ငဝ်ႈၵမ်ႇၽႃႇ 3
3
လွင်ႈၵူၼ်းတူၵ်းသုမ်း
1ငူးၸိုင်လၵ်းလႅမ်ၼႃႇသေတရိၵ်ႈသၢၼ်ႇၵႃႈဢၼ်ထႃႇဝရႃႉၽြႃးပဵၼ်ၸဝ်ႈႁဵတ်းပဵၼ်တင်းသဵင်ႈတင်းလူင်လႄႈ ထၢမ်တီႈၵူၼ်းယိင်းၼၼ်ႉလႄႈဝႃႈ၊ သူဢမ်ႇလႆႈၵိၼ်မၢၵ်ႇတူၼ်ႈၵႃႈဢၼ်မီးၵႃႈၼႂ်းသူၼ်ဢူးယဵၼ်ႇၼႆႉဝႃႈၼႆ၊ ၽြႃးပဵၼ်ၸဝ်ႈမီးဢမိင်ႉဢမၢၼ်ႇၶၼ်ပဵၼ်ႁိုဝ်။ ဝႃႈၼင်ႇၼႆဢေႃႈ။- 2ၵူၼ်းယိင်းၵေႃႈလၢတ်ႈတီႈငူးၼၼ်ႉလႄႈဝႃႈ၊ ႁဝ်းမီးဢၶႂၢင်ႉဢၼ်လႆႈၵိၼ်မၢၵ်ႇတူၼ်ႈၵႃႈဢၼ်မီးၵႃႈၼႂ်းသူၼ်ဢူးယဵၼ်ႇၼႆႉဢေႃႈ။- 3မၢၵ်ႇတူၼ်ႈဢၼ်မီးၵႃႈၼႂ်းၶိုင်ႈၵၢင်သူၼ်ဢူးယဵၼ်ႇၼႆႉၸမ်ႉ၊ ၽြႃးပဵၼ်ၸဝ်ႈမီးဢမိင်ႉလႄႈဝႃႈ၊ သူယႃႇပေၵိၼ်၊ သူယႃႇပေတိူဝ်ႉပေယိပ်း။ ပေႃးဢမ်ႇၼၼ် တၵ်းတၢႆဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။- 4ငူးၵေႃႈလၢတ်ႈတီႈၵူၼ်းယိင်းၼၼ်ႉလႄႈဝႃႈ၊ သူတၵ်းလႆႈတၢႆဢမၢၼ်ႇၶၼ်ပဵၼ်ဢမ်ႇၸႂ်ႈ။- 5လွင်ႈမၼ်းၸမ်ႉ ၽြႃးပဵၼ်ၸဝ်ႈႁူႉလွင်ႈဢၼ်ၼႂ်းဝၼ်းဢၼ်ၵိၼ်မၢၵ်ႇၼၼ်ႉ၊ မၢၵ်ႇတႃသူတၵ်းၽုၺ်ႇလႅင်းလႄႈ သူတၵ်းပဵၼ်ၸိူဝ်ႉၼင်ႇၽြႃးပဵၼ်ၸဝ်ႈသေလႄႈ ႁူႉလွင်ႈဢၼ်လီလွင်ႈဢၼ်ဢမ်ႇလီၼၼ်ႉဢေႃႈ၊ ဝႃႈၼင်ႇၼႆဢေႃႈ။- 6မိူဝ်ႈဢၼ်ၵူၼ်းယိင်းႁၼ်လွင်ႈဢၼ်တူၼ်ႈၼၼ်ႉ ပဵၼ်ဢၼ်လီၵိၼ်လီၶူပ်း၊ ဢၼ်ႁၢင်ႈလီထုၵ်ႇတႃ၊ တူၼ်ႈဢၼ်လီထုၵ်ႇၸႂ်ၵျိူၵ်ႈၸႂ် ပုၼ်ႈဢၼ်တၵ်းႁႂ်ႈၺၢၼ်ႇပိင်ႇၺႃႇယႂ်ႇၽႄႈၼမ်မႃးၼၼ်ႉၸိုင်၊ မၼ်းဢဝ်မၢၵ်ႇတူၼ်ႈၼၼ်ႉၵိၼ်ဢေႃႈ။ တီႈၽူဝ်မၼ်းၵေႃႈမၼ်းပၼ်လႄႈ၊ မၼ်းၼၼ်ႉၵေႃႈၵိၼ်ဢေႃႈ။- 7မၢၵ်ႇတႃသွင်ၶႃၽုၺ်ႇလႅင်းလႄႈ၊ သွင်ၶႃႁူႉႁၼ်လွင်ႈဢၼ်တူဝ်ၸဝ်ႈၵဝ်ႇယူႇတူဝ်ပူၺ်ယူႇၼၼ်ႉသေယဝ်ႉ၊ ဢဝ်မႂ်တူၼ်ႈမၢၵ်ႇလိူဝ်ႇသၢင်းၽေႃးယဵပ်ႉၸပ်းၵၼ်လႄႈ ႁဵတ်းသၢႆဢႅဝ်ပုၼ်ႈတူဝ်ၸဝ်ႈၵဝ်ႇဢေႃႈ။
