LIRAANGA 11
11
Munaara kwa Babilonia
1Lukhuraanga lwene, vandu vu mu shivala shiosi valomolomanga lulomolomo lulala lwonyene, khandi varumishilanga makhuva malala mele. 2Lwa vali nivahamilanga ivukwi, vatukha mu lwomera luli mu shivala shia Babilonia; nivamenyayo. 3Vavoolelana vene, “Hambi hanu! Chendi khuloonje matofari khandi khukasambe.” Vali na matofari ku khumbashila nende ilaamu yu khukalomba kahambane halala. 4Vavoola, “Chendi khumbashe litaala likali nunundi nu munaara kutukhanga khu malesi, khu khwilombele lira lilahi khandi khuvuli khusalanyinywa shia havundu hosi khulilova.”
5Navutswa Mwami Nyasaye yikha hasi khulola litaala lienelo nende munaara kwa vandu vali nivumbakhanga. 6Mwami Nyasaye yavoola, “Loli, nu luhia lulala, khandi valomolomanga shilala; yili nalio liraanga lia vindu via vatsitsanga khukhola. Shindu shiosi shia valiitsa khuvoola venyanga khukhola, nashio shia valiitsa khukhola. 7Hambi khutsi hasi, khuvakoyanyinya mulilomoloma khu vavuli khuhulishitsana vene khuvene.” 8Nalwo lwa Mwami Nyasaye yavasalanyinya shia havundu hosi khulilova, nivalekha khumbakha litaala lienelo. 9Litaala lienelo liakulikhwa lira Babilonia, shichila naho havundu wu Mwami Nyasaye yakoyanyinya lulomolomo lwa vandu voosi khulilova; khandi naho ha havundu wu Mwami Nyasaye yavasalanyila shia havundu hosi khulilova.
Vitsukhulu va Shemu
(1 Tsiny 1:24-27)
10Yava navo vitsukhulu va Shemu. Lwa Shemu yali nali ni mihika imia indala, yivula mwana wi shiyayi walaangwangwa Arupakashadi, mihika nichiakhavira chivili matsi ki michelelo nikamali khuvwa. 11Lwinyuma, Arupakashadi yamenya mihika chindi tsimia tsiranu; niyivula vaana vandi.
12Lwa Arupakashadi yali namali mihika makhomi kavaka na chiranu, yivula mwana wi shiyayi wakulikhwa Shela; 13niyakhivula lila Shela, yamenya mihika chindi tsimia tsine na chivaka; niyivula vaana vandi.
14Lwa Shela yali nali ni mihika makhomi kavaka, yivula mwana wi shiyayi, wa yakulikha lila Eberi; 15Shela niyakhivula Eberi, yamenya mihika chindi tsimia tsine na chivaka; niyivula vaana vandi.
16Lwa Eberi yali nali ni mihika makhomi kavaka na chine, yivula mwana wi shiyayi, wa yakulikha lila Pelegi; 17Eberi yamenya mihika chindi tsimia tsine na makhomi kavaka; niyivula vaana vandi.
18Lwa Pelegi yali namali mihika makhomi kavaka, yivula mwana wi shiyayi, wa yakulikha lira Rehu; 19Pelegi niyakhivula Rehu, yamenya mihika chindi tsimia tsivili na tisa; niyivula vaana vandi.
20Lwa Rehu yali nali ni mihika makhomi kavaka na chivili, yivula mwana wi shiyayi, wa yakulikha lira Serugi; 21lwinyuma, Rehu yamenya mihika chindi tsimia tsivili na saba; niyivula vaana vandi.
22Lwa Serugi yali nali ni mihika makhomi kavaka, yivula mwana wi shiyayi, wa yakulikha lira Nahori; 23lwinyuma, Serugi yamenya mihika chindi tsimia tsivili; niyivula vaana vandi.
24Lwa Nahori yali nali ni mihika makhomi kavili na tisa; niyivula mwana wi shiyayi, wa yakulikha lira Tera; 25lwinyuma, Nahori yamenya mihika chindi imia indala likhomi na tisa; niyivula vaana vandi.
26Lwa Tera yali nali ni mihika makhomi saba, yivula Aburahamu, Nahori nende Harani.
Vitsukhulu va Tera
27Yava navo vitsukhulu va Tera, wivula Abramu, Nahori nende Harani. Harani yivula Loti. 28Harani yakhutsila mu litaala lingo wavo, lialaangwangwa Uri lili Babilonia, tata wewe nashili mwoyo. 29Abramu yahila Sarai, khandi Nahori nahila Milika, mwana wi shikhana wa Harani, nali khandi tata wa Isaka. 30Sarai yali mukhali mukuumba vuchila khwivulakhu mwana wosi.
31Tera yavukula mwana wewe wi shiyayi Abramu, mwana wa amwavo Abramu walaangwangwa Loti, mwana wa Harani, khandi Sarai, wali mukhali wa Abramu, nivatsia navo mu litaala lia Uri lili Babilonia, khutsia mu shivala shia Kanaani. Vasimukha nivatukha mu litaala lia Harani khandi nivamenyaho. 32Tera yakhutsilayo nali ni mihika tsimia tsivili na chiranu.
© The Bible Society of Kenya, 2013
