ดอ โฆว 24
24
ลอง อาบราฮัม เหรต อีบึณ อาดา อาแซก
1อาบราฮัม ตึอน แฮะ กัด กาเซา. เฌาพรา แฮะ ม็องการา แตห ดี อัน ดอน โมยว. 2ปัน ตี อาบราฮัม วี แดะ แดเจณ อัน. อาซาก วี ตี แฮะ กืน หลึอม แดเจณ อี เฮา. อัน บอ อึบ โตต แคง กาง อาบราฮัม. อาบราฮัม วี ต็อห ดี ดา อี ตี, “แตห แม เบลห แด แม ดี ฆึม โอว.#24:2 เฆ โบง ปาย ตี แตห บอ หลูกหลาน อี ดี บอ ตัห วาย อัน ตี นับ ลอง ปี ดี โบง อัน 3โอว ดี หมาณ, แตห แม ดัว กาดีก ซัดฌา ดี โอว. บอ เฌาพรา อี อึบ บอ ฆางหราว บอ กาดาย, แตห อัน โทม โฆรห แม. แม โลว ดัว กาดีก ซัดฌา ดี โอว, แตห แม ฮาว เหรต อีบึณ อาดา ฆอน โอว. แตห แม ฮาว แคง มืง โดง กอย วอแว โอว. 4แกวะ แตห แม เหรต อีบึณ อาโมยว ดูอี กานัณ อี กอย รึม โดบ เอ.”
5แดเจณ ตึอน วี ต็อห ดี อัน, “เซ โอว บอ ยึร อีบึณ อู วี, อัน ยี ตู มึห น็อห ซี เลห มืง อี มูห โดง กอย อัน, มาเซ ปี โลว โบง โอว? แม ดี แตห โอว ตึย ฆอน แม ฮาว แคง มืง บรีม แม?”
6อัน วี ต็อห, “อาว ปึอน ตึย ฆอน โอว ฮาว แคง มืง บรีม โอว ดอ เหมา. 7เฌาพรา อี อึบ ฆางหราว, อัน แฮะ แดะ โอว, แตห โอว เลห แคง มืง บรีม โอว, เลห แคง กาง ฆูณ โอว, แตห โอว เลห ตัะ วอแว โอว. อัน บอ แฮะ ดัว กาดีก ซัดฌา ดี โอว, ต็อห, ‘โอว ดี ดัว มืง ตี ดี หลูกหลาน แม.’ เฌาพรา ตี, อัน ดี ตึย อามู อามาด อัน, แตห อัน แยต ดี อาต แม, แตห แม ฌัม มืง บรีม โอว, แดะ อีบึณ อู วี โดบ แม, แตห อัน แบน อีบึณ ฆอน โอว. 8เซ อีบึณ ปี ร็อห แม ยี ตู ซี โดบ แม, โอว ต็อห, กาดีก ซัดฌา ปี ดัว แม ดี โอว, อึณ อาว ฮู หมาน. แม อาว ฮู โลว โบง มาเซ. แม ยี ตู ปึอน ตึย ฆอน โอว ฮาว ฌัม แคง มืง บรีม โอว ดอ เหมา.” 9อัน แฮะ ฮอต กาลาง ปาย ตี แดเจณ ตึอน บอ เบลห แด อัน ดี ฆึม ดา กาณา อัน, ดัว กาดีก ซัดฌา ดี อัน, ต็อห ดี โบง โตต ปี หมาณ ดา กาณา อัน ดี อัน.
10ปัน ตี อัน ปี วี ดึห มังปร็อง กาฮาต อี มูห โกรว ดา กาณา อัน ฆึร โดว, ดึห โกรวกราม ดา กาณา อัน แบน โมยว แบน โมยว, เลห ฮาว มืง อารามนาราฮัม อี มูห มืง อานาโฮว. 11อัน บอ ฌัม นา เรต มืง ตี, อัน คยัะ, ดีเหลา บอ มังปร็อง กาฮาต อัน โคบ อึม คึม. อึณ มูห บา ดี อับ, อาคราว ดอ ฮาว ต็อะ เฆ อีบึณ ดี อึม.