8သွင်ၶႃၼၼ်ႉငိၼ်းသဵင်ထႃႇဝရႃႉၽြႃးပဵၼ်ၸဝ်ႈ လႄႇၵႂႃႇလႄႇမႃးၵႃႈၼႂ်းသူၼ်ဢူးယဵၼ်ႇၼႂ်းၶိင်ႇဢၼ်ၵၢင်ဝၼ်းဢူၼ်ႈၼၼ်ႉသေယဝ်ႉ၊ သွင်ၶႃၽူဝ်မေးၼၼ်ႉ ဢွၼ်ၵၼ်လပ်ႉမႅပ်ႉတဵတ်ႇယူႇၵႃႈၼႂ်းတူၼ်ႈမႆႉသူၼ်ဢူးယဵၼ်ႇ ႁႂ်ႈလႆႈလွတ်ႈသေ ဢထမ်ႇၸဝ်ႈဢေႃႈ။- 9ထႃႇဝရႃႉၽြႃးပဵၼ်ၸဝ်ႈၵေႃႈ၊ ႁွင်ႉတီႈၵူၼ်းလႄႈဝႃႈ၊ မႂ်းမီးၵႃႈလႂ်၊ ဝႃႈၼင်ႇၼႆဢေႃႈ။- 10မၼ်းၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈငိၼ်းသဵင်ၸဝ်ႈႁဝ်းၵႃႈၼႂ်းသူၼ်ဢူးယဵၼ်ႇလႄႈ ၵူဝ်ၵွပ်ႈပိူဝ်ႈဢၼ်ယူႇတူဝ်ပူၺ်ယူႇၼႆလႄႈ လပ်ႉမႅပ်ႉတဵတ်ႇယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 11မၼ်းၸဝ်ႈထၢမ်လႄႈဝႃႈ၊ ၽူႈလႂ်လၢတ်ႈလွင်ႈဢၼ်မႂ်းယူႇတူဝ်ပူၺ်ယူႇၼၼ်ႉတီႈမႂ်း။ မႂ်းၵိၼ်မၢၵ်ႇတူၼ်ႈဢၼ်ၵဝ်ပိင်းၺၢပ်ႈဝႆႉလႄႈဝႃႈ၊ ယႃႇပေၵိၼ်၊ ဝႃႈၼင်ႇၼႆၼၼ်ႉယဝ်ႉႁိုဝ်။ ဝႃႈၼင်ႇၼႆဢေႃႈ။- 12ၵူၼ်းၵေႃႈလဝ်ႊလၢတ်ႈလႄႈဝႃႈ၊ ၵူၼ်းယိင်းဢၼ်ၸဝ်ႈႁဝ်းဢၢပ်ႈပၼ်တီႈၶႃႈၸဝ်ႈၼၼ်ႉ ပၼ်မၢၵ်ႇတူၼ်ႈၼၼ်ႉတီႈၶႃႈၸဝ်ႈလႄႈ ၶႃႈၸဝ်ႈၵိၼ်မႅၼ်ႈတီႈၶႃႈယဝ်ႉ၊ ဝႃႈၼင်ႇၼႆဢေႃႈ။- 13ထႃႇဝရႃႉၽြႃးပဵၼ်ၸဝ်ႈၵေႃႈ ထၢမ်တီႈၵူၼ်းယိင်းၼၼ်ႉလႄႈဝႃႈ၊ မႂ်းႁဵတ်းၸိူဝ်ႉၼင်ႇႁိုဝ်ယဝ်ႉ။ မိူဝ်ႈဢၼ်ဝႃႈၼင်ႇၼႆၸိုင် ၵူၼ်းယိင်းၵေႃႈလဝ်ႊလၢတ်ႈလႄႈဝႃႈ၊ ငူးပႅတ်ႉလႅၼ်ၶႃႈၸဝ်ႈလႄႈၶႃႈၸဝ်ႈၵိၼ်မႅၼ်ႈတီႈၶႃႈယဝ်ႉ၊ ဝႃႈၼင်ႇၼႆဢေႃႈ။
