SEMPANHNAK 1
1
Semsuahhnak Thu
1A hmasaber ah Pathian in lai le van semsuah i. 2Lai tu pianzia nai lo, a kualawngpui awng i. Tipui tu thimhnak in khuk ai, Pathian ai Rauhla tu tipui vumah leng i. 3Cen Pathian in, “Tleuhnak um tuseh,” tiin ti ai tleuhnak um i.#2Cor 4:6 4Pathian in a sik fangin pha i, ti i. Cen Pathian in tleuhnak tu thimhnak in khan i. 5Tleuhnak tu “Sun,” tiin ko ai thimhnak tu “Zan,” tiin ko i. Zan lam liam ai zing lam suak i, ni khathnak i.
6Cen Pathian in, “Ti khantu in vanhangpui um tuseh, hmun dangdang ah ti um tuseh,” tiin ti ai a tihnak bangin um i. 7Vanhangpui tu Pathian in semsuah ai, a hnia lamai ti le a vum lamai ti khiah a tumce in khan i. 8Pathian in vanhangpui tu, “Van,” tiin ko i. Zan lam liam ai zing lam suak i, ni hnihhnak i.#2Pet 3:5
9Cen Pathian in, “Lai ro dak thil tuhin van hnia lamai tidap hmuahhmuah heh hmunkhat ah taikhawm tuseh,” ti i. A ti bangin cang i. 10Pathian in lai ro tu, “Lai,” tiin ko ai hmunkhat ai taikhawmhnak ti cenin “Tipuithuanthum,” tiin ko i. Pathian in a bawnciahnak a sik fangin pha i, ti i. 11Cen Pathian in, “Lai in thingkung hampa a phunphun, a ci a naimi le thai a naimi, keuh tuseh” tiin ti i. A ti bangin cang i. 12Ciamanin ci a naimi le thai a naimi thingkung hampa phunkhim laipua ah suakruai i. Cen Pathian in a bawnciahnak a sik fangin pha i, ti i. 13Zan lam liam ai zing lam suak i, ni thumhnak i.
14Cen Pathian in, “Sun le zan khantu tuhin, ni le hla le kum khantu tuhin, le ni le hla siarhnak tuhin van ah tleuhnak um tuseh; 15Van ah var tuhai laipua ah tleuhnak pe tuh i,” tiin ti i. A tihnak bangin um i. 16Ciatihin Pathian in a tleuhnak lianpui pahnih bawn i: sun can uktu tuhin ni bawn ai zan can uktu tuhin hlapui bawn i; amah in arsite khai bawn i. 17Laivum tleuruaitu tuhin hemi tleuhnakte tu Pathian in van ah dah i. 18Sun le zan uktu tuhin le tleuhnak le thimhnak khantu tuhin dah i. Pathian in a bawnciahnak a sik fangin, pha i ti i. 19Zan lam liam ai zing lam suak i, ni lihnak i.
20Cen Pathian in, “Ti songin nunghing a phuncang suak tuseh, laivum hli lak ahkhai vaniute zuang tuseh,” tiin ti i. A tihnak bangin cang i. 21Ciamanin ti songai nunghing laukul a lian puipui Pathian in semruai i, ti songai um nunghing a phuncang khai semsuah i; cen vaniu a phuncang khai semsuah i. Pathian in a bawnciahnak a sik fangin pha i, tiin ti i. 22Cen Pathian in, “Ti songai nunghingte heh pungzai tu ilai tipuithuanthum dim tu ih, vaniute khai pungzai tu ilai laivum ah dim tu ih,” tiin hmuifu pe i. 23Zan lam liam ai zing lam suak i, ni ngahnak i.
24Cen Pathian in “Innzuat sumhnam a hinkhim le ramsa a lian ituseh, a sen ituseh, a bok in vak thai nunghing hinkhim khiah laipua in keuh tuseh,” tiin ti i. A tihnak bangin cang i. 25Ciatihin Pathian in innzuat sumhnam hinkhim le hampalak ramsa a lian ituseh, a sen ituseh, a bok in vak ai a mer thai nunghing hinkhim khiah semsuah i. Pathian in a bawnciahnak a sik fangin pha i, ti i.
26Cen Pathian in, “Minung bawn nga hang sing; kinmah ai hmuihmel bangin le kinmah bangin bawn tlang ngasing. Ti song um nga le van vumai a zuangmi vaniu vumah ituseh, innzuat sumhnam le hampalak ai ramsa a sen a lian vumah ituseh, a bok in vak ai a mer thai pawl vum ahkhai ituseh thu nai tlang tuseh,” tiin ti i.#1Cor 11:7 27Ciatihin Pathian in minung#1:27 Minungtihnak tu Hebrew in Adam ti i. semsuah i; Pathian in amah ai hmuihmel bangin semsuah i. Pathian in pasal le nupang semsuah ihang.#Mat 19:4; Mar 10:6#Sem 5:1-2 28Cen Pathian in anite hnenah hmuifu pe ai, “Fa tampui nai in pungzai tu ilai laipua heh dimruai in ning thuthu in umruai tu ih. Ti songai nga ituseh, laivum ai a vak thai ramsa hinkhim a sen a lian le van vumai vaniu hinkhim vumah ituseh, thunaihnak ning pe ing,” tiin ti i. 29Ciahlaiah Pathian in, “Laivum ah hlaici a hinkhim le thingthai a hinkhim khiah ning aih tuhin ning pe ing; 30vaniu hinkhim le ramsa a sen a lian a hinkhim, bokvak thai pawl ai rong tuhin hampa le thingthai ning pe ing,” tiin ti i. A tihnak bangin cang i. 31Cen Pathian in a bawnciahnak hmuahhmuah a sik fangin pha ngai i ti i. Zan lam liam ai zing lam suak i, ni rukhnak ihang.
Zanniat Bible © Bible Society of Myanmar, 2018.
