मत्ती 3
3
यूहन्ना बपतिस्मा दींणवला कु प्रचार
(मरक 1:1-8; लूका 3:1-9; 15-17; यूहन्ना 1:19-28)
1ऊं दिनों मा यूहन्ना बपतिस्मा दींण वलो यहूदिया प्रान्त का एकांत जंगल मा ऐ के पापों का रस्ता बट्टी मन फिराव को बपतिस्मा कु प्रचार करदो छो 2कि, “पापों तैं मांणी कै मन फिरावा किलैकि स्वर्ग कु राज्य नजदीक ऐ गै।” 3यु उ ही च जैकी चर्चा यशायाह जु परमेश्वर का तरपां बट्टी बुल्ण वलो छो का द्वारा करे गै,
“एकांत जंगल मा एक पुकारण वला कु शब्द सूनेणु च कि प्रभु को बट्टो तैं तैयार कैरा
वेकी सड़कों तैं सीधि कैरा।”
4यु यूहन्ना ऊंट का रोम का कपड़ा पैंरयुं अर अपड़ी कमर मा चमड़ा को पठुगा बंधि के रौंदु छो अर टिड्डी अर जंगल कु सौद खांदु छो। अर वेको खांणु टिड्डी अर जंगल को सौद छो। 5तब यरूशलेम शहर अर सैरा यहूदिया प्रान्त अर यरदन गाड का अमणी-संमणी का सभि जगह का लोग वेमा ऐनी। 6अर अपड़ा पापों तैं मांणी के यरदन गाड मा वे बट्टी बपतिस्मा लींनि।
7जब वेल भौत फरीसियों तैं अर सदूकियों तैं बपतिस्मा लींणु कु अपड़ा नजदीक औंण देखि त ऊं बट्टी बोलि, “हे गुरो का बच्चों” तुम तैं कैल जतै कि औंण वला गुस्सा बट्टी भागा। 8इलै मन फिराव का योग्य काम कैरा। 9अर अपड़ा मन मा यु न सोच कि हम अब्राहम का वंशज छा, इलै हम पाप बट्टी बचि जौला किलैकि मि तुम मा बुल्णु छौं कि परमेश्वर यूं ढुंगो बट्टी अब्राहम कु वंशजों तैं पैदा कैरी सकद। 10इलै अब तुम परमेश्वर का न्याय कु तैयार रावा अब कुल्हड़ो डाला का जौड़ा मा रख्युं च इलै जु-जु डालो अच्छो फल नि लौंदु उ कटे अर आग मा झोंके जांद।
11मि त तुम तैं पापों बट्टी पछतावा कैरी के मन फिरावा इलै मि तुम तैं पांणी ल बपतिस्मा दींदो अर यु प्रचार करदु छो, “कि मेरा बाद उ औंण वलो च, जु मि से भि जादा महान अर शक्तिशाली च मि त ये लैख भि नि छौं कि वेको दास बंणि के झुकि के वेका जुतों का तंणखा खोलु, मिल त तुम तैं पांणी ल बपतिस्मा दींनि पर उ तुम तैं पवित्र आत्मा ल अर आग ल बपतिस्मा दयालो। 12वेको सुप्पो वेका हथ मा च अर उ अपड़ा खलिहान तैं अच्छा ढंग से साफ करलो अर ग्यूं को बीज तैं अपड़ा भंडार मा कट्ठा करलो पर भूसा तैं आग मा फूंकी दयाला ज्वा बुझी नि सकदी।”
यूहन्ना द्वारा यीशु मसीह कु बपतिस्मा
(मरक 1:9-11; लूका 3:21-22)
13ऊं दिनों मा यीशु ल गलील जिला का नासरत नगर बट्टी ऐ के यरदन गाड मा ऐ के यूहन्ना से बपतिस्मा लींनि। 14पर यूहन्ना यु बोलि, के ऊं तैं रुकण लगि गै “मि तैं त तेरा हथ बट्टी बपतिस्मा लींण जरूरत च अर तु मि मा बपतिस्मा लींणु कु अईं छै।”
15यीशु ल वे तैं यु जवाब दींनि “अब त इन ही हूंण दे किलैकि हम तैं येइ ढंग से सब धार्मिकता तैं पूरो कन ठिक च।” तब वेल ऊंकी बात मांणी लींनि।
16अर जब यीशु बपतिस्मा लै के पांणी बट्टी भैर निकली के मथि ऐ अर वेल स्वर्ग तैं खुल्यूं देखि अर परमेश्वर की आत्मा तैं कबूतर का रूप मा अपड़ा मथि औंण देखि। 17“अर परमेश्वर ल स्वर्ग बट्टी बोलि कि तु मेरू प्रिय नौंनो छै मि त्वे बट्टी भौत खुश छौं।”
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.
