मत्ती 6
6
दान सम्बन्धी
1येशू कटीगैल, “मनैन देखाइक लाग धर्मकर्म जिन करो, नकि त टुह्र स्वर्गम रना आपन बाबसे कुछु इनाम नैपैनेहुइटो।#मत्ती २३:५
2“टुह्र अभावम परल कौनो मनैन देहबेर कपटी मनैन्हकअस हल्ला जिन करो। हुँक्र त मनैनसे प्रशंसा पाइक लाग सभाघर ओ गल्लीम बाजा बजैटी नेङ्ठ। जाट्टीसे मै टुँहन कहटुँ, हुँक्र आपन पूरा इनाम पास्याकल बाट। 3बेनसे कौनोजहन देहबेर टुँहार दाहिन हाँठले देहल बाउँ हाँठ समेत थाहाँ जिन पाए। 4असिक टुन्हक देहाइ सुटुक्क ह्वाए। तब सब चिज देख्ना परमेश्वर बाबा टुँहीन इनाम देहीँ।
प्रार्थना सम्बन्धी
लूका ११:२-४
5“प्रार्थना करबेर कपटीन्हकअस प्रार्थना जिन करो। हुँक्र त और मनै देखहीँ कैक सभाघर ओ गल्लीक चोकम ठह्र्याक प्रार्थना कर्ना मन परैठ। मै जाट्टीसे टुँहन कहटुँ, हुँक्र आपन पूरा इनाम पास्याकल बाट।#लूक १८:१०-१४ 6टुह्र प्रार्थना करबेर क्वाठम जाओ ओ ड्वार लगाक गुप्तम रना टुन्हक परमेश्वर बाबसे प्रार्थना करो, ओ गुप्तम करल काम देख्ना परमेश्वर बाबा टुँहन इनाम देहीँ। 7गैरयहूदी मनैअस बर्बराक प्रार्थना जिन करो। हुँक्र त नम्मा-नम्मा प्रार्थना कर्लसे उत्तर पाजैठा कैक विचार कर्ठ। 8तर टुह्र हुँकन्हकअस जिन होओ। काकरकि टुह्र मङ्नासे आघहेँ टुँहन का चिज चाहल बा कना बात स्वर्गम रना परमेश्वर बाबह थाहाँ बाटन।
9“टुह्र असिक प्रार्थना करो:
‘हे स्वर्गम रना हमार बाबा,
अप्नक नाउँ पवित्र ह्वाए।#६:९ अप्नक नाउँ पवित्र ह्वाए: याकर अर्थ “सबजन अप्नह आदर करहीँ काकरकि अप्न पवित्र बाटी” कहल हो।
10अप्नक राज्य आए।
अप्नक इच्छा स्वर्गम जसिन बा,
ओस्तहँक यी पृथ्वीम पूरा ह्वाए।
11हमन हरेक दिनिक खाना आज फे दी।
12हमार अपराध क्षमा कैदी,
जसहेँक हमार विरोधम अपराध करुइयन हम्र क्षमा कैरख्ली।
13हमन परीक्षम जिन लैजाई,
ओ दुष्टसे हमन रक्षा करी।
[काकरकि राज्य, शक्ति ओ महिमा सड्डभर अप्नक हो।]’
14टुन्हक विरोधम अपराध करुइयन क्षमा कर्बो कलसे, स्वर्गम रना बाबा फे टुन्हक करल अपराध क्षमा करहीँ।#मर्क ११:२५-२६ 15तर टुह्र मनैन्हक अपराध क्षमा नैकर्बो कलसे, परमेश्वर बाबा फे टुन्हक अपराध क्षमा नैकरहीँ।
ब्रत रना सम्बन्धी
16“जब टुह्र ब्रत रबो, तब कपटीन्हकअस अन्धार मुह् लगाक ब्रत जिन रहो। काकरकि हुँक्र त मनैन देखाइक लाग आपन मुह् अन्धार करैठ। जाट्टीसे मै टुँहन कहटुँ, हुँक्र आपन इनाम पास्याकल बाट। 17तर टुँ ब्रत रहल समयम आपन कपारिम त्याल लगाओ, ओ मुह् धोओ। 18टुँहार ब्रत मनै नाहीँ, तर गुप्तम रना परमेश्वर बाबा देखहीँ, ओ गुप्तम देख्ना परमेश्वर बाबा टुँहीन इनाम देहीँ।
