Luk 1
1
Luke alaka sanguvu yedzi
1Kunwu Tofili,
Batu beyitsi bamikise ne utende mamvu mesuta tima ye besu. 2Bangu betende ni me besu beyuka ne batu bedze me bandu, beyene mamvu mamu ne misa me bangu, ye bangu beyikwe belakisi be iwowe dze Nzambi. 3Nami ma yebise sunwule mesi mesuta, yami me yene umve ne utende we Tofili mamvu mamu. 4Yayu nowe we yiba witi bilakisili bye belakise we byedzi ni umbu.
Betse dziya Zambatisi ni vi
5Ndili ye Elodi edze kani we Zudee, yedze ne kani we ndaku ye Nzambi we kumvu Zakali, wangu edze ni we yimvu ye Abyase nwadzi wedzi Zabeti edze ni we imbisa dze Alon. 6Bangu besi bole bedze ni batu betelee busu ve Nzambi, bangu bedze ne ukuuna mendondzi mesi ne bitsila byesi bye Kunwu Nzambi. 7Ni bangu bedze nde bana, ne Zabeti edze kumba, bangu besi bole bedze badzuna.
8Vusa votu, Zakali edze ne upika sadzi ye Nzambi, yedze ni vusa ve yimvu ye bangu. 9Nda bekani be ndaku ye Nzambi bedze ne upika ne kala, ye betobo Zakali ne unyindzile se liyi ye ndaku ye Nzambi ye umpende, ne utsumba yila ye sulu nda ye paka. 10Ndili ye bedze ne utsumba yila ye sulu nda ye paka, batu besi bedze ituna bedze ne umbondo. 11Palikise, ye tuma we Nzambi eluma elaka Zakali nyulu, untele ne boko ye sangwe ye tsiya ye Nzambi kwele ye bitsumba yila ye sulu nda ye paka. 12Ye Zakali eyene tuma we Nzambi ngazemoyi ya kwata wangu, yedzi eyene bongo. 13Tuma we Nzambi nedzi ati: «We nde yene bongo Zakali, umbondu nwowe Nzambi ayakwe, nwadzi wowe Zabeti atse dziya nwana we ibaka, we tse luka wangu kumvu ye Zan. 14We tse dze ne itsisa dzineni, ne batu beyitsi betse dze ne itsisa, ye bitse dziya nwana wowe. 15Ni wangu atse dze ni mutu we uneni busu ve Kunwu, wangu nde tse noto me kaka me melaku mesi me kanve. Fudzu ye Umpende yetse lundise wangu asake se moyi nwen mama wedzi. 16Wangu atse ye vutise bana be Izayeli beyitsi, kwele ye kunwu Nzambi we bangu. 17Wangu atse ya nda Mutu we Nzambi, ne mimbi tine singa ye Eli, ne uvutise milima mye betata kwele ye bana. Wangu atse yikule milima mye batu be nde kuuna Nzambi, yayu bangu betsimene telee nda bekani. Wangu atse lakise batu bitse pika sadzi ye Kunwu.» 18Zakali asunwule ne tuma we Nzambi ati: «Me tse yiba ni vi? Me ni dzunu, ne nwadzi wami dzunu.» 19Tuma we Nzambi akalule nedzi ati: «Me ni Gablyele undzandzi we Nzambi, wangu ni we meluma me, ne uya tanda we unisisili unve. 20Ni nda we mesuna me, wakitse dze ni tsina. Wakitse wowe si vusa ve mamvu mami me tanda we mamu mitse ya. Ee mami me tanda mamu metse ya ni ndili ye Nzambi etanda.» 21Ndili mene yayu, batu bedze ne ubuka Zakali ituna bangu bakima, ne Zakali eyunwen se ndaku ye Nzambi. 22Yedzi epula wangu eke tuka vele wowe ne bangu, ye bangu beyiba ati, Nzambi alaka Zakali yila se ndaku yedzi. Wangu edze ne uwowe ne bangu yani ne milenvu ayikwe tsina. 23Zakali amana dzandza yedzi evutse sombo yedzi. 24Yumana vavu nwadzi wedzi Zabeti abapa dzimi, Zabeti asodze nyulu besundzi betanyi nde pula. Yedzi etanda ati: 25«Yene me kunwu me pika me, me dze ne sonyi busu ve batu bami, ni velolo Nzambi ayene me tsesi wangu ananguse me sonyi.»
