Ndwuma 2
2
Pentekost Da No
1 #
Lev 23.15-21; Deut 16.9-11 Ber a Pentekost da no durii no, nna hɔn nyina ehyia fakor. 2Na awerɛfir mu ara na dede a ɔtse dɛ mframa a n’ano yɛ dzen a ɔrobɔ fi sor bae, na ɔbɛhyɛɛ dan no a wɔtse mu no nyina ma. 3Na ntɛkyerɛma a wɔapaapaa mu a ɔtse dɛ gya yiyii hɔnho kyerɛɛ hɔn, na wobesisii hɔn etsifi nkorkor. 4Na Sunsum Krɔnkrɔn bɛhyɛɛ hɔn nyina amaama, na wɔhyɛɛ ase kasaa kasa fofor dɛ mbrɛ Sunsum no dze maa hɔn dɛ wɔnka.
5Nna Jewfo bi, nyimpa nyamesurofo a wofi amanaman a wɔwɔ wiadze nyinara tse Jerusalɛm. 6Na wɔtsee dza ɔrokɔ do no, nyimpadodow bae behyiae, na hɔnho boow hɔn kɛsenara dɛ obiara tse dɛ wɔreka no kurow mu kasa. 7Na ɔyɛɛ hɔn nyina ahobow, nye nwanwa, na wɔsesee dɛ, Ana hɔn a wɔrekasa yi nyina nnyɛ Galiliifo bi a? 8Na ɔyɛ dɛn na hɛn nyina yɛretse hɛnankasa hɛn kasaa a wɔwoo hɛn wɔ mu yi? 9Partiafo nye Mediafo nye Elamfo, nye hɔn a wɔtse Mesopotemia nye Judea nye Kapadosia, Pontus nye Asia, 10Frigyia nye Pamfilia, Egypt nye Libiya fa a ɔfa Sirene, nye ahɔho a wofi Rome, Jewfo nye hɔn a wɔadan Jewfo. 11Kreetefo nye Arabiafo, yɛtse dɛ wɔdze hɛn kasaa reka Nyankopɔn n’etumdze. 12Na ɔyɛɛ hɔn nyina ahobow, na hɔn tsirmu yɛɛ hɔn konsee, na wɔsesee hɔnho nkorkor dɛ, Iyi ase nye dɛn? 13Na binom sii atwetwe see dɛ, Nsa fofor abow hɔn.
Peter N’asɛnka wɔ Pentekost Da no
14Na Peter nye dubiako no soɛree gyinae, na ɔmaa ne ndze do see hɔn dɛ, Judea mbarimba, nye hom a hom tse Jerusalɛm nyina, hom nhyɛ iyi nsew, na hom ntsie m’asɛm a mereka yi wɔ aso pa mu. 15Woyinom mmbobowee, dɛ mbrɛ hom susu yi, osiandɛ adzekyee mu anapa ndɔnkron nye yi; 16na iyi nye dza nkɔnhyɛnyi Joel kae no:
17Nyankopɔn se, Ɔbɛba dɛ nda a odzi ekyir no mu no,
Mubohue mo Sunsum egu honam nyina do:
Na hom mbabanyin nye hom mbabaa bɛhyɛ nkɔm,
Na hom mberantsɛ bohu enyido adzehu,
Na hom nkɔdaa bɔsoso adaa:
18Na mpo mo nkowaa nye mo mfonabaa so do,
na nda no mu mubohue mo Sunsum egu
na wɔbɛhyɛ nkɔm.
19Na mebɛma anwanwadze aba wienyi wɔ sor,
Nye nsɛnkyerɛdze wɔ asaase yi do ase;
Bɔgya nye gya nye wusiw kumbɔɔ;
20Ewia bɛdan sum,
Na bosoom adan bɔgya,
Ansaana Ewuradze n’enyimnyam da kɛse no aba.
21Na ɔbɛba dɛ obiara a ɔbɔbɔ Ewuradze ne dzin no, wɔbɛgye no nkwa.
