Mwamulizo 11
11
Umunala wa Babiloni
1Ku wulawa ku mwamulizo, i yinze yose yali yina milonjele mimonga du, ne zinghani zose zihwanile. 2Alu i wanhu lono wali weza kwanza kujendajenda wakulawilila ku lubavu lwa kucilima, nawo wali weza kufika mu yisi yo wuhihi ya Shinali, hodu wakawa kwikala kuko. 3Ninga hanyuma yayo, wakanza kwilonjela wakutya, “Nye, alenyi cinoze matofali, ciganyanye viswanu mu moto.” Holeka wakawa watuga matofali ne lami yo kugalunziza i matofali hamonga. 4Nawo wakeyitya, “Alenyi le ciyinzenjele co weneco likaya lyono lyowa lina no munala wono wofika ku wulanga, ho cisume kwitujila litagwa, kanyhi ho cilece kwiyagala mono'nze yose.”
5Nayo u Muwaha Mulungu, yakawa kutima ho yaliwone likaya lilyo lyono wanhu walizenjile, hamonga no munala walyo. 6U Muwaha Mulungu yakatya, “Alu, lanje ta, wanhu awa, wose wali nghungugo monga, kanyhi wose wakulonga milonjele mimonga, na awuno wo mwamulizo du wa zose zono wosaka kwituma. Na vyono yikwijela, ku wulawa lulu, wosuma kwituma yoyose yono wosaka kwituma. 7Holeka alenyi le citime ciwabitile cikawewajize nonga yawo, ho walece kwihulika weneco wose.” 8Holeka u Muwaha Mulungu yakawa kuweyagaziza mono yinze yose, wakawa kuwuleka no mulimo wu wulya wo wuzenga likaya lilyo. 9Ne likaya lilyo likacemwa likaya lya Babiloni, vyono ho baho hono u Mulungu yawewajiziza i wanhu wose milonjele yawo. Na kanyhi ha wulawilila baho, ho Mulungu yaweyagaziza i wanhu wakeyagala mono yinze yose.
I zindelo za Semu
(1Zin 1:24-27)
10Awano wo we ndelo ya Semu. Yali yeza kupuluta myaka myejete ku wulawa he 'hwazi lye malenga, nayo Semu lono yali yeza yaficila myaka yigana limonga, yakamulela Alipakishadi. 11Nayo lono yali yamulela Alipakishadi, mwene Semu yekala kanyhi myaka magana mahano, nayo yakawa na wana wanji we cilume na we cicekulu. 12Nayo Alipakishadi, yamulela Shela lono yali yaficila myaka makumi madatu na mihano. 13Alipakishadi lono yali yakondya kumulela Shela, u mwene Alipakishadi yakekala kanyhi myaka magana mane na midatu, nayo yakawa na wana wanji we cilume na we cicekulu.
14Nayo Shela, lono yamulelela Ebeli, yali yaficile myaka makumi madatu. 15Nayo Shela lono yali yamulela Ebeli, mwene Shela yakekala kanyhi myaka magana mane na midatu, nayo yakawa na wana wanji we cilume na we cicekulu. 16Na Ebeli nayo, lono yali yaficila myaka makumi madatu na mine, yakamulela Pelegu. 17Na lono yali yamulela Pelegu, u mwene Ebeli yekala kanyhi myaka magana mane na makumi madatu, nayo yakawa na wana wanji we cilume na we cicekulu. 18Lono Pelegu yali yaficila myaka makumi madatu, nayo yakamulela Lewu. 19Nayo Pelegu lono yali yamulela Lewu, u mwene Pelegu yekala kanyhi myaka magana mejete ne 'cenda, nayo nhavivyo, yakawa yena wana wanji we cilume na we cicekulu.
20Lewu nayo, lono yali yaficila myaka makumi madatu na myejete, yakamulela Selugi. 21Nayo Lewu lono yali yamulela Selugi, u mwene Lewu yekala kanyhi myaka magana mejete na mupunghati, nayo yakawa yena wana wanji we cilume na we cicekulu.
22Lono Selugi nayo, yali yaficila mu myaka makumi madatu, yakamulela Naholi. 23U mwene Selugi yekala kanyhi myaka magana mejete lono yali yamulela Naholi, nayo yakawa na wana wanji we cilume na we cicekulu. 24Nayo Naholi lono yali yaficila mu myaka makumi mejete ne 'cenda, yamulela Tela. 25Nayo Naholi yakekala kanyhi myaka yigana limonga ne kumi ne 'cenda lono yali yamulela Tela. Nayo yakawa na wana wanji we cilume na we cicekulu. 26Nayo Tela lono yali yaficila myaka makumi mupunghati, yakawalela Abulamu, Naholi na Halani.
I zindelo za Tela
27Azi ahano zo ndelo ze wana wa Tela, u sogo ya wa Abulamu, Naholi na Halani. Yuyu Halani yali yo sogo wa Loti. 28U mwene Halani yafwila ku Uli, likaya lye Wakalidayo kono yalelelwa u sogwe, lono sogwe Tela yali yakali mumi. 29Nawo wa Abulamu na Naholi, wose wakawa kutola. U mugolece wa Abulamu yacemwaga Salayi. No mugolece wa Naholi, nayo yacemwaga Milika u mwana wa Halani, mono kanyhi yali yo sogo wa Isika. 30Nayo Salayi yakawa yasina mwana, hambi nha yali si kalelaga. 31Nayo Tela yakawa kuwasola u mwanagwe Abulamu, hamonga na Loti u mwizukuluwe, mono yali yo mwana wo mwanagwe Halani, hamonga na Salayi u mugolece wa Abulamu. Wakawa kutuluka wose hamonga ku wulawa ku Uli, likaya lye Wakalidayo, wakubita ku yisi ye Wakanani. Ninga wali weza kufika mu Halani, hodu wakekala kuko. 32Nayo Tela yakafwila kuko ku Halani, yali yaficile myaka magana mejete na mihano.
Cigogo Bible © Bible Society of Tanzania, 2002.
