ดอ โฆว 25
25
ลอง อาบราฮัม ฆาย นาง เคทูรา
1อาบราฮัม ตึอน วี ดึห อีบึณ ปอ อู วี. อัน จืร นาง เคทูรา. 2อัน มึห ฆอน อีมาย. เฆ จืร อาซีมราม, อาโยกซาน, อาเมดาน, อามีดีอาน, อายีบาก บอ อาซูอาก. 3อาโยกซาน ตึอน วี มึห ฆอน อี จืร อาเซบา ฆาย อาเดดาน. ฆอน อาเดดาน ตึอน แบน อาโมยว ดูอี อาซูรีด, เลทูซีด บอ อาโมยว เลอูมมีด. 4ฆอน อามีดีอาน จืร อาเอพา, อาเอเพน, อาฮาน, อาบีดา บอ อาเอดาฆา. เฆ ดอน อี มูห หลูกหลาน นาง เคทูรา ตึอน.
5แคะ มึห อาบราฮัม โกรวกราม, อัน ดัว โตต ดอน โมยว ดี อาแซก, แตห อัน ปลูะ ฆูณ อัน. 6อึณ บอ มึห ฆอน อีมาย อี มูห ฆอน อีบึณ เตียะ. อัน ดัว มี คอซอง ดี เฆ. อัน แฮะ ฮอต ดัว ดี เฆ, อัน วี จัร เฆ เลห ตัะ โดง กอย อัน, แตห เฆ ฮาว กอย ปอ โปละ. ดอ ซี มึห อัน อาซาก, อัน จัร เฆ เลห โดง กอย ฆอน อัน อี จืร อาแซก, แตห เฆ ฮาว กอย แคง มืง นา เลห ซีแง.
7อาบราฮัม ตึอน, อาซาก อัน บอ โนะ อู มาย็อห ดี บู ฆึร ดี พัน ซีนัม. 8แฮะ ฮอต ปัน ตี อัน บอ ยัม. ดอ ยัม อัน, อัน แฮะ กัด กาเซา. น็อห อัน แฮะ ซีน, อัน ฮู ซี กอย แดง กาดาย นี. อัน วี ฮาว กอย รึม โดบ ดูอี อาโมยว อัน อี แฮะ ยัม ดี อาต อัน. 9ฆอน อีมาย อัน อี จืร อาแซก ฆาย อาซามาน, ฆาย วี ดีบ โดว อัน, เบลห แคง กาเดา มาว อี จืร มาดเปนลา. อึณ กอย แคง โดง นา อาเพโรน ตึอน, อี มูห ฆอน อาโฌวฮาน, อี มูห อาโมยว เฮทีด. โดง ตี กอย เครียะ โดง จืร มัมเร. 10โดง นา ตึอน อาบราฮัม แฮะ ดึอม จึห ดี ดูอี อาโมยว เฮทีด. โดง ตี เฆ แฮะ ดีบ โดว อาบราฮัม ฆาย อีบึณ อัน, อี จืร นาง ซารา. 11อาบราฮัม แฮะ ฮอต ยัม, เฌาพรา วี ม็องการา ดัว ดี อาแซก อี มูห ฆอน อาบราฮัม. อัน กอย โคบ อึม คึม อี จืร อึม คึม อัน เฌา อี อีม, อี ปึอน ยึร.
ลอง หลูกหลาน อาซามาน
12อานี อึณ มูห ฌาราง อี ลาย ดาม เฆ หลูกหลาน อาซามาน อี มูห ฆอน อาบราฮัม. มา อาซามาน มูห นาง ฮาฆา อี มูห อาโมยว แอฆึบ, อี แฮะ แบน หมาย นาง ซารา.
13จืร ฆอน อีมาย อาซามาน, เฆ อี ลาย ดาม ปาย นี. ฆอน ฆีณ อาซามาน อัน จืร อาเนยาโบด. แฮะ ฮอต อึณ มึห อาเกดา, อาเดเบน บอ อามีบาซาม, 14อามีซามา, อาดูมา บอ อามาดาซา, 15อาฮาดาด, อาเทมา, อาเยทู, อานาพีด บอ อาเคเดมา. 16อาตี มูห ฆอน อีมาย อาซามาน. เฆ กอย แคง โดง คยัะ เฆ, แคง ทึบ บีก เฆ. เฆ แฮะ แบน ดา กาณา ครึร เฆ, แฮะ แบน อาโมยว ดูอี ฆึร ดี อา โมยว. 17อาซาก อาซามาน ตึอน บอ โนะ อู มาย็อห ดี โอย ฆึร ดี บู ซีนัม. แฮะ ฮอต, อัน บอ ยัม, ฮาว กอย รึม โดบ เฆ อาโมยว อัน, อี แฮะ ยัม ดี อาต อัน. 18เฆ อาโมยว อาซามาน ตึอน, เฆ กอย แบน โปละ แบน โปละ จูห แคง มืง ฮาวีลัะ กอ ฌัม มืง ซูรา. โดง กอย เฆ ตี, อึณ มูห นา เลห ซีแง ดี มืง แอฆึบ, โดบ อึณเตณ อี ฮาว มืง อาซูรา. เฆ บอ ลาย กาโฆห เซเซ.
