Dibandu 38
38
Juda na Tamar
1Va temu eni Juda amakakinina na baana bataji bandi, amawenda o Adoullam ombu mutu diina diandi Hira. 2Avana Juda amalabila muana mugetu uChoua muisi Canaan amamuwela. 3Mugetu amadila dimi na amabura muana dibaala agu Juda amaluga Er. 4Mugetu amamuedila dimi na amabura muana dibaala agu amaluga Onan. 5Amamuebura muana dibaala agu amaluga Chela; Juda amaba o Kezib ava muana amaburulu.
6Juda amawelila tsomi andi Er mugetu, diina diandi Tamar. 7Er tsomi Juda amaba mutu mubi va gusu Fumu; la dibandu Fumu amamubokisila. 8Mbana Juda amaruma Onan rie: Weʼ yebonga mukuili umuana nguji agu nomuvayila adivu diwelimina na bifu bitindi yiburu yimfumbi; gukamuburila baana.
9Onan amajaba yiri muana eni agoba aguandi kabogu amabondusanga tsangu tsiandi va tsi ava amafubininanga yitsiga na mukuili umuana nguji andi yiri agoburila muana nguji andi muana. 10Adi amavaga disamalasa Fumu ubueji, Fumu amamubokisa wandi. 11Mbana Juda amatsingula boji buandi Tamar rie: Tsana mukuili o ndagu taji agu te na muana ami Chela obanguga.
Amalaba keri yiri muana ofu nana baana banguji bandi bamafuila. Tamar amayenawenda na amayetsana o ndagu taji andi.
12Bilumbu bipuela binovioga mugatsi Juda amafu, jandi amaba muana mugetu uChoua. Juda anopala o bukuili amawenda o Timna ombu jogu abamafuganga bindombu biandi, bamawenda, jogu na mbatsi andi Hira muisi Adoullam. 13Bamatsingula Tamar rie: Boji buagu janduʼgu evioyi o Timna uyefuga bindombu biandi. 14Kabogu amavula biduaru biandi bibukuili na anjagumba tsanda na amatsana va dikotulu diEnaim va mugula nsila jiTimna; mu mbari amagulu yiri Chela aka dibaala na asamawakusu ombu gandi. 15Juda amamulaba na amatasa yiri yimbembu avu mu mbari amakubiga yinsi yiandi. 16Amamurasuna muna nsila na amavosa rie: Nyuyisilimina ombu gagu. Asamajaba yiri aguna amaba boji buandi. Mugetu amamuwivula rie: Yi gupega? 17Dibaala amawagula rie: Nyugutindila yinsabi yimosi yimugamba ami. Mugetu amawivula rie: Gupega tuga te na vana guyitindila? 18Dibaala amawivula rie: Tuga yi nyuguvega? Tamar amavosa rie: Yilimba yiagu ayivu na mukudu na nguangu agu ajivu nagu va dikaka. Amamuvega bionyi: Mbana amayesilama nandi; Tamar amadila dimi. 19Mugetu amarelama amayenawenda, anogusula tsanda aji amakegumba amamueduara biduaru biandi bibukuili. 20Juda amatinda yinsabi na mbatsi andi muisi Adoullam uyekobula tuga ombu mugetu eni. Tumba mbatsi andi asamamurasuna. 21Amawivula bisi mbura eni rie: Yimbembu ayimaba o Enaim va mugula nsila, aka? Bamamugabusila rie: Viaga, tugaa na yimbembu vava.
22Dibaala dieni amayenagabuga ombu Juda na amamutsingula rie: Ngaamurasuna na bisi mbura eni batsivosa rie: Viaga, tugaa na yimbembu vava.
23Juda amavosa rie: Akelisi tuga eni! Ba-yatureka. Vagaa diambu, nsitinda yinsabi yieni na gugaamurasuna.
24Miweli mirieru minovioga, bama-yetsingula Juda rie: Boji buagu Tamar amava-ga bumbembu, dimajabunu mu mbari aka na dimi. Juda amaruma rie: Mupalisianu o gusu kana nomunyensa mbisu. 25Banomupalisa o gusu kana, amaruma mutu utsingula boji bua-ndi Juda rie: Mutu agudila bima biebibi agu-mapega dimi. Guijabi mutu agudila moru egu-gu na beleeti tsietsitsi na nguangu ejiji?
26Juda amabijaba kabogu amavosa rie: Amakelisa migaga uviolila menu; dingensa nyisamamuwakisa ombu muana ami udibaala Chela nana divu diwelimina.
Juda asamamuefubana yitsiga nandi.
27Temu jinotola ubura, kabogu Tamar amabura mavasa. 28Ava misongu mitega, di-mosi dimapalisa dikaka; muburisitsi amadi-bonga na amaditunga mukudu ubenga na amavosa rie: Agugu atsireyila upala.
29Tumba amakotisa dikaka mbana muana nguji andi amapala. Kabogu muburisitsi ama-vosa rie: Tsie gumatobila yibaga?
Na Juda amamuluga Peres: Mutobitsi uyi-baga. 30Mbana muana nguji andi udibaala amapala. Agumaba na mukudu ubenga va dikaka; Juda amamuluga Zera: Yiari ayi wisi epalili.
La sainte Bible en langue Yipunu © Alliance Biblique du Cameroun, 1992.