12อัน วี ต็อห, “อึย แม เฌาพรา, แม มูห เฌาพรา ปี กรึบ ดา กาณา โอว, อี จืร อาบราฮัม. อาตึร แตห แม เฌา กาเว ดา กาณา โอว, แตห แม จอย บอ โอว. 13แม ยึร, โอว กอย ดี โคบ อึม คึม นี. อาว เหลณ เฆ ฆอน อีบึณ อี กอย แคง มืง นี, เฆ ดี เลห แคง มืง, ตัห ต็อะ อึม. 14เซ ฆอน อีบึณ ดี ตัห, โอว บอ กาลาง ดี อัน, ‘แตห โอว เดียง อึม ปี ต็อะ แม อี แจก,’ เซ อัน ดี เวียะ ต็อห, ‘แตห แม เดียง, โอว ดี ดัว บอ มังปร็อง กาฮาต แม เดียง,’ เซ อัน โบง ปาย ตี โอว ดี บอ นับ, ฆอน อีบึณ ตี, แม เฌา แฮะ ร็อห, แตห อัน แบน อีบึณ อาแซก อี มูห แดเจณ แม. ปาย ตี โอว ดี บอ นับ, แม เฌา แฮะ กาเว บอ ดา กาณา โอว.”
15อัน แฮะ ฮอต กาลาง ปาย ตี อาว เหลณ อึณ บอ มึห ฆอน อีบึณ อู วี, อัน จืร นาง แบก, อัน เลห ตัห แคง มืง. อัน มูห ฆอน อาเบด อี มูห ฆอน อีมาย นาง แมก. นาง แมก มูห อีบึณ อานาโฮว. อานาโฮว มูห อีกัด อาบราฮัม. นาง แบก ตี วี เลห ตัห แคง มืง, ฆอด กาเปา แดง ยัะ อัน. 16ฆอน อีบึณ ตี แฮะ ชีด กาเซา. อัน มูห ดีบยา, หณัม มึห อีมาย. อัน โลง ดี อึม คึม, ต็อะ อึม, ฮับ แคง กาเปา อัน. แฮะ ฮอต, อัน วี โฮะ.
17ดอ อัน ตี แดเจณ ตึอน วี ฮาว โดง กอย อัน ต็อห, “แตห แม ดัว โอว เดียง อึม แคง กาเปา แม อี แจก.”
18ฆอน อีบึณ ตึอน วี ต็อห, “แตห แม เดียง, ดา.” ปาย ตี อัน บอ เบลห กาเปา อัน อู เฌณ, แตห ดา ตี เดียง.
19ดา แฮะ ฮอต เดียง แพ, ฆอน อีบึณ ตึอน วี ต็อห, “โอว ดี ฮาว ต็อะ อึม ปอ อึณ ปัว, แตห บอ เฆ มังปร็อง กาฮาต แม ปึอน ดี เดียง แพ.” 20ปัน ตี อัน ฮาว อู เฌณ, ดึห กาเปา อัน, ต็อะ โหลว อึม แคง กาลัต. แฮะ ฮอต, อัน ฮาว ปอ อู เฌณ ต็อะ อึม, แตห ดอน โดว เดียง แพ. 21แดเจณ ตึอน ยี กอย ซีต็อง, ยอด ปี โบง อัน, เฌณฌา ลอง เฌาพรา, โยว อัน เฌา ดี แตห อาเร อัน ออง, โยว อึณ ตู ออง.
22เฆ มังปร็อง กาฮาต แฮะ ฮอต เดียง แพ, อัน ดึห ครีว อี ฮับ ดี ฆูงมูห อู โบ็ง. จัน อัน แฮะ มูห อู เท. อัน ดึห บอ ฆันแด ครีว อา โบ็ง. จัน อัน เดา บยา. อัน ดึห อาตี, ดัว ดี ฆอน ดีบยา ตึอน. 23อัน มืร ต็อห, “แตห แม กาลาง ดี โอว, ฆอน อาเซ แม มูห? แคง กาง ฆูณ แม, อึณ ปึอน ตัม?”
24ฆอน ดีบยา วี ต็อห, “โอว มูห ฆอน อาเบด. ฆูณ โอว แฮะ มูห ฆอน นาง แมก ฆาย อานาโฮว.” 25อัน บอ ต็อห, “เย มึห เหรียง กืน, แตห เฆ โดว ซัดดาวา แม โฮม. เย มึห บอ โดง ดี ตัม.”
26วาย อัน ตี ดา อี ตึอน วี มูด ฆีณ อัน ดี อาต เฌาพรา. 27อัน ต็อห, “โอว อืบ มยูก แม เฌาพรา อี มูห เฌาพรา ปี กรึบ อาบราฮัม, อี มูห ดา กาณา โอว. แม เฌาพรา แฮะ โบง นา หมึอม นา หมาน ดี ดา กาณา โอว. แม มืร แฮะ ตึย โอว ฮาว ซืร กอ ฌัม แคง กาง อีกัด ดา กาณา โอว.”
