Luke 24
24
Jesus no Wusoɛr
(Matthew 28.1-10; Mark 16.1-8; John 20.1-10)
1Na da a odzi dapɛn no kan no, anapaatu no na mbaa no dze nduhuam a wosiesiei no kɔr nda no do. 2Na wokohun ɔbo no dɛ woepirew no efi nda no abowano. 3Na wɔhɛɛn mu no, woennhu Ewuradze Jesus no fun. 4Na ɔbaa dɛ iyi yɛɛ hɔn adwen mu basabasa no, hwɛ, mbarimba beenu begyinaa hɔn nkyɛn a wɔhyɛ ntar hyɛnhyɛn; 5na hu kaa hɔn, na wɔbɔɔ hɔn enyi adze sensɛɛn famu no, wɔsee hɔn dɛ, Ɔyɛ dɛn na hom rohwehwɛ nyia ɔtse ase no wɔ ewufo mu yi? 6#Mat 16.21; 17.22, 23; 20.18, 19; Mar 8.31; 9.31; 10.33, 34; Luk 9.22; 18.31-33 Onnyi ha, na ɔasoɛr: hom nkaa mbrɛ ɔda ho wɔ Galilii no, ɔkaa kyerɛɛ hom dɛ 7ɔsɛ nyimpa Ba no dɛ wobeyi no ahyɛ ndzebɔnyɛfo nsa na wɔabɔ no mbeamudua mu na da a otsia ebiasa no ɔasoɛr bio no. 8Na wɔkaa ne nsɛm no, 9na wofii nda no do sanee bɛkaa ndzɛmba yi nyina kyerɛɛ dubiako no, nye nkaa no nyina. 10Mary Magdalene nye Joana nye James ne na Mary, nye mbaa nkaa a wɔka hɔn ho no na wɔbɛkaa nsɛm yinom kyerɛɛ asomafo no. 11Na nsɛm yi yɛɛ hɔn dɛ nsɛnhun, na wɔanngye hɔn enndzi. 12Na Peter dze, ɔsoɛree tutuu mbirika kɔr nda no do, na ɔbɔɔ no mu adze no, ohun dɛ ndwera atam no nko gugu hɔ; na ɔsanee kɔr ne fie, na dza esi no yɛɛ no nwanwa.#24.12 Tsetse akyerɛwfo binom mmfa nkyekyɛmu 12 yi nnka ho.
Dza Osii Emmaus Kwan do
(Mark 16.12, 13)
13Na hwɛ, da no ara, hɔn mu beenu sii mu kɔr ekuroba bi a ne dzin dze Emmaus a ofi Jerusalɛm kɔ hɔ bɛyɛ akwansimba eduosia mu. 14Nna woridzi nsɛm a aba yi nyina ho nkɔmbɔ. 15Na ɔbaa dɛ, woridzi nkɔmbɔ na woribisabisa hɔnho nsɛm no, Jesus nankasa twee bɛɛn hɔn nye hɔn siaan anan kɔree. 16Naaso wosuoo hɔn enyiwa mu, ma woennhu ne nyimpa ban. 17Na obisaa hɔn dɛ, Ebɛn nsɛm nye yi a hom dze ridzi nkɔmbɔ nam yi? Na wogyinae a hɔn werɛ ahow. 18Na hɔn mu baako a ne dzin dze Kleopas see no dɛ, Ana ɔwo nko na eyɛ hɔho wɔ Jerusalɛm, ma innyim dza ɔaba nda yi mu yi? 19Na obisaa hɔn dɛ, Ebɛnadze a? Na wɔsee no dɛ, Dza ɔfa Jesus Nazarɛtnyi a ɔyɛ nkɔnhyɛnyi tumfo wɔ ndzeyɛɛ nye kasa mu wɔ Nyankopɔn nye ɔman nyina enyim no ho: 20mbrɛ asɔfompanyin nye hɛn mpanyimfo no yii no maa dɛ wombu no fɔ nku no, na wɔbɔɔ no mbeamudua mu. 21Na hɛn dze, hɛn enyi daa kwan dɛ nkyɛ ɔno nye nyia ɔrebɛgye Israel. Na iyi nyina ekyir so, wɔyɛɛ ndzɛmba yi ndaansa nye ndɛ. 22Na mbaa bi so a wofi hɛn mu a wɔkɔr nda no do anapahema abɛma hɛn ho abow hɛn; 23wɔbae bɛkaa dɛ woennhu no fun no, mbom woehu abɔfo bi wɔ enyido adzehu mu so a wɔkaa dɛ ɔtse ase. 24Na hɔn a wɔnye hɛn wɔ hɔ binom kɔr nda no do, na wokohun dɛ mbrɛ mbaa no so kae no ara, naaso ɔno dze, woennhu no. 25Na ɔnoara see hɔn dɛ, Ao hom a hom adwen mu nndɔ na hom yɛ nyaa wɔ hom akoma mu dɛ hom bɛgye dza nkɔnhyɛfo no kae no nyina edzi! 26Ana ɔnnsɛ Kraest no dɛ obohu dɛm amandze na ɔakɔ n’enyimnyam mu? 27Na ɔhyɛɛ ase fi Moses nye nkɔnhyɛfo no nyina do kyerɛɛ hɔn nkyerɛw nyina mu dza ɔfa no ho no ase. 28Na wɔbɛɛn ekuroba a wɔrokɔ mu no, nna ɔyɛɛ dɛ dza ɔrokɔ n’enyim. 