मत्ती 18
18
स्वर्गक राज्यम सबसे महान्
मर्कूस ९:३३-३७,४२-४८; लूका ९:४६-४८; १७:१-२
1उह समयम चेलावँ येशूकठे आक पुछ्ल, “स्वर्गक राज्यम सबसे महान् के हो?”#लूक २२:२४
2तब येशू एकठो लर्कह बलैल ओ ओहीह हुँकन्हक बीचम ठह्रेइल, 3ओ कल, “जाट्टीसे मै टुँहन कहटुँ, टुह्र आपन मन परिवर्तन कैक असिन छोटी लर्काअस नैहुइट्सम, टुह्र स्वर्गक राज्यम जाइ नैपैबो।#मर्क १०:१५; लूक १८:१७ 4यी लर्कक्अस अपन्हे नम्र हुउइया जो स्वर्गक राज्यम सबसे महान् हुउइया बा।
5“म्वार नाउँम असिन लर्कह स्वीकार करुइया महीह स्वीकार कर्ठा। 6म्वारम विश्वास करुइया यी छोटी लर्कामध्ये किहुह विश्वाससे जे बहकाई, वाकर घ्याँचम चक्या झुलाक समुद्रम फाँकदेनासे त, परमेश्वरसे पैना दण्ड झन् डरलग्टिक हुहिँस।
7“धिक्कार बा यी संसारक मनैन! काकरकि हुँकन पापम फँसैना चिज धेर बा। मनैन पापम फँसैना अवस्था त अइबोकर्ठा, तर औरजहन पापम फँसाइ खोज्ना मनैन धिक्कार बा! 8यदि टुँहार हाँठ या ग्वारा टुँहीन पाप कर लगैठा कलसे, ओहीह काट्क फाँकदेओ! काकरकि दुनु हाँठ या दुनु ग्वारा लेक नरकक् नैबुट्ना आगीम फँक्वापाइलसे त, एक्कठो हाँठ या ग्वारा लेक स्वर्गम जैना मजा हो।#मत्ती ५:३० 9यदि टुँहार आँख टुँहीन पाप कर लगैठा कलसे, ओहीह निकार्क फाँकदेओ! काकरकि दुनु आँख लेक नरकम फँक्वापाइलसे त, एक्कठो आँख लेक स्वर्गम जैना मजा हो।”#मत्ती ५:२९
हेराइल भेँरोक आहान
लूका १५:३-७
10“होसियार रहो, यी छोटी लर्कामध्ये किहुह फे हेल्हा जिन करो। मै टुँहन कहटुँ, हुँकन्हक रेखदेख कर्ना स्वर्गदूतहुँक्र स्वर्गम म्वार बाबक सामुन्नेम सड्डभर पलरठ।#१८:१० परमेश्वर हरेक व्यक्तिह सुरक्षा देहक लाग स्वर्गदूतन पठैठ (भजनसंग्रह ९१:११; हिब्रू १:१४)। 11[काकरकि मै मनैयक छावा त हेराइल मनैन बचाइक लाग अइनहुँ।]#लूक १९:१०
12“यदि एकठो मनैयक सयठो भेँरी बाट, तर एकठो हेरागैल् कलसे, ऊ उनान्सयठो भेँरीन चह्रनम छोर्क एकठो हेराइल भेँरोक खोजी नैकरट् का? 13मै टुँहन जाट्टीसे कहटुँ, यदि ऊ ओहीह भेटाइल कलसे, ऊ नैहेराइल उनान्सयठो भेँरीन्हक लागसे उ भेटाइल एकठो भेँरोक लाग धेर खुशी हुउइया बा। 14असहेँक स्वर्गम रना टुन्हक बाबा यी छोटी लर्कामध्ये एकजहन फे नाश हुइल् नैचहट।”
पाप करुइयह सम्झैना तरिका
15“यदि टुँहार भैया टुँहार विरुद्धम पाप करल कलसे, वाकरठे अकल्हे जाक ओहीह सम्झाओ। यदि ऊ टुँहार कहल मानल कलसे, ऊ फेदोस्र टुँहार भैया हुइल्।#लूक १७:३ 16तर यदि ऊ टुँहार कहल नैमानल कलसे, और एक या दुइ जहन सँग लैजाक ओहीह फेदोस्र सम्झाओ। काकरकि हरेक झैझग्रा दुइ या तीन जन साक्षी बैठ्क मिलाइपर्ठा।#व्य १९:१५ 17यदि ऊ अत्रा कैक फे नैमानल कलसे, उ बात सारा मण्डलीम जानकारी करादेओ। यदि ऊ मण्डलीक करल निर्णय फे नैमानल कलसे, ओहीह गैरयहूदी ओ कर उठुइया भ्रष्टाचारी मान्क छोरदेहो।