28ปัน ตี ฆอน ดีบยา ตึอน ฮาว เวณ แคง กาง มา อัน, กาลาง โตต ดี มา อัน. 29นาง แบก ตึอน ยี มึห อีกัด, อัน จืร อาลับ. 30อัน บอ ยึร ครีว อี ฮับ ดี ฆูงมูห บอ ฆันแด ปี ชึบ วา อัน, บอ ยึร โฆรห วา อัน อี ต็อห, “ดา อี ตึอน แฮะ ต็อห ปาย ตี ดี โอว.” แฮะ ฮอต, อาลับ บอ เลห แคง กาง, ฮาว ดี อึม คึม อี มูห โดง กอย ดา อี ตึอน. 31อัน ต็อห, “แตห แม ตัห ลึบ แคง กาง เย. แม มูห ดูอี ปี ม็องการา ดัว เฌาพรา. แกวะ แตห แม กอย นา เรต. โอว แฮะ ฮอต อึณปราย โดง ดี ตัม แม แคง กาง. โอว แฮะ อึณปราย บอ โดง กอย มังปร็อง กาฮาต แม.”
32ปัน ตี ดูอี ตึอน ตัห ลึบ แคง กาง. อาลับ บอ จอย อัน อูน โกรว ปี ดาง เฆ แดง มังปร็อง กาฮาต, ดัว เฆ อีด นา แดง เหรียง, ดัว บอ ปี ดี โฮม ดี เฆ โดว ซัด. อัน ดัว อึม ดี ดา ตึอน บอ ดี ดูอี อี โดบ อัน, แตห เฆ บาย เปลา เฆ. 33ปัน ตี อาลับ ดัว เฆ โฮม โบม. ดา อี ตึอน ยี ต็อห, “โอว ตู ซี โฮม ดอ ตี นี. โอว โลว กาลาง ลอง ปี โลว โอว ดี อาต.”
อาลับ วี ต็อห, “แตห แม กาลาง, มาเซ ปี โลว แม.”
34ปัน ตี อัน วี จูห ดี แค. อัน ต็อห, “โอว แฮะ มูห แดเจณ อาบราฮัม. 35เฌาพรา แฮะ ม็องการา ดัว ดี ดา กาณา โอว แบน โมยว แบน โมยว. อัน เฌา ดัว อัน มึห มาบู เฆ มามัก บอ รึอน เฆ ครีว บอ หมาย อี มูห อีมาย บอ อีบึณ. อัน เฌา แฮะ ดัว กืน บอ มังปร็อง กาฮาต บอ มาลา. 36อาบราฮัม มืร แฮะ กัด กาเซา. นาง ซารา อี มูห อีบึณ ดา กาณา โอว, อัน แฮะ ดัว ดา กาณา โอว มึห ฆอน อีมาย อู วี. ฆอน อีมาย ตี แฮะ ปึอน โตต โกรวกราม แคะ ปี มึห ดา กาณา โอว. 37ดา กาณา โอว ตึอน แฮะ หมาณ โอว ดัว กาดีก ซัดฌา ดี อัน. อัน ต็อห, ‘แม แกวะ ร็อห อีบึณ อาดา ฆอน โอว แคง ดูอี อาโมยว กานัณ อี กอย รึม โดบ โอว. 38แม โลว ฮาว ฌัม ดี กาง ฆูณ โอว, โดง กอย วอแว โอว, แตห แม แดะ อีบึณ อาดา ฆอน โอว.’
39โอว แฮะ วี ต็อห ดี อัน, ‘โอว โยว อีบึณ ตู ซี โดบ โอว.’
40ปัน ตี อัน วี ต็อห, ‘โอว แฮะ โดบ เฌาพรา เซเซ. เฌาพรา ดี ตึย อามู อามาด อัน, แตห อัน แยต ดี อาต แม, แตห แม ออง, แตห แม ปึอน ดี แดะ อีบึณ อู วี แคง วอแว โอว, อี กอย โดง กอย บรีม ฆูณ โอว, แตห อัน ตัห ดี นี. 41แม แฮะ ดัว กาดีก ซัดฌา ดี โอว, แตห แม ฮาว ดีหมอด. เซ แม ฮี ตัห ฌัม ดี วอแว โอว, เซ เฆ บอ ตู ซี ตึย อัน โดบ แม, แม อาว ฮู โลว โบง ปี ดัว แม กาดีก ซัดฌา ดี โอว.’
