Luke 22
22
Wɔpam dɛ Woboku Jesus
(Matthew 26.1-5; Mark 14.1, 2; John 11.45-53)
1 #
Eks 12.1-27
Na epitsi afahyɛ no a wɔfrɛ no Apaho no bɛnee. 2Na asɔfompanyin nye kyerɛwfo no hwehwɛɛ mbrɛ wɔbɛyɛ eku Jesus, naaso nna wosuro nkorɔfo no.
Judas Gye Pen dɛ Obeyi Jesus Ama
(Matthew 26.14-16; Mark 14.10, 11)
3Na Satan kɛhɛɛn Judas a wɔfrɛ no Iskariot a ɔyɛ duebien no mu baako no mu. 4Na ɔkɔree nye asɔfompanyin nye asafohen no kɛhyehyɛɛ mbrɛ ɔbɛyɛ eyi no ama hɔn. 5Na ɔyɛɛ hɔn dɛw, na wɔnye no hyehyɛɛ dɛ wɔbɛma no sika. 6Na ɔbɔɔ hɔn anohoba, na ɔhwehwɛɛ mbrɛ obenya kwan edua nyimpadodow no ekyir eyi no ama hɔn.
Jesus Yɛ Apaho Afahyɛ no ho Nhyehyɛɛ
(Matthew 26.17-25; Mark 14.12-21; John 13.21-30)
7Na epitsi da a ɔsɛ dɛ woku apahoguan no durii. 8Na ɔsomaa Peter nye John dɛ, Hom nkɔ nkesiesie apaho no mma hɛn ma yembedzi. 9Na wɔsee no dɛ, Hen na epɛ dɛ yekesiesie? 10Na ɔsee hɔn dɛ, Sɛ hom du kurow no mu a, nyimpa bi a ɔso esuhina behyia hom: hom nka no do nkɔ fie a ɔbɔkɔ mu no mu, 11na hom nse fiewura no dɛ, Kyerɛkyerɛnyi no se, Ahɔhodan a menye m’esuafo bedzi mu apaho no wɔ hen? 12Na ɔbɛkyerɛ hom sor dan kɛse bi a wɔahyehyɛ mu: hɔ na hom nsiesie. 13Na wɔkɔree kohun dɛ mbrɛ ɔsee hɔn no, na wosiesiee apaho no.
Ewuradze Edzidzi no
(Matthew 26.26-30; Mark 14.22-26; 1 Korintefo 11.23-25)
14Na dɔn no durii no, ɔbɛtsenaa ase, na asomafo duebien no ka no ho. 15Na ɔsee hɔn dɛ, Mo kɔn adɔ akyɛr dɛ menye hom dzi apaho yi ansaana mehu amandze: 16na mese hom dɛ, Mirinndzi bi bio gyedɛ ber a ɔaba mu wɔ Nyankopɔn ahenman mu no. 17Na ɔfaa kɔɔpow na ɔdaa ase no, ɔsee dɛ, Hom ngye yi nkyɛ mma homho: 18na mese hom dɛ, Moronnom wenyinaba no bi bio dze ekodu dɛ Nyankopɔn ahendzi bɛba. 19Na ɔfaa paanoo na ɔdaa ase no, obubui, na ɔdze maa hɔn dɛ, Iyi nye me nyimpadua a wɔdze rema wɔ hom ntsi: hom nyɛ yi mfa nyɛ me nkaa. 20Dɛmara so na wowiee edzidzi no, ɔfaa kɔɔpow no see dɛ, Kɔɔpow yi nye ahyɛmu fofor no wɔ mo bɔgyaa mu, ɔno na hom ntsi woruhue egu. 21Na hwɛ, nyia oriyi me ama no ne nsa nye me wɔ pon no do. 22Na nokwar, nyimpa Ba no rokɔ dɛ mbrɛ wɔahyɛ no dze, naaso nyimpa a wɔnam no do ribeyi no ama no ndue! 23Na wɔhyɛɛ ase bisabisaa hɔn mu dɛ woana na ɔrebɛyɛ dɛm adze yi?