Tuma we Nzambi aya tanda nda bitse dziya Zezu
26Zabete adzi ne dzimi dze besundzi untuba, ye Nzambi eluma tuma wedzi we kumvu Gablyele, se ngundu ye Galile ye kumvu Nazaleti. 27Kwele ye nwana we nwantu we kumvu Maliya witse yikwe nwadzi we Zozefi. Zosefi edze ni we imbisa dze Davidi. 28Tuma we Nzambi anyindzile se ndaku ye Maliya anyusile wangu ati: «We dzi ne polo ye Kunwu Nzambi adzi nowe.» 29Maliya ayene nganzemoyi, yedzi eyuka me tuma we Nzambi etanda wangu. Ye Maliya etanda ati: «Yedzi inyusile me tuu ni yi?» 30Tuma we Nzambi ne Maliya ati: «We nde yene bongo, we dzi ne polo busu ve Nzambi. 31Me tanda we, we tse bapa dzimi, we tse dziya nwana we ibaka, we tse luka wangu kumvu ye Zezu. 32Wangu atse dze ni uneni, betse banga wangu ni Nwana we Nzambi we ikulu amene, kunwu Nzambi atse kaba wangu ukani ve koko we dzi Davidi. 33Wangu atse kuma umbu ne umbu se ikaka dze batu be Izayeli likuma ledzi nde tse siya.» 34Maliya ne tuma we Nzambi ati: «Me ni untsuba, ni me tse bapa dzimi ni vi?» 35Tuma we Nzambi nedzi ati: «Fudzu ye Umpende yetse ya kule yowe ne singa ye Nzambi we ikulu amene, yetse vungule we nda sisiwun, yayu nwana wowe itse dziya atse dze ni umpende, betse banga wangu ni nwana we Nzambi. 36Me tanda we, ne Zabeti we yali yowe adzi ne dzimi dze nwana we ibaka se udzunu, we batu besi bedze ne ubanga kumba, adzi ne dzimi dze besundzi untuba. 37Ni nde ye Nzambi iwata pika.» 38Maliya ati: «Me ni undzandzi we Kunwu, Nzambi apika me nda mowe me tanda.» Ye tuma we Nzambi evutse.
Maliya atse yene Zabete
39Bemana vavu, Maliya atse mesadzi mesadzi se bikudzi bye ngundu yotu ye Zuda. 40Maliya anyindzile se ndaku ye Zakali anyusile Zabeti. 41Ye Zabeti eyuka nda Maliya enyusile wangu, nwana anyingene se moyi, ye Fudzu ye Umpende ye lundise wangu. 42Zabeti awowe yangayanga ati: «Nzambi akaba we meve tima ye batu besi, akaba ne nwana widzi se moyi nwowe. 43Me ni nza, we mama we kunwu wami iye yene. 44Yowe menyusile me, nwana anyingene ne itsisa dzesi se moyi nwami. 45We dzi ne itsisa, nowe idzi ne ivukidze ne Kunwu, ne medzi me tanda we metse ya.»
Linvu le Maliya
46Maliya ati:
«Mekumise Nzambi ne unlima nwami nwesi.
47Unlima nwami nwedzi se itsisa, utsina ne Nzambi unlungisi wami.
48Wangu ayivile me undzandzi wedzi, we nde yulu.
Ee mendili mesi batu betse tanda me, we dzi se itsisa.
49Ni Nzambi we singa apika me mamvu meneni,
wangu ni Nzambi we umpende.
50Wangu adzi ne tsesi ye batu bikuuna wangu mendili mesi.
51Wangu apika ne singa yiyitsi,
batu bedze ne udzoko ati, bangu batakwe boko,
wangu apanza bangu.
