KAWNCAU 8
8
Sawlux Tuktiak Ka Ceucao
1Sawlux khaw rhawm ka teei kix nawh yum heue. Ka ngaix an, krax tuktiak pa ting lih ti mawh piang ceucao pa koe ka daux veng Yerusaliem mai lheu khaing kawncau pa ting khankix khawmuik prung prang hu ku dah dee ka daux meung Yudax mai meung Samarix heue. 2Pui pa chix nab yam tix blah, sipaung Sathephan mai kix yiiem riag yiiem yo lox sinum son nawh heue. 3Viang mawh nan Sawlux yieh ceucao laux, laig ka daux ku nyiex mai reu simex mai bun mai hu sau kix ka daux thawng heue.#Cau 22:4-5, 26:9-11
Philipux Sidiex Daux Veng
4Mawh kheu nan kix pa hoik prung prang ku dah dee, hu sidiex gau gumlox bwan heue. 5Philipux lih hu ka veng Samarix mai sidiex gau grawng Cao Khrit ka kix heue. 6Cub pui hun khankix, ih rhawm paox tix, nghiet tau, grawng ceu pa krai Philipux, yam mhong kix mai yaox mhai pa daox deng pa yuh nawh heue. 7Grawh grawng nawh pui pa laig phi pa seeing tom nie, kok yo lox sinum mai lih hu heue. Pui pa yum tix plak ton nie mai pa laux caong khankix deeh moi heue. 8Ka daux veng an kied koe krax gaux rhawm heue. 9Viang mawh nan pui tix kaux pa kaux Simon, pa hoik ot ka daux veng an phao ka mai yuh cao sibawk mai pa hoik kieh pui Samarix khankix daox deng kah, pa hoik yaw tokaux tix mawh pa ting lhaong tix kaux. 10Pui khawmuik hoik nghiet ka nawh, jah ka pa iak tom hoek ka pa ting khaing paox tix, ka ah nin, “Pui in mawh sibrawm Siyiex an, pa kok mawh Pa Ting heue.” 11Kix nghiet ka nawh, kheu nawh hoik kieh kix daox deng ka ceu sibawk pa yuh nawh, rheung nyao heue. 12Yam yum rhawm kix ka lox pa mhawm mhiem, pa sidiex gau Philipux, grawng pa dex dawd mai Meung Siyiex mai ceu kaux Yesux Khrit, kix cubcom khawm simex khawm bun heue. 13Tokaux Simon kawx yum rhawm heue. Nawh cubcom tix ka rawm, ot tau mai Philipux mai nawh daox deng ka mhai pa yuh nawh mai sibrawm pa ting pa yuh nawh heue. 14Kawncau pa ting khankix, pa ot ka daux veng Yerusaliem, yam mhong kix grawh grawng Samarix hoik rieb ti teei gumlox bwan Siyiex, kix ploi Petrux mai Yohan hu ka kix heue. 15Yam lih hoek kiex ka kix, kiex rawg bwan son kix, sonsang pon kix Khuan Singax Singeh heue. 16Mawh kheu Nawh ang nyang bax lih piang kix tix kaux kawx, kix hoik cubcom ngie rawm ka daux ceu kaux Simiang Yesux khaing. 17Yam an kiex deuh taix tix piang kix mai kix pon Khuan Singax Singeh heue. 18Simon yaox grawng deuh taix kawncau pa ting ankiex hoik tawx khuan Singax Singeh, nawh tom tawx ti yaox mau ka kiex, 19ah nin, “Ka aux kawx tawx sibrawm in, son sang deuh aux taix tix piang pui mawx ang ah, sonsang pon nawh Khuan Singax Singeh heue.” 20Petrux ah nin ka nawh, “Kieh mau maix laux leeing tau mai maix, kheu maix ce ti sang pon totaix Siyiex ka mau heue. 21Maix ang kleuk ang neuex ka grawng ceu in, kheu rhawm maix ang caw sivoe ngai Siyiex heue.#Yaog 78:37 22Mawh kheu nan, doh keud ka phimap ceu pa caox pa yuh maix in, mai rawg bwan ka Siyiex, sonsang ploi Nawh phimap pa hoik keud maix daux rhawm tix heue. 23Grawh grawng nawh aux yaox hoik ot maix ka daux ghin pa song mai ka daux ceu pa hoik phyawk phimap heue.” 24Simon deeh pawk lox ah nin, “Pax rawg bwan son aux ka Siyiex liak, son ceu pa hoik ah maix khankix tak ang hoek piang aux tix ceu kawx heue.” 25Mawh kheu nan yam hoik kham kix mhai rug mai hoik sidiex gau gumlox Siyiex, kix deeh ing ka veng Yerusaliem mai sidiex gau lox bwan gaux rhawm ka daux yaong Samarix tom nie heue.