Kɛseyɛ ho Nokotwa
24 #
Mat 18.1; Mar 9.34; Luk 9.46 Na noko bi so baa hɔn mu dɛ hɔn mu woana na wobobu no kɛse. 25#Mat 20.25-27; Mar 10.42-44 Na ɔsee hɔn dɛ, Amanaman ahemfo dzi hɔn do wura, na hɔn a wodzi hɔn do tum no, wɔfrɛ hɔn Ayamuyiefo. 26#Mat 23.11; Mar 9.35 Na hom dze, mma hom nnyɛ dɛm: na mbom nyia ɔyɛ hom mu kɛse, wɔmma ɔnyɛ dɛ ekumaba, na nyia ɔyɛ otsitsir no, ɔnyɛ dɛ nyia ɔsom. 27#Joh 13.12-15 Na woana na ɔyɛ kɛse, nyia ɔtse edziban ho anaa nyia ɔsom a? Nnyɛ nyia ɔtse edziban ho anaa? Na emi dze, mowɔ hom mu dɛ nyia ɔsom. 28Na hom nye hɔn a hom da ho ka mo ho wɔ mo nsɔhwɛ mu; 29na mo so mehyɛ ahendzi ma hom, dɛ mbrɛ m’Egya ahyɛ ama me no, 30ama hom eedzidzi na hom aanom wɔ mo pon do wɔ m’ahenman mu; na hom bɛtsena nhengua do ebu Israel ebusuakuw duebien no atsɛn. 31Simon, Simon, hwɛ, Satan ebisa dɛ obenya hom na ɔapo hom do dɛ eburow; 32na maserɛ ama wo, amma wo gyedzi aammpa, na sɛ daakye esan gyina a, hyɛ wo nuanom dzen. 33Na ɔsee no dɛ, Ewuradze, mayɛ krado dɛ menye wo bɔkɔ efiadze nye wu nyina mu. 34Na ɔsee dɛ, Peter, Meka kyerɛ wo dɛ akokɔ rommbɔn ndɛ ansaana asan mprɛnsa dɛ innyim me.
35Na obisaa hɔn dɛ, Mosomaa hom a hom nndze sika kotoku nye bɔtɔ nye mpaboa no, biribi hiaa hom anaa? Na wɔsee dɛ, Ennhia hɛn hwee. 36Na ɔsee hɔn dɛ, Afei dze, nyia ɔwɔ sika kotoku, ma ɔmfa, na bɔtɔ so dɛmara, na nyia onnyi bi no, ma ɔntɔn no sortar ntɔ afona. 37Na mese hom dɛ iyi a wɔakyerɛw no otwar dɛ ɔba mu wɔ mo ho dɛ, Wɔkaan no foraa mbratofo, na dza ɔfa mo ho no rebɛba mu. 38Na wɔsee dɛ, Ewuradze, hwɛ, mfona ebien nye yi. Na ɔsee hɔn dɛ, Ɔnoara ye.
Jesus Bɔ Mpaa wɔ Ngo Bepɔw no do
(Matthew 26.36-46; Mark 14.32-42)
39Na opuei, na dɛ mbrɛ ɔtɔ dɛ ɔyɛ no, ɔkɔr Ngo Bepɔw do, na n’esuafo no so kaa no do. 40Na odur hɔ no, ɔsee hɔn dɛ, Hom nsɔr ama hom aannkɔ nsɔhwɛ mu. 41Na ɔtwee noho fii hɔn nkyɛn bɛyɛ dɛ ɔbotowee na ɔkɔkotoow ne ntwɛr enyim sɔɔr dɛ, 42Egya, sɛ epɛ a, yi kɔɔpow yi pa mo ho; naaso nnyɛ emi me pɛ a, na wodze na ɔnyɛ hɔ. 43Na ɔbɔfo bi fi sor beyii noho kyerɛɛ no hyɛɛ no dzen. 44Na owuyaw mu no, ɔbɔɔ mpaa enyiberdo, na ne fifir yɛɛ dɛ bɔgya atɔwatɔw a ɔsosɔ famu. 45Na ɔsoɛree fii n’asɔryɛ mu no, ɔbaa n’esuafo no nkyɛn na obohun hɔn dɛ awerɛhow ntsi wɔadeda. 46Na ɔsee hɔn dɛ, Ɔyɛ dɛn na hom ada yi? Hom nsoɛr nsɔr mma hom aannkɔ nsɔhwɛ mu.
