LUKAS 23
23
Mawu Yesus su těngon Pilatus
(Mat. 27:1-2, 11-14; Mrk. 15:1-5; Yoh. 18:28-38)
1Kal᷊awọ mẹ̌sasidang ene nahundarisị bọu ene nẹ̌bawa si Yesus pẹ̌těngon Pilatus. 2Sene i sire nanětạ e němpěngaduhang i Sie. I sire němpẹ̌bera, ”I kami nakahombang tau ini mạmal᷊idẹ̌ kawanua. I Sie mẹ̌sẹ̌sědingu taumata mědeạu abe pěmẹ̌maehẹ̌ balasteng su Kaisarẹ̌, batụu angkuěngʼE i Sie kai i Kristus, sěngkatau ratu.”
3Bọu ene i Pilatus nakiwal᷊o si Yesus, ”Kahěngang bue i Kau ratun tau Yahudi e?”
Yesus simimbahẹ̌, ”Mang kere niweranu e.”
4Tangu i Pilatus e nẹ̌berạ e su manga imang těmbonange ringangu su taumata l᷊awọ ene. ”Iạ e tawe nakahombang sěmbaụ sal᷊a su tau ini kụ makapěhukung i Sie.”
5Arawe i sire saunengkewe lai, ”Měmpẹ̌nẹ̌nahosọu ual᷊ingu těntironʼE i Sie mapẹ̌gẹ̌ganohạ u taumata su kaguwạu Yudea; nitětạ e wọu Galilea kụ tempo ini seng nahumpạ l᷊ai sini.”
Mawu Yesus su těngon Herodes
6Sarạeng i Pilatus nakaringihẹ̌ ene, i sie nakiwal᷊o, ”Apa tau ini, tau Galilea? 7Sarạeng nipaul᷊ikang u Yesus kai wọu tampạ su al᷊ungu kawasang Herodes, i Pilatus něndolohʼi Yesus sarang anung Herodes, kụ tempo ene mal᷊aing ene su Yerusalem. 8I Herodes měngkatewe mal᷊uasẹ̌ tạ sihinge sarạeng nakasilo si Yesus, ual᷊ingu seng marěngụ i sie makạdingihẹ̌ kakakoạ i Yesus kụ měngkate mẹ̌měnningu makasilo si Yesus. I sie mělẹ̌harapẹ̌ u reng makasilo si Yesus makapẹ̌koạ tanda makạl᷊aherang. 9Ual᷊ingu ene i Herodes nangantagu kakiwal᷊o lawọ si Sie, kaiso i Yesus tawe simimbahẹ̌ sarang sěngkamohong. 10Manga imang těmbonange ringangu manga mananěntiro agama mal᷊aing timatěngo sene kụ měngkate měmpạngěnsilʼi Yesus marasai. 11I Herodes dingangu manga sordadone e měmpẹ̌tẹ̌taghunalang dingangu měmpẹ̌lẹ̌hinakang si Yesus, mase mạpěluhen Sie pakeangu kawawantugẹ̌ bọu e rumolohʼi Sie pẹ̌bal᷊i sarang anum Pilatus. 12Su sahěllo ene lai i Herodes dingangi Pilatus, nạung kawe sědụ ute ini e sembeng saụ nẹ̌dal᷊ahapị.”
Mawu Yesus kinahinoěngu hukumang papate
(Mat. 27:15-26; Mrk. 15:6-15; Yoh. 18:39–19:16)
13I Pilatus něngomol᷊en manga imang těmbonange, manga pangahạ, dingangu kawanua, 14mase nẹ̌bera si sire, ”I kamene nẹ̌bawa tau ini sarang anuku kụ měbẹ̌bera u i Sie makạpal᷊idẹ̌ taumata. Kụ ini su těngong kamene iạ e seng namarikẹ̌sa si Sie kai iạ tawe nakạěbạ kakanoạ e ral᷊akị sarang sěmbaụ kere ilẹ̌ěnsilʼi kamene si Sie. 15Kerene lai ěbạ i Herodes, batụu i sie lai seng něndolohʼi Yesus e ipẹ̌sẹ̌sul᷊e su anung kami. Tau ini tawe nẹ̌koạ manga apa sarang sěnsul᷊e kụ hinong hukunangu papate. 16Ual᷊ingu ene iạ měnggeserẹ̌ si Sie bọu ene takụ ipělọ.”
[ 17Apan tempong sal᷊imbangu Paskah, i Pilatus harusẹ̌ maměllọ u sěngkatau wọu taumatan tahungkụ baugu kawanua.] 18Kěbị taumata kụ mạkakomol᷊ẹ̌ sene sěngkapẹ̌bansagẹ̌, ”Patẹ e i Sie! Pěllọ e i Barabas baugʼi kami!” (19I Barabas nitahungkụ ual᷊ingu něnggohaeng sutal᷊oaran soa ringangu ual᷊ingu namate.)
