Mark 14
14
Taattuweeco Yawudigeyyo aŋka diyawti Iisa
(Elloŋ Matiye 26.1-5, Lik 22.1-2, Yaaya 11.45-53)
1 Laalane ta Pakti o ta mappayi bala muɗugu, gu marakkiyo pe meeni seera ka pe. Guu taattuweeco soƴoowee ku saɗikaŋgeyyo o aalimnigee ku Kitamniti Muusa deyeɗɗo botol maa gu baamiyya Iisa ma n̰oor̰o ka, guu deeɗiya. 2Ay ɗakko appe gu beneyɗo goo: «Anneega baama ɗa meene ta laalanti, goneka kee gu giimi cepellene hawwane.»
Iisa o daate
(Elloŋ Matiye 26.6-13, Yaaya 12.1-8)
3Iisa aaye geegar ka Beetani, girti Simo ka jaddimenta#14.3 Simo keeke alaa ga gata aɗe ma rayyide paaɗe min judaammi.. Gii lekkiɗo daate kaƴi aɗe ma asiya gassa wikinne maa ga nowoɗɗe ga tewɗo. Gita pa bakamme koloŋgane ta dambeyyo ma onokke ma itir ma nobokka daana o ga kaali ta kaw maa gu kolaa goo nar o ga amsenta ɗa. Gii yeyyicca koloŋgane gii kalliyyeega itir kaaka kayaati Iisa. 4Maa gu daare min oko giimi kotti elliyya lattaati maa gi leewa kaaka, guu ŋor̰omr̰omɗo aacco goo: «Gaaye pe ini me gi negeɗɗiya itir keeke? 5Ampane kee gi geɗekkiki ɗa aɗe ma gurus ma arakka latta ka lubbiti gimi ka ƴila kaƴi, guu ɗeddiyyooga oko giimi ku saamo e?» Guu ban̰awɗica ta tirta teete daate taata. 6Maa ga Iisa giyyiɗiy gu ban̰aaca pa, gaa beneyyiyyoo gaa: «Aɗaatiniiga niŋga ɗa kantí! Duwaatini ka. Gaarti maa gi leyyaw kooko samaane. 7Giimi ku saamo ɗe aayitoŋ aɗe goŋŋa diiman aattoŋ#14.7 Elloŋ Ɗillico Hukumnigeyyo 15.11. o ga wikinne maa ku aŋkiɗo ku leeɗiyo samaane ku laayo. Naa soopa akkitoŋ ala ɗa diiman. 8Gita leyya paaɗe maa gi gederra. Kalliyyee appe itir oko ziitu min omma saa ku maa gi hassiliyya tinaawi. 9Na beneyyatoŋca seene: Dunuune parattí, were maa gu tasawɗica kabarre ta daana ta Mellayi, gu deeɗiy beneyyo gaarti daate teete maa gi leyyaw o gu deeɗica moyowwo.»
Yudas o Iisa
(Elloŋ Matiye 26.14-16, Lik 22.3-6)
10Gaa Yudas Iskariyot, ma ay kaƴi min oko jobookeetee Iisa ku orro o seera kaatiɗe ga deeɗiyoo beneyya oko taattuweeco soƴoowee ku saɗikaŋgeyyo gaa ga beraayooga Iisa. 11Maa gu giyyiyya beneyti kaaka, gii deeɗiyo daanayo ta tirta. Guu leeɗiyee goo gu beree gurus. Gaa Yudas deyeɗɗo pe wikinne ma wagee ka ku maa ga biriyyooga Iisa.