42ปาย ตี โอว แฮะ ตัห ฌัม ดี อึม คึม อาตึร. ดอ อัน ตี โอว แฮะ วี ต็อห, ‘แม เฌา, แม มูห เฌาพรา ปี กรึบ ดา กาณา โอว อี จืร อาบราฮัม. แตห แม แตห อึณ ออง ปี โลว โบง โอว ดอ ฮาว โอว โดบ อึณเตณ ตี. 43แตห แม เฌา ยอด โอว. โอว แฮะ กอย ดี โคบ อึม คึม ดอ ตี นี. เซ ฆอน อีบึณ เลห แคง มืง, ต็อห ดี ต็อะ อึม, เซ โอว บอ ต็อห ดี อัน, ‘แตห แม ดัว โอว เดียง อึม อี แจก แคง กาเปา แม,’ 44เซ อัน บอ ต็อห ดี โอว, ‘แตห แม เดียง, โอว ดี บอ ต็อะ อึม, แตห บอ มังปร็อง กาฮาต แม เดียง,’ อาเซ ต็อห ปาย ตี, อึณ ดี มูห อีบึณ ปี ร็อห แม เฌา ดัว ดี ฆอน อีมาย ดา กาณา โอว.
45โอว แฮะ ฮอต กาลาง ปาย ตี แคง น็อห โอว, อู เฌณ อึณ บอ มึห นาง แบก เลห ตัห, ฆอด กาเปา แดง ยัะ อัน, ฮาว โลง ดี อึม คึม, ต็อะ อึม.
46ปัน ตี โอว ต็อห ดี อัน, ‘แตห แม ดัว โอว เดียง อึม อี แจก.’ อัน บอ ดึห กาเปา อัน อู เฌณ, ต็อห, ‘แตห แม เดียง, โอว ดี แตห บอ มังปร็อง กาฮาต แม เดียง,’ ปัน ตี โอว บอ เดียง. อัน ดัว บอ มังปร็อง กาฮาต โอว เดียง.
47แฮะ ฮอต, โอว ดีหมอด อัน ต็อห, ‘แม มูห ฆอน อาเซ?’ อัน วี ต็อห, ‘โอว มูห ฆอน อาเบด. อาเบด มูห ฆอน อานาโฮว ฆาย นาง แมก.’ ดอ อัน ตี โอว ดัว อัน ชึบ ครีว อี ฮับ ดี ฆูงมูห อัน, ชึบ บอ ฆันแด ดี แด อัน. 48โอว บอ โฆม ดี อาต เฌาพรา, ครึบเครา, อืบ อัน เฌา, อี มูห เฌาพรา ปี กรึบ ดา กาณา โอว, อี จืร อาบราฮัม. อัน แฮะ ตึย โอว ฮาว โดบ อึณเตณ ตี, แตห โอว แดะ ฆอน อีบึณ แคง อึณโฮม อีกัด ดา กาณา โอว, แตห อัน แบน อีบึณ ฆอน ดา กาณา โอว. 49ดอ ตี นี, เซ เบ บอ ร็อก ดา กาณา โอว, เซ เบ บอ ซี โบง นา หมาน ดี อัน, แตห เบ กาลาง ดี โอว. เซ เบ ตู ซี แตห นาง แบก โดบ, แตห เบ กาลาง บอ อาตี, แตห โอว นับ มาเซ ปี โลว โบง โอว, นา เหมา โอว โลว ฮาว.”
50ปัน ตี อาลับ ฆาย อาเบด วี ต็อห, “เฌาพรา แฮะ โบง ปาย ตี. ยาย ตู นับ ดี ต็อห มาเซ. บอ นา หมึอม, บอ นา ตู หมึอม, ยาย ตู นับ ดี ต็อห มาเซ. 51นาง แบก กอย ดี อาต แม. แตห แม ดึห ฮาว อัน, แตห อัน แบน อีบึณ ฆอน ดา กาณา แม. แตห อึณ โดบ ปี จัร เฌาพรา เย โบง.”