20I Pilatus mapulu měměllọ i Yesus ual᷊ingu ene i sie saụ mẹ̌bisara kapia sutal᷊oaran taumata l᷊awọ e. 21Kai i sire němpẹ̌bansagẹ̌ u, ”Kuruise i Sie! Kuruise i Sie!”
22Bọu ene saụ katěllun sul᷊ene i Pilatus nẹ̌bera si sire, ”Kai apa pẹ̌sasal᷊anʼE? Iạ tawe nakaěbạ sal᷊a sarang sěmbaụ si Sie kụ hinong ihukungu hukumang papate! Iạ e měnggeserẹ̌ si Sie mase takụ ipěllọ.”
23Kai i sire měngkate měbẹ̌bansagẹ̌ sěngapang ihạ i sire u i Yesus kai hinon pakikuruisẹ̌. Kụ samurine pẹ̌bawansagʼi sire timětal᷊ẹ̌. 24Tangu i Pilatus něnawong hukumangu papate si Yesus kerẹewe su kapulun taumata l᷊awọ ene, 25dingangu nělěsọ u taumata kụ dẹ̌dorongang i sire, mangal᷊ene tau kụ nitahungkụ ual᷊ingu pěnggaghohaeng dingangu pamamate. Bọu e i Yesus nisarakangke si sire balạewe koateng tuhụ kapulun sire.
Mawu Yesus nikuruisẹ̌
(Mat. 27:32-44; Mrk. 15:21-32; Yoh. 19:17-27)
26Ene i Yesus niwawạelain sire. Su tal᷊oaran dal᷊eng, i sire nẹ̌sombangu tau sěngkatau kụ arenge i Simon kụ asal᷊e wọu Kirene kụ seng kạsuẹ̌ e su soa. I sire nanamẹ si sie, mase nisihasang sěngapan botonge pamasaěng kalung kuruisẹ̌ niapatol᷊e si Yesus.
27Lawọ taumata nahuntol᷊e si Yesus – piạko l᷊ai kạdal᷊aụ manga wawine pirang katau. Manga wawine ene mạhunsangị dingangu mạhunggungguin Mawu Yesus. 28Arawe i Yesus nẹ̌bihu si sire ringangu nẹ̌bera, ”Manga wawinen Yerusalem! Abe pahunsangị u Iạ. Pahunsangịen batangeng dingangu manga anạ i kamene. 29U kai sarung duměnta tempone taumata e měmpẹ̌bera, ’Kariangkamang manga wawine wantọ e ringangu tawe němpẹ̌hanạ, dingangu tawe niapasusun manga rariọ!’ 30#Hos. 10:8; Pěl. 6:16 Su tempo ene taumata e sarung měmpẹ̌bera su manga wul᷊ude, ’Kaensạko si kami!’ Dingangu su manga wongkone, ’Pangambungko si kami!’ 31Kai kereu su kalu wẹ̌dang biahẹ̌, taumata seng měkẹ̌koạ kere ini ute, kereapa wue sarung pẹ̌kakoạ i sire su kalu mạhẹ̌gu!”
32Piạ lai ruang katau wal᷊ine – irẹ̌dua taha pẹ̌koạ dal᷊aị – kụ niwawan sire waugu pakikuruisẹ̌ dingang i Yesus. 33Sarạeng nahumpạ su tampạ kụ isẹ̌sěbạ ”Daran Těmbọ”, i sire nanguruisʼi Yesus dingang i rẹ̌dua tahapẹ̌gue ene – sěngkatau su sěmběka koaneng dingangu sěngkatau l᷊ai su sěmběkane kaihing Yesus. 34#Mzm. 22:19 Mase i Yesus nẹ̌kal᷊iomaneng, ”Amang ampunge wue i sire! U i sire wěga wue apa kẹ̌koateng i sire.”
Pakeang i Yesus pinẹ̌papahiạen sire sene ringangu lahurị.#23:34: Su ral᷊ungu winohẹ pira-pira tawẹ apa ayetẹ̌ 34. 35#Mzm. 22:8 Taumata l᷊awọ mạhundarisị sene měmpẹ̌bẹ̌biala manga pangahạ u tau Yahudi nẹ̌baheaun Yesus apidʼu nẹ̌bera u, ”I Sie makasal᷊amatẹ̌be taumata wal᷊ine; kěnangko ini i Sie pělěsọkon batangengʼE, kereu i Sie kahěngang-hěngang Datung Sal᷊amatẹ̌ kụ nipilen Mawu Ruata!”
36 #
Mzm. 69:22
Manga sordado l᷊ai nẹ̌baheaun Sie. I sire němpẹ̌haung dingangu němpanẹ̌gon anggorẹ̌ mahaesẹ̌ si Sie, 37apidu nẹ̌bera, ”Kereu i Kau ratun tau Yahudi, pělěsọkon batangengʼU!”