Wɔkyer Jesus
(Matthew 26.47-56; Mark 14.43-50; John 18.3-11)
47Na ɔda do rekasa no, hwɛ, nyimpadodow nye nyia wɔfrɛ no Judas a ɔyɛ duebien no mu baako dzi hɔn enyim na ɔtwee bɛɛn Jesus dɛ ɔrebɛfew n’ano. 48Na Jesus see no dɛ, Judas, edze mfewano riyi nyimpa Ba no ama anaa? 49Na hɔn a wɔwɔ ne nkyɛn no hun dza ɔreba no, wɔsee dɛ, Ewuradze, yɛmfa afona mbobɔ hɔn anaa? 50Na hɔn mu baako bɔɔ ɔsɔfopanyin n’akowaa, na otwaa n’asowa nyimfa. 51Na Jesus buae see dɛ, Hom mma ɔmpa ha ara; na ɔdze ne nsa kaa asowa no famee. 52Na Jesus see asɔfompanyin nye asɔrfi mu asafohen, nye mpanyimfo a wɔbaa no do no dɛ, Ana hom puei baa mo do dɛ owifo do, na hom dze mfona nye mpɔtsibaa yi? 53#Luk 19.47; 21.37 Mowɔ hom nkyɛn wɔ asɔrfi mu hɔ daa no, hom anntsen hom nsa annka me: na iyi nye hom ber, na sum mu tum.
Peter Ka dɛ Onnyim Jesus
(Matthew 26.57, 58, 69-75; Mark 14.53, 54, 66-72; John 18.12-18, 25-27)
54Na wɔfaa no kɔree, na wɔdze no baa ɔsɔfopanyin no fie. Na Peter dzii n’ekyir wɔ ekyirekyir. 55Na wokuaa gya wɔ abangua no finimfin na wɔtsenaa ho no, Peter bɛtsenaa hɔn mu. 56Na ɔtse gya no ho no, abaawa bi hun no, na ɔhwɛɛ no komm, na ɔsee dɛ, Oyi so nye no nam. 57Na Peter saan dɛ, Ɔbaa, minnyim no. 58Na ɔkyɛɛr kakra no obi so hun no, na ɔsee dɛ, Wo so fi hɔn mu. Na Peter see dɛ, Onua, mimmfi mu. 59Na n’ekyir bɛyɛ dɔnhwer kor na obi so kaa gyinaa do dɛ, Ɔyɛ ampa, oyi so nye no nam: na ɔyɛ Galiliinyi. 60Na Peter see dɛ, Onua, minnyim dza ereka yi. Na amonmu hɔ ara a ɔda do rekasa no, na akokɔ bɔnee. 61Na Ewuradze daan noho hwɛɛ Peter. Na Peter kaa asɛm a Ewuradze kae no, mbrɛ ɔsee no dɛ, Ansaana akokɔ bɔbɔn ndɛ, ebɛpa me mprɛnsa. 62Na opuei, na okosuu yayaayaw.
Wosi Jesus Atwetwe na Wɔbor no
(Matthew 26.67, 68; Mark 14.65)
63Na mbanyin a wɔdze Jesus mu no, sii no atwetwe bobɔɔ no. 64Na wɔkataa n’enyiwa, na wobisaa no dɛ, Hyɛ nkɔm! Woana na ɔbɔɔ wo? 65Na ebususɛm pii keka ho a wɔkae tsiaa no.
Jesus Wɔ Mpanyimfo no Enyim
(Matthew 26.59-66; Mark 14.55-64; John 18.19-24)
66Na adze kyee no, ɔman mpanyimfo nye asɔfompanyin nye kyerɛwfo no behyiae, na wɔdze no kɔr hɔn asɛndzii, dɛ, 67Sɛ ɔwo nye Kraest no a, ka kyerɛ hɛn. Na ɔsee hɔn dɛ, Sɛ meka kyerɛ hom a, hom renngye nndzi; 68na mo so mibisa hom a, hom rummbua bi. 69Na daakye nyimpa Ba no bɛtsena Nyankopɔn n’ahoɔdzen nyimfa. 70Na hɔn nyina see dɛ, Nna kyerɛ dɛ, ɔwo nye Nyankopɔn Ba no a? Na ɔsee hɔn dɛ, Hom na hom ka dɛ emi nye no. 71Na wɔsee dɛ, Ebɛn dase na ohia ma hɛn bio? Osiandɛ hɛnankasa yɛatse wɔ n’anomu.
Mfantse Bible © Bible Society of Ghana, 2011.
