YOHANA 20
20
Yesu Yisimukha Khurula mu Likhutsa
(Mat 28:1-8; Mk 16:1-8; Luka 24:1-12)
1Khulitukhu lia Jumapili mu mavwevwe, shivala nishimwami, Mariya Magadalena yasimukha natsia khu shilindwa, nanyola lichina nilimali khusuundiwa haluveka khurula mu vwinjililu. 2Yilukhaka natsia khu Simoni Petro khandi khu mwechi wundi, wa Yesu yali niyayaanza, navavoolela, “Varulitse Mwami mu shilindwa. Shiukhunyala khuva nu khumanyi havundu ha vamuvishi tawe.”
3Khulwa yako, Petro nende mwechi wundi mwenoyo vilukhaka nivatsia khu shilindwa. 4Petro nende mwechi wundi mwenoyo vilukhakanga voosi; navutswa mwechi wundi mwenoyo yaraanga khutukha khu shilindwa, Petro nashili khutukha khushio. 5Mwechi wundi mwenoyo yinama nalolamu tsinguvu tsia machoro malahi nitsilinjilwi, navutswa shiyinjilamu tawe. 6Simoni Petro wali namulondanga inyuma yatukhaho, niyinjila mu shilindwa. Yalola tsinguvu tsienetso nitsilimu 7nende shilaka shiali nishivoheelwi khu murwi kwa Yesu. Shilaka shienesho shiali nishilinji shiene, khandi shishialikhu mu tsinguvu tsindi tawe. 8Mwechi wundi mwenoyo, shichila yali wu khuraanga khutukha khu shilindwa shia Yesu, yinjila khandi mu shilindwa shienesho. Yalola nasuuvila. 9Mumatukhu kenako, vali nivashili khumanya ka Mahandiko Matakatifu kavoolanga khulondokhana khu Yesu khuli aliitsa khwisimukha khurula mu likhutsa. 10Khulwa yako, veechi vavili venavo vakalukha ingo wavo.
Yesu Yalolekha khu Mariya Magadalena
(Mat 28:9-10; Mk 16:9-11)
11Mariya yasinjila ilwanyi wi shilindwa nalilanga. Lwa yali nashililanga, yinama naheenzela mu shilindwa 12nalolamu tsinjelosi tsivili nitsifwali tsinguvu tsindavu, nitsikhale havundu ha mmbili kwa Yesu kwali nu kuli; injelosi indala ha murwi kwekwe, na yindi ha vilenje hehe. 13Tsinjelosi tsienetso tsiamureeva, “Mukhali yivi, ni shina shichilanga nulila?”
Mariya yachipa, “Varulitse Mwami wanje hanu, khandi shimanyikhu havundu ha vamuvishi tawe.”
14Lwa Mariya yaheenza iyi neyo, yalola Yesu nasinjileho; navutswa shiyali namanyikhu ni Yesu tawe. 15Yesu yamureeva, “Mukhali yivi, ni shina shichilanga nulila? Ni viina wa ukhavanga?”
Mariya yakanakana ndi nu mwene mulimi. Nalwo lwa Mariya yamuvoolela, “Mwami, niiva umali khumurulitsa hanu, mbolela havundu ha umuvishi khu nzi khumulera.”
16Yesu yamulaanga, “Mariya!”
Yishevukha wa Yesu yali nali, navoola Muluhebrania, “Rabboni!” (Nakhwo khuvoola “Mwechitsi.”)
17Yesu yamuvoolela, “Ukhangumilakhu tawe, shichila shili khukalukha khu Tata. Navutswa simukha utsi khu vamwavo vaanje uvavoolele ndi ngalukhanga khu woyo uli Tata wanje khandi Tata wavo, Nyasaye wanje khandi Nyasaye wavo.”
18Khulwa yako, Mariya Magadalena yasimukha natsia navoolela veechi ndi uloli Mwami. Yavavoolela makhuva ka yali namuvoolele avavoolele.
Yesu Yalolekha khu Veechi Veve
(Mat 28:16-20; Mk 16:14-18; Luka 24:36-49)
19Lwa shivala shiali nishimwamanga khulitukhu liu khuraanga khu lisitsa, veechi viyikalila munzu, shichila varia vimilili va Vayahudi. Khulwa yako, Yesu yitsa nasinjila hakari havo, navoola, “Nyoli milembe voosi.” 20Lwa Yesu yavoola ndio, yavamanyinya makhono keke khandi luvalu lwelwe. Veechi vali nu vuyaanzi vunyishi lwa valola Mwami Yesu. 21Yesu yavavoolela khandi, “Nyoli milembe voosi. Khuli lwa Tata yanduma, khali inzi murumanga khandi.” 22Lwa yali niyakhamala khuvoola khandi ndio, yavesela muya navavoolela, “Nyoli Roho Mutakatifu. 23Niiva mulasemeha vandu vwoni vwavo, nalwo lwa valiitsa khusemehelwa; navutswa niiva mulambakhana khusemeha, shivanyala khusemehelwa tawe.”
Yesu Yalolekha khu Tomasi
24Khali ndio, Tomasi (wali ni lira lindi Likhwane), mulala khu veechi likhomi na vavili, shiyali navo lwa Yesu yalolekha khuvo tawe. 25Khulwa yako, veechi vandi vamuvoolela, “Khuloli Mwami.”
Navutswa Tomasi yavavoolela, “Nikhaloli tsimbala tsili mu makhono keke khandi ndili shitere shianje mu tsimbala tsienetso; ngumili mumbalu mwemwe, mbulakhu khuli lwa nyala khusuuvila.”
26Matukhu munane nikakhavira, veechi va Yesu vali munzu khandi halala na Tomasi. Khali niiva vali nivikale miliango, Yesu yitsa nasinjila hakari havo navoola, “Nyoli milembe voosi!” 27Yesu yavoolela Tomasi, “Tiila shitere shioshio hanu; khandi uheenze mu makhono kaanje; kololoshitsa mukhono kwokwo khandi ungumili mumbalu mwanje. Lekha khuhaya haya usuuvile!”
28Tomasi yamuchipa, “Mwami wanje khandi Nyasaye wanje!”
29Yesu yamuvoolela, “Wakhasuuvila lwa wakhalola ninzi? Vali ni ikhaavi yavo vasuuvilanga vuchila khulolakhu inzi!”
Shivune shi Shitabu Yishi
30Yesu yakhola viloleshitsu vindi vinyishi imbeli wa veechi veve, viakhahandikwa mu shitabu yishi. 31Navutswa yivi viahandikwa khu musuuvile ndi Yesu neye Masiha, Mwana wa Nyasaye, khandi ndi nu musuuvile muye munyole vulamu.
© The Bible Society of Kenya, 2013
