Mwamulizo 14
14
Abulamu yakumuponya Loti
1Na mu vilo vivyo, u mutemi Amulafeli wa ku Shinali, no mutemi Aliyoki wa Elasali, no mutemi Kedolilayoma wa Elamu, no mutemi Tidali wa Goyimu, 2watemi wawo wose wakawa kwigaluka, wakawa kwihoma na Bela u mutemi wa Sodoma, Bilisha u mutemi wa Gomola, Shinabu u mutemi wa Adima, Shemebeli u mutemi wa Zeboyimu, no mutemi wa Bela (Yo Sowali.) 3Ne watemi wawo wose wahano, wakawa kuwakongholela hamonga i wasilikale wawo wo wulugu mwi'lolo lya Sidimu, (wo wutya, i Lilenga lyo Mwino.) 4Nawo wakajendelela kumuhulika u mutemi Kedolilayoma mu myaka yikumi na myejete, ninga wali weza kufika mwaka we likumi na midatu, hodu wakawa kumubeza. 5Na mu mwaka we likumi na yine, u mutemi Kedolilayoma hamonga na wawalya watemi wayagwe, wakaza wakawahoma no kuwasuma i wanhu wa ku Lefayimu kuko ku Ashiteloti-kalinayimu, hamonga ne Wazuzimi wa ku Hamu, ne Wayemi wa ku Shawe-kuliyatayimu, 6ne Waholi mu matunda gawo ku Seyili. Wakawawinga wakawafisa sunga ko ku Elipalani mu mipaka ya mu nyika. 7Hanyuma wakawa kuwuya ne nyuma sunga ko (ku Enimishipati) ku Kadeshi. Nawo wakayihoma yisi yose ye Waamaleki, no kuwasumiza Waamoli wono wekalaga mu Hazazonitamali.
8U mutemi wa Sodoma, no mutemi wa Gomola, no mutemi wa Adima, no mutemi wa Zeboyimu, no mutemi wa Bela, 9(wo wutya Sowali) nawo wakenjila mu wulugu, mwi'lolo lya Sidimu, wakawa kwihoma na Kedolilayoma, na Amulafeli u mutemi wa Shinali, na Aliyoki u mutemi wa Elasali. Watemi wawo wane, wakawa kwihoma ne watemi wahano. 10Nalyo lilolo lilyo lya Sidimu, lyali lina makombokombo ga lami, ne watemi wawo wa Sodoma na Gomola lono wamanghaga wakutiza wulugu, wakawa kuzubujila mugati ye makombo gago. Ninga awalya iwadatu wanji, awo watoloka no kubita mu matunda. 11Hodu, awalya wono wawasuma wayawo, wakawa kuzisola zisawo zose za mu Sodoma na Gomola, hamonga ne vilimwa vyose, wakabita navyo. 12Wakamusoleleza na Loti nayo, u mwana wa Halani u mwanakwawe wa Abulamu, mono yekalaga kuko ku Sodoma, hamonga ne zisawo zakwe zose, wakawa kubita nayo.
13Munhu yunji mono yatoloka kuko ku wulugu, yakabita yakamulonjela Abulamu, u Muhebelaniya, mono yekalaga behi ne minghola, i mibici yono yelile yono yali ya Mamule, yuyulya Mwamoli. Nayo Mamule ne wanduguze wa Eshikoli na Aneli wali wakondya kwilumbaniza na Abulamu. 14Nayo Abulamu yali yeza kulonjelwa vyono mwanagwe Loti yasolwa mateka, hodu ho baho baho yakawa kuwasola wanhu vitung'ati magana madatu na yikumi na munana, wono waleleywe mu nyumba yakwe, yakawa kuwatyatya wawalya walugu sunga ko ku Dani. 15Nayo yali yeza kufika kuko, yakawa kuwagawanula wanhu wakwe mu vipuga vipuga. Na yali yeza kuwa mu cilo mugati, yakawahoma walugu wakwe, yakawasumiza, yakawawinjiliza sunga ko ku Hoba, kusumuka ya Damesiki. 16Abulamu yakawa kuyikomboza sawo yose yono yali yasolwa ne walugu, yakamukomboza no mwanagwe Loti mweneco, hamonga ne sawo yakwe, hamonga ne wacekulu ne wanhu wanji.
U Mukohani Melikizedeki yakumulugutiza Abulamu
17Nayo Abulamu lono yawuyaga yakulawa ku wulugu, lono yali yawasuma wa Kedolilayoma hamonga ne wayagwe, u mutemi wa ku Sodoma, yakawa kubita kumuhinjiliza Abulamu, mwi'lolo lya Shawe (wo wutya, Lilolo lyo Mutemi.) 18Nayo Melikizedeki u mutemi we likaya lya Salemu, mono yali yo mukohani wo Mulungu Mono Yalawiliciye, yuyo yakaleteleza no mukate ne divayi kuli Abulamu, 19yakamulugutiza Abulamu yakutya,
“U Muwaha Mulungu,
mono yawunoza wulanga ne yinze,
yamulugutize Abulamu!
20U lukumyo lweze kuli Muwaha Mulungu
mono yakupelile vilungo vyo kuwasumila walugu wako!”
Nayo Abulamu yakawa kumulavizya Melikizedeki, lipinga lye monga kwe 'kumi lya muli vyose vyono yali yena navyo. 21Nayo u mutemi wa Sodoma, yakamulonjela Abulamu yakatya, “Nghukunena, wunghombolelaje du wanhu, ninga zisawo zose wuzisolaje go mweneco.” 22Nayo Abulamu yakamupitula yuyo mutemi wa Sodoma yakamutya, “Ane no muyago nghondya kwilahiza hali Muwaha Mulungu mono yawumba u wulanga ne yinze, 23vyono sinosolela lukulu hamba luputi hamba musipi we cilatu, hamba cinhu cinji cako co cose, ho wulece kuza kuwona nha kotya ane ngolipa ku soko ye zisawo zako. 24Holeka sinosuma kusola cinhu co cose, lunji ivinhu vyono waliye wanhu wangu, vivyo du langa vyo novibocela. Alu langa wuwakombolaje wa Aneli, na Eshikoli na Mamule, wo wasole ligawo lyawo.”
Cigogo Bible © Bible Society of Tanzania, 2002.
