Lk 12
12
Enkikoo naipirta esunkureisho
(Mat 10.26-27)
1 #
Mat 16.6; Mk 8.15 Ore etiu neijia, pee eiturrurro olorora kitok metaa keitunyoro, neiteru aiturukie ilooiteng'eni lenyena ajoki, “Entodol ake ate te nkisuijo oo Lfarisayo nchere esunkureisho. 2#Mk 4.22; Lk 8.17 Meetae enaimulumularo nemeibalunyeki, aashu enaisudoro nemeyiolouni. 3Ore embae pooki nitejo ntae te naimin neyookini aalikioo te wang'an, ore nena nipuopuo aaing'omingo'makino too lgilat loo nkisudorot neyookini aalikioo too nchumarot oo nkajijik.
Ele enturiata
(Mat 10.28-31)
4“Ajoki ntae, loshoreta laainei, emiure lelo ooar osesen, nemeitoki aata ai naaidim aataas eidipa ina. 5Kake aikok intai aliki olonare niurere; entureita ilo laa ore eidipa atara metua, neitoki aata engolon nanang'akinye Yehanum; ee ajoki ntae, ilo enturiata!
6“Ai mme elai are ake enya ntiitiini miet? Nemelang ninye Enkai hoo nabo e nena. 7Oo naa ntae ilaa keikena ninye lpapit loo lukuny inyi. Emiureisho; iatata pae tipat aalang ntiitiini kumok.
Enkibalunoto o enyata e Kristo
(Mat 10.32-33; 12.32; 10.19-20)
8“Najoki nanu ntae, ore pooki laaibalie te dukuya ltung'ana, neibalie sii ninye Enkerai e Tung'ani ninye te dukuya ilmalaika le Nkai. 9Kake ore ilo laamiki te dukuya ltung'ana nemikini sii ninye te dukuya lmalaika le Nkai. 10#Mat 12.32; Mk 3.29 Ore oltung'ani pooki osukeny Enkerai e Tung'ani kepalakini, kake ore olomor Enkiyang'et Sinyati nemepalakini. 11#Mat 10.19-20; Mk 13.11; Lk 21.14-15 Naa te neyae ntae nkajijik e ntumo o laitoriak o enkitoo, eming'aing'ai aajo ai jojo aa anaa aiwalulu aajo aa; 12amu keutaki ntae Enkiyang'et Sinyati te ina saa enijojo.”
13Nejoki oltung'ani obo otii atua ilo orere, “Olaiteng'enani, tiaaki olalashe lai maatooriki enjung'ore ang.” 14Kake etiaka, “Lo tung'ani, ai ng'ae laaitaa nanu olarishani anaa olooriki ntae?” 15Neitoki ajoki ninche, “Entodol ake ate, entodol ate to lng'uarra; amu ore enkishui neme nkumoi oo masaa naata.” 16Neitoki aliki enkitanyaanyukoto, nejoki, “Eetae apa olkarsis neisho enkurma enye oleng, 17nejoki kewan enye, ‘Kaa taa aas, amu maata enapik endaa ai?’ 18Nejo, ‘Inji aiko, kaar impechen aainei nashetu naalala naalang kuna; pee ashumie endaa ai o masaa aainei. 19Naa kajoki oltau lai, lo tau! Iata masaa kumok nikitushumakaki too larin kumok; isikarrayu tadaayu niokisho nishipa.’ 20Kake nejoki Enkai, ‘Lo modai! Ena kewarie kiyieki oltau lino; paa omanaa nena tokitin ninteng'ela keaku pasa nkuneng'ae ninche?’ 21Neijia etiu oloshumaki kewan imasaa neme karsis ti alo Enkai.”
Enkisiligata Enkai
(Mat 6.25-34)
22Nejoki ninye ilooiteng'eni lenyena, “Ajoki naa ntae, emintanyamaluo te nkaraki enkishon inyi, te ntoki ninyanya, o too seseni linyi te ntoki ninchopishopo. 23Amu kitok enkishui alang endaa, naa kitok osesen alang inkilani. 24Ing'ura lkurruki; meunisho, nemesotisho, nemeeta sitooni anaa mpechen, neitoki ake Enkai sii ninche. Kebaa naa elang tipat inyi ntae enoo motonyi! 25Naa kalo obo linyi oidim atoponiki kewan entemata nabo e nkaina te nkishui enye? 26Amaa naa te nimindimidimi aataas enkiti bae anaa ina, oo pee intanyamaluoluo too nkulie pooki? 27#1 Int 10.4-7; 2 Ilai 9.3-6 Ng'ura ntapuka, eneiko te nebulu, nemeekenya nemepiyaisho; kake ajoki ntae, ore ninye Solomon te sikar enye pooki nemeikodo anaa enatiu nabo e kuna. 28Kake pasa taa eishop Enkai aiko nji olkujita obulu taata ti ong'ata ore taaisere nenang'akini enkima, kebaa eitulus aishop intae, lo tung'ana kulo ooti enkirukoto! 29Naa eming'oruru entoki ninyanya anaa eniokioko, naa emisinanuo. 30Amu kuna tokitin eing'oru loreren pooki le nkop; neyiolo Papa linyi ajo nkolati inyi nena. 31Ore enaikash naa eng'oru enkitoria enye, naa keaku sii nkuninyi nena kulie.
