Enkiterunoto 16
16
Hagar o Ishmael
1Ore Sarai enkitok e Abram eitu eiki Abram inkera. Neeta apa enkaisiaayiani e Misiri naji enkarna enye Hagar. 2Nejoki Sarai Abram, “Ng'ura sii ake, aaikeno Olaitoriani enguset pee maisho, shomo taboitare enkaisiaayiani ai, amu ebaiki natum inkera te ninye.” Neiruk Abram oltoilo le Sarai. 3Metaa ore eishua Abram ilarin tomon te nkop e Kanaan, ore Sarai enkitok e Abram, neya Hagar ina aisiaayiani enye oo Lmisiri, neisho Abram olpayian lenye meitaa enkitok enye. 4Neboitare Abram Hagar, neiroshiu. Ore peyie edol enkaisiaayiani ajo eiroshiwuo, nemenu Sarai. 5Nejoki Sarai Abram, “Inchoo ntorrok naaitaasitae meetu shumata iyie. Aaishoo iyie enkaisiaayiani ai ntamuata nkaik ore peyie edol ajo eiroshiwuo naamenu nanu. Inchoo Olaitoriani eiguanare erishata ai o enino!” 6Kake etiaaka Abram Sarai, “Ng'ura, etii enkaisiaayiani ino inkaik inono, intaasa anaa enidol eishiaakino te iyie.” Neisomit Sarai Hagar aisilisil o meisikie aitung'uaa kewan. 7Neinepu olmalaika lo Laitoriani ninye te mbata enchorro enkare ti ong'ata. Etii ina shorro e nkoitoi nalo Shur. 8Nejoki ninye, “Hagar enkaisiaayiani e Sarai, kaji iyie ing'uaa naa kaji iloito?” Nejo Hagar, “Kaisikita ailany ina naaitore ai naji Sarai.” 9Nejoki olmalaika lo Laitoriani ninye, “Torrinyokinoyu Sarai nilo ayanyit ninye.” 10Neitoki olmalaika lo Laitoriani ajoki ninye, “Ekaponaa oleng eishoi ino metaa meikenayu te nkumoi.” 11Nejoki olmalaika ninye, “Ng'ura ajo inuta, naa iiu enkayioni, nimpot enkarna enye ajo Ishmael#16.11 Ishmael: Eutu te nkutuk oo Lbrania ajo “Ekening Enkai”, amu etoning'o Olaitoriani osina lino.” 12Naa keaku ninye osikiria le ntim tiatua iltung'ana, keaku ore enkaina enye kear pooki tung'ani, ore inkaik e pooki tung'ani keaku kearr ninye. Naa keibayu ninye ilalashera lenyena. 13Metaa neipot Hagar enkarna Olaitoriani oirorie ninye ajo, “Ira iyie Enkai nadol,” amu etejo, “Kesipa doi katoduaa Enkai neton aishu aidipa atoduaa ninye?.” 14Ore te nkaraki ina eishooki ina shorro enkarna aajo Beer-lahai-roi#16.14 Beer-lahai-roi: Enchoro eilo otoduaa neton eishu, netii ninye erishata e Kadesh o Bered.
15 #
Ilg 4.22
Neiki Hagar Abram enkayioni, neipot Abram enkarna enkayioni enye natoikio Hagar ajo Ishmael. 16Ore apa Abram naa oloo larin ntomoni isiet o ile pee eiki Haga ninye Ishmael.
©Bible Society of Kenya, 2018
