LUKAT 24
24
Yetut eenik a'nuk, mi'nagagerak wone
(Mat 28:1-10, Mrk 16:1-8, Ya 20:1-10)
1Ko'lu tamban eekwi Hari Minggu nogo paga o kuubondendok it kumi nen amburu pipuk eerogo pereegwaarak nogo wonok ndoome nogome aret nogogwaarak. 2Nogo nogogwaarik, yugum tu narak nogo pelenogo nappereegerak kwaakkogo nogogwaarik, 3unggwi nogogwaarak kwe, ninogoba endagembogut eebe logonak nogo inigen koolik. 4Eebe lek mbareegi, ”Yi nonggop aga ubi?” mbakwi iigak, aap mbere inambogoyum abinakwi ndagalam aago yirik inowagam mi'nari wogwe iyareegwaarak. 5Iigo nogogwaarik, inagabiti ambik aganake logonet, inuut nggween paga wu'nogwe iigak, it aap nogo nen kumi nogo yorogo logonet, ”Kit nonggop nduk, at eenik menggerak nogo it kambeegwaarak inom wonage kero, kwaako ogotik o? 6-7Eebe yime lek o. At muk eenik a'nuk, mi'nagaarak o. At Nggalileya logonet, An aap aret nda'nagagirak nogo Ala kooneegerak paga nooruwak nduk, neebe pigogo it aap maluk mendek wogorage mbariminggi, eyo karo-karo paga nabenogo panugwi iinok, nogo mbere yinuk, neenik a'nuk mi'narigin o, yinuk, wone yokkiragagerak nogo abe'nip o.”
8Yorogo mbareegwa, at yereegerak nogo abereegwaarak. 9Abeko nogowaarik, ndoome nen iniyok paga wogo nogogwaarik, inigen kogogwaarak nogo abok aret it aap 11 inom, inoreewi inom nogo nogogwaarak nogo abok aret inom, mbininogo yorogogwaarak. 10It kumi nen aap Yetut leenogo piinok, nappiyareegerak mbininogo yorogogwaarak nogo ti, kwe Mariya awi Magaralena mendek inom, kwe Yokana inom, Yakobut agalo Mariya inom, it kumi alik inom, nen aret mbininogo yorogogwaarak. 11Yorogogwaarak kwe, ”Yi we ugun agan nogwe me,” nduk, inoone abet abu mbarulik. 12Inoone abet mbarulik kwe, Peterut perak, mi'na'nuk, puu'nuk ndoome nogome nage nagagirik, ena tebe yinuk, enegen mannage nagagirik, yum laambu nogo alik mban nggonenak kagagerak. Kage nagagirik, ”Yi nonggop agaarak iya!” yinuk, iniki koonit ame aret wagagerak.
O Emayut paga nogo logonet, eereegwaarak wone
13Ne ti paga lombok Yetut oone waganggwi mendek mbere o Yerutalem nen o endage Emayut nda 11 kilometer negen me nogo logonet, 14eeke kogogwaarak nogo abok aret mbininit nogogwaarak. 15Mbininggo logonet, wone nili-kili mbanit nogwe me, Yetut lombok inowagam nage nagagirik, inom aret nagagerak. 16Inom nogogwaarak kwe, at yelok kogwe iyo, inigen taberak negen eeppiyareegerak. 17Eeppiyareegerak kagak, at Yetut nen it yorage logonet, ”Kit nogo logonet, wone ngge mbanit nogo ogotik o?”
Yorage mbareegi, inabuwa warak inetenggen puk ogo nogogwaarik, 18it mbere nogo ambi endage Keleyopat nen, ”It aap nggiru yi awi ndi awi nen o Yerutalem unggwi wagaarak nogo yogondak iluk eekerak yi, apit ineenu kwe, kat kalik keenggo'lek me wage nagandik, yagan ya?”
19Yoge mbareegi, at Yetut nen, ”Nonggop agaarak me yogop o?”