22Israel mbarimba, hom ntsie nsɛm yi: Jesus Nazarɛtnyi no, ɔbarimba a Nyankopɔn dze tum ndwuma nye anwanwadze nye nsɛnkyerɛdze a ɔnam no do yɛe wɔ hom mu yii no kyerɛɛ hom, dɛ mbrɛ homankasa so hom nyim no. 23#Mat 27.35; Mar 15.24; Luk 23.33; Joh 19.18 Ɔno na, dɛ mbrɛ Nyankopɔn ahyehyɛ ato hɔ na onyim dada no, dze no maa hom, na hom faa no, na hom nam hɔn a wɔnnka mbra nsa do bɔɔ no mbeamudua mu kum no no. 24#Mat 28.5, 6; Mar 16.6; Luk 24.5 Ɔno na Nyankopɔn nyaan no, ɔasan owuyaw no, osiandɛ ɔnnkɛyɛ yie dɛ owu botum aka no ahyɛ. 25#Dwom 16.8-11 Na David ka wɔ no ho dɛ,
Muhun Ewuradze wɔ m’enyim daa,
Osiandɛ ɔwɔ me nsa nyimfa, amma meennhihim:
26Dɛm ntsi m’akoma tɔɔ me yamu, na me tɛkyerɛma dzii dɛw,
Na mo honam so bɔhom enyidado mu;
27Osiandɛ irinngyaa me kra wɔ samanadze,
eso eremma wo Krɔnkrɔnnyi no nhu mprɔwee.
28Akyerɛ me nkwa akwan no:
Edze w’enyim bɛma enyigye amee me.
29Enuanom, mowɔ ho kwan dɛ meka egyapanyin David ho asɛm kofee kyerɛ hom, dɛ oewu na woesie no, na ne nda wɔ hɛn nkyɛn ha dze bodu ndɛ. 30Na dɛ ɔyɛ nkɔnhyɛnyi na onyim dɛ Nyankopɔn aka ntam akyerɛ no dɛ n’asefo mu bi na ɔbɛma ɔatsena n’ahengua do ntsi, 31ohunii siei, na ɔkaa Kraest no wunyan ho asɛm dɛ oenngyaa ne kra wɔ samanadze, eso no honam ennhu mprɔwee. 32Jesus yi na Nyankopɔn nyaan no, na hɛn nyina yɛ ho adasefo. 33Na afei wɔdze Nyankopɔn abanyimfa maa no do no, na onyaa Egya no hɔ Sunsum Krɔnkrɔn no anohoba no ntsi na oehue dza hom ruhu na hom retse yi egu. 34#Dwom 110.1 Na David ammfow sor, naaso ɔnoara ka dɛ,
Ewuradze see mo wura dɛ,
Tsena m’abanyimfa,
35Kodu dɛ medze w’atamfo bɛyɛ w’ananadzegua.
36Dɛm ntsi, wɔmma Israel fie nyina nhu ampa dɛ Jesus yi a hom bɔɔ no mbeamudua mu no, ɔno na Nyankopɔn ayɛ no Ewuradze nye Kraest.
Akadofo Afofor bi so
37Na wɔtsee nsɛm no hɔn akoma mu wowɔɔ hɔn, na wɔsee Peter nye asomafo nkaa no dɛ, Enuanom, yɛnyɛ dɛn? 38Na Peter see hɔn dɛ, Hom nnu homho, na wonnuma hom nyina wɔ Jesus Kraest ne dzin mu nkɔ bɔnfakyɛ mu, na hom benya Sunsum Krɔnkrɔn no akyɛdze no. 39Osiandɛ anohoba no yɛ hom nye hom mba nye hɔn a wɔwɔ ekyirekyir a Ewuradze hɛn Nyankopɔn bɛfrɛ hɔn aba ne nkyɛn nyina dze. 40Na ɔdze nsɛm pii kaa ho gyee dase kyerɛɛ hɔn, na otuu hɔn fo dɛ, Hom ngye homho mfi mbasantsen a hɔn bra akyewakyew yi ho. 41Na hɔn a wɔgyee n’asɛm no, wonumaa hɔn, na da no ara akra bɛyɛ mpensa bɛkaa hɔn ho. 42Na wɔkɔr do suoo asomafo no hɔn nkyerɛkyerɛ nye hɔn fɛkuwbɔ, nye paanoo bubu no nye mpaabɔ mu.
Agyedzifo no Hɔn Asetsena
43Na asomafo no yɛɛ anwanwadze nye nsɛnkyerɛdze pii, na hu kaa nyimpa nyina. 44#Ndwu 4.32-35 Na hɔn a wɔgyee dzii nyina boaa ano na wɔyɛɛ hɔn adze nyina dɛ kwasafodze; 45na wɔtɔɔn hɔn ahodze nye hɔn ndzɛmba, na wɔkyɛe maa hɔn nyina, dɛ mbrɛ obiara n’ehiadze tse. 46Na daa daa wɔkɔr do dze anokor bɔɔ mu hyiae wɔ asɔrfi no mu, na wohyiaa efiefi bubuu paanoo, na wɔdze ahosɛpɛw nye komakor dzii hɔn edziban. 47Woyii Nyankopɔn ayɛw na wonyaa enyimpa wɔ ɔman no nyina enyim. Na Ewuradze dze hɔn a wɔregye hɔn nkwa no kaa hɔn ho daa daa.
Mfantse Bible © Bible Society of Ghana, 2011.