ၽြႃးပဵၼ်ၸဝ်ႈၸီႇယၢင်ႇဢပႅတ်ႈတၢမ်ႇ
14ထႃႇဝရႃႉၽြႃးပဵၼ်ၸဝ်ႈမီးဢမိင်ႉတီႈငူးၼၼ်ႉလႄႈဝႃႈ၊ ပိူဝ်ႈဢၼ်မႂ်းႁဵတ်းဢမူႉၼႆႉလႄႈ၊ မႂ်းတၵ်းလႆႈၶၢမ်ႇတၢင်းၵိၼ်ႇတၢင်းဝႃႈ ၼႃႇသေတူဝ်ယဵၼ်ႇတူဝ်ငႄႈ ဢိၵ်ႇတင်းတူဝ်ႁၢႆႉၵႃႈၼိူဝ်လိၼ်တင်းသဵင်ႈတင်းလူင်ဢေႃႈ။ မႂ်းတၵ်းလႆႈဢဝ်တွင်ႉလိူၼ်ႈၵႂႃႇလႄႈ ၵိၼ်မုၼ်ႈလိၼ်ယူႇၸူဝ်ႈဢသၢၵ်ႈဢေႃႈ။- 15ၵဝ်တၵ်းႁႂ်ႈမႂ်းတင်းၵူၼ်းယိင်း၊ ၸိူဝ်ႉၶိူဝ်းမႂ်းတင်းၸိူဝ်ႉၶိူဝ်းၵူၼ်းယိင်း ဝႆႉတၢင်းၽိတ်းတီႈၵၼ်ဢေႃႈ။ မၼ်းတၵ်းၶိုတ်ႈႁူဝ်မႂ်းဢေႃႈ။ မႂ်းၵေႃႈတၵ်းၶိုတ်ႈသူၼ်ႈတိၼ်မၼ်းဢေႃႈ၊ ဝႃႈၼင်ႇၼႆဢေႃႈ။
16မၼ်းၸဝ်ႈမီးဢမိင်ႉတီႈၵူၼ်းယိင်းၼၼ်ႉလႄႈဝႃႈ၊ ၵဝ်တၵ်းႁႂ်ႈဝူၺ်ႇတၼႃႇ ဢၼ်ပႃးပတိၵ်ႉသၼ်ႇထေႇၼၼ်ႉၼမ်ၵိုၼ်းၼႃႇတီႈမႂ်းဢေႃႈ။ မႂ်းတၵ်းလႆႈၶၢမ်ႇဝူၺ်ႇတၼႃႇဢၼ်ယၢပ်ႇၼႃႇလႄႈ ၵိူတ်ႇလဵင်ႉလုၵ်ႈလဵင်ႉလၢင်းဢေႃႈ။ တၵ်းလႆႈၸွမ်းဢလူဝ်ႇၽူဝ်တူဝ်ၸဝ်ႈၵဝ်ႇလႄႈ ၶၢမ်ႇတၢင်းဢၼ်မၼ်းဢုပ်ႉမၼ်းပိူင်ႇဢေႃႈ၊ ဝႃႈၼင်ႇၼႆဢေႃႈ။
17မၼ်းၸဝ်ႈမီးဢမိင်ႉတီႈၵူၼ်းၸၢႆးၼၼ်ႉလႄႈဝႃႈ၊ ပိူဝ်ႈဢၼ်မႂ်းထွမ်ႇၵႂၢမ်းမေးမႂ်းလႄႈ ၵိၼ်မၢၵ်ႇတူၼ်ႈဢၼ်ၵဝ်ပိင်းၺၢပ်ႈဝႆႉလႄႈဝႃႈ၊ ဢမ်ႇလႆႈၵိၼ်မၢၵ်ႇတူၼ်ႈၼၼ်ႉ၊ ဝႃႈၼင်ႇၼႆၼၼ်ႉမႅၼ်ႈလႄႈ၊ လိၼ်ၼႆႉလႆႈၶၢမ်ႇတၢင်းၵိၼ်ႇတၢင်းဝႃႈၵွပ်ႈပိူဝ်ႈမႂ်းဢေႃႈ။- 18လိၼ်တၵ်းႁႂ်ႈတူၼ်ႈၼၢမ်ၵူႈၸိူဝ်ႉၵူႈပိူင်ဢွၵ်ႇပုၼ်ႈမႂ်းဢေႃႈ။ မႂ်းတၵ်းလႆႈၵိၼ်မၢၵ်ႇၽၵ်းယိူဝ်ႈၽၵ်းၶဵဝ်ဢၼ်ပဵၼ်မႃးၵႃႈၼိူဝ်လိၼ်ဢေႃႈ။- 