मर्कूस 1
1
बप्तिस्मा देहुइया यूहन्नक प्रचार
मत्ती ३:१-१२; लूका ३:१-१८; यूहन्ना १:१९-२८
1यी खुशीक खबर येशू ख्रीष्टक बारेम हो, जे परमेश्वरक छावा हुइट। 2यी खबर अगमवक्ता यशैयक लिखल अनुसार सुरु हुइल्। ऊ परमेश्वरक कहल बात लिख्ल:#१:२ परमेश्वर येशूसे बट्वाइल बात यशैया लिख्ल।
“हेरो! मै आपन दूतह टुँहीनसे आघ-आघ पठैनेबाटुँ,
जे टुँहार आइक लाग डगर तयार पारी।#मला ३:१
3उजार ठाउँम चिल्ला-चिल्लाक
बोलुइयक आवाज सुन्जाइटा,
‘परमप्रभु आइक लाग
उहाँक मार्ग तयार पारो,
उहाँक डगर स्वाझ बनाओ।’”#यशै ४०:३
4यी खबर पुगुइया बप्तिस्मा देहुइया यूहन्ना रलह। ऊ उजार ठाउँम प्रचार कर्टी मनैन कल, “पाप क्षमा पाइक लाग आपन-आपन पापी मन परिवर्तन करल प्रमाणक रूपम बप्तिस्मा लेओ।” 5यरूशलेम सहरसे लेक, सारा यहूदिया क्षेत्रक मनै यूहन्नक सन्देश सुन अइल। हुँक्र आपन-आपन पाप स्वीकार कर्टी यर्दन लद्यम यूहन्नसे बप्तिस्मा लेल। 6यूहन्ना ऊँटक भुट्लले बिनल लुगा लगाइँट्, ओ छालक पेटी बहन्ल रहँट्।#१:६ यूहन्ना फे अगमवक्ता एलियकअस खस्रार लुगा लगाइँट् (२ राजा १:८; जकरिया १३:४)। ख्रीष्ट आइक लाग मनैन तयार पार कौनो दिन एलिया अइहीँ कना यहूदीन्हक आशा रलहन (मलाकी ३:१, ४:५-६; मर्कूस ९:१२-१३)। हुँकहार खाना फटिङ्ना ओ सहत रलहन।#२ राज १:८ 7ऊ असिक प्रचार करँट्, “महीसे पाछ एक जन अइटीबाट, उहाँक अधिकार म्वारसे धेर बाटन। मै त उहाँक जुत्तक टेनी छोर्ना योग्यक फे नैहुइटुँ।#१:७ अर्थात् “मै त उहाँक गैलगुज्रल कमारा हुइना लायक फे नैहुइटुँ।” 8टुँहन पानीक बप्तिस्मा देहुइया मै हुइटुँ, तर टुँहन पवित्र आत्मक बप्तिस्मा देहुइया उहँ हुइट।”
येशूक बप्तिस्मा ओ परीक्षा
मत्ती ३:१३-१७; ४:१-११; लूका ३:२१-२२; ४:१-१३
9उ समयम येशू गालील क्षेत्रक नासरत सहरसे अइल, ओ यूहन्ना उहाँह यर्दन लद्यम पानीक बप्तिस्मा देलन।#१:९ बप्तिस्मा लेना समेत परमेश्वर मनैन कर कहल सब काम येशू कर्ल। तर उहाँह पाप स्वीकार कर नैपर्लन, काकरकि उहाँकम पाप नैरलहन। 10येशू पानीमसे निक्रटीकि, स्वर्ग उघारजाइट् ओ पवित्र आत्मह ढुकुरअस आक आपनम परट् देख्ल। 11ओ स्वर्गसे असिन आवाज आइल, “टुँ म्वार प्रिय छावा हुइटो। मै टुँहीनसे धेर खुशी बाटुँ।”#उत २२:२; भज २:७; यशै ४२:१; मत्ती १२:१८; मर्क ९:७