52แดเจณ อาบราฮัม ตึอน, อัน แฮะ ฮอต โทม โฆรห ฆาย ตี, อัน วี ครึบเครา ดี อาต เฌาพรา. 53ปัน ตี แดเจณ วี ดึห โกรว อี มูห รึอน บอ ครีว, บอ ครึง ตา, วี ดัว ดี นาง แบก. อัน ดึห บอ โกรว อี ง็อห กาเซา, ดัว ดี อีกัด ฆาย มา อัน. 54แฮะ ฮอต ปัน ตี เฆ บอ โฮม โบม, บอ อัน, บอ เฆ ดา อี โดบ อัน. เฆ แฮะ แพ โบม, เฆ บอ ตัม แคง กาง ตี.
ปา แคหณา ซีณวัห เจว เฆ แฮะ ฮอต ยีต, แดเจณ อาบราฮัม วี ต็อห, “แตห เบ ควาง โอว เวณ ฮาว โดง กอย ดา กาณา โอว.”
55อีกัด นาง แบก บอ มา อัน ต็อห, “แตห แม แตห ฆอน ดีบยา กอย รึม โดบ เย อาดา ฆึร ซีแง. แฮะ ฮอต อัน ดี ฮาว โดบ แม.”
56ดา อี ตึอน วี ต็อห, “แกวะ แตห เบ แคร โอว เวณ. อัน เฌา แฮะ ฮอต แตห อึณ ออง ปี โลว โบง โอว. แตห เบ ควาง โอว ฮาว, แตห โอว ปึอน ดี เวณ โดง กอย ดา กาณา โอว.”
57ปัน ตี เฆ ต็อห, “แตห เย แดะ นาง แบก, ดีหมอด อัน.” 58เฆ วี แดะ อัน, ดีหมอด อัน ต็อห, “แม ซี โดบ เฆ ดอ ตี นี?”
อัน ต็อห, “อึร, โอว ซี โดบ เฆ ดอ ตี นี.”
59ปัน ตี เฆ ลาย กาลาง โฆรห ตึย, บอ ควาง เฆ ฮาว. เฆ อี ฮาว ตี บอ มูห บอ วา เฆ นาง แบก, บอ หมาย อัน อี มูห อีบึณ, บอ แดเจณ อาบราฮัม บอ เฆ ดูอี อี โดบ อัน.
60เฆ บอ ม็องการา แตห นาง แบก ตึอน ต็อห,
“แม วา เย, แตห แม มึห หลูกหลาน กืน, แตห เฆ กอย แบน แซน แบน ลาน, แตห เฆ หลูกหลาน แม อึบ รันซู เฆ.”
61เฆ แฮะ ฮอต ม็องการา แตห ปาย ตี นาง แบก บอ หมาย อัน บอ ยีต ฮาว. เฆ โฮะ ป็อะ มังปร็อง กาฮาต เฆ, โดบ ดา อี ตึอน. ปาย ตี แดเจณ ตึอน บอ ดึห เวณ นาง แบก.
62ดา อาแซก ตึอน ยี แฮะ ฮาว โดง กอย อึม คึม อี จืร อึม คึม อัน เฌา อี อีม, อี ปึอน ยึร. อัน กอย กาตัด อึม คึม นา เตต.
63อาดา อู ซีแง บา ดี อับ, อัน แฮะ เลห ฮาว แคง นา อัน, แตห อัน เฌณฌา ลอง เฌาพรา. ดอ อัน ตี อัน ยอด, บอ ยึร มังปร็อง กาฮาต ตัห โดง กอย อัน. 64นาง แบก ตึอน ยอด, บอ ยึร อาแซก บอ โลง ดี กาตูะ มังปร็อง กาฮาต อัน อู เฌณ, 65ต็อห ดี แดเจณ ตึอน, “ดูอี อี ตัห แคง นา ดอย, อัน มูห อาเซ?”
แดเจณ ต็อห, “อัน มูห ดา กาณา โอว.” ปัน ตี นาง แบก ดึห กาแมะ อัน, กาบีด นา อัน.
66ดา อี ตึอน วี จูห ดี กาลาง โตต ปี โบง อัน, แตห อาแซก โทม. 67อาแซก วี แยต นาง แบก ลึบ แคง ทึบ บีก นาง ซารา, อี มูห มา อัน. อัน บอ คัด ดึห นาง แบก, แตห นาง แบก แบน อีบึณ อัน. อาแซก มืร ร็อก นาง แบก. ปาย ตี น็อห อัน แฮะ วี ดาคึย วาย ยัม มา อัน.
© 2021, Wycliffe Bible Translator, Inc. All rights reserved.