Yorage mbareegi, it nen, ”Aap Yetut awi Nataret mendek nogo o. At Ala wone yorogo menggaarak nabi nogo mendek logonet, wone yorage nagaarak inom, eeke nagaarak inom, ti Ala kunduk, nit aakumi abok kunduk, mondok iya tit eerit nage kogo nogoorak o. 20Ndi, ti kwe, it aap Ala unde ninoweewi inom, nit Yakuri ninoweewi inom, nen wariyak lenggembunuk, eyo karo-karo paga nabenogo puwak nduk, wogoragaarak o. 21Nit aakumi Iterali mendek wondet agago pinani woroorak nogo at aret mbakoorak me, ao. Togop aret kwe, eeppegaarak kagak, yogondak nogo mbere yogoorak o. 22Ndi, ambi, it kumi nit ninagalomini nogo nen ninogut mappinanggaarak mban. 23It kumi nogo o kuubondendok ndoome nogome nogo nagaarik, at eebe warak lek kagaarak o. Eebe lek mbaki, wogo nagaarik, yo'nirogo logonet, Mbogut paga yonggo nugu menggaarak melaikat mendek nen, Lek o. At eenik wonage o, ninabinggaanggo negen yo'nirogwe iigoorak o, yinuk, nit yo'nira wagaarak o. 24Yo'nira wogo mbaka, it ando ninom wonagaarak nen ndoome pekka nogo nagaarik, kumi yo'niragaarak nogo ndak-ndak kagaarak kwe, at eebe perak, lek kagaarak o,” yinuk, Yetut mbininogo yoreegwaarak.
25Yogo mbareegwa, at Yetut nen, ”Kit wi kiniki yuundurak aret kiigi o. It aap Ala wone yorogo menggaarak nabi-nabi nen wone yokkirogo nogogwaarak nogo abok aret mbet-mbet abet mbarulik nonggop nduk? 26At Ala nen leenogo mippereegerak nogo aaninggin-paaninggin oba pegaarak yogotak nogo oba pega'lek kagak, at tiyappuurak mbakop? Lek o. Oba puurak agaarak me, pegaarak o,” yinuk, yorage nagagirik. 27Keritut wage kenok, eeri woroorak wone Muta liiru mbaneegerak nogo kuli nen it aap Ala wone yorogo nogogwaarak liiru mbaneegwaarak nogo abok aret amburu mbaniragagerak.
28Amburu mbanirage kagak, o tini noorak mbareegwam nogome wok yi nogogwaarak. Wok yi nogo nogogwaarik, at nok-nok naakit nduk, eereegerak mendek 29tebembunuk, yogo logonet, ”Oonegen abu kilu yi nagaarak o kiip age me, ninom aret logowok o,” yogo mbareegwa, inom logowok nduk, iname aret unggwi nagagerak. 30Unggwi nage nagagirik, inom mbi nawok nduk, kwi'na'nuk, mbi eenggime wappunuk, ”Nogoba wa,” yinuk, karerogo tumburiragagerak. 31Tumburirage mbareegi, ”Ie. Nogo yi aret kogo,” yinuk, at aret yelok kogogwaarak. At aret yelok kogo mbareegwa, inigen iigak, eenggi-iyo'lek aret lek agagerak. 32Eenggi-iyo'lek aret lek age mbareegi, imbirak wone mbanggo logonet, ”Wulaga! Wogo logonet, at wone yo'nirage, Ala wone liiru mbanak amburu mbannirage, eeke kagak, nit niniki eya ee'nabit unggwage kogoorak nogo lek a?” yinuk, yogogwaarak.
33-34Yogo nogogwaarik, ti eyom paga lombok mi'na'nuk, iniyok paga o Yerutalem wogo nogogwaarik, it aap 11 inom, aakumi ugun inom, kuwak eeppunuk, ”Ninogoba endagembogut abet aret eenik a'nuk, mi'nage nagaarik, eebe aap Timon nikka wagaarak o,” yinuk, mbininggwi me, iya wogogwaarak.
