Matyê 1
1
Pəmə́ngâa-njʉʼ Yěso
(Lks 3.23-38)
1Mənyôghʼ pəmə́ngâa-njʉʼ Yěso Kəlísto ŋuu cʉŋə-ndə̂ fou Ndavîd, ə́ mbə́ ŋuu ngər-ndə̂ Ábələhâm ə̂ mwo:
2Ábələhâm lə jí Ísaghʼ, Ísaghʼ jî Yokôp, Yokôp jî Yúda gháp pə pəfə̌r pé. 3Yúda jî Perésʉ gháp Zará, mə́ ghap pə̂ Tamâr, Perésʉ Jî Esəlôm, Esəlôm jî Arâm. 4Arâm jî Aminadâp, Aminadâp jî Náasoŋ, Náasoŋ jî Salə́məu, 5Salə́məu jî Bôoz, mə́ pə Bôoz pə̂ Rahâp, Bôoz jî Obêd, mə́ pə Obêd pə̂ Rwîtə, Obêd jî Yesê, 6Yesê jî fou Ndavîd, fou Ndavîd lə jí Salə́məu, mə́i mə́ pə Salə́məu lə pə́ ngwě Wilí. 7Salə́məu jî Lobohâm, Lobohâm jî Ábya, Ábya jî Azâf, 8Azâf jî Jozafâd, Jozafâd jî Jorâm, Jorâm jî Ozyâs, 9Ozyâs jî Johatâŋ, Johatâŋ jî Ashâazə, Ashâazə jî Ezékyǎsʉ, 10Ezékyǎsʉ jî Manasê, Manasê jî Amôŋ, Amôŋ jî Jozyâs, 11Jozyâs jî Yekonya gháp pə pəfə̌r pé. Ə́ pə̂ mpfu wêi, pə́ ghoutə pye Ísə́lahêl, ə́ ndághʼ gháp ngʉ̌ pəghaŋə tsâŋ ntso, ə́ ndǎghʼ gháp ńdə́r lə̂ Babilônə.
12Zə̂ ləwěi pye lei, Yekonya jî Sheltyêl, Sheltyêl jî Zolobabêl, 13Zolobabêl jî Abyûd, Abyûd jî Elyakîm, Elyakîm jî Azôo, 14Azôo jî Sadôghʼ, Sadôghʼ jî Akîm, Akîm jî Elyûd 15Elyûd jî Elyazâa, Elyazâa jî Matâŋ, Matâŋ jî Yokôp, 16Yokôp jî Yosêp, Yosêp pə̂ ndə̌u Mǎyaa, Mǎyaa pə̂ mə́ pə Yěso yi pə́ fûŋ ńgó yé Nzaʼ-nkʉ*.
17Ə́ laghʼ nâa mbə̂ məwěi ntsap ləkwo lə̂ ləghə̂m lə̂ fú lə́ Ábələhâm ńgwó ńkə́u lə́ fou Ndavîd; ə́ mbǒu mbə́ məwěi ntsap ləkwo lə̂ ləghə̂m lə̂ fú lə́ fou Ndavîd ə́ ngwó nkə́u lə̂ mpfu yi pə́ lə ghǒu pye Ísə́lahêl, ə́ ndághʼ gháp ńgʉ̌ pəghaŋə-tsâŋ ntso, ə́ ndǎghʼ gháp ńdə́r lə̂ Babilônə; ə́ fú mə́u, ə́ nkə́ ncí ngwô məwěi ntsap ləkwo lə̂ ləghə̂m mboŋə́ wǒ kə́u lə́ Nzaʼ-nkʉ*.
Pə́ jí Yěso
18Yo ghíʼ ə́ lə lěi, pə́ poŋə́ jí Yěso Kəlísto. Mə́ yé Mǎyaa lə ghí pə́, mə́i Yosêp túŋu mə́ no tû yé tə pə́ pə̂i, lə́ gháp zʉ́ pyêr pə́ tə́ zôʼ, pə́ jwô a pə̂ yi shuŋú; ə́ ngǐ pə́ yi shuŋú yə́rə́, ə Zəghʼə Ndêi-lěi lə́ ghʉ. 19Ndə̌u ye Yosêp pə̂ ŋuu, ə Sê jwô yé ghíʼ ŋuu ndʉŋ-ndʉŋ* mbi zʉ́, lə́ káa a pə́ nkôŋ yé lə̂ sə̂-nzəm Mǎaya mbi lâʼ ghíʼ ləpə̌ʉ* lâʼ záp lə pə́ ntúŋú; ə́ ncʉ́ʼ mə́ nkwâŋ pə́ ghíʼ a wo lə̌ʼ no yé pə́ nzəm-nzəm tə lə́u ŋuu jî yé po. 20Ə́ mbyér mə́ nkwâŋ kwaŋə́, ə́ ndé njwo, ə́ njwó tâʼ cwôʼ Sê*, a lâʼ lə́ zʉ́ ngô: «Yosêp, gho yi o pə̌ ŋuu ngər-ndə̂ fou Ndavîd, pfú ngwě gho Mǎyaa ńŋə́ ndə̂ tə́ pôghʼ, ńté ńgó â yi shuŋú gháʼá, ə́ pə̂ pə̂ zə̂u yi Zəghʼə Ndêi-lěi lə́ ghʉ̌. 21A ghʉ̌ jí môu mbiŋə, ô cî ləjôghʼ yé ńgó Yěso, ə̂ lághʼ ńdâʼ ngô: “Sê táa ghʉ̌ pə cwôr”, ə́ fûŋ yé yə́rə́, ńté ńgó zʉ́ lə́ táa ghʉ̌ pye lâʼ páp cwôr ndou məno tə́poŋ máp.»
22Mwo məno laghʼ ḿbə̂utə gháʼa lə̂ tsâr yi Nde lə cóghʼ ntsʉ ntsətə-nkəʉ ye, a lâʼ ngô:
23«Pə́ táa ghǐ jwó, môu-ngou pyér pə́ tə́ jǐ no ŋuu mbiŋə, ə́ mbə́ yi shuŋú, ə́ njí môu mbiŋə;
ə́ pə cí ləjôghʼ yé ńgó Emányuwêl,
ə́ lághʼ ńdâʼ ngô: “Ə Sê wə́ nou paghʼə.”»
24Yosêp lei tə njyê, ə́ ngʉ̌ zə̂u yi cwôʼ-Sê yǎa ndǎʼ lə́ zʉ́, ə́ mpfú ngwě ye ńŋə́ ndə̂. 25Lə́ káa gháp zʉ́ láʼ núŋ, tə a lâʼ njí môu wei; Yosêp cî ləjôghʼ yé ńgó Yěso.
