YOHANES 3
3
Mawu Yesus dingangu i Nikodemus
1Piạ sěngkatau těmbonangu agama wọu ghal᷊ipohong tau Farisi kụ arenge i Nikodemus. 2Piạ sěhěbi i sie riměnta su anum Mawu Yesus dingangu nẹ̌bera, ”Tuang Guru, i kami masingkạu i Tuang kai nirolohʼu Ruata. Batụu kai tawẹu sarang sěngkatau makakoạ hal᷊ẹ̌ makạdal᷊inaụ kere kẹ̌koateng i Tuang, kereu Mawu Ruata tawe ruměndingang i sie.”
3Mawu Yesus simimbang, ”Pangimangke, tawẹu sarang sěngkatau makoạ kawanuan Duata kereu i sie tawe ipěhanạ kapia.”#3:3: Kapia: arau wọu rasị.
4”Makoạbe kereapa taumata seng matěllang kụ saụ ipěhanạ kạpia?” angkuěng i Nikodemus su Mawu Yesus. ”Lahạu i sie saụbe makasuẹ̌ su ral᷊ungu gandongang i ninange mase ipẹ̌hanạ karuan sul᷊ene?”
5Mawu Yesus simimbang, ”Mambeng těngadẹ̌ bawera-Ku ini: Kereu taumata tawe ipěhanạ bọu akẹ dingangu wọu Rohkẹ̌ u Ruata e, taumata ene tawe masowa su kararatuangu Mawu. 6Taumata tuhụ gẹ̌si ute nipěhanạ u matimadẹ̌, arawe tuhụ marohkẹ̌ e ute kai nipěhanạ u Rohkẹ̌ u Ruata. 7Abe ral᷊inaụ u Iạ nẹ̌bera u: i kamene harusẹ̌ ipěhanạ kapia.#3:7: Kapia: arau wọu rasị. 8Anging tumiụ suapạeweng kapulune, i kitẹ e makaringihẹ̌ sal᷊induhunge: kai i kau wěga wue měnsang diměntawe wọu a ringangu měnsang makoạbe sol᷊ong a i sie. Kerene lai apan taumata kụ piněhanạ bọu Rohkẹ̌ u Ruata e.”
9”Kereapa ene mariadi?” angkuěng i Nikodemus.
10Mawu Yesus simimbang, ”I kau e mananěntiro su Israel; unụe i kau wẹ̌ga wue? 11Pangimangke: i kami mạulịu apang kasingkạ i kami, dingangu i kami e kětạbeng měsẹ̌sahiding apang seng kinasilong kami; kai i kamene tawe mapulu mangimang sasahiding kami. 12I kamene tawe mangimang kereu Iạ e mẹ̌běkeng kakakoạ u dunia ini; kereapa i kamene mangimang, kereu Iạ mẹ̌běkeng kakakoạ u sorga e si kamene? 13Tawẹu sarang sěngkatau nakạdangeng su sorga e samatang i Sie kụ seng nẹ̌těngkatěntung su dunia, kụ kai Ahusʼu Taumata e.
14Kerẹewe i Musa napakarangẹ u těmpu witụ su kalu sěmbua su wanua l᷊inggi e, kerene lai Ahusʼu Taumata e hinong iapakarange, #Pẹ̌t. 21:9 15tadeạu kěbị taumata e mangimang si Sie, makahombang pẹ̌bawiahẹ̌ tutune ringangu kakalẹ̌.”
16Ual᷊ingu Mawu Ruata kerenẹeng kakěndage su ral᷊ohon dunia e, hakịu i Sie něnarakangu AhusʼE mang sěmbaụ tadeạu apan taumata kụ mangimang si Sie tawe mawinasa, kaiso kawe makahombang pẹ̌bawiahẹ̌ kakalẹ̌. 17Batụu Mawu Ruata e něndolohʼu AhusʼE wal᷊inewe měhukungu dunia e kaiso kawe měngambang dunia e. 18Taumata kụ mangimang si Sie tawe ihukung. Arawe taumata kụ tawe mangimang ute seng nihukungu Mawu, puhinengu i sie tawe mangimang su Ahusʼu Ruata e mang sěmbaụ. 19I sie tẹ̌tuntukang ual᷊ingu hal᷊ẹ̌ ini: Tualagẹ̌ e seng diměnta su dunia, kai taumata e ěndọu kawe mapulung marěndunge sul᷊ungu tualagẹ̌, u kakanoạ i sire kai raral᷊akị. 20I sai-saiewen měkẹ̌koạ daral᷊akị, kai měbẹ̌binsịu tualagẹ̌; kụ tawe mapulu humaung su tualagẹ̌ e, mạdiring kakanoạ i sire raral᷊akisẹ̌ e ikasilo. 21Arawe i saing kawe tutuhụ kapulun Duata e ute lụhaung su tualagẹ̌ e mẹ̌deạu mal᷊ahẹ apan seng nikakoạe timuhụ kapulun Duata.