Sidiex Ka Pui Ethiopia
26Yam an kawncau Siyiex tix kaux sikah mai Philipux ah nin, “Kaoh mai hu plak caong ma seh, ka krax pa kaoh khaing veng Yerusaliem mai bleeh ka veng Gaza, pa mawh krax daux tiag heue.” 27Nawh kaoh mai hu. jhak heue, pui meung Ethiopia tix kaux, pa mawh pui sieh pa kied ting sibrawm ka greem laux simiang Kandeki, pa mawh simiang pui meung Ethiopia, kaw an mawh pa kia piang sinngao an khawmuik, nawh hoik hoek ti krub ka veng Yerusaliem heue. 28Nawh deeh khaing tan, ngawm daux ling brung cie tix mai phat lai cao jhai Isayax heue. 29Khuan Cao ah nin ka Philipux, “Hu dex mai neuex tokaux maix ka ling an heue. 30Philipux to hu dex ka mai mhong kaw an phat lai cao jhai Isayax mai chawk ah nin ka nawh, “Maix tawng dee bleeh pa phat maix lie?” 31Kaw an deeh ah nin, “Phan ang koe cao pa jhi aux yaox, aux chix tawng yuh ka mawx?” Nawh khyox khaw ka Philipux, nhie nawh haok ngawm tau mai tix heue. 32Phuk lai sigang khri pa phat nawh mawh nin, “Hoik tuk Nawh hu awm yung pa yum heue. Awm kawn yung ang nye ka sivoe cao rhip hauk, Nawh ang ang jheeh tix heue. 33Ka daux krax tiem rhawm Nawh, rud ti teei pa prawng ca, ceu pa mawh meh khaing Nawh heue. Mawh mawx pa sang krai grawng ju Nawh? Mawh kheu hoik teei ju Nawh khaing haktiex heue.”#Isa 53:7-8 34Pui sieh an deeh chawk Philipux ah nin, “Aux khyox khaw ti chawk maix, cao jhai in krai grawng pui mawx? Krai grawng tokaux tix lie, phan ang mawh nan, krai grawng tang kaux lie? 35Philipux ang moing tix mai jah ti sidiex ka nawh khaing lox phuk lai sigang khri an, lox bwan gaux rhawm grawng Yesux heue. 36Yam kawn lawng kix krax kix hoek ka dee koe rawm tix dah mai pui sieh an ah nin, rawm koe tin, mawh pa yuh ka mawx pa sang kieh tie aux khaing pa cubcom?” 37Philipux ah nin, “Phan maix yum rhawm khawm rhawm tix, chix maix heue. Nawh deeh pawk lox ah nin, “Aux yum rhawm grawng Yesux Khrit mawh Kawn Siyiex heue.” 38Nawh tawx lox kieh ling brung an kaog heue. Kiex khawm ra kaux lih hu ka daux rawm, kiex pa mawh Philipux mai pui sieh an mai nawh cubcom kaw an ka rawm heue. 39Yam kaoh kiex khaing ka daux rawm, Khuan Siyiex loe Philipux hu mai pui sieh an ang lai baox yaox nawh heue. Kheu nawh gaux rhawm mai kawn hu krax hu nawh heue. 40Philipux yaox tokaux tix ot ka daux veng Asado mai nawh sidiex gau lox bwan gaux rhawm ka veng khawmuik tom hoek nawh ka daux veng Kesarix heue.
Wa Common Language Bible © Bible Society of Myanmar, 2012