52Wangu ananguse bekani se bibuma bye ukunwu,
Wangu atumbidze be unkuuna ikulu.
53Wangu akaba be nde untanvu, untanvu,
wangu avutise bedze ne untanvu meboko sanzile.
54Wangu aya yamene batu be Izayeli bedzandzi bedzi.
wangu eke dzimbise ne ulaka meve medzi,
55Yedze si nda wangu edzika ndaka
ne bekoko be besu bekala, Ablaami
ne be imbisa dzedzi umbu ne umbu.»
56Maliya adze bane Zabete besundzi besatu,
yedzi evutse sombo yedzi.
Nda bedziya Zanbatise
57Ndili ye Zabeti ye udziya ya kalwe, wangu adziya nwana we ibaka. 58Batu bidzi konedzi ne yali yedzi, beyuka ati, Kunwu apika wangu mamvu meve, ye bangu besi betsisa. 59Bemana dziya nwana, vusa ve unwambi bangu baya kwise nwana sakwe. Bangu bafumba luka nwana kumvu ye tata wedzi Zakali. 60Mama ati: «Nyen, kumvu ye nwana ni Zambatisi.» 61Bangu nedzi ati: «Nde mutu widzi ne kumvu yayu se yali yowe.» 62Ye bangu bewesile tata ne usunwunle ati: «Kunvu yowe iluka nwana ni inza.» 63Zakali adzuka liyi ye ibaya atende kumvu ye nwana ati: «Kunvu ye nwana ni Zambatisi.» Bangu besi bakima. 64Ndili mene mbotu, Zakali wedze tsina awowe, yedzi ekumise Nzambi. 65Batu bedze tima yayu bayene bongo, ne batu bedze se ilongo dze Zudee dze bikudzi, bedze ne uwowe ne mamvu mamu mesi. 66Besi bedze ne uyuka mamvu mamu babata se milima mye bangu, ye bangu betse ne uwowe ati: «Ayu nwana atse dze ni vi?» Singa ye Nzambi yedzi nedzi umbu amene.
Linvu le Zakali
67Fudzu ye Umpende ya lundise Zakali tata we nwana.
Yedzi ewowe nda Mutu we Nzambi ati:
68«Yakayi bekumise Kunwu Nzambi, we batu be Izayeli.
Nedzi iya yamene batu bedzi, ne lungise bangu.
69Wangu akaba besu unlungisi we singa, we imbisa dze Davidi undzandzi wedzi.
70Yedzi ni medzi etanda ne kala ne Batu be Nzambi bemipende.» 71Wangu etanda ati:
«Wangu atse lungise besu se meboko me batu biwunda besu, ne be nde tondo besu.
72Wangu edze umve ne bekoko be bebe, velolo avele yivile umbatsi ve ndimvu ve umpende, ve bangu bekuta.»
73Yedze ni ndaka ye Nzambi edzika ne koko we besu Ablaami.
74Wangu ekuta ndaka nedzi ati: «Me tse pinule bana bowe se meboko me batu biluna bangu,
yayu bangu betse tuka bondo me nde yene bongo.
75Bangu betse tuka dze umpende, ne telee
busu vami masi mesi me libiku le bangu.»
76Zakali avele tanda ati:
«We nwana wami betse banga we ni Mutu we
Nzambi we ikulu amene. We tse landa busu
ve Kunwu ne uyebise wangu peyi.
77Yene mowe itse tanda ne batu bedzi,
Nzambi alungise beyi, aboloko beyi mamvu mebi.
78Ee Nzambi we besu adzi ni kate umve amene.
Wangu aluma besu ukwalala vi yinga ikulu nda musa nwibala ne suka.
79Ni wangu nwentse ya nanguse batu bidzi se pindzi ne udzika bangu kwalala
ne bidzi ne bongo ve liku. Yayu nwangu nwen bapa bebe se peyi ye itavu.»
80Nwana anene ne sayi ne sayi ayikwe butu, wangu adze ni se ikanye, ndzii ne vusa vedzi ebanda tanda misisili mye Nzambi ne batu be Izayeli.
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES