YOHANA 17
17
Yesu Yisaalila Mwene
1Lwa Yesu yali namali khuvoola ndio, yaheenza mwikulu nasaala, “Tata, isaa yanje imali khutukha. Khuminya Mwana wowo, khu khali Mwana wowo akhuhe vukhumi. 2Wamuha vunyali khu vandu voosi mu shivala, khu alihaana vulamu vwi mihika ni mhika khu yavo voosi va wamuha. 3Khulwa yako, vulamu vwi mihika ni mihika vuli ndi khutukha vamanye ndi nivi Nyasaye watoto wonyene, khandi Yesu Kristo neye wa yivi waruma. 4Mali khuhaana vukhumi khu yivi khulilova khunu, lwa narweshitsa muhinzilu kwosi kwa wamba khole. 5Khulwa yako, Tata! Khuminya imbeli wowo nunundi, nu vukhumi vulala vwele vwa nali navwo nivi, shivala nishishili khuloongwa.
Yesu Yasaalila Veechi Veve
6“Mali khukhukhola khumanyikhana khu vandu va wamba khurula mu shivala shinu. Vali vovo; nivi wamba vandu venavo, khandi vatsilililanga khulonda likhuva liolio. 7Vamanya nunundi ndi shia shindu shiosi shia wamba shirulanga khu yivi. 8Navilwatsila likhuva lia wambolela nivalihuchilila. Ni kilikali, vamanya vulahi ndi narula khu yivi; khandi vali ni lisuuvila ndi nivi wanduma.
9“Saalilanga veechi vaanje; shikali saalilanga shivala tawe; navutswa saalilanga yavo va wamba, shichila ni vovo. 10Shia shindu shiosi shiandi nashio ni shioshio; khandi viosi viuli navio ni vianje. Khuminywangwa khuvirila muvio. 11Tata Mutakatifu! Shikali nzitsanga khutsililila khumenya mu shivala shinu tawe; navutswa vo vali mu shivala. Tsililila khuvalinda khuvirila mu tsingulu tsi lira liolio, nilili lira lia wamba, khu vave shilala khuli inzi nivi khuli shilala. 12Lwa namenyanga navo, navalinda vulahi khuvirila mu tsingulu tsi lira liolio, nilili lira lia wamba. Navalinda vulahi muno; khandi mundu avulakhuho khali mulala wakora khuvo; nikakhali mulala woyo walachikha aliitsa khukora khu Mahandiko Matakatifu karweshitswi. 13Nzitsanga khu yivi nunundi; navutswa mboli vindu yivi lwa shili mu shivala, khu vuyaanzi vwanje vwitsule mu mioyo chiavo. 14Mali khuvilwatsila likhuva liolio, navutswa vandu vu mu shivala va vambakhana, shichila shivali vu mu shivala khuli lwa inzi ndi wu mu shivala tawe. 15Shikali saalanga uvarulitse mu shivala tawe; navutswa saalanga ndi uvalinde khurula khu Mutamanu Woyo. 16Shivali vu mu shivala, khuli lwandi wu mu shivala tawe. 17Vakhole vave vatakatifu khuvirila mu katoto; shichila likhuva liolio ni liatoto. 18Khuli lwa wanduma khu vandu vu mu shivala, nindio khandi varumanga mu shivala. 19Nzikholanga mutakatifu shichila vo, khu khali vo vave vatakatifu vatoto.
Yesu Yasaalila Vasuuvili Voosi
20“Shikali saalilanga vo vonyene tawe; navutswa saalilanga yavo voosi valiitsa khusuuvila mwinzi khuvirila mu likhuva liavo. 21Tata! Saalanga ndi vandu venavo voosi vave shilala! Saalanga ndi vave khuli yivi uli mwinzi, ninzi mu yivi. Saalanga ndi vave shilala mu khutsi, khu vandu vu mu shivala vasuuvili ndi nivi wanduma. 22Mali khuvaha vukhumi vwa wamba, khu vave shilala, khuli lwa inzi nivi khuli shilala; 23Inzi mbe muvo nivi mwinzi, khu vave shilala, khu vandu vu mu shivala vamanye ndi nivi wanduma khandi wavayaanza khuli wanyanza.
24“Tata! Nyenyanga ndi vandu voosi va wamba vave ninzi shia havundu hosi hamba nindi; khandi valole vukhumi vwanje, nuvuli vukhumi vwa wamba shichila wali wanyanza shivala nishishili khuloongwa. 25Yivi Tata wi likhola liu vulunji! Khali niiva vandu vu mu shivala vakhukorwa, inzi nakhumanya, khandi vamanya ndi nivi wanduma. 26Mali khuvakhola vakhumanye, khandi natsililila khukhola, khu uvayaanze khuli wanyanza; khali inzi mwene mbe muvo.”
© The Bible Society of Kenya, 2013