ลอง อาโกบ ฆาย อาโซว
19อานี อึณ วี มูห ฌาราง อี ลาย ดาม หลูกหลาน อาแซก ตึอน อี มูห ฆอน อาบราฮัม. อาบราฮัม มูห ฆูณ อาแซก. 20อาแซก ตึอน บอ โนะ พวน ฆึร ซีนัม, อัน คัด ดึห นาง แบก, แตห อัน แบน อีบึณ อัน. นาง แบก มูห ฆอน อาเบด, อี มูห อาโมยว อาราม บอ ตัห แคง มืง พาดานอาราม. อีกัด นาง แบก มูห ดูอี อาโมยว อาราม อี จืร อาลับ.
21นาง แบก ยี หมัน, อาว มึห ฆอน. แฮะ ฮอต อาแซก บอ ซาคึร ดี เฌาพรา, แตห อีบึณ อัน มึห ฆอน. เฌาพรา มืร โทม ปี ซาคึร อาแซก. ปัน ตี นาง แบก บอ แด บาดีก ซันเท. 22อึณ ยี มึห ฆอน อา วี อี กอย แคง วัต อัน. ฆาย บยาก กาเซา แคง วัต อัน. อัน ต็อห, “เซ ฆาย ดี ลาย กาลูต เซเซ, เหมา โอว ดี ปาย ดี คัม?” อัน มืร ฮาว ดีหมอด เฌาพรา ลอง อัน ตี.
23ปัน ตี เฌาพรา ต็อห ดี อัน, “อึณ ดี มึห อาโมยว ดูอี อา โมยว เลห แคง วัต แม. ดูอี อา โมยว ตี, เฆ ดี ลาย กาลูต. อู โมยว ดี มึห ปวน ตาง หลึอม ปอ อู โมยว. อีกัด ดี แบน หมาย วา อัน.”
24บอ ฌัม อาคราว ดี ฆึอด, อัน บอ มึห ฆอน ราบ. 25อีกัด แฮะ ฆึอด เลห, อารึบ อัน แฮะ เรณ. อัน บอ มึห ฮึก กืน บอ โดว. เฆ บอ แตห อัน จืร อาโซว.#25:25 ลอง ดาง ‘อาโซว’ แบน ‘ฮึก’ 26แฮะ ฮอต ปัน ตี วา อัน ฆึอด เลห. อัน บอ ปา คาหนูต อีกัด อัน. เฆ วี แตห อัน จืร อาโกบ.#25:26 ลอง ดาง ‘อาโกบ’ แบน ‘คาหนูต’
27ฆอน อีมาย อา วี บอ แกร ดี ตาง, อาโซว มูห ดูอี แล แปร. อัน อึง ดี กอย แคง แปร แคง นา. อาโกบ ยี มูห ดูอี หนีม. อัน อึง ดี กอย แคง ทึบ บีก อัน. 28อาแซก ร็อก อาโซว. อัน ม็อก โดว แปร ปี เหมต อาโซว. นาง แบก ยี ร็อก อาโกบ.
29อู ซีแง อาโกบ แฮะ ดัง ฮาบ ซีแงห. อาโซว ตัห แคง แปร, วี ลึบ แคง ทึบ บีก, กาปราณ กาเซา โบม. 30อาโซว ต็อห ดี อาโกบ, “แตห โอว โฮม อี แจก ฮาบ อี เรณ ปี ดัง แม. โอว แฮะ กาปราณ กาเซา โบม.” โคว อัน ตี, เฆ วี แตห อัน จืร อาเอโดม.#25:30 ‘อาเอโดม’ แคง โฆรห แฮแบร, ลอง ดาง อัน มูห ‘เรณ’
31อาโกบ วี ต็อห, “เซ แม ซี โฮม ฮาบ ตี, ปี ดี ปลูะ แม ดี ฆูณ โกบ มูห แม ฆอน ฆีณ แม โลว ย็อง ดัว ดี โอว ดี อาต, แตห โอว แบน ปี ฆอน ฆีณ.”
32อาโซว วี ต็อห, “โอว แฮะ กาปราณ กอ รีน ดี ยัม. โอว ปี บอ มูห ฆอน ฆีณ, ตู มูห ฆอน ฆีณ, อาว ลืก. อาว มึห ดีโคว, อาว ปาย มาเซ ดี โอว.”
33อาโกบ วี ต็อห, “เซ อึณ ปาย ตี แตห แม ดัว กาดีก ซัดฌา ดี โอว, แตห โอว นับ ซีคยา, แม ดัว โอว แบน ฆอน ฆีณ.” ปัน ตี อาโซว กาลาง โฆรห กาดีก ซัดฌา. ปาย ตี อัน มืร ย็อง โตต ปี ดี ปลูะ ฆอน ฆีณ, แตห วา อัน ปึอน.
34แฮะ ฮอต, อาโกบ ดัว ปี ดี โฮม ตึอน, แตห อาโซว โฮม. อึณ มูห ฮาบ เบล โลม เรณ. อาโซว บอ โฮม บอ เดียง แพ. แฮะ ฮอต อัน วี ยีต ฮาว นา เรต.
รูห มูห อาโซว ฆอน ฆีณ, ปี ดี ปึอน อัน โกบ มูห อัน ฆอน ฆีณ, อาโซว แฮะ แวน โตต ปาย ตี.
© 2021, Wycliffe Bible Translator, Inc. All rights reserved.
