Matayo 7
7
Muli zo kuwalingʼaniza wanji
(Lk. 6:37-38, 41-42)
1“Mulece kuwalingʼaniza wanji, holeka nanye simolingʼanizwa no Mulungu, 2hambi nha mu nghango yono mukuwalingʼaniza wanji, ale nanye nha vyo molingʼanizwa nha vivyo, ne cipimo ci cilya du cono mukucitumamila kuli wanji, co cipimo cico du cono u Mulungu nayo kolomupimilenyi na nyenye. 3Alu nhawule wukucilanga icilagala cono cili mu liso lyo nduguyo, na akuno si wukusuma kuliwona ilibici lyono lili mu liso lyako go mweneco? 4Hamba kosuma nhawule kumulonjela u nduguyo wutye, ‘Gwe ndugu yangu, leka ta nghuwuse icilagala cono cili mu liso lyako,’ na kumbe gwegwe go mweneco, wina libici mu liso lyako? 5Go mukoci gwe! Wamule wuliwuse ilibici lyono lili mu liso lyako go mweneco, ale, ho kosuma kuwona viswanu no kusuma kuwusa icilagala cono cili mu liso lyo nduguyo.
6“Mulece kuzipela izimbwa ivinhu vyono vyelile, ho zilece kupituka no kumulumanjenyi, hamba mulece kuzigumila izilulu zenyu hamwande ye zingubi, ho zilece kuzikanyanjila.
Wulombe, wulondole, wukongʼonhe
(Lk. 11:54-13)
7“Lombenyi nanye mopegwa, londolenyi nanye mowona, mukongʼonhe nanye modigulilwa. 8Hambi mono yakulomba nha yakupegwa, nayo mono yakulondola yakutuga, na mono yakukongʼonha yakudigulilwa. 9Wulenyi, muli nyenye moyuli yunji mono hono u mwanagwe yamulombe mukate komupela yibwe? 10Hamba wule hono yamulombe somba, komupela nzoka? 11Holeka hono anye mono muli wabi, ninga mumanyile kuwapela iwana wenyu ivinhu viswanu, mbeka, u Sogo yenyu wa ku wulanga kokwituma nha vivyo yacizilize, nayo kowapela iviswanu wose wono wakumulomba. 12Muwatendelaje wanji nha vyono anye mukusaka wene nawo wamutendelenyi nyenye. Na yiyi yo nhunizo yo wulajilize wa Musa, sunga ne mejizo ge wawizi.
U mulango mufinyu
(Lk. 13:24)
13“Mwinjilile mu mulango u mufinyu. Hambi inzila yono yibitile ku wongomele nha ngazi, sunga no mulango wo kwinjilila kuko nawo mugazi, nawo wono wakuyikola inzila yiyo, wo wenji. 14Ninga inzila yono yikubita sunga ko ku wumi, finyu, sunga no mulango wo kwinjilila kuko nawo mufinyu, nawo wanhu wacefu du wono wakusuma kuyiwona inzila yiyo.
U mubici wukuwa kumanyicila mu mikalo yayo
(Lk. 6:43-44)
15“Mwilanjililaje kuli iwawizi wo wulambi. Wono wakumuzizenyi, akuno wakwijela kunze nha ngholo, ninga mugati yawo ho maminzi makali. 16Ninga mowamanyila du mu metumo gawo. Aluʼmbi iwanhu wakuwa kuhepa zi zabibu mu mabici ge mamiya, hamba zinghuyu mu mabijili? Aa, ngʼo! 17Holeka u mubici muswanu wulelaga mikalo miswanu, no mubici mubi wulelaga mikalo mibi. 18U mubici muswanu si wosuma kulela mikalo mibi, hamba u mubici mubi nawo siwosuma kulela mikalo miswanu. 19No mubici wo wose wono si wukulela mikalo miswanu, wukutemangwa no kutajilwa mu moto. 20Holeka mowamanyila du mu metumo gawo.
Si nghumumanyenyi nye
(Lk. 13:25-27)
21“Si munhu wo wose mono yakunyitya, ‘Muwaha, Muwaha,’ yo kokwinjila mu wutemi wo Mulungu, langa yuyo du mono yakwituma u wuhile wo Sogo yangu mono yali ku wulanga. 22Wenji wono wolononjela mwizuwa lyo wulingʼanizwe wakutya, ‘Muwaha, Muwaha! Mwitagwa lyako, cayiganulaga inghani yako, na mwitagwa lyako calavyaga macisi, no kunoza vitanjilo vinji.’ 23Baho nane nowalonjela nitye, ‘Ane si nghumumanyenyi hamba hadodo, muwuce ha mwande yangu anye wose mo wetuma wubi!’
I wazenji we maps mejete
(Lk. 6:47-49)
24“Holeka ku soko yiyo, u munhu wo wose mono ya kuzihulika izinghani zangu no kuzibata, yuyo yehwanile u munhu we mahala, mono yayizenga ikaya yakwe mwitalawe. 25Imvula yikatonya, ne makolongo gakahuluma, ne mbeho mbaha yikakukunza no kuyikundujiza ikaya yiyo. Ninga hamba si yagwa yaye ku soko vyono yali yizenjigwe mwitalawe mucanyha. 26Ninga muli wose mono yakuzihulika izinghani zangu zizi, hamba kuzibata, ale yuyo yehwanile no munhu mulele mono yazenga ikaya yakwe mwisangha. 27Imvula yikatonya ne makolongo gakahuluma, ne mbeho mbaha muno yikakukunza, no kuyikundujiza ikaya yiyo, nayo yikagwa, no wugwe wayo wali wuwaha muno muno.”
U Wulajilize wa Yesu
28Nayo Yesu yali yeza kukondya kuzilonga izinghani zizo, imapuga ge wanhu gakezina muno so mejizo gakwe. 29Hambi u mwene nha si yali yenha iwejizi wawo wo Wulajilize, vyono u mwene Yesu yejizaga ko wulajilize.
Cigogo New Testament © Bible Society of Tanzania, 1991.