35Iya wogo nogogwaarik, tu nogo logonet, eereegwaarak inom, mbi karerogo tumburirage kagak at yelok kogogwaarak nogo inom, abok aret mbininirogogwaarak.
Yetut nen at oone waganggwi abok aret eebe nigiya wagagerak wone
(Mat 28:16-20, Mrk 16:14-18, Ya 20:19-23, Nap 1:6-8)
36Mbininirogwe me, Yetut lombok inenggela'me mi'nari unggwage logonet, ”Kiniki kwippinip o.”
37Yorage mbareegi, iniki ma'nage logonet, ”Yi kugi ilik?” yinuk, inagabiti ambik mbareegwaarak. 38Inagabiti ambik mbako mbareegwa, Yetut nen it yorage logonet, ”Kit nonggop nduk, kiniki piirik logonet, kiniki yungguppegak eeko ogotik? 39Kit an aret neyaamunggup nduk, neenggi-niyok yi pekkaanip o. An nengganggum-nowak warak neegotak pogom it kugi togop lek me, an pi'nako logonet, an neebe aret nomba'nip o.”
40Yorage nagagirik, eenggi-iyok nigiyareegerak. 41Nigiige mbareegi, iniki ale'nggen nen abet mbaka'lek logonet, ”Yi nonggop ubi! Iya!” yinuk, awo mbakwi iigak, it yorage logonet, ”Mbi ambi wonage ilik, lek a?” 42Yorage mbareegi, ikan larak ambi wogogo mbareegwa, 43waganogo it inigen iigak aret nenggegerak.
44Nengge nagagirik, yorage logonet, ”Ninom logonet, an eeriyak wone nogo aap Muta nen Ala wone lengganak liiru mbangge logonet, mbaneegerak nogo inom, it aap Ala wone yorogo nogogwaarak liiru mbaneegwaarak nabi-nabi nogo inom, mbuku Matimut paga liiru mbaneegwaarak nabi-nabi nogo inom, mbuku Matimut paga liiru mbanak nogo inom, abok aret a'me lik yigin o, yinuk, yokkiragagirak nogo yi aret eeppanggaarak o.”
45Yorage nagagirik, Ala wone liiru mbanak tena'me kaawak nduk, iniki eya eeppiyareegerak. 46Iniki eya eeppiige nagagirik, ”At Ala nen leenogo mippereegerak Mesias nogo aaninggin-paaninggin oba pugwi iinok, nogo mbere yinuk, kanggo menggam nen eenik age logominggirik, mi'narigin o. 47Ndi, ambi, Kit maluk eeko monggotak nogo kiniki koombunuk, kinomaluk mbo pugwi kiinok, Ala nen kinomaluk lek eerogo pinagagin o, yinuk, wone nogo at endage kumbunuk, iyaalok o Yerutalem nen yi awi ndi awi abok aret yoranet wundi nogo logogun o, yinuk, Ala wone liiru mbaneegwaarak nogo yi aret eeppanggaarak o. 48Eeke neegotak yi abok aret paganogo yoranet nugu logorak kit aret me, 49kinaruk logonip o. Nogoba nen wokkiroorak abok yokkiragagerak nogo, an nen aret kinoba wuppinagi woraagin o. Wuppinagi woraagin me, Ala omaawi agi nen kinoba mondok li'luk eeppinagi waga'lek kagak, o tini ambit yime logonu o,” yinuk, yoragagerak.
Yetut mbogut paga wonok laganeegerak wone
50Yorage nagagirik, wogoret o Mbetaniya korok-korok me nage nagagirik, eenggi nippege logonet, ale'nggen inoba piyareegerak. 51Ale'nggen inoba awo piige kagak, at eebe wonok mbogut paga lagangge kogogwaarak. 52Lagangge kogo nogogwaarik, Ala ayuk wuko logonet, inale'nggen ambik mbakak iniyok paga o Yerutalem wogogwaarak. 53Wogo nogogwaarik, Ala awi wurik me nogome mban logonet, Ala endage alut eeko nogogwaarak.
@LAI1994