Iisa ma jobookeetee laaca laalane ta Pakti
(Elloŋ Matiye 26.17-25, Lik 22.7-14, Yaaya 13.21-30)
12Gaa oko meene ta diiliti laalane maa gu lewɗo mappa bala muɗugu, maa gu saɗakayɗo ma tamee oko tiyaw ta laalane ta Pakti, gu jobookeetee Iisa inniyya goo: «Ki aŋka pe kii ni kaatiɗo taŋaa ni deeɗamca hassila tiyaw ta laalane ta Pakti?» 13Gaa n̰aamiɗe seera min aacco gaa: «Ommoŋ geegarri. Ku deeɗo gassa gimu ma goyee kuɗige ka ammo. Jobboŋga. 14Were maa ga deeɗo un̰n̰a kaaka pa, ku beneyyine oko milti giiri kuu: “Garaawatine enaa gaa ga ay ŋa ga ger maa na asiɗo tee tiyaw ta laalane ta Pakti ma jobookeetaw?” 15Gaa gaarittoŋ daŋaye kaƴi aɗe baramta ma gekee kayaati giiti. Daŋaye kaaka pa hassilenta paaɗe o ga lekkiy lawwi paracco. Ay iŋaa appe ku deeɗineeca leewa tiyaw ta laalane ta Pakti.» 16Guu jobookeetee ku seera koo kaatiɗe. Gaa maa gu sarɗe geegarri, guu gassiyya paratti aleŋ maa ga Iisa beneyyiyoo. Guu leeɗica tiyaw ta laalane ta Pakti.
17Gaa ma pootimooko ga Iisa asiɗe ma jobookeetee ku orro o seera. 18Gaa maa gu nowoɗɗe gu tewɗo, ga Iisa beneyyiyoo gaa: «Na beneyyatoŋca seene, kaƴi min oko kuŋ keeke ma teewa ma naa akkino bira picco giimo#14.18 Elloŋ Soom 41.10..» 19Gaa oko beneyyi keeke gu jobookeetee paracco zorontiyɗe. Guu enewɗo paaɗe zeneeco. Kulla kee aɗe gaa: «Ay naa ɗa ka ɗeɗe?» 20Gaa Iisa tiiliyyoo gaa: «Ay kaƴi aɗe min oko kuŋ ka orro o seera, ma noƴaaca lugumati kiɗiili ma naa. 21Ta seene pa ga Runti Gimi gu akkiya dee aleŋ maa gi Kitamniti Mellayi beneyye ma gaartee#14.21 Elloŋ Soom 22.2-19 o Esaya 53.. Raɗɗee soopa oko gimu ma akkiya bira picco giimo. Gimu kaaka guu weewiya ɗa kulla gi samaane ƴiila oko gata.»
Tiyawti Iisa ta Pakti ma jobookeetee
(Elloŋ Matiye 26.26-30, Lik 22.14-20, 1 Korente 11.23-25)
22Gaa maa gu tewɗo kaaka, ga Iisa icciɗe mappa. Gaa leeɗiyee barkinti oko Mellayi. Gaa erriyya, gaa biriyyooga oko jobookeetee. Gaa beneyyiyyoo gaa: «Cawwoŋ, keeke ay ziitu.» 23Gaa icciɗe payya kuraaka ta mirmi ku mor̰mor̰oskeyyo. Gaa leeɗiyee barkinti oko Mellayi. Gaa biriyyooca, gu aar̰iɗe paracco. 24Gaa beneyyiyyoo gaa: «Kooko pa ay baartaw. Baara maa ga Mella onniɗe liŋgane ta marawta ma gimtee, o gu n̰alaa oko giimi maani. 25Na beneyyatoŋca seene, na ar̰aa ɗa payya ta kaw mirmi ku mor̰mor̰oskeyyo namma ya oko meene maa na asiɗo aar̰a mirmi ku marawta mulunniti Mellayi.» 26Gaa min iŋaa gu reeɗe riyaawiŋgee#14.26 Riyaawiŋgee ku laalanti kotti gu reeway min oko Soomnigee 115–118. ku laalane ta Pakti, guu kaatiɗe gu deeɗe kalpa dambu ka olibiyeyyi.
