मर्कूस 2
2
प्यारालाइस रोग लागल मनैया चोखैलक
मत्ती ९:१-८; लूका ८:१७-२६
1टनिक दिन पाछ येशू घुम्क कफर्नहुम सहरम अइल। येशू आपन बैठ्ना घर आरल कना बात मनै सुन्ल। 2तब अत्रा धेर मनै अइल कि घरक भित्तर-बाहर, कहोँ फे ठाउँ नैरह। येशूजुन मनैन परमेश्वरक वचन प्रचार करटलह। 3येशू प्रचार कर्टिरलह त, चार जन मनै प्यारालाइस रोग लागल एकठो मनैयह बोक्क उ घरम अन्ल। 4तर मनैन्हक भीडक कारण हुँक्र ओहीह येशूकठे पुगाइ नैसेक्ल। उहओर्से हुँक्र भर्याङ्गमसे छतम चिहुर्ल। हुँक्र येशूक स्वाझ उप्पर छत उजर्ल ओ उ बेरम्हेह बिस्तारासैँट उहाँकठे उटर्ल। 5हुँकन्हक विश्वास देख्क येशू उ बेरम्हेह कल, “भैया, टुँहार पाप क्षमा होगैल्।”#२:५ उ मनैया चाह पापक कारणले बेराम रह, चाह और कारणले, हम्र सबजन पाप कैरख्ली ओ पापक क्षमा पैहीपर्ना बा। पापक क्षमा पैना चोखैनासे असल हो (यूहन्ना ९)।
6कौनो-कौनो शास्त्रीहुँक्र ओठे बैठलरलह। यी बात सुन्क हुँक्र मनमन सोँच्ल, 7“यी मनैया काकर असिक बट्वाइटा? यी त परमेश्वरक बदनाम करटा! परमेश्वर बाहेक और के पाप क्षमा करसेक्ठा जे?”
8येशू हुँकन्हक मनक बात थाहाँ पाडर्ल ओ हुँकन कल, “टुह्र म्वार बारेम काकर गल्ती विचार कर्ठो? 9यी बेरम्हेह ‘टुँहार पाप क्षमा हुइल्’ कना कि ‘उठ् ओ बिस्तारा बोक्क नेङ्ग’ कना, कौन सजिलो हो?#२:९ यी बेरम्हेह “टुँहार पाप क्षमा हुइल्” कना धेर लिरौसी हो (काकरकि यी देखपर्ना बात नैहो, ओ जाट्टीसे क्षमा हुइल् कि नाहीँ कैक कुई फे थाहाँ पाइ नैस्याकट्)। तर यहीह “उठ् ओ बिस्तारा बोक्क नेङ्ग” कना धेर जोखिमपूर्ण हो (काकरकि मनैया चोखाइल कि नाहीँ कैक सबजन द्याखसेक्ठ)। 10हेरो, मै मनैयक छावह यी पृथ्वीम मनैन्हक पाप क्षमा कर्ना अधिकार रहल बात मै टुँहन देखैम।” तब उ बेरम्हेह कल, 11“उठो, आपन बिस्तारा बोक्क घर जाओ।”
12उ बेरम्ह्या सबजन्हक सामुन्नेम जुरुक्कसे उठल ओ आपन बिस्तारा बोक्क गैल्। तब हुँक्र सबजन छक्क पर्ल। हुँक्र “ओहो! हम्र त असिन कबु फे नैदेख्लरलही!” कह्टी परमेश्वरक महिमा कर्ल।
लेवीक बोलावट
मत्ती ९:९-१३; लूका ५:२७-३२
13येशू फेदोस्र गालील समुद्रक ढिक्वम पुग्ल। धेर मनै उहाँकठे अइटीरलह, ओ उहाँ हुँकन सिखाइलग्ल। 14येशू ओठेसे नेङ्ग्टी जाइबेर, अल्फयसक छावा लेवीह देख्ल। ऊ कर उठैना अड्डम बैठलरलह। येशू हुँकहीन कल, “म्वार पाछ लागो।” तब ऊ उठ्ल ओ उहाँक पाछ लग्ल।
15कुछ समय पाछ येशू लेवीक घरम चेलन्हकसँग खाए बैठ्ल। धेर जन कर उठुइया ओ पापी मानजैना और जन फे येशूक पाछ लग्लरलह। हुँक्र फे सँगसँग खाइटलह। 16कौनो-कौनो शास्त्रीहुँक्र फरिसी समूहक रलह। हुँक्र येशूह कर उठुइया ओ पापीन्हकसँग खाइट् देख्ल। हुँक्र उहाँक चेलन कल, “ऊ काजे कर उठुइया ओ पापीन्हकसँग खैठ?”