29Na wɔhyɛɛ no dɛ, Nye hɛn ntsena, na orudu ewimbir, na adze reyɛ asa. Na ɔmanee dɛ ɔnye hɔn bɛtsena. 30Na ɔbaa dɛ ɔnye hɔn tse edzidzii no, ɔfaa paanoo, na ohyiraa do, na obubui maa hɔn. 31Na hɔn enyiwa buei ma wohun no, na ɔyeew hɔn enyiwa do. 32Na wɔsesee hɔnho dɛ, Ɔnye hɛn rekasa wɔ kwan mu, na obuee kyerɛwnsɛm no mu kyerɛɛ hɛn no, aso hɛn akoma anndzɛw hɛn mu dɛɛdɛɛw? 33Na wɔsoɛɛr dɔn no ara mu sanee baa Jerusalɛm, na wobohun dubiako no nye hɔn a wɔka hɔn ho no dɛ wɔaboa hɔn ano, 34na wɔreka dɛ, Ewuradze asoɛr ampa, na oeyi noho akyerɛ Simon. 35Na hɔn so wɔkaa dza ɔbaa kwan no mu, na mbrɛ wohun no wɔ paanoo bu mu no kyerɛɛ hɔn.
Jesus Yi Noho Kyerɛ Esuafo no
(Matthew 28.16-20; Mark 16.14-18; John 20.19-23; Ndwuma 1.6-8)
36Na wɔrekasa dɛm no, Jesus nankasa begyinaa hɔn finimfin, na ɔsee hɔn dɛ, Asomdwee nka hom. 37Na wɔbobɔɔ piriw na hu kaa hɔn, na wosusuu dɛ woehu ɔsaman. 38Na ɔsee hɔn dɛ, Ɔyɛ dɛn na hom akoma etutu yi? Na ebɛnadze ntsi na adwendwen soɛrsoɛr hom akoma mu yi? 39Hom nhwɛ me nsa nye me nan dɛ emi mankasa a: hom nka me nhwɛ; na ɔsaman nnyi honam nye mbiew dɛ mbrɛ hom hu dɛ mowɔ yi. 40Na ɔsee dɛm no, ɔdze ne nsa nye ne nan kyerɛɛ hɔn. 41Nna wɔda ho nngye nndzi wɔ dɛw ntsi, na ɔyɛ hɔn nwanwa no, ɔsee hɔn dɛ, Ana hom wɔ edziban bi wɔ ha? 42Na wɔmaa no esunam a wɔatoto sin. 43Na ɔgyee na odzii wɔ hɔn enyim.
44Na ɔsee hɔn dɛ, Iyi nye me nsɛm a meda ho wɔ hom nkyɛn no mekaa kyerɛɛ hom dɛ ɔsɛ dɛ dza wɔakyerɛw no wɔ mo ho wɔ Moses mbra, nye nkɔnhyɛfo, nye ndwom no mu nyina bɛba mu. 45Nna obuee hɔn adwen mu, ama wɔaatse kyerɛwnsɛm no ase; 46na ɔsee hɔn dɛ, Dɛmara na wɔakyerɛw no, dɛ Kraest no bohu amandze na da a otsia ebiasa no ɔasoɛr efi ewufo mu; 47na woedua ne dzin do akɛka nnuho nye bɔnfakyɛ akyerɛ amanaman nyina, wobefitsi ase wɔ Jerusalɛm. 48Hom yɛ yinom ho adasefo. 49#Ndwu 1.4 Na hwɛ, morosoma m’Egya n’anohoba maba hom do: na hom ntsena kurow no mu nkodu dɛ wobefi sor abrɛ hom ahoɔdzen.
Wɔfa Jesus Kɔ Sor
(Mark 16.19, 20; Ndwuma 1.9-11)
50 #
Ndwu 1.9-11
Na ɔdze hɔn fiir edzi kodur Bɛtani tsentsendo, na ɔmaa ne nsa do hyiraa hɔn. 51Na ɔbaa dɛ, orihyira hɔn no, ɔnye hɔn paapaa mu na wɔfaa no kɔr sor. 52Na hɔn dze, wɔkotowee sɔɔr no, na wɔdze dɛw kɛse sanee baa Jerusalɛm; 53na wɔtsenaa asɔrfi mu hɔ daa yii Nyankopɔn ayɛw.
Mfantse Bible © Bible Society of Ghana, 2011.
