PALABURU 1
1
Tuntuka palaburu yangi pai lino
1:1–2:4a
1Ri uyu-uyunya, ri tempo pantepuʼu i mPue Ala malaburu yangi pai lino, 2lino setu bareʼepa tumotoa, pai ntongo kaenggo-enggo. Ewa tasi bangke anu kayonggu-yonggu mangkaʼuwi pura-puranya, nakulamuti mbani, paikanya kuasa i mPue Ala moyano-yano ri wawo ue setu. 3#2 Kor. 4:6 Ndatoʼo i mPue Ala, “Kareme!” Liu-liu mareme. 4Mawongko raya i mPue Ala mangkita. Ndapapogaʼamo reme pai wengi, 5pai ndapapotoʼo i mPue Ala reme setu “Mareme”, pai wengi setu “Mawengi”. Liumo wengi pai ratamo ri kamowuronya. Inceʼemo eo anu kaʼisa.
6-7 #
2 Ptr. 3:5
Ungka lairia ndatoʼo i mPue Ala, “Pewalimo poragia da mangagaʼaraka ue setu mewali radua ntila.” Liu-liu mewali. Ewanceʼemo ndapapewali i mPue Ala poragia anu mampapogaʼa ue anu reʼe ri ara mporagia setu pai anu reʼe ri wawonya. 8Poragia setu ndapapotoʼo, “Yangi.” Liumo wengi pai ratamo ri kamowuronya. Inceʼemo eo anu karadua.
9Ungka lairia ndatoʼo i mPue Ala, “Waʼa ue anu ri ara yangi da mompasambaka, da naka tongawa tana.” Mewalimo kojo ewanceʼe. 10Ndapapotoʼo i mPue Ala tana setu “Karatana”, pai ue setu ndapapotoʼo “Tasi”. Mawongko raya i mPue Ala mangkita 11Ndatoʼo woʼu i mPue Ala, “Mbolimo tana setu da mampapesuwu mpengaya-ngaya pinamuya, inceʼemo ngaya mpinamuya anu reʼe wukunya pai ngaya mpinamuya anu da mowua.” Mewali kojo ewanceʼe. 12Inceʼe painaka tana mampapesuwumo mpengaya-ngaya pinamuya. Mawongko raya i mPue Ala mangkita inceʼe. 13Liumo wengi pai ratamo ri kamowuronya. Inceʼemo eo anu katatogo. 14-15Ungka lairia ndatoʼo i Pue Ala, “Mbolimo da reʼe waʼa aga-aga ri yangi anu da mampakareme lino, anu da mampapogaʼa reme pai wengi, pai da mampakanoto tempo pontepuʼu ndeme, taʼu, pai eo bangke agama.” Mewali kojo ewanceʼe. 16Ewanceʼemo ndapapewali i mPue Ala radua aga-aga merara anu bangke, inceʼemo ogu eo da merara ri ndeme pai ogu mbuya da merara ri wengi; banya podo inceʼe ndapowia woʼu waʼa betuʼe. 17Ndadika i mPue Ala waʼa aga-aga anu merara setu ri yangi da mampakareme lino, 18da mangkuasai reme pai wengi, pai da mampapogaʼa kareme pai kawengi. Pai mawongko raya mPue Ala mangkita inceʼe. 19Liumo wengi pai ratamo ri kamowuronya. Inceʼemo eo anu kaʼaopo.
20Ungka lairia ndatoʼo i mPue Ala, “Mbolimo ri raya ue da kangkanyo-ngkanyo waʼa mpinatuwu, pai ri tongo ndaoa da maria tonci moyoko-yoko.” 21Ndapapewali i mPue Ala waʼa mpinatuwu anu bose ri tasi, pai mpengaya-ngaya pinatuwu anu tuwu ri raya ue, sangkani pai mpengaya-ngaya tonci. Pai mawongko raya i mPue Ala mangkita inceʼe. 22Ndadonco i mPue Ala pura-puranya setu, nepa ndasongka pinatuwu anu tuwu ri raya ue da naka mojene mabangani tasi, pai ri waʼa ntonci da naka kakoteranga-rangani karianya. 23Liumo wengi pai ratamo ri kamowuronya. Inceʼemo eo anu kaʼalima.
24Ungka lairia ndatoʼo i mPue Ala, “Mbolimo lino da mampapesuwu mpengaya-ngaya pinatuwu anu ri karatana, anu manaya pai anu maila, anu bose pai anu masiwu.” Mewali kojo ewanceʼe. 25Ewanceʼemo ndapampapewali i mPue Ala pura-puranya setu pai mawongko rayaa mangkita.
26 #
1 Kor. 11:7
Ungka lairia ndatoʼo i mPue Ala, “Seʼi-seʼi kita da mampowia tolino anu da mewali ewa kita pai da sintolio pai kita. Tau seʼe anu da mamparenta waʼa bau, waʼa ntonci pai mpengaya-ngaya pinatuwu anu ntaninya, madago anu manaya bara anu maila, madago anu bose bara anu masiwu.” 27#Mat. 19:4, Mrk. 10:6 #Pal. 5:1-2 Ewanceʼemo i Pue Ala mampapewali tolino, pai ndapapewali tau seʼe ewa koroa ngkalioa. Ndapapewali tau seʼe tuama pai weʼa. 28Ungka lairia ndadonco tau seʼe ndatoʼo, “Ndipomulimo naka sondo, da naka waʼa mulimi mampeari pai mamparenta juku-juku sambawo lino. Ri komi kuwai tetala da mampasilolongani waʼa bau, waʼa ntonci pai pura-pura pinatuwu ntaninya anu maila. 29Anu da ndikoni kuwaika komi mpengaya-ngaya pinamuya anu reʼe wukunya pai wua ngkaju. 30Paikanya ri waʼa ntonci pai pinatuwu anu maila ntaninya, kuwaika ewo pai pinamuya anu moira mewali pangkoninya.” Mewali kojo ewanceʼe. 31Ndapapowawo i mPue Ala wuwunya anu roo ndapowia setu mawongko kojo rayaa. Liumo wengi pai ratamo ri kamowuronya. Inceʼe eo anu kaʼaono.
@LAI 2000