12जुर्टहेँ पवित्र आत्मा येशूह उ ठाउँसे दूर, उजार ठाउँम लैगैलन। 13उहाँ चालीस दिनसम उजार ठाउँम रहबेर शैतान उहाँक परीक्षा करल। उ ठाउँम जङ्गली जनावर फे रलह। ओ स्वर्गदूतहुँक्र उहाँक हेरविचार कर्ल।
चेलन्हक बोलावट
मत्ती ४:१८-२२; लूका ५:१-११; यूहन्ना १:३५-४२
14यूहन्ना पक्राउ पर्ल त, येशू गालील क्षेत्रम जाक परमेश्वरक खुशीक खबर प्रचार कर्ल। 15उहाँ कल, “परमेश्वरक ट्वाकल समय आरहल, ओ परमेश्वरक राज्य लग्घ आस्याकल। आपन-आपन पापी मन परिवर्तन कैक परमेश्वरकठे घुमो, ओ यी खुशीक खबरम विश्वास करो।”#मत्ती ३:२
16कुछ समय पाछ येशू गालील समुद्रक ढिक्व-ढिक्व जाइटलह। जैटीजैटी, दुइठो जलहारीन जाल ख्यालट् देख्ल। हुँक्र सिमोन ओ हुँकहार भैया अन्द्रियास रलह। 17तब येशू हुँकन कल, “म्वार पाछ लागो, मै टुँहन मनैन बझैना जलहारी बनैम।” 18यी बात सुन्टीकि, हुँक्र आपन जाल छोर्क येशूक पाछ लग्ल।
19ओठेसे येशू टनिक दूर गैल त, याकूब ओ यूहन्ना नाउँ रहल और दुइ जन जलहारीन देख्ल। हुँक्र जब्दिया कना मनैयक छावन रलह। हुँक्र लाऊम बैठ्क आपन जाल टङ्ग्रटलह। 20येशू तुरुन्त हुँकन आपन चेला हुइक लाग बलैल। तब हुँक्र फे आपन बाबा जब्दियह काम करुइयन्हकसँग लाऊम छोर्क उहाँक पाछ लग्ल।
भूत्वा लागल मनैया चोखैलक
लूका ४:३१-३७
21येशू आपन चेलन्हकसँग कफर्नहुम सहरम गैल, ओ बिसैना दिन सभाघरम जाक मनैन सिखाइलग्ल। 22उहाँक वचन सुन्क मनै छक्क पर्ल, काकरकि उहाँ शास्त्रीन्हकअस नाहीँ, तर पूरा अधिकारसे सिखाइँट्।#मत्ती ७:२८-२९
23उहब्याला सभाघरम भूत्वा लागल एकठो मनैया फे रह। 24ऊ चिल्लैटी कहल, “नासरतक येशू, काजे हमन सँटाइटी? हमन नाश कर आरली का? मै चिह्न्ठुँ, अप्न परमेश्वरक पठाइल पवित्र मनैया हुइटी।”
25तर येशू ओहीह असिक हप्कैटी कल, “चूप लाग्! वाकरमसे निकर्!”