Iisa beneyya gaa ga Piyer akka meela
(Elloŋ Matiye 26.31-35, Lik 22.31-34, Yaaya 13.36-38)
27Gaa Iisa beneyyiyyoo oko jobookeetee gaa: «Ku akkino pooca parattoŋ, asan gi Kitamniti Mellayi beneyye gee: “Na akkiya uppa maggu naa deeɗiya, guu tameetee tacilɗo#14.27 Elloŋ Zakariya 13.7..” 28Na beneyyatoŋ, naa ase naɗa min muuti soopa na omokka na deeɗitoŋ uca kiɗa ta Galilee.» 29Gaa Piyer tiiliyyee gaa: «Guu paracco kulla gu capakkam, ga naa pa capakkam ɗa!» 30Gaa Iisa tiiliyyee oko Piyer gaa: «Na beneyyamca seene: Meente aɗe goŋŋa oko aandoŋ keeke saa kadar ga kokkor bookiɗo seertiŋ ki melaa subbatiŋ kii ki ibinno ɗa.» 31Gaa Piyer tiiliyyee payya ma raɗɗa gaa: «Caŋ gi daw muutu ma kii kulla, na melaa ɗa ta kaw naa na ibinum ɗa.» Guu gittee Piyer kulla tiiliɗe aleŋ kanti Piyer kaaka saa.
Inniti Iisa Getsemani
(Elloŋ Matiye 26.36-46, Lik 22.39-46)
32Gaa Iisa ma jobookeetee sarɗe were kaƴi aɗe maa gu kolaa goo Getsemani. Gaa beneyyiyyoo gaa: «Nuntoŋ iŋee aɗe kadar kee na deeɗo inna Mella.» 33Maa ga katawɗo pa ga gulmiy ini Piyer ma giiti Zak o Yaaya. Gii kelemti diiliɗe paaɗe oomo o gi galbanti koɗosse. 34Gaa beneyyiyyoo gaa: «Ziitu kallinoo ma ka muuti. Nuntoŋ iŋee aɗe bala ooƴo ta waano.» 35Gaa tan̰n̰iɗe paalta gaa galɗe kiɗaati. Gaa inniyya Mella gaa: «Gii deewa, ki aɗaw duwa ɗa na un̰n̰iɗo aattí diigane teete. 36Baaba, Tattu, gaari paracco maa ki aŋka deewa ka. Saapawca maaƴi kuraaka ta diiganti teete. Innasoopa gi addo dee ɗa ma aŋko tanni, gi dee ma aŋko tancum.» 37Gaa Iisa yookiɗe ga asiɗiy gassa jobookeetee subbacco guu oƴee. Gaa beneyyiyyee oko Piyer gaa: «Simo, ki oƴee e? Ki gederre ɗa ki nuntiɗe bala ooƴo saha kaƴi ka kulla e? 38Nuntoŋ bala ooƴo o ku enewwoŋga Mella ku maa ku alɗo gala ɗa sekelkilati. Galbanti gimi ɗe lekka niyyane ta samaane, ziiti pa lekka ɗa gudirane.»
39Maa ga beneyyiɗe goŋŋa, gaa kaatiɗe payya ga deeɗica ɗilla inniti gita ka. 40Gaa yookiɗe payya, ga asiɗiy gassa jobookeetee guu oƴee. Waani appe ecekkiyooca namma gu alɗo gederra ɗa iyyico iɗiico o gu ibina ɗa beneyyi maa gu beneyyiyee. 41Gaa kaatiɗe payya inniti Mellayi. Maa ga yookiyyo oko jobookeetee oko ta subbatiŋ ga beneyyiyoo gaa: «Ku oƴee missa ku nabaɗɗo e? A deesitoŋ pe! Ooƴitoŋ teete kaawe. Hiyya, saha ase! Haŋka pa ga Runti Gimi gu beraayooga paaɗe picco giimi ma leewa zunubgee. 42Wacoŋ! Anne waaga ma giimi kotti. Elloŋga gimu ma beraano picco giimo ay gata appe keeke.»
