Pomulanya 13
13
Sarita Tempo i Abram sira dua i Lot Maga’a
1-4Wali ojo karoonya i Abram pasi indo nu ananya rapaposuwu muni yako ri tana Mesir, sira mawolili muni mangampago pada bone to rato’oka Negeb to tondo selatan ri tana Kana’an. Tempo sira yau etu sira mangkeni samparia ngaya-ngayanya. Pasi i Lot, pinuana i Abram, ia yau seja mangalulu sira. Wali rata nja’u Negeb ri tana Kana’an etu sira malinja wo’u sangkodi-sangkodi mangampago tondo utara panewa sira liu mandoo ri waka ntampa nakayore nsira tempo ruyu. Tampa etu re’e ri oyonya kota Betel pei kota Ai. Nja’u ria semo i Abram nangawangu palampa watu seore, wali rata nja’u ria ia mampue wo’u mampakabae i Pue Yawe.
Wali i Abram mawali tau to sugi kojo. Kasuginya etu, etu semo pera pasi weyawa, pasi malagi kojo binatang, etumo domba, bembe, pasi sapi. 5Pasi pinuananya, i Lot, ia sugi seja. Ia malagi seja dombanya, bembenya, pasi sapinya, pasi malagi seja to papolaonginya pasi tau to yusa to maroo ri raya ntenda-ntendanya. 6-7Pasi tempo etu re’ewa to Kana’an pei to Peris to maroo seja ri tana etu. Wali apa saba malagi kojo tau pasi binatang nsira etu, see naka taa soa sira samparia maroo siwaka, apa tana etu taa kojo gana pangkoni ane binatang to ewa wetu kalaginya. Wali see naka re’e tingka to mawali ri oyo ntau to mangkampang binatang i Lot pasi tau to mangkampang binatang i Abram apa sira paka rani mangampake tana etu damampokoni binatang to nakampang nsira etu.
8Wali see naka i Abram manganto’oka i Lot, to’onya, “Kita dua maja’i, wali taa masipato ane kita matingka pasi taa seja masipato ane to pangkampang binatang ngkita matingka. 9Gete, gana kojo tana to ri tango ngkita si’i, wali to tao-tao kita maga’a. Wali koromja mangampilis tana to nuporoe. Ane korom mangampilis tana to tondo ngkii, aku dayau njo’u tondo ngkana. Pei ane korom mangampilis tana to tondo ngkana, ane ewa see aku dayau njo’u tondo ngkii.”
10Wali ojo panto’o i Abram gombo etu, i Lot mansaka mangalo’aka pei mangkita samparia tana ri lemba Yordan ungka ri kota Soar. Tana etu maboko apa gana kojo ue. Kaboko ntana etu ewa kaboko ntana ri bonde to naikaka i mPue Yawe i Adam sira dua i Hawa nja’u Eden tempo owi, pasi ewa lemba nue Nil ri tana Mesir. Wali magaya pu’u tana etu. Pasi tempo etu tiroowa re’e kota Sodom pei Gomora nja’u ria apa tawa napakaja’aka yau i mPue Yawe. 11-12Wali i Lot masanang kojo mangkita lemba Yordan etu see naka to etu semo to ipilisinya. Yako etu i Abram sira dua i Lot maga’a. I Abram taa malimba, ia ojo maroo-roo ri tana Kana’an etu. Pei i Lot mampakaroso sindara-ndara pei samparia joanya pei mayoko njo’u tondo mata nu eo mangampago lemba Yordan. Rata nja’u ria sira maroo ri oyo ngkota-ngkota to re’e ri lemba Yordan etu pei mangawangu tenda nsira mosu ri kota Sodom. 13Pei tau to maroo ri kota Sodom etu maja’a kojo lengko ngkatuwu nsira pasi bae kojo dosa to naika nsira mangewa i Pue Yawe.
Sarita Tempo i Abram Malimba njo’u Hebron
14Wali ojo karoonya i Lot maga’a pei i Abram etu, i Pue Yawe mampogomboka wo’u i Abram. Ia mamparajanjika i Abram, to’oNya, “Lo’aka jukunjo yako ri tampa to nupokore etu. Lo’aka njo’u tondo utara pasi tondo selatan, pasi njo’u tondo mata nu eo pasi tondo kasoyo nu eo. 15Apa samparia tana to nukita ngkorom etu daKuwaika resi korom pasi resi wiyaamu rataka ri singkasaenya. 16Pasi Aku damangika see wiyaamu damalagi kojo, raporapaka ewa awu ntana. Wali ane awu ntana, taa nakoto ntau mangabilang kalaginya, wali ewa see kalagi mbiyaamu ri tempo to darata. 17Wali pakaroso pei linjak juku ri tana to daKuwaika korom si’i see nukita ewa wimba kabaenya, apa monso pu’u Aku damangawaika resi korom.” Etu semo parajanji i mPue Yawe resi i Abram.
18Wali yako etu i Abram pasi joanya mangalimba tenda nsira. Sira mampiyaika tampa etu pei malinja njo’u lipu to mosu ri kaju poli to malagi to i Mamre puenya. Kaju poli etu mosu ri kota Hebron. Wali sira mangawangu muni tendanya damaroo nja’u ria. Pasi nja’u ria i Abram mangawangu wo’u palampa watu darapake mampue mampakabae i Pue Yawe.
© 2018 New Tribes Mission, Sanford, FL 32771-1487, USA.
Printed in the United States of America
