मर्कूस 15
15
पिलातसद्वारा येशूह सोधपुछ
मत्ती २७:१-२,११-१४; लूका २३:१-५; यूहन्ना १८:२८-३८
1बिहान हुइटीकि, महासभक सारा सदस्यन, जस्त: मुख्य पूजारीहुँक्र, अगुवाहुँक्र ओ शास्त्रीहुँक्र सरसल्ला कर्ल। हुँक्र “येशूह बाहान्क पिलातसकठे लैजाओ” कल। येशूह लैजाइबेर, हुँक्र फे सँगसँग गैल।#१५:१ पिलातस इस्राएल देशम रोमी सरकारक हाकिम रलह।
2पिलातस येशूह पुछ्ल, “का टुँ यहूदीन्हक राजा#१५:२ यहूदीन्हक राजा: यहूदीहुँक्र “यहूदीन्हक राजा” कलसे ख्रीष्टह कहल बुझँट्। हुँक्र अठे येशू रोमी साम्राज्यक विरोधम उठरल कैक पिलातसह विश्वास दिलाई ख्वाजट। हुइटो?”
येशू जवाफ देल, “अप्नहे महीह राजा कहटी।”
3ओठे रहल मुख्य पूजारीहुँक्र येशूह धेर बातक दोष लगैल। 4पिलातस उहाँह फेदोस्र पुछ्ल, “का टुँहारठे कुछु जवाफ नैहो? हेरो त, हिँक्र टुँहार विरोधम कत्रा धेर बातक दोष लगाइट।”
5तर येशू कुछु जवाफ नैदेल। यी देख्क पिलातस छक्क पर्ल।
येशूह छोरदेना विचार
मत्ती २७:१५-२६; लूका २३:१३-२५; यूहन्ना १८:३९–१९:१६
6मुक्ति-दिवस कना टिहारक समयम, पिलातस मनैन्हक माङ्गल एकठो यहूदी जातिक कैदीह छ्वारपर्ना चलन रलहन। 7रोमी सरकारक विरोधम मनै हूलदङ्गा मच्चारख्लह। हुलदङ्गम हत्या करुइयन जेलम परलरलह। हुँक्रमध्येम बारब्बा फे एकठो रह। 8मनैन्हक भीड पिलातसकठे आक “सालो छ्वारलअस असौँ फे एकठो कैदीह छोरदी” कैक बिन्ती करल।
9तब पिलातस हुँकन पुछ्ल, “यहूदीन्हक रज्वह छोरदिऊँ?” 10पिलातस यी प्रश्न पुछ्ल काकरकि मुख्य पूजारीहुँक्र बिह्र मुलकओर्से केल, येशूह पकर्क आनरख्ल कना बात फे उहाँह थाहाँ रलहन।
11तर मुख्य पूजारीहुँक्र मनैन्हक भीडह उच्काक “बारब्बह छोरदी!” कह लगैल।
12पिलातस फेदोस्र हुँकन पुछ्ल, “टुह्र जेहीह यहूदीन्हक रज्वा कठो, ओहीह का करुँ त?”
13हुँक्र जोरसे चिल्लैल, “ओहीह क्रूसम टङ्गाक मुवाई!”
14पिलातस हुँकन कल, “काजे? यी मनैया का अपराध कैरख्ल?”
तर हुँक्र आउर जोरसे चिल्लैल, “ओहीह क्रूसम टङ्गाक मुवाई!”