19ၸူဝ်ႈဢၼ်မႂ်းဢမ်ႇပႆႇၶိုၼ်းၸူးၵႃႈတီႈလိၼ်ဢၼ်မႂ်းဢွၵ်ႇမႃးၼၼ်ႉၸိုင် ႁိူဝ်ႇဢွၵ်ႇၵႃႈတီႈၼႃႈၽၢၵ်ႇမႂ်းယူႇသေလႄႈ မႂ်းတၵ်းလႆႈၵိၼ်တၢင်းၵိၼ်မႂ်းဢေႃႈ။ လွင်ႈမၼ်းၸမ်ႉ မႂ်းပဵၼ်မုၼ်ႈလိၼ်လႄႈ တၵ်းလႆႈၶိုၼ်းၸူးၵႃႈတီႈမုၼ်ႈလိၼ်ဢေႃႈ၊ ဝႃႈၼင်ႇၼႆဢေႃႈ။
20မိူဝ်ႈၼၼ်ႉၵူၼ်းၸၢႆးၼၼ်ႉ ႁွင်ႉႁဵၵ်ႈၸိုဝ်ႈမေးမၼ်းၼၼ်ႉ ဢေးဝႃႉဢေႃႈ။ လွင်ႈမၼ်းၸမ်ႉ မၼ်းပဵၼ်မႄႈၵူၼ်းၸိူဝ်းဢၼ်ဢသၢၵ်ႈလိပ်းယူႇတင်းသဵင်ႈတင်းလူင်ဢေႃႈ။
21ထႃႇဝရႃႉၽြႃးပဵၼ်ၸဝ်ႈၵေႃႈ၊ ဢဝ်ၼင်ႁဵတ်းၶူဝ်းၼုင်ႈပုၼ်ႈဢႃႇတၢမ်ႇဢိၵ်ႇတင်းမေးမၼ်းၼၼ်ႉလႄႈ ႁႂ်ႈသွင်ၶႃၼုင်ႈဢေႃႈ။
ၽြႃးပဵၼ်ၸဝ်ႈႁေႃႈၶဝ်ဢွၵ်ႇသူၼ်ဢူးယဵၼ်ႇ
22ထႃႇဝရႃႉၽြႃးပဵၼ်ၸဝ်ႈၵေႃႈဝႃႈ၊ တူၺ်းလူး၊ ၵူၼ်းၼႆႉပဵၼ်ၸိူဝ်ႉၼင်ႇႁဝ်းသေပႃးပႃးလႄႈ ၸၢင်ႈႁူႉဢၼ်လီ ဢၼ်ဢမ်ႇလီဢေႃႈ။ တေႃႈလဵဝ်ၼႆႉ ၵူဝ်မၼ်းတၵ်းယိုၼ်းမိုဝ်းမၼ်း ဢဝ်မၢၵ်ႇတူၼ်ႈဢသၢၵ်ႈၵိၼ်လႄႈ ဢသၢၵ်ႈလိပ်းယူႇထႃႇဝရႃႉဢေႃႈ၊ ဝႃႈၼင်ႇၼႆလႄႈ၊- 23လွင်ႈၼင်ႇႁိုဝ်မၼ်းတၵ်းႁဵတ်းၵႃႈတီႈလိၼ်ဢၼ်မၼ်းဢွၵ်ႇမႃးၼၼ်ႉၸိုင်၊ ထႃႇဝရႃႉၽြႃးပဵၼ်ၸဝ်ႈပွႆႇမၼ်းဢွၵ်ႇသေ ၵႃႈၼႂ်းသူၼ်ဢူးယဵၼ်ႇဢေႇတိၼ်ႇၼၼ်ႉသေဢေႃႈ။- 24မၼ်းၸဝ်ႈႁေႃႈၵူၼ်းဢွၵ်ႇၸိူဝ်ႉၼင်ႇၼၼ်သေယဝ်ႉ၊ ဢဝ်ၶေႇရူႉၽဵမ်ႇတင်းလၢႆ တင်းလၢပ်ႇဢၼ်မၢပ်ႈမႅပ်ႈၼၼ်ႉ ဝႆႉၵႃႈတီႈၽၢႆႇဝၼ်းဢွၵ်ႇသူၼ်ဢူးယဵၼ်ႇဢေႇတိၼ်ႇၼၼ်ႉ ႁႂ်ႈလႆႈပႂ်ႉသဵၼ်ႈတၢင်းတူၼ်ႈဢသၢၵ်ႈၼၼ်ႉဢေႃႈ။
Copyright © 2021 by OMF International, Shan Baptist Churches Fellowship
