Mathiu 8
8
1Ɔwa ma ɔ thor ka kateŋ-e, suniya tǝbana tǝ tan kɔ. 2Ka wuni ka rǝlel ɔ der ro ŋɔŋ, ɔ sɔna kɔ tǝwu, kɔ pa, Pa, bepi mǝ selɔ-e, mǝ gbǝli fethǝr mi. 3Ka Yisɔsȧŋ ɔ thanthi kȧta kɔŋ, ɔ gboŋ kɔ, kɔ pa, I selɔ. Yi mun gbǝraŋ. Ka ɔlɛmp wati ralel rǝ pond kɔ. 4Ka Yisɔsȧŋ ɔ pa ro rɔŋɔŋ, Botnɛ kȧmȧ mǝ te kanɛ ti wuni o wuni, kɛrɛ kɔnɛ mǝ tɔrinɛ ka aŋfode, kȧmȧ mǝ wurɔ asathka ȧte Mosisȧŋ ɔ yamari tǝ kǝyi mǝseri ro ŋaŋ.
5Ɔwa ma ɔ wɔŋ ro Kapǝrneɔm-e, ukaptin ɔ der ro ŋɔŋ, kɔ nɛmthɛnɛ kɔ, ɔ pa, 6Pa, ȧŋbɔy a mi ɔ fǝntha ro seth kȧmi, ɔ po gbɛthkɛ, ɔwa ɔ nakasi ɔthasǝr. 7Ka Yisɔsȧŋ ɔ pa ro ŋɔŋ, I ti der yeŋkǝs kɔ. 8Ka ɔkaptin ɔ pa, Pa, i bek hɛ kǝpa munɔ mǝ wɔŋ ka ȧŋseth a mi. Pa gbo ȧrim, ɔwa ȧŋbɔy a mi ɔ tǝ yeŋk. 9kotȧy-e minɛ sɔ i yi wuni ka afɔsɔ ratha, i ba aturgba roratha kȧmi. Ma i pa ka ɔkin ɔwe, Kɔnɛ, ɔwa ɔ tǝ kɔ. Ka ɔlɔm, Der, ɔwa ɔ tǝ der. Ka ȧŋbɔy a mi, Yɔ ȧte, ɔwa ɔ tǝ yɔ ti. 10Ma Yisɔs ɔ tǝl ȧte, ɔ kabanɛ, kɔ pa ka ŋaŋ aŋa tȧŋ kɔ-e, Tǝ tɛntɛnɛ i pa ro rɔnu, i tha bǝp hɛ kǝlanɛ kǝbana kǝwunɔŋ, hali kǝtɔŋ ka aŋIsrɛl bɛ. 11Ɔwa i kanɛ nu, agbȧthi aŋ tǝ wur ro thɔrɔŋ yi ro pil, aŋ tǝ yirȧ yi Ebraham, yi Aysak dɛ yi Yekɔb ka rȧbȧy ra ro riyana, 12kɛrɛ a tǝ fitha aŋwuth ŋa rȧbȧy ka ȧŋsum rokaŋ, ro kǝkulɔ yi kȧŋȧkŋȧk ɛsek kǝ yi. 13Ka ȧŋbɔy ŋɔŋ ɔ yeŋk ka ȧŋlɔkɔ ŋati gbeŋ.
14Ma Yisɔsȧŋ ɔ wɔŋ ka ȧŋseth ŋa Pitar-e, ɔ nənk ɔniŋkara kɔŋ ɔ fǝntha, ɔ tu mǝdɛr mǝgbipanɛ. 15kɔ gboŋ kȧta kɔŋ, ka madɛr mǝgbipanɛ mǝ ter kɔ, kɔ yokanɛ, ɔ yɔna kɔ. 16Ma rȧfɔy rǝ bek-e, a kȧrȧ kɔ afǝm agbȧthi aŋa ba akǝrǝfi. Kɔ wurɔ aŋkǝrǝfi rǝ rim, ɔ kȧl yeŋkǝs aŋa yi aboma bɛ; 17kȧmȧ ȧte Isaya ɔnȧbi ɔ pa tǝ lasǝr, kǝpa, Kɔn kɔnɔnɛ ɔ gbasi mȧrȧnt ma su, ɔwa ɔ sara tatu ta su.