15तब पिलातस हुँकन खुशी पारक लाग बारब्बह छोरदेल, ओ येशूहजुन कोर्रा लगाक क्रूसम टङ्गैना आदेश देल।#१५:१५ कोर्रा लगाक रोमीहुँक्र मृत्युदण्ड पाइल मनैन मुवैनासे आघ कोर्रा लगाइँट्। हुँक्र कील्लाअस-अस धातुक या हारक टुक्रिटुक्रा गस्काइल छालक कोर्रा प्रयोग करँट्।
येशूह हिस्यैलक
मत्ती २७:२७-३१; यूहन्ना १९:२-३
16सिपाहीहुँक्र येशूह महलक अङ्नम लैगिल, ओ हुँक्र पल्टनक सारा सिपाहीन बलैल।#१५:१६ महलक नाउँ प्रेटोरियन रह। 17हुँक्र उहाँह राजा कैक हिस्याइक लाग बैजङ्ग्यार झुल्वा#१५:१७ बैजङ्ग्यार झुल्वा राज खानदानक संकेत रह। धेरजसिन राजाहुँक्र महङ्ग बैजङ्ग्यार झुल्वा घालँट्। घलादेल, ओ काँटक मुकुट बनाक उहाँक कपारिम घलादेल। 18तबदोस्र हुँक्र “यहूदीन्हक रज्वक जय!” कह्टी उहाँह हिस्यैल। 19हुँक्र उहाँक कपारिम लठ्ले ठठैल, थुक्ल, ओ उहाँक पाउ पर्क दण्डवत कर्लक स्वाङ् पर्ल। 20असिक हिस्याहुसुक हुँक्र उहाँकमसे बैजङग्यार झुल्वा काहारदेल ओ उहाँकऽ झुल्वा घलादेल। तबदोस्र हुँक्र उहाँह ओठेसे क्रूसम टङ्गाए लैगिल।
येशूह क्रूसम टङ्गैलक
मत्ती २७:३२-४४; लूका २३:३३-४३; यूहन्ना १९:१७-२७
21 #
रोम १६:१३
यरूशलेमसे जाइबेर, हुँक्र कुरेनी सहरक सिमोनह गाउँओर्से आइट् देख्ल। (ऊ अलेकजेण्डर ओ रूफसक बाबा रलह।) सिपाहीहुँक्र हुँकहीन बलजब्री येशूक क्रूस बोकैल।
22हुँक्र येशूह गलगथा अर्थात् खोप्रही#१५:२२ गलगथा: आरमाइक भाषम खोप्रहीह गलगथा कहँट्। उ ठाउँक नाउँ काजे खोप्रही ढर्ल कलसे, एकठो कारण बरा दूरसे ह्यारबेर उ ठाउँ मनैन्हक खप्परअस देखपर्ठा, या द्वासर कारण रोमीहुँक्र धेर मनैन उ ठाउँम मृत्युदण्ड देरख्लह। कना ठाउँम लैगिल। 23तब हुँक्र उहाँह लत्यास बनैना मूर्र कना विर्वा मिलाइल अङ्गूरिक मद पियक लाग देल, तर उहाँ नैपिल। 24तबदोस्र हुँक्र उहाँह क्रूसम टङ्ग्ल ओ उहाँक कौन लुगा क्याकरम पर्ठा कैक गोटी डर्ल।#भज २२:१८
25हुँक्र उहाँह क्रूसम टाङ्गल ब्याला बिहानिक नौ बजल रह। 26उहाँह क्रूसम टङ्ग्ना कारण लिखल सूचना पाटी उहाँक कपारिक उप्पर टाँसल रह। उ सूचनम “यहूदीन्हक रज्वा” लिखल रह। 27हुँक्र उहाँक दाहिन ओ बाउँ पाञ्जर दुइठो अपराधीन फे अल्ग-अल्ग क्रूसम टङ्ग्ल। 28[असिक “हुँक्र उहाँह अपराधीम गन्ल” कना धर्मशास्त्रक बात पूरा हुइल्।]#यशै ५३:१२
29उहँरेसे नेङ्ग्घुम करुइयन मुन्टा हिला-हिला असिक उहाँह हिस्यैल, “वाह्! मन्दिर बिग्राक तीसर दिनम बनुइया!#भज २२:७; १०९:२५; मर्क १४:५८; यूह २:१९ 30क्रूसमसे उतर्क अपन्हेह बचा।”
31असहेँक मुख्य पूजारीहुँक्र ओ शास्त्रीहुँक्र अप्न-अप्न उहाँह हिस्यैल। “यी औरजहन त बचाइल, तर अपन्हेहभर बँचाए नैस्याकल्! 32यी नाउँ केल्हिक ख्रीष्ट, इस्राएलक रज्वा क्रूसमसे उतर्क आए ना, हम्र देख्बी, तब विश्वास कर्बी।” येशूक दाहिन ओ बाउँ पाञ्जर क्रूसम टङ्गागैल् अपराधीहुँक्र फे उहाँह हिस्यैल।
येशूक मृत्यु
