LIRAANGA 13
13
Abramu nende Loti Vavukhana
1Abramu yasimukha natsia khuluveka luli ivuluka khurula mu shivala shia Misri khuluveka luli natsia, ikuvanda wi shivala shia Kanaani halala nu mukhali wewe ni miandu chiechie chiosi; Loti yasimukha natsia naye. 2Abramu yali mundu wahindahala muno; yali na makondi, tsimbuli nende tsing'ombe. Yali khandi ni ifetsa nende itsahabu. 3Yarula ikuvanda wi shivala shia Kanaani nachenda chenda iyi neyo, khutsia mu litaala lia Betseli. Yatukha havundu hali hakari ha mataala ka Betseli nende Ai, ha yali niyumbakhakhu liheemo lielie 4khandi ha yali niyumbakhakhu vwaali lukhuraanga. Yasaala khuvirila mu lira liu Mwami Nyasaye havundu henaho.
5Loti wali nali khu luchendo nende Abramu, yali khandi na makondi, tsimbuli, tsing'ombe nende maheemo ku khumenyamu ka vandu vi inzu yeye; 6vwayilu shiuvwali vwa vatukha lwa vo vavili vamenyanga halala tawe, shichila vali vavaya miruku minyishi. 7Vutsolani vwaliho hakari ha vayi vi miruku chia Abramu nende vi miruku chia Loti. Mumatukhu kenako, Vakanaani nende Vapeerizi vamenyanga mu shivala shienesho.
8Nalwo lwa Abramu yavoolela Loti, “Vusolani vukhavakhu hakari hanje nende hoho, inoho hakari ha vayi vovo nende vaanje tawe, shichila khuli viikho. 9Nu vulahi nukhulekhane. Rovola lusomo lwa wenyanga mu shivala shinu. Ulatsia khuluveka lu mukhono musatsa, ninzi nzi khuluveka lu mukhono mukhali; inoho nutsia khuluveka lu mukhono musatsa, inzi natsia khuluveka lu mukhono mukhali.”
10Loti yaheenza shia havundu hosi, nalola khuli Luhoongo lwa Yorodani lwelelekha khutsia khutukha havundu halaangwangwa Zohari; Luhoongo lwa Yorodani lwali na matsi manyishi, khuli Mulimi ku Mwami Nyasaye inoho khuli shivala shia Misri. (Kenako kikholeka Mwami Nyasaye nashili khutivitsa mataala ka Sodomu nende Gomora.) 11Khulwa yako, Loti yivukulila mwene luhoongo lwa Yorodani lwosi, natsia khuluveka luli ivukwi. Nindi Abramu nende Loti vavukhana: 12Abramu yali wamenya mu shivala shia Kanaani, navutswa Loti yamenya mu mataala kali mu luhoongo, khandi niyumbakha maheemo keke himbi mu litaala lia Sodomu. 13Vandu vi litaala lia Sodomu vakhola vutamanu khandi nivakhola vwoni vunyishi imbeli wu Mwami Nyasaye.
Abramu Yasimukha Natsia Heburoni
14Mwami Nyasaye yavoolela Abramu, lwa Loti yali niyahukha khuye, “Chinguula tsimoni tsiotsio nunundi, uranjile khuheenza uli yaho, mu tsimbeka tsiosi khuraanjila khuluveka luli ivuluka, ikuvanda, ivukwi, nende imbo; 15shichila shivala shia mulolanga shiosi yeshio nashio shia nzitsanga khukhuha yivi nende vitsukhulu vovo mihika ni mihika. 16Nzitsanga khukhuha yivi vitsukhulu vanyishi, vu mundu wosi anyala khunyala khuvalitsa voosi; vwakhavele vutoro khuvaliitsa muyeeshe kwosi mu shivala! 17Lwene yulu, tsia khandi uheenze shivala shiosi, shichila nzitsanga khukhuha shivala shienesho shiosi.” 18Khulwa yako, Abramu yasinyuula maheemo keke, natsia khumenya himbi ha misala chi miseno chia Mamure mu litaala lia Heburoni, ha yumbashila Mwami Nyasaye vwaali.
© The Bible Society of Kenya, 2013