Karsisisho e keper
(Mat 6.19-21)
32“Emiureisho, lo turrur oti, amu Papa linyi otonyorra aisho ntae enkitoria enye. 33Entimir imasaa inyi, enchoo laisinak; engoraki ate lbenia lememusanu, ooata olchumati te shumata lememuta, ine nemenyikaki olapurroni nemeinosie oriri. 34Amu ore ine netii olchumati lino naa ine etii oltau lino.
Isinkan oorripisho
35 #
Mat 25.1-13
“Enterreten impolosi inyi, naa enchoo etoni eyupuyup ltaai linyi 36#Mk 13.34-36 nitiuu anaa ltung'ana ooanyita olkitok lenye elotu eing'uaa osirua le nkiyama, pee te nebau neipotisho nesioki aabolu nabo kata. 37Emayiana ake lelo aisiaayiak laa te nebau olkitok lenye neinepu erripisho. Esipa ajoki ntae, kerretena ninye openy neisho ninche metotona te mesa, nelotu aitoti ninche. 38Naa te neewuo te rripore e are, aashu te ne uni, neinepu etiu neijia, nemayian ake lelo aisiaayiak! 39#Mat 24.43-44 Kake entayiolo nchere, te naa keyiolo olopeny enkaji esaa nalotunye olapurroni, anaata etorripishe naa anaata eitu eisho metigili enkaji enye. 40Entashololoto sii ntae; amu elotu Enkerai e Tung'ani te saa niminteikiki.” 41Nejoki Petero, “Olaitoriani, aiyiook ake iliki ena kitanyaanyukoto ena ei pooki ng'ae?” 42Nejoki Olaitoriani, “Kalo pasa abarani#12.42 abarani olaramatani, olchekut oitasheiki ewueji ilo supat naa ng'en otung'eikia olopeny enkaji, meitotio lootii too rishat enye?
43“Emayiana ake sii ilo aisiaayiani oinepu olkitok lenye easita ina naitanapa. 44Esipa ajoki ntae, keisho meitoria masaa enyena pooki. 45Kake oo te nejo ilo aisiaayiani openy, ‘Eimutie olkitok lai,’ neiteru aidong nkaisiaayiak, nedaa ninye neokisho amera, 46neyooki alotu olkitok le ilo aisiaayiani to lkekun, lemeiteikini o te saa nemeyioloi, neitame neitaboitaki ilemening'isho. 47Ore ilo aisiaayiani apa oyiolo enayieu olkitok lenye, neitu eas aitabaya aashu ina nanyor, neidong'i oleng. 48Kake ore ilo lemeyiolo, netaasa enaishiaakino enkidong'oto, eari penyo. Ore pooki oishooki nkumok, neyieki ninye nkumok; ore ilo laa ninye eitanap iltung'ana nkumok neyieki ninye nkumok oleng.
Eewuo Yesu aor iltung'ana
(Mat 10.34-36)
49“Aewuo aisuroki enkop enkima; naa oi sii ake duoo te naa keidipa atudupai! 50#Mk 10.38 Kake kaata enkibatisa naaibatisae; nebaa enaaitirrishita o meitabari kenya! 51Aijojo pasa kaewuo ayaki enkop osotua? A'a, ajoki eoro ayaki; 52amu ore ebaiki taata eoro enkaji nara miet; nepong'ore uni are, nepong'ore are uni; 53#Mik 7.6 nepong'o enkerai o menye, nepong'o entito o ng'otonye, nepong'ore enkaputani enkitok o layioni lenye, nepong'ore esiankiki enkaputani.”
Entayiolo ake nkatitin
(Mat 16.2-3)
54Nejoki sii olorere, “Te nidolulu oshi enkatampoi eilepa te nkalo e ndoyioroto, nijojo nabo kata, ‘Kelotu asha’; netiu neijia. 55Ore pee idolidolo osiwuo oing'uaa moikuape nijojo, ‘Kelotu airowuaju’; netiu neijia. 56Lo sunkuro! Kulo iyiololo intae aatolimu eliooto enkop o loing'ang'e; kake kaji nkoko pee miyiololo aaing'ura nilimumu enatiu ena kata?
57“Naa kaji etiu pee mirishushu oopeny enasipa? 58Ore eton iriamariri te nkoitoi o ilo likintang'or to larishani, tetema toning'ore ninye eton ipuopuo, pee mikiyeataki enetii olaiguanani, nikintarasaki olaiguanani osikari, nikipik osikari korokoroni. 59Aajoki, mipuku aikata te ine mme italaa empisai nabayie.”
©Bible Society of Kenya, 2020
©Bible Society of Tanzania, 2020