Baamiti Iisa
(Elloŋ Matiye 26.47-56, Lik 22.47-53, Yaaya 18.1-11)
43Gaa oko wikinne kaaka saa, maa ga Iisa beneyɗiyo missa oko jobookeetee, ga Yudas, gata ma ay kaƴi min oko jobookeetee ku orro o seera, asiɗe. Gata pa marawwiko giimi maani ma ecekke seepigee o gombolli. Ma n̰akammiy giimi kotti pa, ay taattuweeco soƴoowee ku saɗikaŋgeyyo o aalimnigee ku Kitamniti Muusa o ajaawaŋgeeco Yawudigeyyo. 44Yudas gata pa ma beraa Iisa picco giimo, beneyyiyooga min omma oko giimi kotti latta maa ga leewayo ma garaa Iisa gaa: «Gimu maa na gogaa, ay gata appe maa ku deyekke. Baamoŋga o ku arkini o ku pakarroŋga.» 45Maa ga Yudas asiɗe pa, ga asiyee katta oko Iisa, gaa beneyyiyyee gaa: «Garaawatu!» Gaa googiyya. 46Guu giimi ku maani kotti tipiriyya Iisa gu baamiyya.
47Gaa kaƴi min oko jobookeetee Iisa jooticca seepanti min girtí, ga uppiyya lubaakati tattuwco oko taattuweeco soƴoowee ku saɗikaŋgeyyo ga reepiyyeeca diiti. 48Gaa Iisa beneyyiyyoo oko giimi kotti ma asee baamiti gaa: «Ku ase baamitu ma seepigeetoŋ o ma gombollitoŋ aleŋ kuu na ay mariŋ ma onokka bottolli! 49Kulla meene na aaye aattoŋ doorane ta girti Mellayi na garkayɗiy giimi, kuu alɗino baama ɗa. Keeke soopa deero meente ku maa ga beneyti Kitamniti Mellayi asiɗo butulti.» 50Guu jobookeetee paracco gaɗɗiɗe gu cappiyyee. 51Gaa lekkiɗo ɗibilu ma jobokka Iisa. Gata pa dawakke kaɗiyye ka, guu giimi cokkiɗe baamiti. 52Gaa gata soopa miriyyooca kaɗiyye, gaa gaɗɗiɗe pe bur̰aŋta ka.
Iisa unco taattuwee ku parlanti
(Elloŋ Matiye 26.57-58, Lik 22.54-55,63-71, Yaaya 18.12-14,19-24)
53Guu giimi kaatikkiki Iisa girti tattuwco oko taattuweeco soƴoowee ku saɗikaŋgeyyo. Iŋaa pa gu taattuweeco soƴoowee ku saɗikaŋgeyyo o ajaawaŋgeeco Yawudigeyyo o aalimnigee ku Kitamniti Muusa temekke. 54Piyer pa jobbiya Iisa min arro ka. Gaa un̰n̰iɗe doorane ta girti tattuwco oko taattuweeco soƴoowee ku saɗikaŋgeyyo. Gaa deeɗe nunta ma taraakee sariptí okkati ga ƴerewɗo.
55Guu taattuweeco soƴoowee ku saɗikaŋgeyyo o taattuweeco Yawudigeyyo ku parlanti paracco deyeɗɗo er̰n̰e ku maa gu caaɗiyyee parlane ma ka muuti, guu alɗo gasakka ɗa soopa. 56Guu giimi maani bowoɗɗe oko Iisa#14.56 Elloŋ Soom 27.12, 35.11., guu alɗo tacaa ɗa beenannico. 57Guu daare waciɗe gu bowwiyyee goo: 58«Nii giyyiya maa ga beneyɗiyoo gaa ga yeyekkaa girti Mellayi maa gu giimi gekee, gaa geewiɗo kaƴi ma meeni subba bala picco giimo#14.58 Elloŋ Yaaya 2.19..» 59Gii ma bowwico taata kulla gu alɗe taaca ɗa beenannico.
