัน จืร อาเฌนรา.#38:30 ‘เฌรา’ แคง โฆรห แฮแบร, ลอง ดาง อัน มูห ‘อี เรณ’
© 2021, Wycliffe Bible Translator, Inc. All rights reserved.