मत्ती २७:४५-५६; लूका २३:४४-४९; यूहन्ना १९:२८-३०
33लगभग दिनक बाह्र बजेसे तीन बजेसम साराओर अन्धार हुइल्। 34तीन बजल त, येशू कर्रसे चिल्लैल, “इलोई, इलोई, लामा सबखथनी।”#१५:३४ इलोई, इलोई, लामा सबखथनी: यी आरमाइक भाषा हो। याकर अर्थ हो, “म्वार परमेश्वर, म्वार परमेश्वर, अप्न महीह काजे छोरदेली?”#भज २२:१
35यी सुन्क ओठे ठह्र्याइलमध्ये कुई-कुई कल, “हेरो, यी त अगमवक्ता एलियह बलाइटा।”
36तब एकठो मनैया दौरटी जाक आमिल मदम कपास बिल्ब्वारल ओ लट्ठीम अँट्काक येशूह पिय देहल। ऊ कहल, “हेरी, यहीह बँचाए एलिया आजैठ कि।”#भज ६९:२१
37तबहेँ येशू कर्रसे चिल्लैल ओ प्राण छोर्ल।
38 #
प्रस २६:३१-३३
उह समयम मन्दिरक धेर बोक्लार पर्दा उप्परसे टरलाग फाट्क दुइ भाग होगैल्।#१५:३८ यरूशलेमक मन्दिरम पवित्र ठाउँ ओ महापवित्र ठाउँ अल्गैना लुगक एकठो बोक्लार बरानक पर्दा रह। यी धर्तीम परमेश्वरक रना ठाउँ उह महापवित्र ठाउँ हो कैक विश्वास कैजाए (प्रस्थान २६:३१-३३)। प्रधान पूजारी केल महापवित्र ठाउँम वर्षक एकचो जाइ पाइँट्। ऊ परमेश्वरक मनैन्हक प्रतिनिधित्व करँट् ओ परमेश्वरसे क्षमा पाइक लाग हुँकन्हक नाउँ पार्क बलि चह्रादिहँट्। येशू क्रूसम मुक सबजन्हक पापक म्वाल तिर्ल, ओ फेदोस्र बलि चह्राइपर्ना आवश्यकता नैरहल। मन्दिरक पर्दा फटाइ जुन परमेश्वर ओ मनैन्हक बीच मिलाप हुइल् कना संकेत देठा। 39येशूह असिक प्राण छ्वारल देख्क ओठे ठह्र्याइल रोमी सेनन्हक कप्तान कल, “पक्क फे यी मनैया परमेश्वरक छावा रलह।”
40टनिक दूरसे हेरुइया जन्याओँमध्ये मगदालक मरियम, छोटकी याकूब ओ योसफक डाई मरियम, ओ सलोमी रलह।#लूक ८:२-३ 41येशू गालील क्षेत्रम रहबेर, उहाँह पछ्याक उहाँक हेरविचार करुइया हिँक्रहे रलह। येशूक सँगसँग यरूशलेम सहरम आइल आउर धेर जन्याओँ फे ओठे रलह।
येशूक लाश गर्यम
मत्ती २७:५७-६१; लूका २३:५०-५६; यूहन्ना १९:३८-४२
42उ दिन बिसैना दिनिक लाग चाञ्जोपाञ्जो मिलैना दिन#१५:४२ चाञ्जोपाञ्जो मिलैना दिन यहूदीन्हक व्यवस्था अनुसार हर शुकक् दिन चाञ्जोपाञ्जो मिलैना दिन हो। हर शनिच्चरक दिन बिसैना दिन हो। रह। दिन बुर्नासे आघ 43अरिमाथिया सहरक योसेफ साहस कैक पिलातसकठे गैल ओ येशूक शरीर मङ्ल। (उहाँ महासभक मानसम्मान पाइल सदस्य रलह। उहाँ परमेश्वरक राज्यक बट्या ह्यारटलह।)
44पिलातस येशूह मुवल सुन्क छक्क पर्ल, ओ सेनन्हक कप्तानह बलाक येशू जाट्टीसे मुगैल कि नाहीँ कैक जान खोज्ल। 45उहाँ मुगैल कना बात पिलातस सेनन्हक कप्तानसे थाहाँ पैल त, योसेफह येशूक शरीर लैजिना अनुमति देल।
46योसेफ सूती लुगा किन्ल ओ येशूक शरीर उतार्क उह लुगले लप्याट लगैल। दोस्र पत्थ्रा खोल्क बनाइल गर्यम ढर्ल ओ बरानक पत्थ्रले गर्यक मोह्टा टुम लगैल।
47मगदालक मरियम ओ योसेफक डाई मरियम येशूक शरीर उ ठाउँम ढरट् ह्यारटलह।
© 2020, Wycliffe Bible Translators, Inc. All rights reserved.