18Ɔwa, ma Yisɔs ɔ nənk suniya tǝbana tǝ gbǝtɔsnɛ kɔ-e, ɔ yamari tǝ kǝfǝsi romɔri. 19Ka ukarmɔkɔ ulɔm ɔ der, ɔ pa ro ŋɔŋ, Karmɔkɔ i ti tȧŋ mu dɛr o dɛr ro maŋ kɔ. 20Ka Yisɔsȧŋ ɔ pa ro rɔŋɔŋ hɔ, Ɛgbogboro aŋ ba tǝyaŋka-e, ɛbȧmp ya aŋfena aŋ ba ɛseth. Kɛrɛ ɔWan ka wuni ɔ ba hɛ dɛr ro mǝ ɔ bot rȧbomp rɔŋ. 21Ka ulɔm ka aŋkarande ɔ pa ro ŋɔŋ, Pa, ter mi kȧmȧ i mɔtha kɔ maŋk ɔkas kȧmi. 22Kɛrɛ Yisɔs ɔ pa ro ŋɔŋ, Tȧŋ mi, ɔwa tey aŋfi kȧmȧ aŋ kɔ maŋk aŋfi ŋaŋ.
23Ɔwa ma ɔ po bȧkȧ rǝ abil-e, aŋkarande ŋɔŋ aŋ tȧŋ kɔ. 24Kɛrɛ ka ɔlɛmp wati kǝnkǝl kǝbana kǝ yokanɛ ro baŋ, haŋ ɛmuŋkǝl ɛ gbǝpǝr ȧŋbil: kɛrɛ Yisɔsȧŋ ɔ bɔ dirȧ. 25kaŋ kɔ thǝmi kɔ, aŋ pa, Pa, kisis su, sǝ dinɛ. 26Kɔ pa ro ŋaŋ, kɔyɛŋ mǝ nǝ nesa-e, naŋ aŋa ba kǝlanɛ kǝthan-e? Kɔ yokanɛ, ɔ ŋal aŋfef yi kȧbȧŋ. Ka pǝ re yi ɔthɔfǝl bɛm. 27Ka aŋfǝm aŋ kabanɛ, aŋ pa, Ko wuni wɔŋ ɔwe-e, ɔwe pǝ yi hali aŋfef yi kȧbȧŋ aŋ tǝla kɔ-e?
28Ma ɔ po fǝsi romɔri ka ȧŋthɔf ŋa aŋKadarin-e, afǝm ŋarǝŋ aŋa ba akǝrǝfi aŋ wur ka taboma, aŋ gbanɛ kɔ. Aŋ yi aninis ɔthasǝr, ɔwa wuni o wuni ɔ gbǝli hɛ thas ka aroŋ dati. 29kaŋ sel ɛrɔŋ, aŋ pa, Ko tȧy tȧŋ saŋ sǝ ba yi munɔȧŋ-e, munɔ Yisɔs ɔWan ka Kuru-e? Mǝ po der nɔ tǝ kǝsɔmpa su yeŋka ȧŋlɔkɔ aŋ bek-i? 30Ɔwa kuthi ka tǝsɔp agbȧthi kǝ yi ri, kǝ bɔ wɔnth dɛr ɔbɔlanɛ poŋ. 31Ka aŋkǝrǝfi aŋ nɛmthɛnɛ kɔ aŋ pa, Bepi mǝ wurɔ su-e, ter su kȧmȧ sǝ kɔ wɔŋ ka akuthi ka tǝsɔp. 32kɔ pa ro ŋaŋ, Kɔnɛ. Kaŋ wur, kaŋ wɔŋ ka tǝsɔp. Ɔwa akuthi ka tǝsop kǝ gbuŋklɛ kǝder ka aŋtǝmp ŋa ro baŋ, kaŋ dinɛ ro mȧnt. 33Ka ŋa aŋa bumǝr ŋa-e aŋ gbukɛ aŋ kɔ ro pet, aŋ tɔri koko bɛ, dɛ yi ȧte yɔnɛ ŋaŋ aŋa la ba aŋkǝrǝfi. 34Ka aŋfǝm bɛ ro pet aŋ wur tǝ kǝgbans Yisɔsȧŋ. Maŋ nənk kɔ-e, aŋ nɛmthɛnɛ kɔ kȧmȧ ɔ wur ka ȧŋthɔf ŋaŋ.
Themne New Testament © The Bible Society of Sierra Leone, 2009.