Mawu Yesus dingangi Yohanes Mangangurung
22Samurin ene Mawu Yesus dingangu manga muritʼE něngkakoạ sol᷊ong banuang Yudea. I Sie reng nẹ̌tanạ kadodọ tempo ringangi sire kụ něnahani. 23-24#Mat. 14:3; Mrk. 6:17; Luk. 3:19-20 Su tempo ene i Yohanes deng tawe nạtahungkụ. I sie něnahani su Ainon, masandigu Salim, batụu sene kai piạ mal᷊awọ akẹ. Taumata e měmpạhunděnta su anune, mase i sie měnẹ̌nahani si sire.
25Manga tumatol᷊e si Yohanes nanětạe němpẹ̌darendehẹ̌ dingangu tau Yahudi#3:25: Tau Yahudi: Binohẹ u nạung pira-pira měbẹ̌berau sěngkatau Yahudi. su hal᷊ẹ̌ u pamamurẹ̌si e. 26I sire nakoạ sol᷊ong anun Yohanes kụ nẹ̌bera, ”Guru, i Tuang bẹ̌dang makạtahěndung tau ringangi Tuang su sěmběkan Sal᷊ụ u Yordan ene, kụ itẹ̌těbọu si kami kạngerẹ? Orasẹ̌ ini i Sie mal᷊aing měnẹ̌nahani kụ kěbị taumata e rụděnta su anunʼE!”
27I Yohanes simimbang, ”Taumata e tawẹ pusakạe kereu tawe ghělirangu Mawu si sie. 28I kamene hala seng nakaringihẹ̌ si siạ nẹ̌bera, ’Iạ bal᷊inewe Ratu Měnanal᷊amatẹ̌. Iạ kai nirolohẹ̌ ipạngal᷊imona si Sie.’ #Yoh. 1:20 29Kaghiang bawine e kai tẹ̌taghuanengu kaghiang esẹ. Arawe hapịu kaghiang esẹ e kětạben měnananggelẹ̌ dingangu kapědẹ̌daringihe, kụ mal᷊uasẹ̌ naunge kereu makaringihẹ̌ tingihʼu kaghiang esẹ. Iạ mal᷊aing kerene. Kụ orasẹ̌ ini e ral᷊uasẹ̌ku e nasukụ kahěngang. 30Kai i Sie hinon kạkasěllahe, arawe iạ e kai hinong kạkạdodọ e.”
I Sie kụ seng diměnta wọu sorga
31I saing kụ bọu rasịe kai su wowong kěbị e. I saing kụ bọu dunia e kai nasowa taumatan dunia ringangu mạhumbisarang hal᷊ẹ̌ u mạdunia. I Sie e kụ darěntane wọu rasị e kai su wowong kěbị. 32I Sie měbẹ̌bisaran apang kụ seng kinasilonʼE ringangu kinaringihʼE, kaiso mang tawẹu sarang sěngkatau mangimang su apan sasahidinʼE. 33I sai mạngimang su sasahidinʼE ene ute, měngaku wue u Ruata e mambeng těngadẹ̌. 34Batụu taumata rarolohangu Mawu mělẹ̌habarẹ̌ manga baweran Duata, ual᷊ingu Rohkẹ̌ u Ruata seng nipal᷊oho si Sie masukụ. 35I Amange makěndagẹ̌ su AhusʼE, kụ seng něnarakangu kěbị kawasa si Sie. #Mat. 11:27; Luk. 10:22 36I saing kụ mangimang su Ahusẹ̌ ene sarung makahombang pẹ̌bawiahẹ̌ tutune ringangu kakalẹ̌. Arawe i saing kụ tawẹ satiane su Ahusẹ̌ ene e tawe makahombang pẹ̌bawiahẹ̌. I sie ihukungu Mawu sarang karěngụe.
@ LAI 2003