स्वर्गम जम्मा कर्ना धनसम्पत्ति
लूका १२:३३-३४; १६:१३
19“पृथ्वीम आपन लाग धनसम्पत्ति जिन कुह्र्याओ, जहाँ कीरा ओ खिया खैठा, ओ च्वार चोर्क लैजैठ।#याक ५:२-३ 20बेनसे स्वर्गम आपन लाग धनसम्पत्ति जम्मा करो, जहाँ ना कीरा, ना खिया खाइट्, ओ च्वार फे नैचोर्ट। 21काकरकि जहाँ टुन्हक धन रही, उहँ टुन्हक मन फे रही।
22“शरीरक दिया आँख हो। यदि टुँहार आँख ठीक बा कलसे, टुँहार सारा शरीर अजरार हुइनेबा। 23तर टुँहार आँख खराब बा कलसे, टुँहार सारा शरीर अन्धार हुइनेबा। यदि टुँहारम रहल अजरार अन्धार होजाई कलसे, उ अन्धार कत्रा कैयाँकुचिल रही।#६:२३ ठीक आँख रहल मनैया भलो कर्ना मनैया हो ओ खराब आँख रहल मनैया स्वार्थी मनैया हो।
24“कुई फे दुइ मालिकन्हक सेवा कर नैस्याकट्। काकरकि ऊ एकजहन हेल्हा करी, एकजहन प्रेम करी, कि जुन एक जन्हक कहल मानी, एक जन्हक मतलब नैकरी। टुह्र फे परमेश्वर ओ धनक सेवा कर नैसेक्नेहुइटो।
चिन्ता सम्बन्धी
लूका १२:२२-३१
25“उहओर्से मै टुँहन कहटुँ, आपन प्राणक लाग का खैम, का पियम कैक ओ आपन शरीरक लाग का लगैम कैक चिन्ता जिन करो। जीवन खैना चिजसे ओ शरीर लगैना लुगासे बरा नैहो का? 26आकाशम उर्ना चिरैँचुरुङ्गन हेरो ना। हुँक्र ना बुइट, ना कट्नी कर्ट, ना त अनाज बखारीम जम्मा कर्ट, तर फे स्वर्गम रना बाबा हुँकन खवैठ। टुह्र उ चिरैँचुरुङ्गनसे धेर मूल्यवान नैहुइटो का? 27चिन्ता कैक टुह्रमध्ये के आपन आयु एक घण्टा हुइलसे फे बह्राइसेक्ठा जे?
28“लुगाफाटक लाग का चिन्ता कर्ठो? मैदानम फुलल् लिली फूलह हेरो ना। हुँक्र ना त परिश्रम कर्ट, ना लुगा बिन्ट। 29मै टुँहन कहटुँ, सोलोमन राजा ओत्रा धनी रटीरटी फे ऊ एकठो फूला बराबर फे सँप्रल नैरलह।#१ राज १०:४-७; २ इति ९:३-६ 30आज रना ओ काल आगीम फाँकजैना घाँसह त परमेश्वर असिक सँप्रैठ कलसे, उहाँ टुँहन झन् नैसँप्रैहीँ का? खै टुन्हक विश्वास? 31उहओर्से ‘का खैबी? का पिबी? का लगैबी?’ कैक चिन्ता जिन करो। 32काकरकि असिन चिजिक चिन्ता त गैरयहूदी मनै कर्ठ। यी सब चिज टुँहन चहठा कना बात स्वर्गम रना बाबह थाहाँ बाटन। 33बेनसे पैल्ह परमेश्वरक राज्य ओ उहाँक धार्मिकतक खोजी करो, यी सब चिज परमेश्वर टुँहन देहीँ। 34काल्हिक लाग चिन्ता जिन करो, काल्हिक समस्या काल समाधान हुई। आझुक दुःख आझुक लाग धेर बा।”
© 2020, Wycliffe Bible Translators, Inc. All rights reserved.