26तब उ भूत्वा मनैयह अइँठ्गुइँठ् पारल, ओ चिल्लैटी वाकरमसे निकर्क गैल्।
27यी घटना देखुइया सबजन छक्क पर्टी, अप्न-अप्न कहलग्ल, “यी का हो? यी त और मेह्रिक शिक्षा हो काहुँ! येशू अधिकारसे भूतन हप्कैठ त, हुँक्र मन्ठ फे!” 28तब उहाँक करल कामक बयान मनै सारा गालील क्षेत्रम बराहाली फैलाडर्ल।
धेर जन चोखैलक
मत्ती ८:१४-१७; लूका ४:३८-४१
29येशू ओ उहाँक चेलावँ सभाघरसे निक्रल त, सिमोन ओ अन्द्रियासक घर गैल। उहाँहुँकन्हकसँग याकूब ओ यूहन्ना फे रलह। 30सिमोनक सासू बेराम पर्क सुत्लकसुत्ल रलही। हुँक्र पुग्ल त सिमोनक सासूक बारेम येशूह सुनैल। 31तब येशू हुँकहार पञ्ज्र गैल, ओ हाँठ पकर्क हुँकहीन उठैल। तबहेँ ऊ चोखागैली ओ उहाँहुँकन्हक मानमर्जाट् करलग्ली।
32सन्झ्याक दिन बुरल त, मनै येशूकठे बेराम ओ भूत लागल सब मनैन आनलग्ल। 33तब अङ्नम सारा सहरक मनै देखपर्ल। 34उहब्याला येशू कैयौ मेह्रिक रोगले सँताइल मनैन चोखैल, ओ धेर भूतन निक्रैल। येशू भूतन ब्वाल नैदेल, काकरकि हुँक्र उहाँह “ख्रीष्ट हुइट” कैक चिह्न्रख्लह।
येशूक प्रार्थना ओ वचन प्रचार
लूका ४:४२-४४
35द्वासर दिन येशू बिहान अङ्गट्टी उठ्क सुनसान ठाउँम अकल्हे परमेश्वरसे प्रार्थना कर गैल। 36तब सिमोन ओ हुँकहार सङ्घरेन येशूह एक-एक कैक खोज्टी गैल। 37हुँक्र उहाँह भेँटैल त, कल, “सबजन अप्नह ख्वाजट।”
38तब येशू हुँकन कल, “हम्र आसपासक गाउँम जाई। उहाँ फे महीह प्रचार करपर्ना बा, काकरकि मै यिह कामक लाग आरनु।” 39उहओर्से येशू ठाउँ-ठाउँक सभाघरम जाक प्रचार कर्ल ओ भूतन निक्रैल। असिक उहाँ सारा गालील क्षेत्रम घुम्ल।#मत्ती ४:२३; ९:३५
कोररोग लागल मनैया चोखैलक
मत्ती ८:१-४; लूका ५:१२-१६
40एकठो कोररोग लागल मनैया आक येशूक पाउ पर्टी, बिन्ती करल, “अप्न महीह चोखाइ चहबी कलसे, महीह कोररोगसे च्वाखा पार सेक्नेबाटी।”
41यी बात सुन्क येशूह स्वाग लग्लन, तब उहाँ वाकरम हाँठ ढैक कल, “मै चाहटुँ, टुँ चोखाजाओ।”#१:४१ कोररोग लागल मनैयह छुलसे, र्वाग सर्ठा कना मान्यता रह। लेवी १३:४५-४६ अनुसार, कोररोग लागल मनैयह छुउइया जे फे अशुद्ध होजाए। तर येशू नैडराक कोररोग लागल मनैयह छुल ओ शुद्ध पर्ल। 42तबहेँ उ मनैया कोररोगसे चोखागैल्।
43तबदोस्र येशू उ मनैयह बिदा देटी कर्रा आदेश देक कल, 44“हेरो, सरासर पूजारीकठे जाक टुँहीन कौनोजन नैद्याखट्सम, कौनोजहनसे कुछु जिन बटोइहो। अप्न कोररोगसे चोखैलकम मनैन्हक आघ साबित कराइक लाग, मोशक व्यवस्था अनुसार बलि चह्राओ।”#लेवी १४:१-३२ 45तर उ मनैया गैल् ओ खुलेआम प्रचार कर्टी अप्न कोररोगसे चोखाइल बात फैलाइ लागल। असिक धेर मनैन्हक भीड येशूक आञ्जरपाञ्जर हुइलकओर्से, उहाँ कौनो सहरम फे पैँठ नैसेक्ल। उहाँह सुनसान ठाउँम जाइपर्लन, तर फे मनै सक्कुओर्से खोज्टी उहाँकठे अइटीरलह।
© 2020, Wycliffe Bible Translators, Inc. All rights reserved.