60Gaa tattuwco oko taattuweeco soƴoowee ku saɗikaŋgeyyo waciɗe unco tattuwe ku parlanti, gaa beneyyiyyee oko Iisa gaa: «Ki telaa ɗa soo oko bowwico giimo maa gu bowoɗɗam teete e?» 61Gaa Iisa soopa ƴapawɗe kanti ga alɗe tiila ɗa. Gaa tattuwco oko taattuweeco soƴoowee ku saɗikaŋgeyyo inniyya payya gaa: «Kii ay Masi, gata maa ga Mella aparre e? Ki ay Runti oko gata maa gi logaw ay tanti e?» 62Gaa Iisa tiiliyyee gaa: «Haa! Na ay gata aɗe o ku akkiya ella Runti Gimi gaa nowotte tiyaawati Mella Miltí gudiranti o ku akkiya ella kulla gaa asaa min aacco n̰irɗa ku samaani#14.62 Elloŋ Daniyel 7.13 o Soom 110.1..» 63Gaa tattuwco oko taattuweeco soƴoowee ku saɗikaŋgeyyo erriɗiy kaɗiŋgeetee, gaa beneyyiɗe gaa: «Ke aŋka ɗa payya suyuudigee! 64Ku giyyiya ɗa saa pe parattoŋ maa ga n̰eleɗɗiya Mella e? A oko mooyitoŋ pa kuu me pe?» Guu paracco appe gu beneyyiɗe goo ga niŋge, kaaka pa gu caaɗiyee parlane kadar ga kanti ay muutu ka pe#14.64 Elloŋ Soƴoowee ku Saɗikaŋgeyyo 24.16.. 65Guu daare min aacco diiliɗe paaɗe gu peseɗɗe olo. Guu onniyyeegu iɗiitee, guu kondisiyya. Guu inniyya goo: «Gaaraniiga ƴa gimu ma leyyamga latta keeke!» Guu taraakee baamiyya gu ɗacciyya#14.65 Elloŋ Esaya 50.6..
Piyer pocaa Iisa
(Elloŋ Matiye 26.69-75, Lik 22.56-62, Yaaya 18.15-18,25-27)
66Oko wikinne kaaka pa ga Piyer aaye aattí dooranti. Gii kaƴi min oko lubaakeetee tattuwco oko taattuweeco soƴoowee ku saɗikaŋgeyyo asiɗe. 67Gii elliyya Piyer gaa yeraa okko. Gii neeɗiya samaane, gii beneyyiyyee gee: «Kii kulla ay kaƴi aɗe min oko gimtee Iisa ma ay ka geegar ka Nazaret.» 68Gaa meeliɗe gaa: «Na ibinya ɗa, o beneyte keeke na gasakka ɗa.» Gaa min iŋaa ga oomiɗe renta biloti. Gaa kokkor bookiɗe kaytiŋ. 69Gii lubaaká taata elliyya. Gii beneyyiyyoo payya oko giimi kotti ma aaye iŋaa gee: «Gimu keeke kulla ay giico aɗe.» 70Gaa Piyer meeliɗe payya. Gaa maa gu nambiɗe paalta guu giimi icciyyeega payya beneyyi kee goo: «Ma tirta aɗe ga kii kulla ay giico oko giimi kooko, asan ki ay ka Galilee!» 71Gaa Piyer waciɗe beneyyi ma haliipine gaa: «Na ibinya ɗa gimu keeke maa ku beneyya. Ga Mella boolino gaa beneytu keeke ay borooli.» 72Gaa oko wikinne kaaka saa, ga kokkor bookiɗe payya oko ma daa ta seertiŋ. Gaa Piyer mooyiyya beneyti Iisa kee maa ga beneyyiyee gaa: «Kadar ga kokkor bookiɗo seertiŋ ki melaa subbatiŋ kii ki ibinno ɗa.» Gaa Piyer waciɗe erciti.
© 2019, Wycliffe Bible Translators, Inc. All rights reserved.