38Su wowong kalung kuruisʼu Mawu Yesus, mạbawohẹ bawera ini: ”Ini e Ratun Tau Yahudi.”
39Sěngkatau wọu tau tahapẹ̌gue mạgaghantong sene něhinakang Mawu Yesus. I sie nẹ̌bera, ”I Kau Ratun Sal᷊amatẹ̌ běgang? Ute pělěsọkon batangengʼU ringangu i kandua l᷊ai!”
40Arawe tahapẹ̌gue sěngkatau e wue nẹ̌bera su hapịe angkuěnge, ”Apa i kau tamatatakụ u Mawu Ruata e? I kau seng sěngkakahukungu papate kere i Sie. 41Kětạeng hukumang si kaduạ ute, někětạeweng kakanoạ i kaduạ. Kai i Sie mang tawẹ sal᷊ane!” 42Mase i sie nẹ̌bera, ”Mawu Yesus, tahěndunge wue iạ kereu i Kau seng duměnta kere sěngkatau Ratu!”
43”Pangimangke,” angkuěng i Yesus si sie, ”sahěllo ini i kau sarung dingang-Ku su Firdaus.”
Kapapohong u Mawu Yesus
(Mat. 27:45-56; Mrk. 15:33-41; Yoh. 19:28-30)
44Mangạe pukul᷊ẹ̌ mapul᷊o dua ěllo rangẹ matangěllo tawe siměnnang dingangu kạguwạu wanua ene měngkate marěndung-děndung sarang pukul᷊ẹ̌ tatěllu wawěllo. 45#Sas. 26:31-33 Gordeng mạgaghantong su ral᷊ungu Wal᷊em Mawu e natingkasẹ̌ napahiạ darua. 46#Mzm. 31:6 Mase Mawu Yesus něluntingihu tingihʼE maihạ, ”Amang! Su ral᷊ungu l᷊imanʼU Iạ manarakangu watangeng-Ku!” Bọuten něhengetang kerene, i Sie napohong.
47Sarạeng těmbonangu sordado e nakasilọe apan seng nariadi, i sie mědẹ̌dalo Mawu Ruata mase i sie nẹ̌bera, ”Kahěngang i Sie Taumata tạ sal᷊ane!”
48Taumata l᷊awọ kụ narěnta sene kụ měmpẹ̌biala, nakasilọe apa nariadi. I sire napul᷊ẹ dingangu naung napenẹ u pẹ̌sasasěsilẹ̌. 49#Luk. 8:2-3 Dingangu kěbị kanarang i Yesus laụ e manga wawine kụ nahuntol᷊e si Sie wọu Galilea, mạhundarisị bọu maraune kụ nakasilo kěbị ene.
Pěngangubul᷊ẹ̌ si Yesus
(Mat. 27:57-61; Mrk. 15:42-47; Yoh. 19:38-42)
50-51Piạ sěngkatau arenge i Yusup kụ asal᷊e wọu soang Arimatea su wanuan Yudea. I sie sěngkatau mapia kụ lẹ̌adatengu taumata kụ mal᷊aing kạpangampal᷊e tempone Mawu Ruata manětạ mẹ̌parenta kere sěngkatau Ratu. Maning i sie kai anggotang Měnggaghuta, i sie tawe sěngkanaung su putusang dingangu kakanoạ i sire ene. 52I Yusup e tamai nẹ̌těngon Pilatus kụ měgẹ̌gausẹ̌ tadeạu wadangu Mawu Yesus e pakigěllị si sie. 53Bọu ene i sie nangal᷊ạ badangu Mawu Yesus bọu kalu kuruisẹ̌, mase nipikungu hekạ sapụ bọu hekạ al᷊usẹ̌. Kutẹu nipěllọete su ral᷊ungu kubul᷊ẹ̌ kụ nikakoạ su ral᷊ungu watu hanibẹ̌ – kubul᷊ẹ̌ ene bẹ̌daweng ta nịpapakẹ. 54Ěllo ene ěllon sambaiang; dingangu seng maraning pěnanětạu ěllon Sabatẹ̌.
55Manga wawine kụ němpẹ̌tol᷊e si Yesus bọu Galilea e timol᷊e lai si Yusup kụ nakasilọe kubul᷊ẹ̌ ene. I sire nakasilo lai kereapa wadangu Mawu Yesus nipěllọ su ral᷊ungu kubul᷊ẹ̌. 56#Sas. 20:10; Pang. 5:14 Bọu ene i sire něngkapul᷊ẹ mase němpanạdia manga rampa ringangu l᷊ana mawěngi baugu mělanisẹ̌ badang i Yesus.
Su ěllon Sabatẹ̌, i sire tawe něhal᷊ẹ̌ baugu tụtuhụ tita su ral᷊ungu pangangagama.
@ LAI 2003
