ZABUR 21
21
Nyanyian syukur lantaran kemenangan raje
1Umaq pemimpin kor. Zabur Daud.
2Ya ALLAH, raje jari cemoh séngaq Deside neguqang ie;
ie besukecite lantaran kemenangan saq Deside icanin tipaq ie!
3Deside sampun ngicanin napi saq jari keméléq angenne,
dait ngicanin napi saq ie tunas.
4Deside rauh tipaq ie siq berkah saq belimpah,
dait masangang mahkote emas léq ulune.
5Ie nunas idup, dait Deside icanin ie
malahan umur saq bélo selaéq-laéqne.
6Lantaran pertulungan Deside ie jari tehormatin gati,
Deside jariang ie kesohor dait mulie.
7Deside icanin ie berkah jangke seterusne;
kehadiran Deside miaq ie penoq siq sukecite.
8Raje beharep léq ALLAH Saq Maheagung,
ie tetep aman séngaq tetep tekasihin siq ALLAH.
9Ie gen nenahen selapuq musuhne,
dait bau selapuq dengan saq meriq léq Ie.
10Ie rauh maraq api saq ngelaur
jari binaseang ie pade.
Ie pade gen temusnahang siq murke ALLAH,
dait siq api saq ngotongang.
11Léman keturunan ie pade ndéq araq saq masih,
raje gen binaseang ie pade selapuq.
12Lamun ie pade miaq rencane ngelawan raje,
tipu muslihat ie pade ndéq gen berhasil.
13Ie gen papahang panaq-Ne,
sehingge ie pade bebalik dait pelai.
14Kaji pade memuji Deside, ya ALLAH, séngaq kuase Deside beléq,
kaji pade benyanyi memuji keperkasean Deside.
LAI 2007