18“जाट्टीसे मै टुँहन कहटुँ, टुह्र ज्या पृथ्वीम बहन्बो, उ स्वर्गम बाहान्जाई, ओ टुह्र ज्या पृथ्वीम छोर्बो, उ स्वर्गम छोरजाई।#मत्ती १६:१९; यूह २०:२३
19“यी बात फे याद करो, यदि पृथ्वीम टुह्र दुइ जन एक्क मन होक कुछु चिज मङ्ग्बो कलसे, स्वर्गम रना म्वार बाबा उ चिज टुँहन देह्हीँ। 20काकरकि जहाँ दुइ कि तीन जन विश्वासीहुँक्र म्वार नाउँम जम्मा हुइठ, उहाँ मै हुँकन्हक बीचम रठुँ।”
क्षमा देना बारेम आहान
21तब पत्रुस उहाँकठे आक पुछ्ल, “प्रभु, म्वार विरोधम पाप कर्ना मनैयह मै कै फ्यारासम क्षमा देहपर्ठा? सात फ्यारासम?”#लूक १७:३-४
22येशू जवाफ देल, “सात फ्यारासम केल नाहीँ, सतहत्तर गुणा सात फ्यारा!”#१८:२२ याकर अर्थ क्षमा देना कामक हिसाब नैकरपरट् कहल हो।
23“स्वर्गक राज्य असिन बा: एक दिन एकठो राजा आपन नोकरचाकरहुँकनसे हिसाबकिताब लेना विचार कर्ल। 24उ राजा हिसाबकिताब लेना क्रमम दश हजार स्वानक पैँसा ऋण लेहुइया एकठो ऋणी हुँकाहारठे आनगैल्। 25तर उ मनैया ऋण तिर नैस्याकल। नैस्याकल त वाकर मालिक ओहीह ‘अपन्हेह, आपन गोसिन्यह, आपन लर्कापर्कन ओ सारा श्रीसम्पत्ति बेँच्क ऋण चुक्ता कर्’ कैक हुकुम देलस।
26“उ मनैया आपन मालिकक् पाउ पर्क कहलागल, ‘महीह दया करी, मै अप्नक पैँसा सब चुक्ता कैदेहम।’ 27ओहीह देख्क उ मालिकह स्वाग लग्लन ओ ओहीह छोरदेल ओ वाकर सब ऋण मिनाहा कैदेल।
28“तब उ नोकर निकर्क गैल्। जैटी-जैटी ऊ आपनसँग काम कर्ना और संघरेह भेटाइल। उ संघर्या ओहीसे एक सय चाँदीक पैँसा ऋण लेरख्लहा। ऊ त एकचोट्टे वाकर घाँटी पकर्क कहल, ‘म्वार पैँसा तुरुन्त तिर।’
29“उ सङ्घर्या वाकर पाउ पर्क बिन्ती करल, ‘महीह दया करी, मै अप्नक पैँसा सब चुक्ता कैदेहम।’
30“तर ऊ नैमानल, ओ ऋण नैतिरट्सम ओहीह झ्यालखानम डारदेहल। 31उ दुनुजहनसे सँगसँग काम कर्ना और नोकरहुँक्र यी सब घटना देख्क धेर दुःखीत हुइल। हुँक्र मालिकक्ठे जाक यी सब घटना बट्वादेल।
32“तब मालिक उ नोकरह आपनठे बलाक कल, ‘टैँ दुष्ट नोकर हुइट्या। टैँ “महीह दया करी” कैक बिन्ती कर्ल्या, त मै ट्वार सब ऋण मिनाहा कैदेनु। 33मै टोहीह दया करलअस, टैँ फे आपनसँग काम कर्ना आपन सङ्घरेह दया करपर्ना नैरह का?’ 34तब वाकर मालिक रिसले चूर हुइल ओ उ नोकर सब ऋण नैतिरट्सम ओहीह झ्यालखानम डारदेल।
35“यदि टुह्र आपन भैयह आपन हृदयसे क्षमा नैदेबो कलसे, स्वर्गम रना म्वार बाबा फे टुँहनसे अस्तह व्यवहार करुइयाबाट।”
© 2020, Wycliffe Bible Translators, Inc. All rights reserved.