17यी बात सुन्क येशू हुँकन कल, “वैदावक आवश्यक रोगीन केल पर्ठा, तर निरोगीन नैपरट्। असहेँक मै पापी मनैन बलाए आरनु, धर्मी मनैन नाहीँ।”
ब्रत रना बारेम प्रश्न
मत्ती ९:१४-१७; लूका ५:३३-३९
18यूहन्नक चेलावँ ओ फरिसीहुँक्र ब्रत रहँट्। एकचो मनै आक येशूह पुछ्ल, “यूहन्नक चेलावँ ओ फरिसीहुँक्र ब्रत रठ, तर अप्नक चेलावँ काकर ब्रत नैरट?”
19तब येशू कल, “भ्वाजमक भोजह्रेन नैखैट का? अवस्य खैठ। दुल्हा हुँकन्हकसँग रहट्सम, हुँक्र ब्रत नैबैठ्ट। 20तर एक दिन हुँकन्हकठेसे दुल्हा लैजाजहीँ, तब हुँक्र ब्रत रहहीँ।#२:२० येशू अपन्हेह दुल्हसे तुलना करट, जे एक दिन लैजाजहीँ ओ मुवापैहीँ। येशू आपन चेलन भोजह्रेनसे तुलना करट।
21“कुई फे पुरान लुगम लौव लुगक पिउँडा नैलगाइट्, काकरकि लौव लुगक पिउँडा मारी पैँस्ठा, ओ पुरान लुगह पैल्हसे झन् कर्रसे फटादेठा। 22अस्तक पुरान छालक थैलीम कुई फे लौव अङ्गूरिक मद नैढरट्, काकरकि लौव अङ्गूरिक मद बाहार्क पुरान छालक थैलीह फुटादेठा। तब अङ्गूरिक मद अँराजैठा। उहओर्से लौव अङ्गूरिक मद ढरक लाग लौव छालक थैली चहठा।”
बिसैना दिनिक प्रभु
मत्ती १२:१-८; लूका ६:१-५
23बिसैना दिन येशू ओ उहाँक चेलावँ बाली बुइल् खेत्वओर्से जाइटलह। तब उहाँक चेलावँ नेङ्ग्ने गोहूँक बाल टुर्ने खैने करटलह।#व्य २३:२५ 24यी देख्क फरिसीहुँक्र येशूह कल, “हेरी! हिँक्र नैकर्ना काम करट। बिसैना दिनम कुछु काम कर्ना व्यवस्था अनुसार ठीक हो का?”
25तर येशू जवाफ देल, “का टुह्र परमेश्वरक वचनम दाऊदक बारेम लिखल बात पहर्क फे नैबुझ्टो? दाऊद राजा ओ हुँकहार मनै धेर भुँखाइलम, दाऊद का कर्ल?#१ शमू २१:१-६ 26अबियाथार नाउँ रहल प्रधान पूजारीक समयम, दाऊद परमेश्वरक पाल भित्तर पैँठ्ल। ऊ परमेश्वरह चह्राइल रोटी अप्न खैल, ओ आपनसँग रहुइयन फे खाइ देक परमेश्वरक व्यवस्था भङ्ग कर्ल। वास्तवम परमेश्वरह चह्राइल रोटी पूजारीहुँक्र बाहेक औरजहन खाइ नैबन।” #लेवी २४:९
27तब येशू हुँकन कल, “परमेश्वर बिसैना दिन मनैन्हक लाग बनैल। तर बिसैना दिनिक नियम मानक लाग मनैन नैबनैल। 28बिसैना दिनम का कर्ना ठीक हो, का कर्ना बेठीक हो कना अधिकार मै मनैयक छावकठे बा।”
© 2020, Wycliffe Bible Translators, Inc. All rights reserved.
